أخوية - تفقيس الفنانات

بتسمي حالها مطربة وهي بالحقيقة مكربة. بتبلش مقهورة ومغمورة وبتصير مشهورة ومغرورة، كيف يا عمي كيف، ما عم أحكي عن شي خفيف. ولك هيدا واقع الحال، ما تلوموا الزمن، العيب مش فيه، العيب فينا ولازقين التهمة فيه، فلتان وضارب اطنابه، ابتذال ومش مخبا بتيابو

ما بقا في كلام ولحن، مش مهم عندهن، أي كلمات بتمشي مع شوية محن ، بيركبوا كلمات ساقطة على الحان فارطة ، بيجيبوها من أي بلد عالخارطة، على تياب لفوق زاحطة و فساتين من فوق قاشطة، وبتلاقيها بالأخير كومة مصاري قارطة. والغريب العجيب انو بتطلع الغنية ضاربة، ولو كانت صاحبتها فنيا خايبة

والفيديو كليب يا عيني، لا عينك تشوف ولا تسمع الدينة. وبعض الفضائيات سايبة، والرقابة عنها غايبة، بتتسابق على عرض الرخيص، والمبتذل يللي كلو تخبيص. لجمع المصاري بس طالبة، وعلى حب الدولارات قلوبها دايبة، وعلى تفقيس الفنانات أفكارها لايبة، بفرجوك وحدي سايحة ووحدي نايحة ووحدي ريحتها فايحة

وين النقابة يا ناس. مش نقابة الفنانين، قصدي نقابة الرقاصات والرقاصين، تا يضبوا عندن هالطرز من المغنيات المكركبات البايخين، أدعياء الطرب القصير يللي أصواتهن شي تعتير

بس عند بعض الناس في شي عالصوت الحلو بيغطي. بعمركن سامعين عن شي مكشوف بيغطي، وبتشوفو من دون ما توطي

وبيناتنا الجمهورهالأيام نفسو شايشة، ولو ما هيك ما كانت هيك أشكال باللوج عايشة

كمان الجمهور في عليه مسؤولية، ما يزتها على صاحبات الجسم اللميع والربح السريع، ما هو كمان نازل فيهن تشجيع وبالملاهي والسهرات دفيع
ويا حيف على هيك نسوان، بضاعتن ليللي بيريد، بس على مين يدفع ويزيد. خليك يا رجال قلعة ولا تشتري من هيك سلعة