أخوية - نوادر حسني مبارك

الريس حسني مبارك في الطيارة قرر يرمي 100 جنيه
يفرح بها عيلة مصرية.
قالت زوجته: خليهم خمسينتين و فرح عايلتين..
قال ابنه: خليهم 25 و فرح أربع عوايل...
قال كابتن الطيارة: يا عم ارمي نفسك و فرح 70 مليون مصري !!

:lol::p:lol::p

علاء مبارك شارك في من سيربح المليون...
وصل لآخر سؤال: من هو أكبر حرامي في مصر ؟
طلب مساعدة صديق و اتصل بأخوه جمال و سأله السؤال.. رد عليه أخوه:
انسحب باللي كسبتو و ما تخسرش أبوك !!

:lol::p:lol::p

مرة حسني مبارك راح مدرسة ابتدائي.. فلما جت فترة الأسئلة ولد رفع ايده..

مبارك: اسمك ايه ؟
- رامي..
- ايه سؤالك يا رامي ؟
- أنا عندي أربع أسئلة :
1. ليه أنت رئيس بقالك 25 سنة ؟
2. ليه لسه ما عينتش نائب؟
3. ليه ولادك ماسكين كل حاجة في البلد ؟
4. ليه مصر حالتها الاقتصاديه زفت و انت ما بتعملش حاجة ؟
ساعتها بالضبط ضرب جرس الفسحة و بعدها رجع مبارك و قال:
احنا كنا فين بقى ؟ مين عنده سؤال ؟
ولد صغير تانى رفع ايده..
مبارك: اسمك ايـــه ؟
- تامر..
- سؤالك يا تامر ؟
- أنا عندى 6 أسئلة :
1. ليه أنت رئيس بقالك 25 سنة ؟
2. ليه لسه ما عينتش نائب ؟
3. ليه ولادك ماسكين كل حاجة فى البلد ؟
4. ليه مصر حالتها الاقتصادية زفت و انت ما بتعملش حاجة ؟
5. ليه جرس الفسحة ضرب قبل معاده بربع ساعة ؟
6. و بعدين فين رامي؟؟!!؟؟!!

:lol::p:lol::p

مبارك: عارف يا ابليس ياخويا , أنا عاوز أعمل في الشعب المصري حركة تطلع من نافوخهم..

ابليس: طب هات ودنك وخد الفكرة دي.... وش وش وش وش
مبارك: لالا يا ابليس الفكرة دي مش نافعة , عاوز حاجة أشد...
ابليس: طب خد دي...... وش وش وش وش
مبارك: لا لا .. برضو مش نافعة , ايه يا ابليس ! أنت بقيت خرع كده ليه ؟! هات بقا ودنك و انا اقولك أنا نويت أعمل فيهم ايه...وش وش وش وش
ابليس: لا يا راجل حرام عليك !!!

:lol::p:lol::p

واحد اتحشر في زحمة المرور فلقى واحد بيخبطله على شباك العربية.. فتح الشباك و سأله: عايز ايه ؟!
- الرّيس حسني مبارك خطفوه و الفدية 5 مليون دولار.. و لو الفدية ما اتدفعتش.. الخاطفين هددو يدلقو عليه بنزين و يولعو فيه.. و احنا بنجمع تبرعات.. تحب تشارك ؟
- و في المتوسط الناس بتتبرع بكام ؟؟
- من 5 إلى 10 لتر بنزين...

:lol::p:lol::p

مرة سيادة الريس مد إيده في جيبه لقي 5 مليون جنيه !!

فزعل قوي و خاف و قال : ايه الفلوس دي ؟! الفلوس دي حرام ؟
فراح لرئيس الأزهر الفاضل و طلب مشورته.. فرد الشيخ:
5 مليون بس !! ده ايه النزاهة دي ؟ دي بسيطة خالص يا ريس ما تزعلش نفسك... كل اللي هتعمله حتروح تمشي في الأحياء الفقيرة ، كل ما تمشي 1 كيلو تتبرع بألف جنيه عن كل مليون جنيه و خلاص .
الريس راح يمشي ، وهو بيمشي قام لقي عمنا صفوت الشريف بيمشي بنفس المكان فقال له : أنت بتعمل ايه هنا ؟ أنت حتمشي كام ؟

صفوت: 78 كيلو بس يا ريس..

الريس: يخرب بيتك !! ده انت خربت البلد !!
صفوت: أنت جاي تحاسبني انا !!؟ روح شوف علاء ابنك جايب موتوسيكل وبقاله 3 ايام بيمشي فيه !!!

:lol::p:lol::p

كان حسني مبارك بيخطب في الشعب... فكل شوية واحد يقوم و يقول: عاش حسني مبارك موحد الأديان !! و يقعد...

يروح حسني مكمل كلامه و شوية يقوم الراجل و يقول: عاش حسني مبارك موحد الأديان !!
اتمسك من أمن دولة و طااااااااخ...

و قالوله: ايه اللي انت بتقوله ده.... ازاي يعني موحد الأديان ؟؟؟ دي مصر فيها مسيحيين و يهود و مسلمين.. و طااااااخ ...

فرد عليهم: يا باشا.. ما هوه موحد الأديان علشان هوه اللي مكفرنا كلنا.........

:lol::p:lol::p

واحد سأل المغني سعد الصغير... انت ما غنيتش للريس ليه زي الباقيين ؟!

رد سعد و قال: إزاي ؟؟! طبعاً غنيت !!
- غنيت إيه ؟؟؟
- غنيت له طبعاً " بحبك يا حمار " ...

:lol::p:lol::p

بيقولك واحد لقي الفانوس السحري و دعكه طلعله العفريت و قله: شبيك لبيك تطلب ايــــــــه ؟

الراجل: أنا عايز كوبري بين القاهرة و أسوان...
العفريت: دى صعبة قوي ! .. نقي حاجة تانية...
- يبقى خلي حسني مبارك يسيب الحكم...
فقله العفريت : أنت عايز الكوبري رايح جاي ولا رايح بس ؟؟

:lol::p:lol::p

مبارك : قلي بصراحة يا نظيف و مفيش داعي للمجاملة و النفاق .

نظيف : أمرك يا ريس...
- أنا أحسن ولا عبد الناصر ؟
- انت طبعاً يا ريس.. جمال مين دا اللي كان بيخاف من الروس !!
- طيب أنا أحسن ولا السادات ؟
- سادات مين دا يا ريس اللي كان بيخاف من الأمريكان !!
- طيب أنا أحسن ولا عمر بن الخطاب ؟
- انت طبعا يا ريس.. عمر بن الخطاب دا كان بيخاف من ربنا..!!!

:lol::p:lol::p

بيقولك جورج بوش قبل الانتخابات اتصل بمبارك و قله : عاوزك تبعتلي شوية ناس من عندك عشان يسيحولي في الانتخابات و اكسبها في الآخر.. راح باعتله شوية من أعضاء الحزب الوطني و بعديها بكام يوم لقى جورج بوش بيتصل بيه و يقله : الله يخرب بيتك..! و قفل السكة في وشه..

و بعديها بشوية لقى كونداليزا رايس بتتصل بيه و بتقوله : الله يخرب بـيتك ..!!! و قفلت السكة في وشه...
و بعديها بيل كلينتون اتصل و قله : الله يخرب بيتك !!! و قفل السكة في وشه برضو..!
الراجل هيـتـجنن و بيقول هوا فيه ايـــــــــه ؟!!!
شوية كمان لقى بتوع الحزب الوطني بيتصلو بيه من أمريكا و بيقولوله :مبروك يا ريس انتا كسبت في الانتخابات الأمريكية !!!!!!!

:lol::o:p:lol:

مرة واحد مسيحي راح للريس وقله : يا ريس هو ممكن واحد مسيحي يبقى رئيس جمهورية ؟

قله : ولا مسلم يا روح امك !!

:lol::o:p:lol:

انجازات حكام مصر :

قد نجح السيد الرئيس عبد الناصر فى إخراج الانجليز من مصر.
و قد نجح السيد الرئيس محمد أنور السادات فى إخراج اليهود من مصر.
و قد نجح السيد الرئيس محمد حسنى مبارك أطال الله فى عمرهفي إخراج المصرين من مصر..!
وفقه الله ومنحه الصحـة و الخير و اليمن و البركات...

:p:lol::o:p