|
دورها و عطيني شحطه
 اجينا ورحنا ورحنا واجينا وبعدين مابيتغير شي كل شي على حالو يعني الشي يلي بنساوبي اليوم هو نفسو يلي ساوينا مبارح وبدنا نساوي بكره وبنرجع بنساويه بعد بكره ويلي بعدو يعني هيك الشغله دايره بدائرة مغلقه نص قطرها 2 سم يعني مافي خواص بدنا نلف وندور وندور ونلف حولين النقطه وهيك بدها تمشي القصه بس!!!!!؟؟؟ لحظه في شغلات بنعملها مرة وممكن نعيدها بس كل مرة بتكون مختلفه عن يلي قبلها وألها نكهة جديده مبارح وانا طالع بالسيارة رايح على الشغل طلعت غنيه لابو وديع بيغرد وبيقول احلى ايام العمر عمر السهر وصرت اتذكر ايام السهرات والليالي العامرة بالفرح احيانا وبالآسى اوقات تانيه بس كانت السهرات تبقى حلوة وهون حطنا ابو خليل الجمال .... يعني لما بتذكر كيف كنا نسهر للصبح واحنا قاعدين ومسلطنين على شي غنيه لام كلثوم او شي موال للعملاق وديع الصافي او حتى الاغاني الشعبيه ومواويل العتابا مع الكاس ..لا تسألو اي كاس اكيد المشروب يعني بصراحه العرق وشويه هالمازاوات قدام منا ونفس هالاركيله يلي مخلي الجو ضبابي والضحك والتخويت بالله كان الواحد ينسى همو وحتى لو كانت القعده فيها لمحه من الآسى بتلاقي نسايم البسمه عم داعب وجهك وبتصير تضحك ولو كنت عم تضحك من قرفك بس بتنبسط وبتعرف انو اليوم يلي عم يروح مارح يرجع لهيك ما في احلى من السهر ه والقعده الحلوة يعني انا واحد من الناس بدفع نص عمري لأسهر شي سهرة متل ايام السهر بسوريا صحي نسيت خبركن اني برا سوريا ويمكن هدا الشي يلي بخليني حن للسهرات لان اكيد الجو بسوريا هلئ كلو سهر ات وقعدات من يلي بحبن قلبي يعني هلئ بتلاقي فلان طالع هو وفلان على الساحل وبيتذكروني لما كنت اطلع متل المجنون بالليل على طرطوس بشان اسمع فيروز الصبح على الشط وفلان تاني بكون عم يشرب كاسه المته هو وتلاته تانيين وفاتيينها لعبه تركس والتخويت شغال او بكونو اصحابنا التانيين -لا حظولي هي التانيين -بيكونو سهرانين -ساعه بقرب الحبيب -ايييييييييييييييييه راحت علينا نفسي يرجع الوقت لورا شي سنه لارجع استمتع بكل لحظه من كل سهرة سهرتها انتو بعدكن معي..!!!!؟؟؟؟ طيب ليش ساكتين اتفضلو عطوني رايكن كيف بتحبو تكون سهرتكن وشو احلى سهرة ممكن الواحد يسهرها بس يرجع على البلد واسمحولي وجه شكر ل leoprad |
اي دورها خيي وعطيني شحطة:cry: :cry: :cry: :cry:
اليوم 28 آب والصيف عم بيودع وأنا ما حسيت بالصيفية السنة مع اني مو مغتربة ولا شي ما سهرت متل كل صيفية ولا رحت رحلات متل كل مرة ييييييييييييي على هالوضع أحلى شي الكزدورة المسا بعدين دق طرنيب بس بشرط واللي بيخسر يا ويلو من المسخرة تاني يوم يا الله ليش هيك عنجد الوقت اللي بيروح ما بيرجع أي دورها خيي وعطيني شحطة |
اقتباس:
نحنا لاعنا سهرات ولا عنا شي |
بمناسبه 28 آب بحب اتذكر فيروز لما قالت رجع ايلول وانت بعيد بغيمه حزينه قمرها وحيد
|
وبمناسبة 28 آب
بعايد رفيقي بعيد ميلاده هوي ما رح يشوف هالمعايدة بس وإذا |
أحلى سهرة!!!!!!!!!
أحلى سهرة وقت بتطلع عالضيعة يوم الخميس و بتروح عالساحة و بتلتقي مع رفقات ألك زمان ما شفتون....... هدول اصدقاء الطفولة، عرفتون ما هيك؟؟؟ يلي كانو معك بكل لحظة سعادة انت و صغير....... و بتصيرو تحكو سوا و تتذكروا كيف كبرتوا و ين صرتو من احلامكن.... و كمان احلى سهرة و قت يلي بتخلص شغل و بتروح بتقعد عالكورنيش قدام البحر انت و أعز رفقاتك ........ و تنفخ نفس اركيلة غير شكل و بتتطلع بوجه الناس يلي قاعد معون و بتحس بالحب يلي بعيونون كيف عم يضويلك كل حياتك.... الصداقة كتير حلوة يا ناس...... و احلى سهرة وقت لبتروح لعند خالتك ام ياسين انت و الشلة بالشتوية و بتقعدوا جنبا و بتكون هيي محضرتلكون هالاكل الطيب....... يي ذكرتني بأشيا كتيرة الله يسامحك!!!!!! |
دورها وعطيني مليون شحطة وقول الله وولع غيرها ولا تخاف :cry:
قلتلي احلى سهرة ما هيك.... لك ااااااااااااااااااااااااييييييييييييه ع وجع القلب الي عملته انت هلق... خيو متل ما قالت ري مي اليوم 28 آب لا وهلق صرنا 29 لانه الاعه 12 وشوي..المهم راحت الصيفية ورج ايلول ...وورقوا الاصفر شهر ايلول...تحت الشبابيك... اخ بس لو كنت هلق سهرانه ع سطوح ضيعتنا انا والغالي وعم نحكي ونمزح ونتقاتل ونعصب او سهرانه انا ورفيقتي ببيتهن ع البرنده والسد قدمنا ومنظر وهوى برد العمر.. او سهرانه انا واهلي عم نحكي نرغي ع العالم او سهرانه انا ورفقاتي بالضيعه وهنن بيلعبوا شدة وانا بتفرج ويتعايطوا ع بعض ويصرخوا وانا اضحك...ولك اخخخخخخخخخخخخخخخخخخخخخخ ع شي نفس اركيلة قدام البحر ... بكمل ولا حاجة؟ |
اقتباس:
ورقو الأصفر شهر أيلول تحت الشبابيك ذكرني و ورقو دهب مشغول ذكرني فيك رجع أيلول و أنت بعيد بغيمي حزيني قمرها وحيد بيصير يبكيني شتي أيلول و يفيقني عليك يا حبيبي ليالي شتي أيلول بتشبه عينيك يا ريت الريح إذا أنتا نسيت حبيبي أول الخريف و ما جيت ينساها الحور و قمرها يغيب و ليلا يطول و نبقى حبيبي غريبي و غريب أنا و أيلول |
لك أخ ما أحلى أيام السهر قولت أبونا وديع يا 26 سنة و يا عمر الولدنة و يا مين يرجعني صغير و ياخد مالك يا دني يا با أوف
أخلى سهرات سهرات البحر بيضل الواحد عل الشط عم يسكر لتطلع الشمس و عند الشروق بيكون الواحد عم يمر بأحلى لحظات حياتو |
:? :? :? :? :? :? :? :? :? :? :? :? :? :?
:? |
مشان الله بس ... والله دمعوا عيوني
لك دخيل رب سورية وتراب سورية أنا هلأ شي شهر زمان ومسافر وصدقوني يا جماعة اني احياناً ببكي وبقول : كيف بدي اترك هالبلد ؟ اما عن السهرات فحدث ولا حرج انا من الشام والسهرة من الشام ولا احلى احلى لعبة تريكس بالربوة مع نفس أرغيلة وأصواتنا بتوصل للمريخ ونحنا عم نتخانق على اختيار او شب او أص ... او احلى سهرة بالشام القديمة بباب توما .. بباب شرقي .... لك آآآآخ واحلى احلى شي صحن فول من عند بوز الجدي بنص سوق الجمعة بعد نص الليل يا ويلي شو طيب وآخر شي اختمها ابريق موز وحليب عند ابو شاكر بالصالحية لك آآآآآآآخ .. من عند مين لح اشرب كوكتيل من بعدك يا ابو شاكر ؟ اما طلة قاسيون فلا حدا يذكرني بتحس حالك واقف بالسما والنجوم عم تضوي وكاشف الدنيا كلها والله شوفة بترد الروح لك آآآآآخ ويا ويلي ع البلد شو حلوة |
ذكرتوني واليوم 28اوت. خلصت الصيفية مو:cry: اي خلصت وراحت معها ايام كتير حلوة متل ماراحت ايام العطل اللي كنا بنقضيها كلها بالسفر والسهر مع الاصدقاء الجداد اللي بنتعرف عليهم بالمكان اللي بنقضي فيه اجازتنا.بتذكر وقت كنا نتعرف على شلة ويوم بعد يوم بيزداد عددها وبتحلى السهرة.وباخر ايام الاجازة بنوعد بعضنا مشان السنة الجاية نقضي اجازة الصيفية بنفس المكان ونلتقي فيه.ما خلفنا الوعد وصرنا نتلاقى 4 سنين متابعة.بس ظروف كل شخص فينا ما تركت هالاربع سنين يتمددو ليوصلو للسنة الماضية وهالسنة والسنوات الجاية.يلا خلصت الصيفية بس لسى ذكريات حلوة بتضل بقلوبنا:cry: :cry: :cry: :cry: :cry: :cry: :cry: ولك اه:cry:
|
ممكن تفهموني الموضوع
|
و فوق كل هاد .. بكرا المدرسة .. :cry:
|
اقتباس:
|
اقتباس:
|
اقتباس:
|
اقتباس:
|
| الساعة بإيدك هلق يا سيدي 03:06 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون