استفتاء أول السنة
 

على اعتبار قربت السنة الجديدة ( ماني محشش, السنة الفارسية, تبعيت عيد النيروز يعني...) المهم, حابب هيك أوقع بين الناس شوي و بعمل استفتاء شعبية بالمنتدى وهيك يعني,فاضي أشغال وبدي اتسلى :P :P ....
حطيت هيك كام سؤال مشان اللي بدو يجاوب عليهون...شي خاص بالأقسام وشي بالأعضاء...وشي بالمشرفين...
1- شو رأيك بالأخوية بشكل عام؟
2ـ شو أكتر قسم بتحبو بالأخوية؟
3- قسم ما بتحبو أو حابب أنك تغير شي فيه
4- لو حابب أنو يصير قسم جديد بالأخوية, شو حيكون موضوع هالقسم؟

5- ظاهرة أو عادة بالأخوية تحبها
6- ظاهرة أو عادة بالأخوية تكرهها

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
8- عضو بتضحك معو كتير و بتتسلى بكتاباتو
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ :lol: :lol: )
10- رسالة عتب لعضو أو أكثر..

11- شو رأيك بالمشرفين بشكل عام.
12- أي ملاحظة سلبية أو ايجابية بالنسبة لعمل المشرفين.

14- مساحة حرة ( اكتب شو ما بدك يعني...عكيفك)

تحياتي :D :D

اقتراح رائع أبو مارل والواضح أنك تعبان عليه كتير الله يعطيك العافية ..
ورح بلش أنا ..
- شو رأيك بالأخوية بشكل عام؟
رائعة .. وصارت جزأ من حياتي بكل أعضاءها ومشرفيها وادارييها ومشاكلها وجدبتها وتحشيشاتها .. :hart: :hart:

2ـ شو أكتر قسم بتحبو بالأخوية؟
أنا صحي أكتر قسم بشارك فيه هوي الشعر بس أكتر قسمك بحبو وبستفيد منو كتير هوي (المنبر الحر) بفضل شخص عزيز ورائع بمواضيعو (أبومارل)

3- قسم ما بتحبو أو حابب أنك تغير شي فيه
هوي مو مابحبوا بس يعني بتمنى يكون الحوار فيه بشكل أقل حدية وهوي حوار الأديان ..

4- لو حابب أنو يصير قسم جديد بالأخوية, شو حيكون موضوع هالقسم؟
قسم خاص بعلم النفس ..تحديدا" ..

5- ظاهرة أو عادة بالأخوية تحبها
الأخوية ..

6- ظاهرة أو عادة بالأخوية تكرهها
الردود اللي بتكون بس وجوه وبيكون ممكن الواحد يعبر بغير الوجوه .. لأنو أحيانا" بيكون الرد بالوجوه بمحلو وكافي ومعبر ..

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
والله كل الشباب خير وبركة .. وما فيني حدد مو مشان شي لأنو فعلا" الكل مميز بشيء ..

8- عضو بتضحك معو كتير و بتتسلى بكتاباتو
كاكابودا والكينغ وفيليب وأم الزوز ..

9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ
لفراس لأني معجب بكتاباتو كتير بس هوي العاطل صاير بخيل وماعاد كتب ..

10- رسالة عتب لعضو أو أكثر..
لديموزي الغالي وبقل رجاع وحاجتك دلال بقى :hart: :hart:

11- شو رأيك بالمشرفين بشكل عام.
الشباب ما في منون بس لازم نكون حركين أكتر .. انطلاقا" مني وجر .. :P :P

12- أي ملاحظة سلبية أو ايجابية بالنسبة لعمل المشرفين.
لازم يكون في حركة أكتر ..

14- مساحة حرة ( اكتب شو ما بدك يعني...عكيفك)
موقع الأخوية هوي شيء أكبر من موقع انترنت أو مجرد تبادل مواضيع هو مجتمع رائع (بكل سلبياتو وايجابياتو) وأنا شخصيا" بالحياة الواقعية ما لقيت غير صديق واحد .. وبالأخوية رأيت ألف صديق .. الكينغ كاكابودا فيليب أبومارل ديموزي الاداريين كلهن (وهون بحب قلون أنو أحلى شي بالعالم الصفحة الجديدة ) وأم الزوز وحنونة وشوكوزلو وحسون وحنان وجوي .. وشو بدي أحكي لأحكي كل الشباب والصبايا رائعيين (وبالمناسبة ترتيب الأسماء اللي أنا كاتبها لايدل على أفضلية أحد على الآخر فالكل أخوة رائعين .. ولسا في كتير عالم ويمكن ماذرتها بس هنن بيعرفو معزتهون عندي ) يعني الصراحة انا من فترة كنت مفكر أترك الموقع بس ما قدرت لأنو عنجد صار جزأ من حياتي يعني اللخ يخلينا لبعض أخوات وأحباب وسوريين ..

وبالنهاية أحلى تحية لأبومارل ملك الأفكار الودية والابداعية .. :D :D :D

ولا تواخذنا ..
:hart: :hart: :hart: :hart:

صار دوري ما هيك :lol: :lol: لنشوف

الأخوية بالنسبة ألي وفرت فرصة حلوة كتير للتواصل مع البلد و أهل البلد...وحتى صارت بالنسبة ألي متنفس بعيد عن أعباء الدراسة و الحياة اليومية...مجتمع صغير اذا حبيتو
المنبر الحر, بدون شك. قسم السفراء هلأ لساتو فطور التأسيس و التنظيم وكذا...بس كتير متفائل فيه و بتصور راح نستفيد كلنا منو
بتمنى أنو حوار الأديان يصير فعلا حوار أديان...وكمان بتمنى يتنظم قسم قرأت لك بشكل أفضل
طموحي كان بقسم السفراء و تحقق...هلأ لسا ما خطر ببالي شي
لغة الحوار و التعامل كتير حلوة و خفيفة...حتى بأكثر المواضيع تعقيدا و جدية بتلاقي أريحية
أحيانا بنخلط كتير المزح بالجد و نكتر سلامات و تحيات و شوباشات بدون طعمة...لازم ننتبه على هالشي شوي
العاشق من فلسطين...شريكي, شو بدي أحكي لأحكي
حشت نشت , يا شيخ بتمنى بيوم من الأيام أقدر أوصل لفلسفتو و طريقة تعبيرو, رائع فعلا
الأستاذ, كتير بختلف معو بالرأي أحيانا, بس دائما بيسكتني بموضوعيتو و طريقة تعبيرو الهادية
فيليب...يازلمة كتير بيعجبني مرحو
جيني....منبع مشاعر فعلا
نانا...وينك يا شريكة, والله اشتقنالك
ديموزي, بدك فركة اذن
حسون, حاج ماسكها حنبلية يازلمة, روق, احكي شو مابدك, بس اسمع حكي غيرك

على سلامتهون و الله...كتير عم بنتعاون, وعم بيسمعو أقتراحاتي (هون بيجي سلام خاص ناص للحكيم)
بدنا مشرف لقرأت لك...

أنا حطيت الأسئلة...بس عن جد ما كفوني لاعبر عن شعوري تجاه المنتدى...هالأشهراللي صارلي هون فعلا كانت كتير حلوة, و الخير لقدام انشالله...
بتمنى الغايبين يرجعو, خصوصي جدا ديموزي, فراغو جدا كبير...وسلام خاص لأبو زياد
الأسامي اللي ذكرتها بيجوز لأنو أكتر شي ألي علاقة معهون...بس ما بدي انسى ذكر حدا...جو , الكينغ رورو , سعيد , أركيتيكتورر, جينو ,فؤاد, كاكابودا...استمرو ها...
بدي أرحب بالأعضاء الجدد اللي شرفونا بالفترة الأخيرة...أهلا وسهلا فيكون


ليش حاسس حالي ربحان شي أوسكار :confo: :confo:

لأنك بتستاهل أوسكار على هالفكرة الرائعة ..
وتحياتي شريك .. :gem: :gem:

أول الشي الفكرة كتير حلوة
1-أنا كتير مبسوطة با للأخوية وهون الواحد بيحكي على كيفوا
2-بحب الساحة الفنية كتير والرياضة
3-حوار الديان لانوا كتير في ردود ما حبيتا
4-بدي قسم لالي ولوائل :lol: :lol:
5-العفوية والطبيعية بالردود
6-اكتر الشي وقت بيحولوا المواضيع لسيرة الحشيشة يعني رح يعملوني محششي
7-كلونمهضومين بس اكتر الشي مجد والكينغهدول بشوفون على طول وكمان كابودا والعاشق وأم الزوز كتير لذيذي
8-ام الزوز
9-أنا معجبة بالكل
10-ما بعتب على حدا كلون بحبون
11-أنا كتير بحبون
12-مافي على سلامة كلون بس هدا كينغ عم يعذبني خلي يبعد عن وائل
13-عنجد الاخوية كتير حلوة انا سعيدة كتير اني كون من احد اعضاء وشكرا كتير على الفكرة بتعقد

مرحبا
:D

1- شو رأيك بالأخوية بشكل عام؟
الاخوية ,موقعي بكل بساطة , بتسألوني رأيي بالاخوية , متل رايي بحمص , احلى شي , و احسن من هيك بتنتزع .
2ـ شو أكتر قسم بتحبو بالأخوية؟
بحب الشعر و الخواطر , و بحب اكتب بالمنبر الحر بس ما بصراحة مابسترجي :cry: يعني في كتير مواضيع بكون حابب اكتب فيها و بتحرقص بجي بدي اكتب و انا عم لف و دور , بعدين بحذف اللي كتبتوا و بمشي :roll:
3- قسم ما بتحبو أو حابب أنك تغير شي فيه
كل المنتديات الروحية بحسها بلا طعمة , البسطة كمان , وزنوا شوي يا جماعة .......... شو بسطة ما بسطة ......... بربكن حدا باع او اشترى فيها شي :?: :?
4- لو حابب أنو يصير قسم جديد بالأخوية, شو حيكون موضوع هالقسم؟
عجبني اقتراح عاشق بمنتدى لعلم النفس , و بتصور انو الاخوية بتحتاج لقسم للتوعية الاجتماعية و الجنسية , بتصور المواضيع مترابطة مع بعضها, و لو كان في محاذير او تخوفات , الموضوع بينحل بالاشراف يعني بس كان في اكتر من مشرف واعي على القسم ما بتصور يكون في مشاكل , كام دكتور على كام متخصص :P بتصور القسم رح يكون حيوي و مفيد .
5- ظاهرة أو عادة بالأخوية تحبها
البراءة اللي بالاخوية حلوة كتير .................. ما في روح الشر اللي بغير مواقع .... و الناس بتحب بعضها هون ................ ما كل الناس بس ماشي الحال :shock:
6- ظاهرة أو عادة بالأخوية تكرهها
المجاملات يا أخي ............ و الله مشكلة ............ من زمان و انا بقول المجاملات كترانة ......... تمسيح الجوخ بيكون على ابو موزة أيام ................ و غياب النقد ........... كلو بالاخوية حلو ...... وما حدا بيغلط ................ معقولي :?: يا اخي شوية نقد ما بيضروا حدا ولا بيمغصوا حدا , كمان اذا الواحد حكا اي شي على ............. الحكومة ............... ما بيسلم يعني :cry: :lol:

7- عضو مميز بالنسبة لألك وليش ( اذا محتار بين تنين أو تلاتة حطون...مافي مشكلة)
هلاء اذا بدي عد ما رح خلص ............. الغوالي كتار و بيعرفوا حالن منيح و ما بتصور في حاجة قول اسماء :shock:
8- عضو بتضحك معو كتير و بتتسلى بكتاباتو
حشت نشت ............... عاشق على الخط بيفقع ضحك ........... و بحب مواضيع التحشيش كتير و بتعز على قلبي ............ نانا مغرقة بالسخرية المضحكة و الموجعة بنفس الوقت , يعني بتعرف وين تضرب و تصيب
9- رسالة اعجاب لعضو أو أكثر ( اعجاب بالمشاركات وكذا...مو تقلبوها غزل هلأ )
آسف Yass بدي أقلبها غزل بـــ Geeny حياتي أشتقتلك كتير ............. وينك :hart:
10- رسالة عتب لعضو أو أكثر..
الله لا يجيب عتب ............... هلاء لا يخلو الامر يعني انو في كام واحد بدهن فركة ادن :angel: ............ صدقت حالي........ لا جد في كام واحد بدهن فركة ادن ............. مين ؟؟؟؟ أنا ؟؟؟؟ليش يا اخي؟؟؟؟؟ :P

11- شو رأيك بالمشرفين بشكل عام. :? :shock: :roll: :dr: :confo: :confo: :frown: :P :oops: :cry: :mrgreen: :hart:
12- أي ملاحظة سلبية أو ايجابية بالنسبة لعمل المشرفين.
يعني في ملاحظات ............... بس بخاف اذا حكيت شي تاني يوم شوف الموضوع منقول على الارشيف أو محطوط بالمنصة :lol: ............. لك مزح مزح :mrgreen:


14- مساحة حرة ( اكتب شو ما بدك يعني...عكيفك)
الاخوية متغيرة ............. بنواحي نحو الاحسن ..................... و بنواحي نحو :roll: الاحسن , شو بدنا نحكي , المهم كلو منيح , و على قولت حشت الستة احسن شي و مدري شو قصة السبعة :P اذا بدي وجه تحيات ما بعرف لمين ولا لمين ............... لان جد ما بوفيهن حقن ............. الكل هون رفقاتي .........شايف انو في جداد كتير بتمنى انو نتعرف على بعض و نصير صحاب............... اي تذكرت

احلى تحية لأحلى حسون لانو عجبتني صراحتوا و عفويتوا و اندفاعوا المجنون :D ............. و بتمنى ما حدا يقمعوا متل ما كان عم يصير
:angel: :angel:





تحياتي الخضراء :mrgreen:

اول شي بدي اشكر عاشق كتير
بعدين اخي يس مشكور على الفكرة الحلوة
انا بالنسبة الي كل الاقسام حبيتن بس بلشت اهتم بجزء من قسم اكتر شي وهو المطبخ يعني كانت فكرة كتير حلوة وانا ايدتا من الاول

اكتر اشخاص بنبسط معن عاشق / فيليب / كاكابودا / اخيل / atramez zeton / زين / حنان / زنوو / شكوزولو / وكتار غيرن



طلب من المشرفين : تحركو شوي يا كسلانين



الله يعطيكن العافية جميعا :D :D :D :D

محليها أعضائها
ما بدها 2 يحكوا فيها أكيد الخواطر و الخربشات هههه
حوار الأديان ... جاي على بالي سميه ساحة الصراع في الأديان
فعلياً كتير أشياء بس أكتر شي قسم خاص بالصيد بكل أنواعي لأني بموت بشي اسمو صيد ..
في أحلا من ظاهرة الحريمات عنّا صبايا هون بجد بشهوا الحيات بوجهلهم أحلا تحية
بلا فضايح خلينا ساكتين :P
كل الصبايا يؤبروا ألبي
والشباب جميعاً بس يعني برأس القائمة العاشق و كينج رورو و هشت نشت و ديموزي و الحلاق و شوكوزولو و و و و يعني الكل الله يديمنا لبعض
عاشق دخيل ربو .. أم الزوز العظيمي .. أبو نهلا لعظيم و كمان بدون استثناءات ..
أم الزوز أحلا روح فعلاً ..
حنوني أحلا تعاليق ..
عاشق ملك التعاليق
الكينج بظن الاسم كافي للتعبير
هشت نشت اللي عطاني شرف الهشت نشت بمقولتو الشهيرة only kakabouda can hasht nasht
زنو عبير أنجل و كل الصبايا حبيبات ألبي
خلص خلص فهمنا الكل تحياتي هههه :D
للحكيم بدنا نشوفك اشتقنالك يا زلمي خلص عاد مل من مصر ...
شي رفع والله ههههه يعني كريم شنتيه المنتدا .. زبدة المنتدا :lol: :lol: أوجه حديسي للمشرف كاكابودا و بقلو يعطيك العافية :lol: :lol:
الله يديم المحبة و الأخوة بهالمنتدا ...
تقبلوا فائق احترامي .. كاكابودا :D

صدقي يا أم الزوز والله شعور متبادل :D

مشكور كتير يا أبو جريج .. لك والله لأطلع على حمص وافرشها ورد لأجلك ..
:D :D وأم الزوز الغالية شو بدي أحكي لأحكي .. آخ .. :D :D

لا باس ....يعن ماشي الحال....مقبول...منقول منيح...نشكر الله ..ما شاء الله ...شي فخامة ....احسن من هيك يعني ما بصير....يا ويلاه احلى موقع بالعالم :P

الصالون...أنا من زمان ..من وقت ما كنت صغير كنت حب الصالونات ..بس كنت لفضل لو كان في قسم اسمو البلكون..لأنو بالصيفية بصير شوية شوب....ولا ما بصير شوب :?

حوار الروح....يعني لهلق انا ما فهمت انو شو بينحكى بهاد القسم .؟؟؟ انو يعني روح ولا تطول مثلاً ؟ ولا روح القلب داعيلك ( مع تحياتنا للكينغ ) :D

قسم الأعضاء المفقودين...يعني اسمو عم يكترو الاعضاء اللي عم يختفو فجأة ..أنا رأيي نخصص قسم منحكي في عن تاريخ هالاعضاء..و منحط في ابرز مشاركاتن ..و لمحة عن تاريخن ..و منحتفل بالذكرى السنوية لرخيلن ..و هيك يعني...مشان التواصل بين الأجيال :lol:

ظاهرة اختفاء الأعضاء...لأنو شي سيسبنس العادة ..يعني و في اكشن :P

تمسيح الجوخ....و ما حدا يرد عليي رجاءً ..أخي خدوني ع قد عقلي :frown:

يعني ..هو في أعضاااااااااااااااااااااء مميزين ..كل واحد مميز بتميز مختلف عن تميز التاني ...و ما بدي سمي حدا مشان ما حدا يفكر اني نسيت حدا لأني ماني نسيان منوب...هني المميزين بيعرفو حالن و بيعرفو حالن ليش مميزين ..و هاد الشي اللي بميزن اساسً ...فهمت عليي منوب ؟ :angel:

يعني بشكل عام حلف الأحششي ...شي سيلما ع الاخر...و في ( الرفيق ) حسون ..كمان سيلما ...بس صاير شوي ع سينس فيكشن . :P

بوجه رسالة إعجاب للعضو حشت نشت ...بحسو انو انسان كبير..و بيفهمني تمام ..يعني أحياناً بس انو عم يحكي شوفي براسي...ما طبيعي هالزلمي i love you Hashtooooooooooo :lol:

و الله انا عتبان ع الادارة...و كتير يعني ...و ما بدنا نرجع نفتح مناحة هلق ..أخي عتبان و خلص :pos:

مع أنو ما بحب أحكي بالسياسة ..بس بشكل عام ماشي .....ماشي الحال ...يعني دورة اشرافية و بتمضى ... :lol: :lol:
عم امزح ...و الله كلكن ع راسي :D

هدول التنتين ...يعني ما بقدر احكي...اول شي لأنو ما بحب اعطي ملاحظات ...و ما بعرف اذا لاحظتو هالشي يعني...و تاني شي لأنو ما بدي مشاحة حرة

بدي مساحة مانها حرة منوب..بدي عبر من خلالها لأبو مارال ..عن عميق الشكر و الامتنان لما يتخذه من مواقف نضالية ..تتجسد فيما نحن فيه الآن ...و أحلا ابو مارال و احلا 1984 :D :D :D

اخي كاكابودا انا بدي اشكرك من كل قلبي وبتمنى اضل اخد عني فكرة منيحة وصح
اخي عاشق بدي اشكرك كتير على كلشي ولانك ساعدتني بكتير اشيا بالموقع
يعني انا بشكل الله لانو عرفني عليكن وعلى كل الشباب والصبايا المناح يلي بالموقع والله يقويكن جميعا :oops: :oops:

والله أنت كبيرة وما في منك يا أم الزوز .. :D :D

أحلا أم الزوز بالعالم العربي و الهنجاري والبورتغالي .. يا غالية
1000*1000 :D

مشكور يا غالي من كل قلبي :sosweet: :sosweet: :sosweet:

احلى موقع بالعالم

يعني هوي كل الاقسام حلوة بس اكتر شي بحب ع الطاير

حوار الاديان ......الردود كتيير حادة ...يعني بنقول تيس بيقولو حلبوه

حاليا مافي شي محدد

المحبة و المزح و الاخوية

الردود الحادة احيانا

كل الاعضاء خير و بركة بس اكتر شي مميز الكينغ ابو الرور و فيليب (مساعدي الخاص) و حنوني و زوزو

عاشق من فلسطين و كاكابودا و ابو الرور و فيليب و قطرميز زيتون و زوزو (بعتذر اذا نسيت حدا)

كل الصبابا و الشباب خير و بركة من دون استثناء

ابو الرور وينك ........صرلنا زمان ماشفناك بالمنتدى

بياخدوا العقل :D

شباب شدوا الهمة بدنا حركة اكتر من هيك

الله يعطيكن العافية يا شباب
عنجد موقع روعة (بما تحمله هذه الكلمة من معنى)

موقع حلو .. او بيجوز حلو كتيييييير ومنيح كتير .. بس بالناس الي فيه ..
كل الأقسام متل بناتي .. ما بقدر ميزة وحدة عن التانية :shock: :lol:
الصالون .. جاي عبالي لو بيكون صالون للإستقبال الضيوف المهمين وطق الحنك معون .. مو يصير سقيفة نرمي البضاعة العتيقة فيها .. :P
بحب لو بيكون في قسم جديد انسميه حوار الخرسان الطرشان .. واتكون كل المواضيع الي فيه فاضية (بدون ولا كلمة بس ابتسامات) لانو ما عم انلحق نقرأ وانتابع الأقسام الموجودة .. بقا حبزا اذا بدو يكون في قسم جديد يكون صااااااااامت ..
بحب بالأخوية انها ليست نقرات كي بورد على صفحات انترنت .. (كمعظم المواقع ) وانما تتعدى النقرات على الصفحات لترنو للنقرات على الإفئدة والوجدانات (جمع وجدان ..قال على اساس.) :lol:
بكره باخوية انها مستحيل تفضل كما هي ... وانو دائما بتتغير .. (والتغيير بيحمل دائما ايجابيات وسلبيات.. لانو متل ما بتعرفو الوحيد الي ما بيغلط هوي الإنسان الي ما بيعمل شي.. والي ما منشوفهم بيغلطو مو لانو معصومين .. لاء لانو هني اصلا واساسا ما عم يعملو شي .. المهم .. باخوية بكره انو بدها تتغير شئنا ام ابينا (هذا قانون الكون وسنتو).. وبإمل التغيرات تحمل معها رجحان لكفة الإيجابيات على السلبيات ..
اكتر عضو مميز بالنسبة لي "سوسو الأمورة" -مديرة العلاقات العامة باخوية.. ونائبها فصحون الناطق الرسمي بإسم مكتب سوسو الأمورة .. غيرون معجب ب Mr POLICE الي المفروض قال عامل فيها امن المنتدى .. و Akhawia الي مستحملني كل هال السنيني و مسيوGodAdmin الي عم بيساعدنا بأمور كتييير..
كل الأعضاء الجدد الي عم يتفشكلو باخوية بالغلط وعم بيشاركو وخاصة هدول الشلة جماعة القبائل الي عم بيدرو على زويهم واقاربهم بالشام هههههههههههههههههه اي هدول بيفطسوني ضحك ..
انا معجب بكل المبدعين .. بكل المجالات .. يعني اي شخص بيبتدع اي شي انشاء الله شحاطة بيعجبني .. لاء اكتر .. الحقيقة انا من النوع الي بيفتح تمو امام الإبداع هيك :o
فما بالك بالناس الي بتبتدع موضوع ولا قصة ولا شعر ولا حوار جيد ولا فكرة ولا مشروع ولا قرار ولا نكتة ولا صورة ولا شرح ولا ولا ولا ..
كل شيئ بالدنيا بيقدر الواحد يتعلمو .. من الطب للهندسة للسياسة للصناعة الشعر للتمثيل للرسم للكلام للرقص للحنجلة .. كلو بينفع تتعلمو بس ما بينفع تتعلم الإبداع هذا شيئ ما فيك تتعلمو ولا اتعلمو .. بيجي مختوم بالواحد
غير ان في ناس بيكون مختوم معها الإبداع بس ما بتحس .. بقا حبزا كل واحد يحسس على جنابو ويشوف في شي ابداع مختوم معو ؟؟
:lol: :lol: :lol:
اي انا عتبان على كتير ناس.. بس بالمنتدى ما عتبان على حدى .. (فما حدى بينعتب عليــــــــــــــــــه) ههههههههههههههههههههههههه
لاء القصد تم فهمو غلط .. انا قصدي يعني عتبان على ناس ما عم تدخل بس مقدر ظروفهم بالتالي راح العتب ..
وعتبان على ناس ما عم ينكشو .. بس كمان انا مقدر ظروفهم فراح العتب..
وعتبان على ناس زعلانين وما عم يحكو .. وعلى اعتبار اني مقدر ظروفهم واسباب الي بتدفعهم للصمت فكمان راح العتب ..
وعتبان على ناس ما بتسكت .. بس كمان انا مقدر ظروفهم ودوافعهم .. فكمان راح العتب ..
يعني بالأخير اكتشفت اني ما عتبان على حدى ..

هلق السؤوال انو شو رايك بشكل عام .. اي بشكل عام طبعا مناح .. يعني من غير المنطقي يكون في مشرفين ما مناح .. (زعران مثلا ههههههههههههههههههه) مو هون وبس بأي مندى بالأرض لازم يكونو مناح .. فكل المنتديات في الأرض معفية من الضرائب والفساد الإداري .. وهذا سبب وجيه لوجود مشرفين مناح بكل المنتديات ..
بس عاد لو كان السوال شو رأيك بالمشرفين بشكل خاص .. بقلك
انو مناح..
اي مناح .. بس مو دائما الرجل المناسب بالمكان المناسب .. لانو الواحد بيجي على الدنيا لحالو .. لازم هيك لو بيجي الواحد ومعو خريطة الكترونية لمخو مثلا .. اي وقتها بيصير اسهل يكون الشخص المناسب بالمكان المناسب على ضوء الخريطة الإلكترونية لمخو ..
هاهاهاها

اي ايجابية عندي.. بحب قلهم يعطيكم العافية ... جدا .. فالجهد الي عم تعملوه جبار بكل الأقسام سواء الي انتو فيها او الي لاء ..
اخيرا بحب استهل المساحة الحرة منشان وجه تحية او مثلا اخلع قبعتي.. لكل الي ممكن نجدل على تسميتهم معارضة بالمنتدى .. او مثلا التيار الأخر .. لانو لولاهم ما بتتحسن الأخوية بالقدر المطلوب .. فدائما الي واقف على السطح بيشوف الشارع احسن من الي قاعد جوات سيارة جوات الشارع .. (منشان هيك بتلاقي تبعوت الي بيرصدو الطرقات والزحمة المرورية برا .. بيحلقو بطيارات فوق الشوارع منشان يشوفوها احسن ويساعدو الي بالشارع على انو يمشو بالطريق الأقصر والي مافيه زحمة وهيك .. )
وعلى اعتبار ما بيقدر الواحد يكون بسيارة بالشارع وبنفس الوقت بطيارة فوق الشارع .. فوجب شكر الي بالطيارات لمساعدتهم الي بالسيارات .. :D :D :D

وعلى عيني ابو الزلف

الله الوكيل رائعة و أكتر من رائعة .. يعني حلوي ..
متل ما قلت و بقول دائماً .. أخوية هي بيتي على شبكة الإنترنت .. .
أكتر قسم هو

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

و باقي الأقسام كلون حلوين ..
بس بشكل عام أكتر شي بحب الخواطر و الخربشات ...
قسم حوار الأديان .. لأنو بيوجعلي راسي ... ببساطة
حلو يكون في قسم إسمو منقول .. و ضمن هالقسم إذا حدا قرا شي خاطرة حلوي أو قصة قصير حلوي أو تفركش بشي شغلة بغير مواقع و حابب ينزلها هون .. بقا بيكون ما في مشكلة .. يعني منطقة مشان ممارسة هواية الكوبي- بيست
إنو موقع ما بينشبع منو ... و إنو أععضاء هالموقع هني أطيب و أحلى شعب بالعالم ..
طبعاً مو الكل ... لأنو في عالم أطيب من أطيب شعب و أحلى من أحلى شعب بالعالم .. :P
أوقاتاً شغلة التحشيش كتير حلوي و أوقات كتير بتذيد شوي عن حدها ..
و كمان لازم يكون في تعليقات جدية أكتر و خصوصي بالمنتديات الأدبية .. يعني بمعنى آخر بدنا نشوف ناقدين عنجد .. شو في أخطاء بالقصيدة أو الخاطرة . شو فيها أفكار حلوة .. و ذا شي قصة قيرة .. كمان النقد البناء كتير بيفيد ..
و إنشالله نكون أكتر من بس قارئين حياديين ..
بتمنا تكون وصلت الفكرة :)
الجينيرال سمايلي أبو وردة :cry: و بدي قلو إنو إشتقتلك كتير .. و إشتقت لمغامرات إمبراطورية حمص المستقلة ..
بس حابب قول بهالمناسبة شغلة ...
ثورة على الطغيان ..... لعب و بيرة و نسوان :lol:
و الأعضاء المميزين على قولة ديموزي .. بيعرفو حالون ... إي .. انت .. ليش مفكر إنو مانك مميز ؟؟؟
ما بدي سمي مشان ما كون نسيت حدا : حشت نشت (( السبعة أحسن من الستة .. و الستة أحسن شي )) و بدي قلو لحشت نشت أنا عنجد معجب بنظرياتك و بكتاباتك كلها .. حتى و لو كان تعبق بسيط .. و حتى ولو كان بس وجه ضاحك بس يكون جنبو إسم حشت نشت بيكون غير شكل ... ولا شو ؟؟؟
أول شي الله يعطي الكل العافي ... لأنو لولا هالأعضاء المميزين ما بيكون صار موقع أخوية مميز ... و لولا الإدارة كمان ..
المشرفين كلون بيجننو .. (( و خصوصي هاد تبع الصالون .. سمعت إنو رهيييييب )) و عميعملو يلي عليهون و زيادة ..
الأعضاء رهيبين .. القدماء و الجداد كمان ...
القدماء لأنون هني أساس هالموقع ... و الجداد يلي عميحاولو يفهمو مسيرة الموقع و أهدافو وتطلعاتو ... و عميسيروا فيه دائماً نحو المقدمة ..
و كمان فوق هاد بحب وجهة وردة وردة لكل من الثلاثي يلي كتير نحسهون مميزين ديموزي , حشت نشت , نانا ....
و ميت وردة لأحلى شباب و صبايا :
جو : بتعجبني أفكارك و طريقتك بالرد و التعامل مع الموضيع .
كينغ رور : روح القلب داعيلك , انت و فيليب و عاشق من فلسطين و كاكابودا و الحلاق عاطين نكهة كتير حلوي للموقع ..
ياس : برفعلك القبعة (( على قولة ديموزي )) على هدوئك بالتعامل مع الشغلات الصعبة ..
و أكيد مسك الختام للشخص يلي عنجد عميتعب أكتر واحد بالموقع .. و يلي الكل هون مقدرين تعبو معنا .. و لو شو ما عملو الأعضاء ما رح نقدر نكافيه .. بتقد الكل عرف مين هالشخص هاد ...
أكيد الحكيم حسام :D :D و عنجد حكيم .. الف شكر و ميت وردة على كلشي ... (( هون بنسمع صوت تصفيق حار ))
أكتر شي عتبان على نانا يلي صرلنا زماااااان ماعاد شفناها معنا .. و عنجد إشتقنالك و إشتقنا لمفاجأاتك الحلوي ..
و كمان ديموزي يلي متقل حالو هالفترة علينا و ما عمنشوفو غير بالأعياد ..
و رسالة عتب على ياس : ليش ما نزلت هالموضوع من زمااااان :P
شهادتي بالمشرفين مجروحة ... بس الله يخليهون ... وويفقون .. و يسعدون و بس ...
لا ما عندي ملاحظات بالوقت الحالي.. بس يصير عندي بحكي لا تخافو عليي ما بستحي من حدا .. وما عندي يا أمي ارحميني ...
بس بدي قول إنو عنجد الواحد ما بيعرف بقيمة لشي لحتى يفقدو ..
من فترة ما كتير طويلة إنقطع خط الإنترنت عندي و كان عندي وقتها كمان فحوص .. يعني ما إقدرت إدخل على الموقع بولا شكل من الأشكال .. وقتها حسيت بقيمة الموقع ..
و في شغلة كمان , و بصراحة أنا نفسي مستغربها .. هي إنو أول ما بسمع وائل كفوري و خصوصي الألبوم الجديد ما بيخطر على بالي غير أخوية .. (( و عسيرة وائل أحلا ميت وردة لأم وائل .. عنجد إشقتلك هنوني الغالية ))
و لا تأخذوني طولت عليكون ..
سلامات ..