|
شو بتعمل اذا ....؟؟؟ - موضوع للنقاش -
مرحبا يا شبيبة :D
هاد اليوم كنّا عم ناخد مادة اسمها ethics ... ع اساس انو من هون لنتخرّج بيكون صار عنا كومايات منيحة منها وبنفيد المجتمع ..:lol: المهم مو هاد موضووعنا ... الموضوع هو قضيّة اخلاقية حابّـة نطرحها للنقاش ، لاعرف انو لو صارت مع حدا فيكم شو رح يعمل؟ كيف رح يتصرّف ؟؟؟ وهل بيختلف موقفك او تفكيرك بالموضوع لو كانت الشغلة بتمسّك انت شخصياً ؟؟ هلأ ع فرض انّك مسؤول عن رقابة المنتجات وبعتوك لدولة من العالم التالت ( يعني التشييك العام النهائي بيتم من قبلك مشان تشوف اذا هالمنتج بيطابق المعايير والشروط الدولية ولا لاء ) ، وانطلب منك تروح لتعمل تشييك على مواد كهربائية لشركة ما .. والله انت رحت وشفت شغلك ، واكتشفت انو هالمنتج ما بينفع لينزل بالسوق لانو في خلل صغير بالدارة مثلا .. وفي احتمال اللي يستخدمو يتعرض لصدمة كهربا ... اجيت انت وخبّرت المشرف بهالشركة عن العلّة وانّو ما بينفع ينباع او يتصدّر لبرّا .. قام قلك : اي مزبوط ما رح يمشي الحال ينباع لدولة متقدمة - اوروبية مثلا - لانو المعايير عندهم مختلفة ... بس اذا بعناه لدولة من العالم التالت رح ياخدوه .. ليش؟؟ لانو المعايير عندهم " اقل " والتدقيق مو كل هالقد ، بئا بيمرق !! هاد غير انّـو هنن اصلا ما عندهم هالمنتجات اللي احسن بكتير من هاد المعطوب - اذا كان عندهم اصلا - !! اجيت انت قلت .. طيب بس انا بكل الاحوال رح خبّر المدير .. رحت لعندو وقلتلو .. وبتتفاجئ انّو المدير مو مستعد يخسر تجارتو لانو البضاعة بهالحالة رح تضل عندو وما استفاد منها شي ولا طلّع حق التكلفة حتى ... - " اوكي ... طيب اقتراح تاني .. اعملوا شوية اصلاحات فيها لحتى تزبط " ( يعني حتى لو كان المنتج درجة تانية بس عالاقل ما يكون فيه خطر ع حياة العالم !! ) - " كمان ما بيمشي الحال ... نحنا متعاقدين مع شركات لتشتريها already .. واذا تأخرنا لبين ما نعمل التعديلات نحنا اللي بنخسر لانو بيسحبو الطلب ...! " وبيطلب منك انو تتغاضى عن الموضوع حرصاً على " وظيفتك " هلأ المشكلة وين ؟؟!؟ المشكلة بكذا شغلة ... 1 ) انت لو كتبت التقرير وقلت انّـو كل شي سليم ... ومستقبلاً صار شي ، انت اللي رح تاكلها بصفتك الخبير اللي شيّك آخر شي.. 2 ) لو عملت اللي عليك وكتبت التقرير ... بتنفصل من شغلك .. وعلى فرض انّـو قررت تروح مع المشكلة الاولى وما تجيب سيرة " ع مبدأ خلّي ولّي ما دخلني بغيري "... وراح هالمنتج وانباع ببلدك .. شو رح يصير ؟!؟ تخيّل انّـو شخص من اهلك اشتراه .... شو موقفك ؟؟!؟ طيب ... وعلى فرض تاني انّـو كتبتو .... اي الشغلة مو سهلة .. طارت وظيفتك ووراك عيلة ومسؤوليات خيرات الله !! السؤال انّـو : انت لو انحطّيت بهيك موقف ... شو رح تعمل ؟؟ ملاحظة اخيرة : يا ريت النقاش يبقى ضمن الموضوع ونترك السلامات والدردشة ع جنب ...:D |
اقتباس:
وبروح بعمل بسطة ببيع عليها |
طبعا ما بصدرها وبرفع تقرير بكل شي...8)
انو انا اخسر وظيفتي ولا عالم تخسر حياتها وضل عايشة .. بخطيتهن العمر كلو......:cry: |
بعمل اللي عليي وبكتب التقرير ... الشغلة في حياة بني أدمين مو لعبة أبدا ... وبعدين أكتر من الشغل ما في :lol:
|
انا بقدم استقالتي
لانو بكل الاحوال انا خسران فاخسر بدون ما اشتغل شي ما منيح احسن من انو اخسر وكون مشتغل شغل مو منيح |
طيب ليش عم تفكرو من وجهة نظر انّو " أحد الامرين " هو الحل ؟؟
يعني مافي حل تالت مثلا ؟؟؟ :? للصراحة انا لهلأ ما طلع معي شي تالت .. بس قال المفروض يكون في ، بحيث انّو انت ما بتخسر شغلك ولا بـ " تخرق " الethics code وتعمل شي غلط ... وهنن ما بيخسرو كمان ... بس كيف ؟ الله واعلم:dunno: |
اقتباس:
|
اعدمك الهي .. اي ؟!؟ :lol:
ولااااااااء ... بس بدّي حل :cry: |
اقتباس:
هيك لا بخسر ولا بيخسرو :lol: |
اقتباس:
معناها مافي غير واحد من الحلين |
اقتباس:
|
لاقيتا لاقيتا
دول عالم ثالث قلتيلي بسيطة ... بروح لعند دكتور بدفعلو 200 ليرة بدل تقرير طبي أنو انا مصابة بأبو صفار ولازم أضل بالبيت أسبوعين ... وهيك بتاخدي أجازة مرضية وحدا تاني ( انشالله ما يكون معنا بالمنتددى مالي خلق فكرلو بحل ) هوي بيروح بيشتغل هالشغلة والله بيعوضك راتب هالأسبوعين :lol: |
أنتي أتغاضي عن الأمر .. و الأعمار بيد الله ( مو هيك بيقولو ) ..
:lol: بس أذا أنا كنت بمحلك بترك و بمشي .. |
اقتباس:
اقتباس:
قلتو قبلك :pos: :pos: :pos: |
اذا بنحط بهيك موقف برفع تقريرين تنين الاول عن الوضع الحقيقي للمكنات للجهات المختصة فيه
والتقرير التاني عن وضع المدير واتباعو وعن الفساد تبعون للجهات المختصة الاعلى من اول جهات مختصة وبحاول قدر الامكان انشرو كمان بكل الجرائد اللي ممكن تنشرلي هيك قصة بحيث اني اعمل فضيحة بجلاجل لشلة الفاسدين هدول...... هلأ اللي رح يصير واحد من تنين اما انو شلة الفاسدين هدول رح يكونو واصلين كتير ويضلو باماكن عملون ووقتها رح انفصل من شغلي :cry: بس بكل الاحوال نتيجة للتقرير الاول انا مفصولة فماخسرت شي...... او انو رح يتبهدل المدير وشلتو ويتقحطلون وبضل انا بشغلي :gem: واذا زبطت هي بكون ارضيت ضميري من جهة وبكون انقذت حياة وجيبة المستهلك وبكون كمان انقذت ناس تانيين كان ممكن يتضررو من صفقات تانية غير هي وبكون ضليت بشغلي نشاله كون عطيتك جواب مقبول ياملاك سوريا:D |
مرحبا كيفكون كيف الصحة و الولاد و و .. هيهي ما تعصبي عم امزح
طيب أنا بصراحة و من حيث المبدأ (ما منعرف شو التطبيق) طبعا بكتب تقرير صحيح : ليش؟ من شان ما نظر و أعمل حالي بطل العدالة و الأخلاق، الحقيقة موضوع اخلاقيات المهنة ألو علاقة بسمعتها كمان و أي إنسان بيحترم مهنتو بيحافظ على سمعتها لأنو هي استثمار ألو و لزملاءه بالمهنة هي أولا هلق أنا براغماتي كمان، و اللي بحاول أعمله أني استفيد من القضية بما أنو المسؤولين ولما بدون يفصلوني لازم يوضحو ليش .. يعني مافيهن من الباب للطاقة و أنا فيني روح عالنقابة و أعمل العمايل الخ (طبعا حسب نظام العمل السائد) الفكرة المهمة أنو كشركة و منتجات متطورة المفروض يكونو قادرين بتحملو الخسائر و بهيك حالة الحفاظ على سمعة الشركة أنها سحبت منتجات فيها خطأ أهم و كتير شركات كبيرة بتسحب منتجاتها و هادا موضوع بيزيد ثقة المستهلكين ، هلق إذا الخطأ قابل للتصليح هادا الشي بيخفف من الخسارة ممكن ندور على طريقة لتخفيف الخسائر لأقل حد ممكن ، ممكن ندور عن العطل و إذا كان سببه شركة من الموردين فينا نقاضيها و ندفعهن الخسائر أو نتشارك معهن، بس باعتقد من ناحية اخلاقية أنا ضد المساومة على هيك موضوع و خاصة إذا كان موضوع في خطر على حياة ناس أو صحتون، لو أنو المنتج في مشكلة و بيصير أداءه أسوء بدون ما يأثر على صحة و سلامة المستهلك ممكن الواحد يبيعه كنخب ثاني مع انو الشركات الكبيرة بالعادة ما بيخاطروا عادة إذا قضية بتمس سمعتهم هلق هي افكار كتير بس بالنسبة لألك و بما أنو هي وظيفة بتصور أهم شي تبينيه بجوابك: - شو هي القضايا الأخلاقية اللي ما بتساومي عليها (صحة و سلامة الناس) - كيف بتعالجي الموضوع (تخفيف الخسائر، البحث عن مخرج، تفادي الوصول إلى طرق مسدودة) |
رأيي ،،
ممكن فكر اني اتحايل بطريقة أو بأخـرى بحيث انـي اكسـب شغلي و بنفس الوقت ما ضر حدا :pos: ،، و الطريقة الأنسب هي اني اعتذر و اطلب من الادارة احالة التقرير لزميلي بالعمل ،، يعني يصطفلو بينات بعضهن ، و اذا رفض ،، فـ الاســـــــتقالة و الانسـحاب بيكون البديل الأنسب :peace: ،، و منو برتاح من هالشغل و هالمدير ;-) ،، و مسسستحيل فكر بالنقاش ،، لأنو اصلاً مافي شي اسمو نقاش بدول العالم التالت ،، للأسف :cry: .. |
| الساعة بإيدك هلق يا سيدي 22:59 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون