|
جريمة شرف بمسدس ابن العم هذه المرة
أقدم شاب يبلغ عمره 21 سنة على قتل ابنة عمه المتزوجة التي تصغره بثلاث سنوات منتظراً قدوم الشرطة ليسلم نفسه فيما بدا أنه "قتل بدافع شريف " . وكان الشاب واسمه "محمد – ق " في طريقه لتنفيذ الجريمة في منزل ابنة عمه "ياسمين " في حي الأشرفية - بني زيد عندما التقى بها صباح أمس الأحد في شارع يؤدي إلى المنزل حيث قام بإطلاق سبعة طلقات أصابتها في رأسها و أنحاء مختلفة من جسمها لتفارق الحياة فوراً . وانتظر الشاب قدوم الشرطة لتعتقله حيث حضرت أولاً دورية من شرطة النجدة التي سلمته إلى الأمن الجنائي الذي حوله بدوره إلى شرطة جبل سمعان المختصة مكانياً بالجريمة. وادعى الشاب أن ابنة عمه تعمل في بيت للدعارة في حي الأنصاري وقد تغيبت عن منزلها 25 يوماً أثناء غياب زوجها خارج المحافظة وأنه رآها تعود بسيارات خاصة إلى المنزل لذلك قرر قتلها "بدافع شريف " . وتطالب منظمات حقوقية ونسوية سورية بإلغاء المادة 548 من قانون العقوبات السوري التي تبيح قتل المرأة في حالة الزنا المشهود أو الصلات الجنسية الفاحشة مع شخص آخر و تعديل الفقرة الثالثة من المادة 192 لتصل مرحلة السجن إلى 15 عاما لمرتكب الجريمة فيما دعت التوصيات الختامية لأعمال الملتقى الوطني الأول حول جرائم الشرف إلى "تشديد عقوبة الزنا للرجل والمرأة على قدم المساواة، وتعميم فتاوى تحرم ارتكاب جرائم الشرف، ومنع استفادة مرتكبيها من العذر المحلل أو السبب المخفف للعقاب ". ووفقا للقانون السوري فإن جرائم الشرف عرفت في حالتين نصت عليهما المادتان 192 و548 من قانون العقوبات، حيث أقر المشرع في المادة 192 تخفيف العقاب على كل من يرتكب "جريمة بدافع الشرف" ولكنه لم يعرف الدافع الشريف، ونصت المادة 548 أنه "يستفيد من العذر المحل من فاجأ زوجه أو أحد أصوله أو فروعه أو أخته في جرم الزنا المشهود، أو في صلات جنسية فحشاء مع شخص آخر وأقدم على قتلهما أو إيذائهما أو قتل أو إيذاء احدهما بغير عمد, ويستفيد مرتكب القتل أو الأذى من العذر المخفف". Syrianews.com |
ما عندي تعليق
بس ازا المرأة بتشتغل ببيت دعارة سامحوني ما فيني اتعاطف مع بغي |
اقتباس:
مو بيت دعارة , بعدين وتشتغل بالدعارة ويحاكموها عاهاد الاساس , بس يجي شخص لابس الاخلاقيات , ويطبق حكمو فهاد شي بتسمحيلي فيه شو هو الله !!!! بالنهاية تخلف وهاد لازم يحطوه عالخازوق لسببين الأول عم يحاول يكون الله والتاني عم يتعدى على حقوق الدولة:larg: |
لك حتى ولو شو ما كانت بتشتغل هي مو شغلتو يعاقبها
في الها رب اسمو الله ولا شو ماكان يحاسبها وفي قاضي ومفتي يحددوا العقوبة اللي بتستحقها شو هالهمجية هي؟؟؟!!!!!!! |
اسمحولي انا بشوف انو اذا حكي الابن العم صحيح معناتا بتستاهل الي صار فيها
وما تحكو حريه شخصيه لان المجتمع الكامل بيدمر من وراء هيك شغلات هاد رأيي ربحترم الأراى المخالفيتو |
اقتباس:
تاني شي مين قال انو هوي بيحقلو يقتلها ويزهق روح بني آدم ...حتى لو كانت عاملة شي غلط ..؟؟؟؟:shock: شنو على حسب علمي الدين ما بيعطي الحق بالقتل لاي دا وحتى الحاكم الشرعي ...و بالنسبة للحاكم الشرعي .. ما بيقدر ينفذ الحكم لحتى يتأكد من القصة باربع شهود وباعترافها ..ومع كل هاد ... ازا اعلنت توبتها ... ممكن للحاكم الشرعي يخفف الحكم وممكن يلغيه حتى... هي ازا عم نحكي من الناحية الشرعية:pos: اما من الناحية الانسانية .. فما في اي قانون انساني بيسمح بهالشي لو شو ما كانت الاسباب ..:pos: وازا من الناحية القانونية .. فحدث ولا حرج ... شي بيقرّف :frown: و:سوريا: |
اقتباس:
شو شايفتينا عم نغني بالطاحون جرائم الشرف محرمة بالأديان وبتقليلي بتستاهل هاد تفكير متراجع ومتخلف مع كل احترامي لإلك:larg: |
اقتباس:
بس عندك الحالة فوق هو اكيد مو ربها ليحاسبها بس وحده متل هاي بتخرب على عيلة كامله حياتها بنات العيلة كلن بمجتمعنا اللي ما بيرحم حد بنقضي عليهم لمجوزه بتطلق والبنت بشككو فيها وماحد بقربلها اما لرجال ما بيقدر واحد يطلع من بيتو وهو رافع راسو غير الكوارث اللي بتجرها الدعارة ع المجتمع من امراض وغيرو وغيراتو ما تقلي انت موضوعك عن جرائم الشرف مو عن الدعارة لأنو كل جريمة بتندرس لحالها |
شوفو بجوز ما بتأمنو بالقانون العشائري بس في بهالقانون شي اسمو فورة الدم
لقلكم كيف ممكن واحد يكون مع ابنو بشارع وتيجي سيارة تدعس ابنو ويموت هلا بتعرفو كيف بكون الاب في هاي الحاله لهيك ازا في هاي اللحظه قتل السائق ما بيتحاسب كتير ونفس الشي على الحاله فوق بجوز راح يراقبها وشافها بمكان فاحش وقتلها هون كمان فورة دم انا زكرت هالشي بس من باب العلم |
اقتباس:
هاد تخلف وقضية الدعارة الها أحكامها بالقانون العالم عم يسبقنا ونحنا لساتنا عا ايام البسوس وداحس والغبراء والاطلال ومن جميعو خلصنا بقى , بتقليلي اب شاف ابنو اندعس وبدو ياخد بتارو من الشوفير ,,, شو هالمثال الي عم تطرحيه كتير ضعيف , وعم تدعمي شغلة فورة الدم (التخلف) |
اقتباس:
ما اتذكر الاية اللي بتقول " والكاظمين الغيظ والعافين عن الناس والله يحب المحسنين" ولا بس بيعرفوا من الدين والاخلاق اللي بدون ياه شو هالتخلف و الهمجية انو يقتل انسانة من لحمو ودمو !!!!!!! |
اقتباس:
وكان نفسي ابررلها (الله يغفرلها ) بس ما لقيت معطيات تخليني دافع عنها بجوز لازم انذكرت القصة بتفاصيل اكتر |
اقتباس:
يعني انتي هلأ صدقتيه الو .. بس ما عرفتي شو وجهة نظرها هيي .. بركي هوي كان عندو عقدة نفسية شهريارية ...وكان حابب بنت عمو .. بس هيي ما قبلت فيه وقتلها ونزعلا سمعتها !! بتصير كتييييير .. بس اهم شي ما نوقف مع التخلف .. و من ايمتا كانت هيك تصرفات الها تبريرات ! :frown: :D |
اقتباس:
|
دع الخلق للخالق بس....
ولو امنا بانو هالحكي صحيح لو انو هوي لابن عمها يللي بيجي على بيت الدعارة هيي ما بحقلها يفور دمها على أساس,,,ما هوي مسموحلو وهيي لا لك والله لو كل واحد يطلع على حالو كانت الدنيا بالف خير |
حتى لو كانت بتشتغل ببيت دعارة مابجي انا بوسخ ايدي بدمها
بعدين انا لما اقتلها بكون منعتها تتوب ..بركي كانت بتوب لو ضلت عايشة متلا ؟ ولنا في رسول الله قدوة حسنة ,, ففي خادثة الافك .. ربنا ما انزل برائة السيدة عائشة فورا مشان نشوف كيف رسولنا الكريم رح يتصرف مع هالواقعه وقتها النبي عليه الصلاة والسلام من جوا كتير تضايق .. بس وكّل ربه وصبر .. لا قتلها للسيدة عائشة ولا ضربها ولا حتى شتمها .. كل مالنا عم نصير امة همجية واحنا اصلا الاخلاق طلعت من عنا .. والديانات السمواية كلا نزلت علينا مع هاد الغرب بتحضر واحنا منتسخم تحيتي ابو ريتا ,. |
مدامها متزوجة المعنى بـ بيت مستقل ولحالها...فاول الشي شو عرفو انو غايبة 25 يوم عن بيتها..وحتى لو كانت غايبة..مابعرف وحدة مزوجة تضل 25 يوم بدون اتصال بزوجها مافايتة بعقلي... يعني اول الشي لو شوماكان مالو حق انو حتى يقرب عليها..لنقول انو في عندها زوج وعندا اب.. تاني شي واللي بيخصني من الموضوع بانو حق بيقتلها؟ لو شو ماعاملة هالمخلوقة..اوكي عم تشتغل بالدعارة في قانون بحاسبها.. بس انو قتل مابعرف اديش لسا بدنا توعية لنقدر نقنع البشر انو في مليون طريقة لتنتقم لـ "شرفك" عدا عن القتل...وحاج تقولولي بنات العيلة...محدا بيموت بسبب غلط حدا تاني... جرائم الشرف بيعملو عندي مشكلة كبيرة كتيير |
من وحي الجو المقرف :frown:
 |
| الساعة بإيدك هلق يا سيدي 00:33 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون