|
رياضة الميكرو
بمناسبة حديثنا عن رياضاتنا الشعبية علينا ان نلقي الضوء على رياضة هامة بل وهامة جدا لانها لا تتعلق كسابقتاتها بفصل من فصول العام بل انها فصل ناقص قائم بحد ذاته وهي رياضة مزعجة نوعا ما لانها عنيفة الرياضة المعنية هي رياضة الصعود والهبوط من الميكرو صباحا وظهرا وعصرا ومساء
حيث تبدأ صافرة البداية عند اجتماع الناس على الموقف ونظرات التحدي والوعيد التي يتبادلونها وعندما يبدأ ذلك الشيء الابيض او الاصفر من ماركة ايسوزو بالاقتراب من الجموع الغفيرة يقوم اللاعبون بالتأهب للانطلاق (كما في سباقات العاب القوى ) وما ان يبدأ بضرب فراماتو حتى يبدأ الرياضيون بالتفنن في عملية التدافع كل حسب طريقته وتربيته وبيئته والمنتصر هو من ينجح في رفس العدد الاكبر ممن خلفه والصعود رغما عنهم ويتأنزع في صدر الميكرو مجهزا الخمسة بكل فخر واعتزاز وبنفس الطريقة تكون المباراة على الجهة الاخرى من طرف الفريق النازل من الميكرو حيث يقوم اعضاء هذا الفريق بكل ما اتاهم من قوة بلبط ولبج ولكم لاعبي الفريق الخصم لانهم ينزلون اما بالورب او بالقفز العشوائي بدون مظلة او يعلق احد اعضائهم الجسدية بالميكرو وينشحط معه لمسافة لا تقل عن عشرة امتار ذلك لان الشفير يكون قد انتبه فجأة لوجود شرطي لاطي عالسوكة فيفز بالميكرو بشكل مفاجئ تجنبا للمخالفة اللعبة الماضية قد قام اليابانيون باخذها عنا بنجاح اما هذه اللعبة فمن المستحيل على اي شعب ان يقوم بالتفكير في ممارستها لصعوبة قواعدها وما تتطلبه من تيسنة وعدم توافر الملاعب المخصصة لها الا عنا ........ |
شو مشان محد التكش بالموضوع :? :cry:
|
اقتباس:
كتير حلو الموضوع .... ذكرتني بشغلة .. بسنة من السنين -ايام ما كنت عاقلة - كنا طالعين عالفيجة .. رحنا عالكراجات قام طلع مافي ميكرو واقف وجاهز ( حاليا ) !! .. بدك تستنى شي خمس او عشر دقايق .. قلنا اي مو مشكلة .. وكان اعداد الناس اللي قاعدين عم يستنوا عالكراسي - بالاسم كراسي - كتاااااااار !!! بس اشكالهم كلهم يا اما ( انا تعبان ومو حسنان اتحرّك ... اووو النوع التاني اللي بتلاقيها عم تتطلع فيك وتتفحصك ... اوووو التالت اللي ماسك شي حدا جنبو ومستلمو بشي سيرة ) ... المهم بس وصل الميكرو .. شايف هال 3 انواع ؟!! يا سبحااااان الله ... بقدرة قادر .. الكل دبّت فيه الحياة !! ... لك انا كنت واقفة واقرب شي للميكرو .. بسسس عم استناه ليوقف !! .. ما لقيت الا اندفشت مدري من مين .. وصرت ورا بآخر العالم ... وطلعوا الكل وامتلى الميكرو ومشي !!! .... و بعد ما مشي انا وقفت :shock: ... عنجد انصدمت !!! بس لاني زيكو تعلمت بسرعة .. :lol: بس اجى اللي بعدو .. طاحشنا وركبنا .. واكلنا كم كلمة على كم زورة من بعض العالم :p بس يلاّ ... -بالطقّاق - .. :lol: :lol: عنجد الدرس اللي بتتعلمّو بسوريا هو ...... ( الحياة معركة شاملة ) :pos: |
لك ديما لا تخليني احكي
وقت اللي كنت بالجامعة بحمص فكنت اطلع من الدوام شي الساعة اربعة وبتكون كل الطلاب طالعة وما في سرافيس بتكفي فاللي مستعجل بدو يمشي شي كيلو متر لحتى يطلعلو سرفيس او المانو مستعجل بينطر شي بين تلت رباع الساعة والنص ساعة وبالاخير بيجي سرفيس بيوصلو لنص المسافة اللي بدو يوصلا وبيكون هيك حظو بيفلق الصخر ايييييييييييييييييييييييي يييييييييييييييييه ايييييييييييييييييييييييي ييييييييييييييه لك والله كانت ايام ما في احلى منا :cry: |
اقتباس:
على شو مافي احلى منا ؟!؟ ... على التعتير اللي يومياً لازم تعيشو لحتى تحس انك سوري ؟! على كل .... انا قصة الميكرو ما بتتضايقني قد ما بتتضايقني التكاسي بسوريا .. انا بعرف انو وقت اللي بتوقف تكسي . بتقللو خدني على البطيخ بيقلّك حاضر وبيمشي !! الا بسوريا !! ... انت بتصير عم تترجاه لياخدك !! .. لانه اذا ما كنت على طريقو ما مستعد يوصلك !! لك لشو اسمك تكسي ؟!! :lol: ... طبعاً هاد غير قصة العداد ونص وعدادين :lol: ... رهيبين الشوفيرية السوريين :p :lol: |
ليش اذا بتوقفي تكسي
 وببطلعك بعد ما يسال لوين يا بيقول طلاع  يا بيقول مو طريقي  بطالع شي طلبين على الطريق ويمكن تكوني انت الطلب التاني وما بهمن ولا بيسالو  |
:lol: :lol:
اي والله صح .. كيف نسيت هالحركة كمان ؟!؟ :lol: .. شكرا ماري سو عالتذكير :p |
اول الشي السمايلي اللي عم يبكي من حرقة القلب
يعني والله العظيم الواحد لما بيشوف هالمناظر على الطرقات يا اما بدو يكفر بكل لغات العالم يا اما بدو يحكي من الزنار وتحت يا اما بدو يبكي يللا الا ما تفرج :pos: |
فعلا انا كمان بلاقي وضع التكاسي عنا اسوأ من المكرويات
لانو شوفيريه التكاسي جد اكتر عالم ولاد حرام بالكره الارضيه كلها (طبعا الا ما تلاقي حدا منيح) |
اقتباس:
يعني ان كان عنا بحمص اللي فيا شوفيرية التكاسي ما بيعرفو شي اسمو عداد او بالشام اللي شوفيرية التكاسي بيعرفو شي اسمو عداد بس ما بيعرفو كيف يستخدمو يعني وما بعرف ببقية المحافظات بس اكيد الوضع مو احسن من هيك يعني بيعين الله |
يسلمو أبو الهن على الموضوع
يا سيدي ما قصرت فيون لهل البشر بس تعا شوف شريك بالشام هي الرياضية.. يعني عنا هون صار دوري المحترفين بهي الرياضة وصاروا يجيبو المحترفين من شوفيريي وركاب من باقي المحافظات.. لأ والاضرب أنو في ظاهرة جديدي عنا بهي الرياضة وهي ظاهرة التشبير ورح اشرحلك يا سيدي شو هي ظاهرة التشبير بتكون واقف بالشارع وناطر الفرصة المناسبة لاقتناص شي كرسي تسلل في شي سرفيس وبتبلش تشوبر للسرفيس بأيديك ورجليك فبتتفاجأ أنو السائق بأشرلك بأيدو بإشارة بتدل على الشبر وبوقفلك العينتين... وبتنقض على السرفيس مثل الصقر وبتفتح الباب لتتفاجئ أنو ما في ولا كرسي بتقولو وين الكرسي معلم...فبجابوك بلغة المسؤولين اي دبر راسك ما أشرنالك انو قرفصة فبتستنتج انت انو هي الشبر بتعني القرفصة.. ودبر راسك لقلك على أساس ناقصنا أمور ندبر راسنا فيها. |
اقتباس:
فرطتني ضحك ... :lol: ... قرفصة لكان !! هههههههه على فكرة مرة صارت معي ... بتقعد على الدولاب :lol: يا امي والله فرطت خلص ههههههههههههههه |
الي زمان ما ضحكت...
زكرتوني بهديك الايام... القرفصة واردة.. بس كمان سرفيس بتلاقي الشوفير بيقول لاحد الركاب: بمعيتك طلعلو الكرسي من تحت المقعد ... بيكون كرسي حديد من هدول يلي بينضبو... و الدوري تبع هالرياضة بيصير برمضان... لانو انسب وقت لممارسة هالرياضة ... و دوس دوس يا شوفير :clap: ... كملوها انتو :p |
شكرا هاني
ضربت ع وتري الحساس وزكرتني بالبلد |
ليش والله السرافيس حلوين
ليش كل هالحقد على التكاسي والسرافيس ياشباب
اي بشرفي شوفيرية التكاسي والسرافيس كتير طيبين وامورين عنا بحلب يازلمي حتى من كتر موووو طيبين بتسابقوووو على الراكب وحتى بالعلامة مرة في سيرفيسين عنا بحلب عبتسابقووووو على راكب عند الموقف قام من حدة السباق الراكي انعفس ياحرااااااااااااام :lol: :lol: :lol: :lol: اما فشوفيريت التكسي عنا بحلب فحدث ولاااااااا اول مابتدخل على التكسي بيستقبلوووووك بابتسامة عريضة وبوصلوك حتى لو كانت طلبيتك على حمص وطبعا مابياخدوووو على العداد ولا فرنك زيادة بقى شفتوووو ياشباب ويا بنات شقد شوفيريت التاكسي والسيرفيسات طيبين وامووووووورين عنا بحلب؟؟؟؟؟؟؟؟؟؟؟؟؟؟ ;-) ;-) ;-) ;-) ;-) ;-) |
اقتباس:
غير هالخمسه مالو لو يبظو عيونو اما شوفيريه التكاسي حدث ولا حرج وعلى سيره حمص مرا كنت بحمص واخدت تكسي نسيت من وين لوين بس بذكر انو كانت المسافه قريبه طبعا ما كان في عداد ودينو وربو بدو 40 ليره عطينا 40 ليره شو بدنا نساوي مجبر اخاك لابطل انا بين ارضو وجمهورو :lol: |
اقتباس:
فمرة نزلو مجموعة انسات من عنا من الضيعة على التربية وهني ما بيعرفو وين التربية انو بيعرفو المنطقة بس ما بيعرفو وين بالتحديد البناء انو بعد ما فتلو ودارو قالو تعو لنوقف تكسي تاخدنا على التربية فوقفو تكسي قالولو خدنا على التربية والله الشوفير ابن حلال طلعو طلعو الانسات ما برم دولاب السيارة غير برمتين يعني ما في عشر متار الله الوكيل قلن تفضلو هاي التربية عطونا 25 ليرة طيب يا ابن الحلال طالما انو عشر متار انو اشر بايدك عليا وعلى سيرة القرفصة فهاي بحلة الجامعة بحمص الواحد بدو يطلع انشالله على ضهر السرفيس فانا واقف اشرلي انو قرفصة وقفتو طلعت لقيت في واحد مقرفص قدامي قرفصت وركيت ضهري على الباب والله الزلمي مشي وقف على الاشارة بيجي واحد بدو يركب مو منتبه انو السرفيس ما في محل يقوم يفتح الباب ومحسوبكن دوب وعلى ضهري لورا والعالم بالسرفيس فقعت ضحك عليي ومن وقتا تحرم اطلع مقرفص واركي ضهري على الباب ايييييييييييييييييييييييي ييييييييه ما احلى هديك الايام |
ههههههههه
يلاا شرييك بكرا بترخص السيارات ومنيتهون على حالهون حلاوه كلمه بكرا انو يمكن تمط معك عشرين سنه |
| الساعة بإيدك هلق يا سيدي 12:51 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون