|
اليانصيب
عندما كنت في دمشق و كنت صغيرا اتذكر اوراق سحب اليانصيب و كيف كان سعر ورقة اليانصيب حوالي الليرة و نصف و احيانا تصل الى الليرتين و الجوائز طبعا بالليرات او المئات و تصل الجائزة الكبرى الى بضعة الآف كانت لها قيمة كبيرة في ذالك الوقت و كان السمان جارنا اذا صرف البطاقة الرابحة لأحدهم ياخود فرنكين اي عشرة قروش و هي عبارة عن اجرة الباص الى شارع بغداد ذهاب و اياب من مديرية المعرض.
تتابع ارتفاع سعر بطاقة اليانصيب و انخفضت قيمة الجوائز بقدرة قادر و قد تداولت الصحف و التقارير العديد من اساليب اللف و الدوران و اعطا ء الجوائز لارقام يقال بانها غير مباعة و العديد من اساليب الأحتيال مثل الكثير من الشغلات واصبحت الجوائز الآن ببضعة ملاين يحلم كل شاري لبطاقة يانصيب ان تكون له . المقدمة المذكورة هي لأتكلم عن سحب اللوتو الأسبوعي في كندا و كما هو معروف اللوتو الكندي من اقدم اللوتو في العالم و هو جدا منظم بطريقة الكترونية دقيقة و غير قابلة للتزوير او التلاعب ( اساسا هون ما حدى بيفكر باللف و الدوران و السرقة ) و اللوتو يبدأ بكم مليون دولار و في حال لم يربح احد الجائزة تضاف الى الأسبوع المقبل و تتضاعف و تصل الى مئات الملايين من الدولارات و لكن حتى ما يوجعكم راسكم تخيل انك انت من غامر و سحب ورقة لوتو بقيمة 3 دولار فيها عدة ارقام و رقم اكسترا و عند ظهور النتائج تجد تطابق احد الأرقام مع الرقم الرابح مثلا لمبلغ 14 مليون دولار كندي و بعد ضربهم ب 45 ليرة تكون قيمتهم 630000000 ليرة سورية :o انا لم اضع المبلغ كبير حتى تستوعب الأة الحاسبة التحويل علما انه منذ فترة وصلت احدى جوائز اللوتو الى 120 مليون دولار. اتمنى ان ارى تعليقكم على الموضوع بموضوعية لأرى كيف يفكر اي واحد منكم اذا ابتلى بهالمصيبة . Fouad:hart: you |
يعني الصارحة ما كتير فهمت شو بدك ؟
يعني اذا الواحد ربح شو بدو يعمل بالمصاري ؟ ولا شو .. |
أنا ما بحب اليانصيب ابدا لو بدي اربح منها ملايين انا بحب الكسب الحلال
|
هههههههه ايه صياد اذا ربحت المصاري شو بتعمل فيهم ؟؟؟؟؟:blusted:
بعدين السؤال مو مين بيحب اليانصيب او اذا حلال او حرام او ايا شي تاني بس اذا ربح الواحد هيك مبلغ شو بيعمل فيه و يللي رح يربح اكيد بده يكون شاري لوتو او يانصيب مو معقول يربح باللوتو بدون ما يكون مشتري |
اذا ربحت 14 مليون دولار ...
أول شي اكيد بروح بحطون بالبنك ... و تاني شي بعملو بشتري شي 50 صندوق Blue Label و بضل احتفل مع الشلة تبعيتي بشي محل تسالي لمدة شي 10 ايام .... و بعدين برجع عالبيت و بنام شي يومين تلاتي لأنو اكيد بكون كتير تعبان من السهر و التسالي ... و بعدين ببلش الجد ... بقعد مع الطاقم و منبلش نعمل دراسة لتكبير المصنع تبعنا و بس تخلص هالدراسة بروح مناخد تراخيص التكبير و بس نخلص من المعاملات الحكومية بروح بشتري شوية أراضي حوالين المعمل لأنو بكون لازمنا مساحة و بعدين بروح على الصين و باخد معي الأشخاص يلي رح يلزموني و منقعد هنيك شي شهر .. ما بخلي معمل بصنع آلات إلها علاقة بالشغل إلا و بزوره ... هيك حتى آخد كل العروض و بعدين بنقي احسن كام عرض و بروح بشتري كل الآلات يلي بيلزموني من التصنيع للتعليب للطباعة و هيك بصير معمل متكامل و مانّا بحاجة لا مطابع يطبعولنا الماركة و لا نشتري العلب يلي رح ينحط فيها المنتج .. و برجع عالبلد و بهالفترة بكون انا قايل للمهندس انو يجيب الورشة و تبلش بتعمير البنية التحتية و التمديدات الصحية و الكهرباء و الأساسات و و و و من جميعو ... و بعدين بروح عالأراض الزراعية و بشتري كل الأراضي يلي فيها المحصول يلي انا بدي اخدو و صنعو عندي بالمعمل (هيك بصير بوقف عليي أرخص .. يعني بدال ما روح اشتريه من السوق و يربحو عليي بصير انا بزرع و انا بقطف و بيع اذا كان عندي زيادة) و بعدين منجيب العمّال و و و وبصير بدنا طاقم اكبر لأنو المعمل كبر و ود على تسويق بسوريا و البلدان العربية المجاورة و الشقيقة :lol: و لسا القصة طويلة كتيييييير و التفاصيل أكتر ... المهم هلىء بضل بتعب هيك اول شي 3 سنيين لبين ما يمشي المعمل 100% و بصير عرفت عن معظم المشاكل و حلولها يلي معقول تصير معنا ... و بعدين عاد بس يبلش الربح مزبوط بروح بيع سيارتي القديمة و بشتري مرسيدس E55 بتعديل من AMG طبعا" موديل سنتها و بين كل فترة و فترة بتطلع لشي بلد بأوروبا و بعدين منغير على آسيا و كل المحلات الممتازة :lol: بتعرفو شو والله شغلة سئيلة هالـ 14 مليون ! يعني رح يصير تفكيري كلو بالشغل .... بطلت خيو ما عاد بدي الـ 14 مليون دولار .. باخد منون 280 دولار و بروح بشتري قنينة وحدة Blue Label و بضل بحتفل كل الليل و بس فيق بروح بتبرع بالمصاري و بعدين بطلع عالشغل .... |
godfather تحليلك للمصنع رائع بس هاد شي عادي يفكر فيه الواحد في حال ربح هال 14 مليون بس وقت بيربح عن جد بعتقد بيتعير تفكيره شوي طبعا اول شي في صدمة و بعد ما يصحى بيصير بده يفكر مظبوط هي اذا صار معه وقت لآنه وقتها ما رح يفضى من استقبال الناس يللي جايي تهني بالرح و تذكرة انها بتعرفه من صف الحضانة و كانت تعطيه مسكة و بسكوتة بالفرصة و يا لطيف شو كانوا بيحبوا بعض بس يضرب الزمان يللي بعدهم و بعدين بيبلشوا الأقارب يتدحوشوا فيك بينما قبل ما تربح كنت تروح تعمل زيارة لشي حدى منهم يشوفك من العين الساحرة و ما يفتحلك او اذا فتحلك بيشعل التلفزيون و بيعمل حاله رح يموت من النعس و اذا كنت عزابي ما بتلاقي غير هالنسوان العجايز ناتعين بناتهم و حاطيلهم المعجون و الدهان على وجههم و جايين يخطبوك ......... اكيد رح كمل مرة تانية شو بيصير بس لنشوف بقية التعليقات .
Fouad:hart: you |
ما راحت عن بالي هي شغلة "المباركة"
معلم الف الف عالماشي بتجيبلك نص زعران البلد بتخليون قاعدين تحت البيت و يلي بقرب بياكل أحلى شبرية بنص جبينو .... و بطلع عالبلكون و بقول المشتاق يقرب :lol: و بقعد اضحك على هالعالم يلي مانا عم تعرف منين عم تجيها الشبرية ... |
اقتباس:
|
اعطوني الجائزة الكبرى وانابعرف اتصرف
|
صياد
ما اختلفنا عالقناعة بس يا ترى اذا انت ربحت بترضى تاخود280 دولار من المبلغ و تترك الباقي ؟؟ ايه لفها بقا :wink1: كريم مو هو السؤال نعرف شو بدك تعمل و كيف بتتصرف :7asheesh: Fouad:hart: you |
شو رأينا
أي سحبلنا بطاقة من عندك:pos: 3 دولار:? يعني اقل من 200 ل.س سعر بطاقة اليانصيب السنة وصل لل700 بس بدكون الصراحة أنا ما بحب اليانصيب حرام:jakoush: |
ايه تكرمي بسحبلك بطاقة يا وايت روز بس لو برات الموضوع ممكن اعرف ليش حرام اليانصيب ؟؟:oops:
Fouad:hart: you |
انا إذا ربحت بشتري فيون معسل فريز ......... خخخخخخخخخخخخ
|
اقتباس:
المهم مابعرف اذا عندكون ياها بكندا بس هون في السوبر لوتو _ هاد تبع كاليفورنيا _ وفي كمان ميغا مليون هاد صاير بعشر ولايات ( وماني متأكدة شو هني ) هدول لسا اضعاف مضاعفة :cry: مرة واحد ربح 350 مليون دولار :cry: هلأ في حال ربحت ال 14 مليون مابعرف شو بدي ساوي مبدئيا رح انزل ع سوريا ( مع اني نازلة هيك هيك ) بعدين بروح عالجامعة اللي بدي ياها ( ومابتحمل منية الجامعات ) وبعدين ببعت اهلي عالبلاد ينبسطو ويعيشو تحت حاجتون شغل وهم وبعدين بعطي المصاري لابي هوي يصطفل :p |
انا بخدهم وبفر العالم سبع مرات
|
أنا بقلكون ليش حرام ............ بس لا حدى يسألني ليش وشو الأسباب
لأنو بالإسلام حرام تعتبر مقامرة .................................................. .... رجاء لا حدى يسألني عن شي .......... |
ابو جعفر طيب و منين بده يبقى معك حق الفحمات :blusted:
|
اللة يجازيك على هلعملي
|
| الساعة بإيدك هلق يا سيدي 00:41 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون