|
أخوية ...
يا ترى اخوية ... هي مجرد ساعات منقضيا ... قدام شاشة وكلمات .. وحروف غريبة ...؟ أكيد لأ ...
شوي شوي ... وبفترة ما بتطول .. بتبدا أخوية تصير ... أشخاص منلتقيون ... منشتقلون .. منحبون ..منبادر لعند البعض ... والبعض بيبادر باتجاهنا ... ...الأصدقاء بيتحولو من كلمات على شاشة لحضور بحياتنا ... علاقات بتنمينا ...وعلاقات بتستفزنا وبتحفزنا ... أراء بتغنينا وأراء بتصدمنا ... وأراء بتخلق فينا مجال جديد من التساؤلات ... أخوية لوحة ... فيها تدرج الألوان كلا ... يمكن ما كل الألوان قادرة تتمازج بالتجانس نفسو ... يمكن ألوان ...أأقرب لبعضا من ألوان تانية ... يمكن ما كل الألوان ... عم تقدر تخلق لوحة بنفس الجمالية ... بس هالألوان المتناقضة والمتنوعة كتير كتير كتير ... عم تخلي أخوية ساحة غنى ... شوي شوي ... بتتحول اخوية ... لمجتمع وحياة .. مو مجرد فكرة ورأي ... وموضوع ... ما مهم .... اكتب مشاركات بالميات وبالألوف ...لأكون فرد من هالجماعة الكبيرة أن ما حبيت اخوية بأشخاصا وتنوعون ... ما فيني كون ... بهالجماعة .. إن ما خفت عأخوية ...وسعيت أني حافظ على مستواها ... ما فيي كون بهالجماعة ... أن ما كان فيي أنمى وأتطور .. غير وأتغير ... أسمع وعبر ... أكيد ما فيي كون بهالجماعة ... أذا ماكان فيي قدر التعب اللي عم ينبذل .. على ادق التفاصيل ... أكيد ما فيي كون بهالجماعة ... ما كتير مهم ....قدي قدرت أبهر الناس .. أو أكتب آراء خارقة .. اللي بيهم أخوية فتحتلي باب ليكون عندي كام اخ وكام صديق جديد ؟؟؟ يا ترى لأخوية هالأثر بحياتك ؟؟؟؟؟ يمكن ما الكل بيقدر يعيش العلاقات بأخوية بهالجمالية ... ويمكن البعض يعيشا بعد أحلى من هيك ... بتبقى لحظات منعيشا سوا ... ومنتذكرا وحلو نتشاركا ... الشي اللي حابة نتشارك فيه ... يا ترى .. انت بتحس اخوية ملتقى الأخوة ...؟؟ كيف ؟؟ |
اقتباس:
|
اقتباس:
في موضوعي ... يا هلا حضورك جد لافت ... وأنا جدا بحترمك.. :سوريا: أما بخصوص قاصدة حدا ... قاصدة كتير كتير ناس .. اخوية ..قدمتلي اخوة كتير كتير بعتز فيون ... ألي رجعة ... عهالفكرة ... |
شو اخدتو عني فكرة اني بضل بالمنبر
القصة مش هيك بس هنيك المواضيع اللي بتنقرا عفكرة انا من زمان بأخوية بقرا بس قليل ما بعلق وتسلمي انتي حضورك أميز وبحسك أخت رجال فعلا أخوية من أروع أروع المنتديات في جوها الحالي. كيف اذا بقولو من زمان كانت أروع راسليني عالخاص ونشالله بصير الك أخت جديدة بتعتزي فيها وبتعتز فيكي |
اقتباس:
يلا اسبقيني لاحقتك ... مشان ما يعرفو شورح نحكي :p |
عن جد ميرسي كتير مارسيل لانك بادرتي بفتح هالموضوع وحطيتي الفكرة بلوحة لحتى نستخرج منها اراءنا بهالمنتدى الفريد من نوعو اللي دخلت ليه كمشاركة كان هدفها قراءة المواضيع وانها تمر مرور الكرام بدون ما تشارك ولو بسمايلي.بس تعامل الاعضاء مع بعضهم اعطاني حافز مشان شارك بردود وبمواضيع اللي منها تعلقت كتير باخوية وصرت اول ما افتح النت بروح ليها كاول موقع.التقيت فيها باصدقاء حبيتهم ولو في بعد المسافات.ومن بعض المشاجرات اللي بتحصل هون تعلمت انو كيف لازم للشخص يتقبل كل تصرف ضدو بروح رياضية .ويشوف معاملات غيرو ليه في حياتو العادية بشكل ايجابي.واخيرا وليس اخرا بحب وجه كل حبي وتقديري لاخوية بصاحبها ومشرفيها واعضاءها:hart: :hart: :hart: وميرسي مرة تانية يا احلى مارسيل:سوريا:
|
أخوية .. أكتر بكتير من منتدى أنترنت ..
أخوية .. بكل معنى الكلمة أخوية .. شباب طيبة و جمعة حلوة .. بتسمعلون بيسمعوك .. شباب دخلو على قلبي و صعب كتير يطلعو منو .. أخوة و أعز بكتــــــــــــــــير .. صعب كتير أحكي و عبر .. الأخوية صايرة جزء كبير من حياتي .. ميمو يسلمو أيدكي على هل موضوع .. يعني متل ما قلتي .. صعب الواحد يعبر بـ الحكي و يموضوع و بمجرد رد .. تحية لـ أحلا أعضاء بـ أخوية .. القدام و الجداد .. الطيبين و المو طيبين .. الحلوين و ؟؟؟؟ و الأحلى .. و خمسمية محروقة و مطعوجة و مشقشة و مبهدلة و مزورة لـ أحلى أعضاء ... وسمعني بودعك |
صدقيني خيتو ان فعلا اخوية صارت جزء من يومي :) صرت اشتاقلكن كلكن...
من احب ومن اصادق ومن اختلف معو ومن نتشاجر معو.... فعلا اخوية بصحبتها واعضائها كلهن بلا استثناء في مدة قصرة صارت وصارو غاليين كتير عليي وانا من هون بدي قول لكل الممكن يكون زعلان من الحكي تبعي بأي موضوع او اي موقف..... ما تزعل منى لأنو انا بحكي من منطلق حبي لك (الكلام بالخصوص لعاشق من سوريا) عنجد ان كنت زعلان منى في ايا شي... انا بس بحكي معك لأنو شاعرة انو انت اخي الصغير واكيد انت بتعرف شو بيعني الاخ لأختو تسلم ايديكي butterfly على الموضوع الحلو :) |
انا رح احكي من خلال قسمين
اخوية القديمة واللي هيي حكت عنها مرسيل واللي كانت احلى فترة بحياتي تعرفت على عالم كتير وصرنا اكتر من اصدقاء يعني صرنا متل الاخوات منتشارك كل شي اخوية هلأ مركز مسبات وشتائم وحكي من الزنار تحت مركز لكل واحد عندو عقدة نقص و بيستحي يحكي هالحكي بالحقيقة بيفوت لهون تحت اسم مستعار وبيبلش يزفر بالحكي يعني بكل بساطة صارت اخوية مركز لتجمع قلة الادب (طبعا مو كل الاعضاء وانما الاقلية منهن) بس المشكلة انو هالاقلية هيي اللي عم تجزب العالم تقرا مواضيعا يعني اخوية معدها متل اول ولا رح ترجع متل اول يعني اسوء من هيك ما بقى يصير فخدو راحتكن وفردو اجريكن وطولو لسانكن قد ما بدكن لانو ما رح تنتزع اكتر من مانها منزوعة هلأ ملحوظة هادا الرد كعضو وليش كمشرف مشان ما حدا بكرا يلقطني على هالشغلة |
اقتباس:
|
اقتباس:
أسمي بلا ألف ... الله يخليكون ...:cry: :cry: هلا كازيتا .... ردك لطيف جدا جدا كالعادة .. ميرسي :سوريا: |
الأخ الفصعون العبقري ...
اقتباس:
بحس لازم أشكرك ... :سوريا: مو بس على ردك ... وعلى حضورك .. معي .. |
اقتباس:
بتشكرك عالمرور الراقي .. :king: |
هنهون الغالي
اقتباس:
من وقت ما فتت أنا على أخوية ... في هالتغني بالماضي والبكا عالأطلال ... إذا كانت اخوية ... علاقات .. يا بيي ... عطتني ... كتير كتير كتير علاقات بتجنن ..رفقة أخوات ..حتى مي تو اتبناني :clap: ...رفقة عن جد ... وقت قعدنا أنا وليلى ..حسيت شو عطتني أخوية .. وحسيت انو الموضوع مو بس كلام .. اقتباس:
هدول ولاد أخوية ؟؟؟ ما بظن ... هدول ناس بتمرق حجرة صغيرة بتعكر صفو ... وبتروح بس ما بعتقد الوضع بهالسوء... يمكن موضوع واحد ..او تنين ..أو عشرة حتى ... ما بتخرب أخوية ..وما بتقدر تمنعنا نكون أخوة بجد اقتباس:
أنا عايشة شي كتير حلو وكل يومين تلاتة بيدخل عحياتي عن طريق اخوية شخص جديد ... فعلا ممكن يصير جزء من هالعيلة ... هنهونتي ... ما تكون متشائم |
اقتباس:
|
اخوية هي الملتقى
بعد كم يوم الذكرى السنوةي لأنتسابي لأخوية ... بأخوية كونت أحلى الصداقات وأروع العلاقات .... الشباب و الصبايا الي صاروا اخوة واصدقاء وحباب ... صارت علاقتنا خارج اخوية ...ورح تبقى انشالله |
أخوية بالنسبة الي مجتمع مصغر عن سوريا فيو الحلو والطيب وفيو المر والقاسي
فيو اللي بحبو كتير وفيو اللي مو كتير هضمتو بس بتضل سوريا المصغرة وبحبها كتير شكرا مرسيل عالموضوع الحلو :سوريا: |
اخوية بتجنن .. وانا تعرفت عليا من الاخوية اللي عنا ...
صدفت انو كنا مجتمعين ..وعم نحكي عالنت ..اجا اخي ..بالتعليم .. بقللي بتعرفي موقع اخوية ؟؟ قلتلو لا ..كتبلي الموقع وفتت عليه لاول مرة من سنتين .... بس ما سجلت فيو ولا اشتراك .... :? ..كان الجو غريب عليي .. بس بقول هلا يا ريتني مشتركة من هداك الوقت ..:cry: رجعت هالسنة فتت عليه ..بغير اسم .. والحمد الله ..صرلي كتييير رفقات واخوات .. اعتبرتن من عيلتي ..:سوريا: وهللأ ... كتير متحمسة ليجي الصيف وشوف اخواتي ع ارض الواقع ....:clap: |
| الساعة بإيدك هلق يا سيدي 22:07 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون