|
معقول في جنة و نار
مرحبا
في البداية يمكن موضوعي يثير جدل و يمكن في ناس راح تتدايق و انا بتأسف للإخوة المسلمين إذا كان موضوعي ممكن يجرح شعورهم بس بجد انا بدي أفهم و أقتنع هل يوجد عذاب و في جنة و نار ؟ أو بمعني آخر هل يوجد آخرة كل الأديان بتحكي إنو في آخرة بس أنا مش مقتنع يعني الواحد بعد ما يموت بده يعيش تاني فهموني يا عالم |
نفسي ساعدك و اعطيك الجواب الشافي بس في مشكله وحده بقى اني لسا ما جربت موت :? بس موت بشفلك الاوضاع و بردلك خبر .. :D |
طبعا طبعا طبعا
هلا انت ركز معي انت قلت انها موجودة في كل الاديان و هادا لحالو بكفي بس اذا برضو مش مقتنع اسمع هلا ربنا خلقنا للعبادة (قال سبحانه و تعالى: و ما خلقت الجن و الانس الا ليعبدون) خلقنا و انعم علينا بكل النعم و حطلنا قوانين و قواعد في الدنيا لازم نلتزم فيها زي الصلاة و الزكاةو الحجاب....... و بما انو انعم علينا و خلقنا علينا الالتزام بهاي القواعد عشان بعد ما نموت ربنا بعاود بعيشنا عشان يحاسبنا على عملنا بالدنيا اذا التزمنا بقواعد القران و لا لا و اللي عمل عمل صالح عالجنة و تبع العمل السيء عالنار و ما حدا بيعرف وين الجنة او النار لحالو ربنا بيعرف ان شالله تكون فهمت |
هلئ بدك تفهمني انو مالك مقتنع انو في جنة ونار والا بس حابب تعمل شوية مشاكل في اكتر موقع فيو طوائف دينية؟:jakoush:
|
اقتباس:
|
اقتباس:
هلأ إخوتي المسلمين بيقولوا انو ربنا محدد مصير الإنسان من يوم ما ينخلق يعني بيكون مكتوب وين يروح على الجنة او على النار معناها احنا مسرين مش مخيرين بمصيرنا اذا ربنا كاتب لكل واحد وين بده يكون ، معناها ليش عم يطلب منا عباده و صلاة و ....... |
كما قال عمر الخيام: الجنة و النار هما في اصل نفسك. يعني لما بتعمل شي غلط ضميرك بيأنبك او الناس بتحكي عليك و هادي النار, و لما ما بتعمل شي غلط و بتسيطر على اهواءك و غرائزك بيرتاح ضميرك و بتحترمك الناس و هادي هي الجنة... و كل الاديان قالت انو في جنة و نار لانو هادي هي الطريقة الوحيدة للسيطرة عل غرائز ناس بدائيين (من 2500 الى 1500 سنة و بنفس المنطقة من العالم), لاحظ انو في اديان اسيوية سطرت على غرائز اناس بطريقة تانية متل البوذية...
اريد التوسع في اكتب لكن وقتي ضيق... ارحب بالتعليقات الجدية فقط |
حبيبنا
اخي العزيز الامر سهل كتير وبدو بس شوية منطق
هلق نحنا متفقين على انو في الله مننطلق من هون هل من المعقول انو رب العالمين اللي بيتصف بالعدل متل ما عم تتفضل يساويني انا اللي مالي عامل شي بحايتي مع مجرم قاتل وسارق وناهب ... هل من المعقول انو رب عادل يترك واحد متل شارون او بوش او هتلر او او هيك بدون حساب او عقاب فكرة الجنة والنار هي من اكتر الفكر اللي الواحد بيتقبلها انطلاقا من عدل رب العالمين الموضوع الثاني اللي تفضلت فيه كمان بسيط كتير يا سيدي الكريم رب العالمين ماقدر علينا افعالنا ولكن علمها .. شلون يعني هلق بافتراض انت واخوك انت زلمة بيتوتي ما بتحب الطلعة والفوتة ولا بدخن ومالك صاحب عي اخوك شب طالع اول طلتو وبيحب يطلع على القهاوي ويدخن .... بافتراض ابوك عطا 100 ليرة لالك و100 ليرة لاخوك ابوك بيعرف انو انت حتصمد ال 100 ليرة او تشتري فيها شي مفيد وبيعرف انو اخوك حيصرف ال 100 على بسطوا منحسن نقول انو ابو جبرك على التصميد او جبر اخوك على الصرف لا ولكن بما انو بيعرف كيف بتفكروا عرف شو حتساوو مستقبلا وبما انو رب العالمين خلقنا وبيعرف شو داخليتنا وشو نفسيتنا في بيعرف شو حنساوي بالمستقبل بس ما اجبرنا عليه بتمنى اني كون فدتك بشي |
في جنة أو في نار
أنت عم تسأل منشان شو ؟
بدك تفهم يعني كمان ليش ؟ طيب إذ فهمت شو بصير يعني ؟ يعني بتصير مسلم ؟ ولا بتصير مسيحي ؟ واذا صرت هيك ولا هيك يعني شو بصير ؟ شوف حبيبي اذا فهمت بكون لنفسك واذا اقتنعت كمان بكون لنفسك والحالتين نحنا مو جايينا شي طريق الجامع والكنيسة معروف وطريق الكازينوهات معروف ويـــــــــــن مابدك روح درب الهوى مفتوح :clap: |
طول بالك يا معلم مو هيك بيكون النقاش
( وجادلهم بالتي هي احسن ) مو ضرورية العصبية |
في في ...
سالت انا قالولي في |
اقتباس:
حسون منشان الله غيرها لهل الصورة الرمزية تبعك عم بتجبلي وجع راس كل ماشفتها المسكين ما إرتخوا براغي عقلوا للخاروف من كتر الهز:o صحي شو في عندكن هون ....شو شايف جنة وما جنة ونار وما نار أخي مانك على أساس إنته إخترك إسم ناسك و الناسك هو على ما أعتقد واحد إيمانوا بالله أكبر من أي إنسان وهموا الوحيد بالدنيا إنوا يفوز بالجنة وبعدين مين قلك إني الدين الإسلامي بيقول إني ربنا كاتب أعمال الواحد ومعروفة نهايتوا إذا كان بدوا يروح على الجنة أو على النار......غلطان حبيبي ..لإني لو كان متل ماعمبيقوا إلك صحيح ,كان مافي داعي ليوم الحساب وكل واحد وقتها بيجي على الدنيا وبينتحر وبقول بعقلوا ...بالناقص وجع راس إذا كانت آخرتي معروفة حبيبي إنته مكتبلك إيمتى بدك تجي على الدنيا وشو هو جنسك ووين بدك تعيش إيمتى وكيف رح تموت ..بس عملك بالدنيا هو بيحدد شغلتين عمل بيحدد عيشتك بالدنيا وعمل بيحدد شو رح تكون آخرتك بالجنة أو بالنار يعني كمثال بسيط إنته اليوم إذا كنت عم تشتغل شغلة شريفة وماعم تتعامل مع الناس باللف و الدوران و الغش و الكذب... و الخيانة مو بطبعك بتشوف إني تجارتك ناجحة وشغلك ماشي تمام وإسمك متل الدهب والكل عاملك الف حساب وهادا الشي لو متت الكل بيذكروا لأولاد أولادك ولو كان العكس بتلاقي عيشتك صارت زفت وماعم يجيك نوم من عزاب الضمير يا أخ منك إنما الأعمال بالنيات ولكل إمرئ ما نوى ومن عمل مثقال ذرة خيراً يرى ومن عمل مثقال ذرة شراً يرى وفي متل بيقول عنا يلي بتطبخوا بالطنجرة......بتغرفوا بالمعلقة يعني يلي بتطبخ منوا بتاكل منوا ودمتم الحاج متولي :D:D:D |
أخر همي إن في جنة أو نار المهم شوف وجه ربي بس موت أن كان بالجنة أو بالنار
|
يعني بعد عن الأديان شوي .... واحسبها بمخك ... معقول تكون عامل العمايل بالدنيا ومايكون إلك عقاب؟؟ ومعقول تكون إنسان صالح وعلاقتك قوية وإنسانية مع العالم اللي حواليك ومايكون في جزاء او هديه ؟؟ يعني لو اجتمعوا كلون انو يقنعوك بوجود او عدم .... ما رح تصدق لحتى تفكر انت لحالك ومن منطلقك انت بس ...... وبس تقرر ... معناها انت وصلت للجواب اللي بدك ياه .... من وجهة نظري انا بعتقد بوجود جنه ونار متل ما كل الاديان بتقول ... :D |
اقتباس:
:D:D انا والله كنت داخلة قول هالكلام بس سبقتني:D وبعدين شو بنخسر يعني خلينا نعمل الي علينا ونبقى خيريين بالدنيا لو في جنة ونار صحيح خلينا نفوز بالجنة وإن لم يكن.... يبقى ما خسرنا شي والناس حبتنا من اعمالنا الحلوة:D |
يا جماعة و الله انا معكم
اوكي في جنة و في نار و في عقاب و في حساب بس اللي بدي افهمه الانسان مسير او مخير لانه لو مسير كان لشو الواحد يعمل و يصلي و يعبد مش هدا هو شو ربنا كاتبله ولو انه مخير ليش بيحكي انو الانسان معروف مصيره من قبل ما ينخلق يعني القصة فيها جدل و اختلفه عليها كتير في ناس قالوا انه الانسان مسير و ليس مخير وناس قالوا انو الانسان مخير و ليس مسير و ناس قالوا انه مخير و مسير يعني في غموض بالموضوع هلأ شو بدكم بالقصة هاي خلينا نسكرها احسن |
اقتباس:
يا خياااار ما عملت يا صديقي .. جهز نفسك حتى نجاهد فيه بإذنه تعالى بكرا عندك بالوزارة لنشوف شو قصتك :zen: |
اقتباس:
:lol: لك ابو شريك الشغلة مي بايدي .. الصورة الرمزية عندي عطلانة وكل مابدي اروح صورة رمزية مابتزبط ومع انو كلو مزبوط وكلشي بس في عطل من المنتدى ماعبخليا تزبط هيك عندي بالذات صار :frown: وساعدونا كتير ناس الله يكتر خيرن انو تنحل هالمشكلة عبس فالج ولا تعالج ماتصلح شي ونزلنا موضوع بالبريد مشان يحلولنا المشكلة قام بعد شهر ردو وقالولنا اي وهادا وش الضيف :pos: وهلأ صفيانين على هالصورة لوقت ماتتصلح المشكلة ;-) |
| الساعة بإيدك هلق يا سيدي 20:17 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون