|
انو
صباح/ مسا / ضهر الخير جميعا حسب محلاتكن ومطارحكن وحسب قعداتكن ونوماتكن وفيقاتكن
خيو نحنا اللف والدوران ما منحبو لهيك رح نفوت بالموضوع من النص (يعني ما في داعي تتعزبو وتقومو تعملو قهوة وتجيبو موالح وضيافة مو خرج والله هني كلمتين (بالاسم كلمتين هني بيطلع شي موضوع صفحتين ) جايين نحكيهن ورايحين ) طبعا الموضوع رح حاول اختصرو قدر المستطاع لانو اسا معي نص ساعة لقوم نام (الساعة وحدة ونص بالليل وبكرا الصبح عندي جامعة وعندي الفحص النهائي بالانكليزي وبعدها عندي شغل فلازم قوم نام) خيو القصة وما فيها ايام ما كنت بسوريا (الله يرحم ايام التحشيش ) كان بيتنا طابقين وكان تقريبا اعلى بيت بالضيعة يعني بتطلع على السطح بتشوف الضيعة كلياتها وبتشوف الضيعة الشرقية كمان (الضيعة الشرقية : هيي الضيعة اللي كانو عايشين فيها اهل المشرفة من شي عشرين سنة وبعدين انتقلو على الضيعة الجديدة لانو الضيعة الشرقية لقو تحتها قلعة اثرية وصار في بعثات عم تنقب ما علينا من كل هالحكي ) المهم كنت انا هيك كل ما داقت خلاقي اطلع على هالسطح اتفرج على هالضيعة بس كل مرة اطلع حس بنفس الشعور وقت اطلع على البيوت وكيف مرتبة حد بعضها انو ارجع اتزكر كيف كانت هالمنطقة على ايام "تابت" (تابت هوي الاقطاعي اللي كان مستلم الضيعة قبل ما تصير الانتفاضة وينتهي زمن الاقطاع ) هلأ انا ما كنت عايش ايام تابت بس بسمع الحكي انو كانت المنطقة شجر تين ولوز يعني شجر من كل الانواع وكانت طبيعتها حلوة هلا بعد ما انتقلت العالم على هالمنطقة اضطرو يقصو الشجر كلو مشان يعمرو بيوتن بس لما بتطلع على سطح بيتنا وبتتفرج على الضيعة انا متاكد انو نفس الشعور بدو ينتابك لانو طريقة ترتيب البيوت بتحسسك انو في فن يعني اكيد هيي انبنت بعشوائية بدون ما واحد يطلع بطيارة هلكوبتر بالجو ويقلن عمرو هالبيت هادا هون وهالبيت هادا هون بس البيوت ترتيبها بخليك تفكرة بروعة العمارة عند الانسان وانو كيف قادر يخلق ولو بشكل عشوائي شي جميل طبعا هالشي بيخليني فكر باشياء تانية .................................... هادا الجزء الاول يتبع بالجزء التاني بكرا قولو انشالله ملاحظة : ما يغركن المقطع الاول لانو فكرة الموضوع ما رح تجي لاخر رد اهلين بالشبيبة :D |
مابعرف ....يمكن :?
:D |
جاد وهاني .....صفناتكن شغلة ... :?...
|
اقتباس:
بكل الاحوال هاني ناطرين انو تتابع بالموضوع :D |
هلا أنا بعرف قصدك .. كاتب هل موضوع و اللف و الدوران كللو .. مشان تقللنا بيتكون أعلى بيت بالضيعة
|
اقتباس:
ضهر الخيرو لا اجر الخير |
ايه ناطرين لكن:?
|
اهلين هاني ...
بلكي تزودنا بصورة الضيعة من بيتكم حتى ينتابنا نفس الشعور! |
وساندريلا شو صار فيها ؟:?
|
دخيل رب الضيع كلون
أنا بس شوف هالمناطق الحلوة يعني مناطقنا مو بس بينتابني شعور حلو والله بحس انو الروح رجعتلي الله يحمي الضيع كلها وادي النصارة والمشتى والكفرون والمشرفة وكلون :D |
اقتباس:
|
اي هنهنات ..وبعدين؟؟؟؟ :shock::?
|
عمنستنا .. :frown:
|
لك معلم هاني من كتر ماقلت انو بيتكن اطول بيت بالضيعة يازلمة ليقوم شي حدا يدخل يصبلك بيتكن بالعين
وتصيبو شي طرطوشة شي صارو شي شغلة ويصير بدال اطول بيت بالضيعة يصير اكتر بيت مهدم بالضيعة (لاسمح الله) :lol::lol: يازلمة بشرفي شهيتني اشوف هالاطول بيت بالضيعة :p |
اي وبعدنا ناطرين
|
:?:?
ما فهمت شي:oops: |
تابع لما سبق ذكره في (فقيش )
خيو بعد ما كنت اطلع على هالسطح وشوف منظر الضيعة اللي بخليك تسرح كنت اسرح انا بافكار تانية كنت اسرح بالكمبيوتر خيو هلأ ما تجو تسالوني شو جاب هاي لهاي انا هالمنظر ما كان يزكرني غير بالكمبيوتر بجوز لانو دراستي بمجال الكمبيوتر بجوز لانو انا مهووس بالقعدة على الكمبيوتر بس هالمنظر وانو يصير شي من لا شي كان يزكرني بالكمبيوتر (اقصد بكلمة يصير شي من لا شي انو يصير منظر فني حلو من مجموعة بيوت متناثرة عشوائيا ) خيو انو قليلة هالكمبيوتر كم مكثفة على كم كبل على كم قطعة بلاستيك ومعدن عملولك كائن قدامك بيخليك تعمل اللي بدك يا وبيوفر عليك جهد ووقت خيرات الله بحيث انو انتي مثلا يصير عندك وقت فراغ تزيد في اختراعاتك المعباي الدنيا او مثلا ترسملك شي لوحة فنية تغلب فيها دافنشي او تالفلك شي كتاب تاخد علي جائزة نوبل للسلام بس يا هل ترى هل فكرت شي مرة كيف هالكمبيوتر عم يشتغل ؟ انو يبا هالكم قطعة بلاستيك اللي قدامي كيف عم تستجيب لحركاتي واوامري وتعمل اللي بدي يا (هلأ طبعا احيان كتير بيحرن هادا الماخود وما بقى بيستجيب لشي وبيعمل عكس ما بدك بس اذا فكرت فيها هاي كمان بتسحق التفكير ) انو خيو كيف انا بس اكبس حرف ال " ك " مثلا بيطلع قدامي على الشاشة " ك " انو عنجد يبا فكر فيها مجموعة مكثفات اذا كانت المكثفة مشحونة بتعني شي واذا كانت مو مشحونة بتعني شي مجموعة مكثفات مصفوفة حد بعضها ولنفترض ترتيبها بهالشكل مشحونة - غير مشحونة - غير مشحونة - مشحونة - مشحونة - مشحونة - مشحونة - غير مشحونة مشان نوفر عليكم شوي جهد وتركيز رح رمزهن متل ما رمزوهن العلماء 1 - 0 - 0- 1 - 1 - 1 -1 -0 (طبعا كلكن استنتجو انو مكثفة مشحونة بتعني 1 ومكثفة غير مشحونة بتعني 0) انو معقولة هالترتيب هادا الهن بيخلي المعنى تبعهن يختلف عن المكثفات اللي مرتبة بالشكل 1 - 1 -0 - 1 - 1- 1 - 1 - 1 طيب فكرو فيها انو هالانسان بشو فكر حتى قدر يتوصل لهالنتيجة ويصنع كمبيوتر ويخلي يمشي حسب نظرية معينة هيي مشحونة او غير مشحونة (طبعا هادا ما دخلنا بالتفاصيل المعقدة اسا ) انو خيو هات لنشوف انتي كم حركة بتعمل على الكمبيوتر انو معقولة كل حركة بتعني شي معين وبتظهر نتيجة معينة انو شو هالاختراع الذكي هاد او بالاصح شو هالانسان الاذكى اللي قدر يخلق شيء من لا شيء هلأ شو وصلنا لنتيجة لوحة فنية رائعة من مجموعة بيوت متناثرة انسان بناها واله عجيبة قادرة على كل شيء وتستجيب حسب الاوامر من مجموعة من القطع البلاستيكية والمعدنية وشوية كهربا انسان صنعها يعني شيء من لا شيء............................................... ......... يتبع.............................................. .............. |
انت شكلك رح تفوتني بالحيط
وانا اساسا هالشغلة ما عم تدخل مخي شغلة الاكترون يعني ناطر لشوف بركي بيطلع معي نتيجة وبستوعب |
| الساعة بإيدك هلق يا سيدي 20:14 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون