متغير
 

كلمه ممكن تسمعها كتير اذا كنت مغترب و رجعت زياره لأوّل مرّه .. و بنسمعها كتير كتير بكتير احيانا و من كتير ناس صار في انقطاع فتره بيننا و بينهم ..

هل ياترى مش لازم نتغير ؟
لأي مدى بنصير غرباء عن الناس اللي بنحبهم و يصعب التواصل معهم بعد فتره غياب ؟
فينا نرجع نتأقلم مع ناس بعد ما نكون "تغيرنا " عليهم ؟


رأيكم ؟؟

:D

بالفعل انا اول ما رجعت من السفر كلن قالولي متغير :o

بس يعني اكيد الواحد بدو يتغير لانو طلع لبيئة غير البيئة العايش فيها و عايش بعيد عن صحابوا و احبابوا.....:cry:

كتير شغلات بتتغير فينا بتتغير نظرتنا لبلدنا بعد ما نشوف بلاد برا و بتتغير نظرتنا للعالم لما منشوف و منتعامل مع شعوب غير شعبنا و بحكم الللي بيسافر بتكون علاقتو مع العالم بمعظمها عملية فبيصير انسان عملي اكتر مانو شخص مزوحي متل ما كان ايام الصياعة بالبلد :gem:

و رح يصير عند الشخص نوع من الكبر الادنى لانو بيتغير نمط حياتو برا و نتيجة مقارنتو لنمط الحياة ببلدو و البلد اللي عايش فيه و هاد بينعكس بيشكل نظري للعالم على انو تكبر و شوفة حال .....:pos:

التاأقلم اكيد بدن يتأقلمو معو لانن هني اهلو و ناسو و اصحابو و حبابوا فكيف بدن يتركوا و ينسو ما هني المشتاقينلو قد ما هوي اشتقلن و يمكن اكتر الا اذا وصلت معو حالة الكبر للعظمة فوقتها بدن ينسوا و يتركوا لانو تغير جوهريا
:frown:
شو رايك انت ؟؟:D

الظريف أنو أحياناً الناس يلي ابتعدت عنها بتكون هي كمان اتغيّرت بنفس النمط الي أنا اتغيرت فيه، ومع هيك بيستغربو أو بيحسّوني انا بس الي اتغيّرت. وهاد شي طبيعي لأني كنت بعيد عنون وبيتذكّروني متل ماكنت بآخر لقاء.



التغيير حلو وضروري لما يكون ضمن مفهوم التنّوع بالتفكير واتساع الافق... كلّ الناس بتتغير بشكل أو بآخر بنسبة ضئيلة أو كبيرة، بس يمكن الشخص نفسو -أو الناس الموجودة حواليه باستمرار- ما يلاحظو هالشي.

بالنسبة الي، أنا شخصياً مع انّي لاقيت بكتير أحيان صعوبات بالتواصل مع ناس بحبها كنت غايب عنهم أو غابو عنّي، بس مع هيك وبسبب العلاقة القوية الي كانت تربطنا ما حسيت حالي غريب عنهم. لهيك، أي فيني أرجع أتأقلم لأنو غالباً بيكون في كتير أشياء وأوقات حلوة لازم نعيد احياءها بعد الفراق :yahoo:


أكيد مو شرط التغيّر يكون بعد غياب برات البلد، ومو شرط يتحول المغترب لإنسان عملي وابن البلد يضلّ صايع، والمزوحيّة مالا علاقة بالعمليّة :lol:وبلد الغربة موشرط يكون بلد عملي أكتر من بلدنا:lol:
بشوف كتير ناس بالغربة بيرجعو بتفكيرون شي خمستالاف سنة لورا

معك حق يمكن انا اخد تفكيري الشغل بما اني متغرب للعمل و بردي يمكن كنت اتذكر ايام ما كنت صيع بالشام بالرغم من انو كنت اشتغل بالشام و مبسوط :sosweet:

لانو كنت كل يوم روح يا عا باب توما يا بالشعلان يا عا قاسيون و حياة حلوة يعني فيك تصيع و تشتغل بينما برا ما بيعود في هالجو لانو ما ضلو حدك رفقاتك و ما ضلت هالاماكن اللي كنت ترحلها :cry:

و عجبتني وجهة نظرك بالنسبة لانوا حتى العالم اللي بتشوفك تغيرت بتكون تغيرت بالنسبة لالك و هاد الحكي مزبوط بس هنن اللي بيكونوا حاسين انو انت اللي تغيرت و ما بيفكرو بحالن انو هنن اللي تغيروا:deal:

التغير حلو و ضروري و لا بد منو بس بيكون حلو وقت بيكون تغير نحو الافضل مو تدهور نحو الاسواء :jakoush:
:D

سلام :D

يكون التغيير بافكار او عقيدة او مبدا هي مشكلة
الا اذا كان للافضل
لو بالمظهر او طريئة التعامل مع الناس شي اهون

انا اخوي سافر عروسيا ورجع اهدا واركز من اول بكتير
متغير بس الحمد لله للاحسن

في ناس فجاة بيتغيرو
يمكن هو ما كان التغيير فجاة كانو عم يتغيرو شوي شوي من زمان بس احنا ما شفنا الا نتيجة فورية لهاد التغيير
في ناس بتئدر تاثر على بعض وتغير فيهم

هو اكتر شي ببين هالحكي لما بتكون مسافر و بترجع ..
لكنها بتحصل بين اي شخصين بتربطهم علاقه و بيعرفو بعض منيح و بيغيبو فتره عن بعض فأول شغله او من اوائل الشغلات اللي بيقولوها لبعض .. متغير ..

في حالات السفر .. بتزداد الظروف اللي بتخلي الواحد يتغير و يغير عاداته و ينسى بعضها و يبزهل جهد ليتأقلم بجو جديد و هيك .. فأكيد رح يتغير .. لكن قديش يا ترى هو بحاجه يسمع هالكلمة ( متغير ) انو عنجد بتضرب عالعصب :? !


أنا بعصبني اسمع هالكلمه .. بتزعجني .. سواء من ناس سافرت عنهم او ناس انقطعت عنهم .. انو بالله العظيم متغيرة .. اي بعرف شو هالفرحة :o ! من الطبيعي اتغـيّر اصلا ً المش طبيعي انو الانسان ما يتطوّر و يتغير ..

قلت نقطه حلوه .. برأيك بيتغيرو مبادئ الانسان مع الوقت ؟؟

أنا عني شخصيا ً تغير فيّ كتير .. طلعت من سوريا كنت ولد .. شيطان .. برجع هلأ الجيران ما بيعرفوني :lol: .. تغير مقياسي للأمور .. كبرت وعيت .. انا طلعت من سوريا بفتره عز تغير الشخصية ( 15 سنه تقريبا ً ) و بذلك من الطبيعي اني تغيرت كتير ( هاد فيما يخص خارج سوريا )

بحياتي كل يوم بتغير ايضا ً .. كلنا بنتغير .. نلتقي ناس كتير .. ناس ممكن بكلمه تغيرلنا سير حياتنا .. ناس بكلمه تغيرلنا حياتنا :oops: .. هيك يعني ..

كمان التغير بيتناسب مع المنطقة اللي سافرنا عليها و الاسباب فالتغير اللي بيصيب واحد سافر عا بلد اجنبي غير التغير اللي بيصيب واحد سافر عا بلد عربي و التغير اللي بيصيب واحد سافر من شان الشغل غير اللي بيسافر من شان غير شغلات
:D:D

طبعا لازم.. اساسا التغير اللي بتتغيرو هو انت.. يعني كل (تغيرة :lol:) بتتغيرها... او قناعة بتتولد عندك قد ما كانت غريبة ما بتعبر غير عنك انت وشو هو انت.. الانسان اللي ما بيتغير ما بيكون حالو.. بيكون المجتمع,, العيلة.. اي شي ..بس مش حالو !!

حسب قدر التغير اللي فيك.. و التجارب اللي مريت فيها.. مش بس و انت "مغترب" حتى و انت جوا البلد.. هيك مواقف كتير ممكن تحصل و تحس انو انت صرت غريب نوعا ما عن اللي حواليك.. بالمحصلة هاي بترجع لـ نوعية علاقتك مع المخلوق اللي بتحبو.. و شخصيتو و قدرة تقبلو للاخر و رأي الاخر..

حسب شو اللي تغير فيك.. متلا في عالم صارت ما بتلقى كلمة من اللي قدامو :sly:.. و واحد تاني صار بيسمع للي قدامو اكتر.. او يمكن يباخد القدامو ع قد عقلو (و هاي بيني و بينك بتصير كتير :lol:) خصوصي لما تكون العلاقة الي بينك و بين الشخص اكبر من اي اختلاف.. متلا انا رفيقتي منختلف بكل شي.. يعني مامنتفق ع شي ابدا.. و في اختلافات جذرية بيننا.. (ما بعرف اساسا صداقتنا كيف بلشت :lol:) لكنها موجودة.. و بقوة.. كتير.. وقت ما اتدايق اول حدا بفكر فيه هو هالبنت.. فـ لما تحكي عن علاقة متل هيك بيصير احسن شي انو كل واحد فينا "بيكبر عقلو" ازا صح التعبير .. و بيمشي للي قدامو.. لانو "خلص مش مستاهلة ما رح نخسر بعض ع هاي:p"
+
الدنيا اخد و عطا.. يعني التغير و الاختلاف موجود وين ما كان.. متل ما عم تحكي مع العالم المختلفة عنك بغربتك و تتأقلم معهم.. فيك كمان تحكي مع عالم تانية مختلفة بطريقة تانية موجودين عندك بالبيت.. او وين ما كان.. بعدين البني ادم شغلتو بالدنيا انو يتاقلم.. فـ تأقلم يرعاك الله :o

طبعا بيتغير المبادئ.. الواحد ما بيخلق و معو "كيس المبادئ تاعو :lol:".. انما المبادئ بنتج عن قناعة و القناعة بتنتجن عن تجربة.. و بما انّا احنا قاعدين ما في ورانا شي غير انو نجرب :p.. فـ طبيعي قناعاتنا تتغير بالتالي مبادئنا ايضا !!

** بتسدقي اني كنت عم فكر بهالموضوع قبل شي يوم او يومين.. و بعدني عم فكر فيه.. يعني حاسة حالي ملخبطة شوي بهالخصوص :oops:!! و لكن هذا ما طلع معي حتى هذه اللحظة.. بيجوز من هون لاسبوع يكون عندي فكرة جديدة.. برجع بكتب شو بيطلع معي :lol:!!

:D

في مقطع من مسرحية لولو السويعتية تبع الاخوين رحباني

بتقول فيها فيروز يلي بيروح ما لازم يرجع
لأنو بيكون يلي تركهن عرفوا و قدروا يعيشوا بلاك
اخدولك كلشي حتى تختك محل ما بتنام
و لما بترجع بتكون راجع من الماضي تخرب عليهون المستقبل


ما بعرف قديش هالحكي صح

و الله يا صاحبي النسيان نعمة بس فيك تقول انو مقولة فيروز سوداوية نوعا ما:pos:

لأن مو معقول اهلك ينسوك و صحابك ينسوك لان الشغلة اكبر من مجرد ذكرى
:D:D