|
سفر التكوين
سفر التكوين * مرّة كنت ضجران عم عاني أرَق معْتلي عَرْشي إسكَر وإشرب عرَق وما كان لسّا بعد في غيم ومَطرْ ولا في سَمَا تضوِي إذا رَعْدي بَرَق كِتْر المَلَل ولّع بعينيي الضَجَر خاطر غريب وأحمق بفكري مَرَق قرّرت إخلق كوكب وليل وقمر ونهار يطلع كلما نجمو شَرَق أنهار وجبال ووِدَى، طيور وشجر وأزهار من قوس القَزَح لونا انسرق ومن بعد ست أيام عم برسم صُوَر عِرْقوا صابيعي وفَلـّتوا نقطة عَرَق بالغلط منها بهالدني خلقوا البشَر تخربَط مزاجي ونور أحلامي احترق إنسان إنسانيّتو وأصلو نَكَر وبحقد مجرم دمّ إخوانو هَرَق يصنع قنابل، أسلحة بتفني الحجر ويجمَع فِرَق وجيوش تَ تقتل فِرَق يفَبْرَك وصايا ودين، باسمي، وعِبَر وكل شي وضع قانون، قانونو خَرَق ولما شفت من خَلق هالكائن ضَرر وقصدي بوجود الخَلْق عن قصدو فَرَق قررت إطوي صفحة وجودو أنا ويصير إسم البشر ذكرى ع الورق . ----------------------------------- * حدا من أصدقائي نصحني عدّل العنوان لـ "سفر التكويم" :) |
olallaaa!!
:D |
:jakoush: .........
|
ما شاء الله عمي ناصر عم تبلش بمثلوجيا جديدة
الدين الناصري الجديد احكي لنا عن دينك هذا يا ناصر :D |
اقتباس:
عندَك بَشَر لو حكت ما منسمع إلـا وعندك بشر لو حكت "لا حول ولا" وسبحان الله كيف في عندك بشر شو ما حكت منشوف حكياتا حَـلا :D |
اقتباس:
وعندَك بَشَر لو حكت بتولّع بـِكي وعندك بشر لو سكتت سكوتا ذكي وعندك بشر لو حكت أو بقيت سكوت بتحس إنو سكوتها نفس الحكي ;) |
اقتباس:
وعندَك بَشَر حكياتها متل الرصاص بتقتل بكلمة، بكلمة بتجيب الخلاص وعندك بشر حكياتها ما بتنمحَى وعندك بشر حكياتها كتابة رصاص :D |
وعندَك بَشَر ضيعان تتسمّى بَشَر لو قدّها محاكي الحَجر، حَسّ الحجر وعندك بَشَر تفهم عليك بْلا حكي ويا ريت كل الناس تفهم بالنظر :) |
| الساعة بإيدك هلق يا سيدي 03:42 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون