|
بتتذكروا لا تقولولي ما بتتذكروا وإلا
بتتذكروا.. المصيص الأحمر اللي بيعلق بالسنان ومعو عود لونه احمر مخطط بالأبيض وكنا نقلبو بالمقلوب ونحطو ع الشمعة أو الغاز وننفخ مشان نساوي فقاقيع وطبعا ما تطلع النفيخة لحتى تطلع زلاعيمك معها وتنحرق كل أصابيعك. بتتذكروا.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت ونتم ناكل مثله وبعدين نحطو بطاسة مي أو بالمغسلة وناكلو عم يشرشر. بتتذكروا.. يوم الجمعة ... نقوم من الصبح مشان نسمع أغنية في قصص الشعوب قصائص لا تنتهي وعالم حلو بهي يسكن في القلوب في قصص الشعوب . بتتذكروا.. تيلفون أبوقرص اللي يهلك أصابيعك وانت تتصل ويا ويلك يطلع الرقم مشغول لأنه ما في ريدايل. بتتذكروا.. يوم كنا نربط الشرشف على رقابنا مثل سوبرمان ونطلع فوق الخزاين ونط على التخوت وآخر شي ناطط غلط ومنكسرة إيدك. بتتذكروا.. يوم كنا نحط الآيس أو الكازوزة بالكيس بالتلاجة مشان تصير متلجة وكل ما بدك تجي تاخدها تلاقي الوالدة حاططته تحت ومانو متلّج.. يا حسرة. بتتذكروا.. لما كانوا الأولاد يشطفوا البرندة بالصابون ويضلوا يتزحلطوا عليها طوال النهار وآخر الشي تنفكش رجل شي واحد وما ينام الليل لأنو رجلو ورمانة.. بتتذكروا..لما كنا نستقبل الحجاج بكامل الفرحة واللهفة على الهدية والعيدية وآخر شي: مسواك ومسبحتين والكاميرا الحمراء وسجادة وللبنات قطعة قماش مبرقعة وساعة. بتتذكروا.. عزايم قبل والسفرة ومفرش الطاولة اللي عليه صورة (فواكه) وريحتو لازم مثل ريحة المطبخ وقاعد على كراسي القش اللي لما تقوم تلاقي سيقانك عليها شخوط ومربعات. بتتذكروا.. أيام الدراسة لما نشد حيلنا بالدراسة ونشتري قلم فسفوري أصفر أو برتقالي مشان نظلل على الشي المهم وآخر شي نظلل على كل الكتاب.. وين الشي المهم؟؟ ما بعرف!!!! بتتذكروا.. أول ما يسرق الأولاد سيارة أبوهم كانت الرجل اليمين على البنزين والرجل اليسار على الفرام من شدة الفرحة .... ولازم طبعاً يمر على أولاد الحارة ويطلعوا معو شي خمسين واحد بتتذكروا.. لما تتقاتل مع ولد الجيران وتقول له: انقلع عن بيتنا وعن رصيفنا... يقول لك: مو رصيفكن هادا رصيف الحكومة كلام منطقي, ويتم يمرق قدام البيت ويقول لك مادخلك. بتتذكروا.. لما يروحوا الأولاد السوق مع أبوهن أو أمهن مشان يشتروا تياب للعيد ..وآخر شي شارين تياب متل بعض بس غير ألوان وتشوفن بأول يوم العيد من الأخ الكبير للصغير متل فرقة حسبالله. بتتذكروا.. لما الشباب بدهن يعملو عضلات يروحوا يترسو علب النيدو باطون ويحطون بينهن عمود حديد وهووووووووب وآخر شي منكسرة ضهورهن. بتتذكروا...لما نشيل الطراريح والشراشف ونعملهن خيم ...أو ناخذ المخدات الكبيرة ونعملهن بيوت. واللي ما عمل شي من المذكور فوق بيكون من جيل الهمبرغر وسبيس توون وأبطال الديجتال..راحت عليكم هديك الأيام أولاد هالأيام بتلاقيه عايش مرحلة وحده بس ألا وهي مرحة الكبار: سيارة وموبايل و تدريجة وشحططة في الشوارع والمطاعم. ماشاف لا أفلام كرتون ولا لعب وهو صغير.. أول ما يفتح التلفزيون بتلاقيه يتفرج ع هيفا ونانسي وروبي وعلى أيامنا قصص عالمية و حديث الجمعة الديني وسهرة صباحية ع الشدة كل ليلة خميس وأم عمار ببرنامج ما يطلبه الجمهور وعصمت رشيد يغني بين الشوطين ويوم الجمعة سيران والله أيام للأسف صار الجيل الجديد بلا هوية :yahoo::lol::yahoo: |
شو ما في رد :frown:
|
:cry:
اقتباس:
اقتباس:
بس هي انا كتيييييييييييييييييييير كنت اعملهاااااا هههههههههه الله يرحم ايام زمااااااان كانت بتجننننننن :cry::cry::cry::cry: |
اقتباس:
بقى نص أخوية بتكون واصلتون من زمان |
اقتباس:
مدري ليش خلاني هالاحساس فوت عالموضوع مرة تانية :? طلع مزكور اسمي :gem: الله حيو الله حيو انزكر اسمي :clap: --------------------------------- صحيح نسينا نشكرو للزلمي .. مشكور خيو :D |
اقتباس:
مو مشكلة بس هيك نورت المشاركة اكتر بمروركم |
والله يا كابتن رجعتني لزكريات ما في اجمل منها..........نحنا يمكن صحيح ايامنا كانت اصعب بس كتييييييييير احلى من ايام جيل اليوم والله بنشفق عليهم ما شافو شي........مساكين.شكرا يا كابتن
|
انا الحمدلله من ايام الزمن الجميل بس رح قلك بعض التقمصات
انا كنت متقمصة شخصية ريمي بندلي وخصوصي بعد ما حضرتلها فيلم اسمو اماني فوق قوس قزح ضليت اقلدها بس ما حد اكتشفني كمان فيلم عمر المختار صاحبتي قعدت هيه واخوانها يمثلو وعلقو مشنفه لأختها بس الله ستر اخوها خاف يدز الطاوله وفيلم الرساله اخوي كان عامل بلال الحبشي وخلا ابن الجيران يعذبو عشجرة ويقول احد احد والله ايام بتعرف الله بيستر ما طلعنا بعاهات مستديمة |
لا ما بنتزكر ;)
|
اقتباس:
:lol::lol: مين قلك في كتير ناس صار عندهم عاهات مستديمة .. :lol: انا قليل من اللي انذكر كنت اعملو ...:larg: |
اقتباس:
|
ايه هلأصارت المشاركة أحلا :clap:
بعدين شفت ياMadMax لسا في ناس مو واصلتهم ايه يا هلا بأصدقاء هديك الأيام يلي فعلا ما بقى تتكرر و صارت من الماضي وهلأ هي ذكريات حلوة كتيييييييييربالنسبة لإلنا |
اقتباس:
|
| الساعة بإيدك هلق يا سيدي 06:17 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون