|
هدية مالية
من فترة منيحة صار في مفهوم الهدايا المالية
عيد ميلا ، نجاح ، خطبة ، زواج ، طهور :o ... الخ من مناسبات ممكن يصير فيها تبادل هدايا ، صار احد الاحتمالات هية الهدية المادية بيني وبينكم هية فعالة كتير وبتريحك من الحيرة بالهدية خصوصا وقت شخص ما بتعرفه منيح وما بتعرف شو بحب وشو ما بحب فبتضيفه مصاري ليتصرف فيها على كيفه ومنها بتضمن انه بده يستفيد من هديتك ومنها بتكون طلعت من مشكلة : " شو ممكن اضيفه ؟! " بس هل يا ترى بتحمل شي معاني الهدية العادية !؟ وشو كان بالاصل الهدف من الهدية ؟! |
هلا الهدية المالية احنا بنسميها عنا بالاردن (نقوط) الها عدة فوائد
مرات ممكن تجيب هدية وما تكون ع زوء او مقاس الشخص.... الخ وتنركن عندو لهيك المصاري بتكون متأكد انو رح يعمل فيها شي مفيد هلا متلا بالاعراس لنقوط بيفيد وبحسو شكل من اشكال التكافل الاجتماعي خصوصي لما يكون العريس دخلو محدود والزواج بكسر الضهر ف انا بشوف الهدية المادية شي منيح |
انا اشوفها مع الاشخاص القراب او الاصدقاء المقربين ..... مو حلوة الهدية المالية
و يمكن حتى عيب :pos: من ناحية هي هدية عملية ... و ما تكلفك وقت و تفكير و تدوير بالسوق ... بس من ناحية ثانية الهدية العينية ... تكون تذكار يتذكروك فيه دائما احسن من اوراق مالية رح تنصرف بعد فترة و تختفي ... و بالنسبة للناس اللي العلاقة معهم رسمية ... الهدية المالية مو عيب :lol: |
ما في شي بحسو مزعج قد انو حدا يعطيني مصاري على انها هديه
فعلا بزعل وما بقبل آخد المصاري .. انو بدو يهديني ولا يشحدني :? انو الهديه مهما تكون بسيطه ( ممكن قيمتها اقل من المبلغ نقدي ) .. بس كتير بتكون مأثرة اما اللي ما بدو يتعب حالو ويفكر شو الهديه المناسبة .. لا يتعب جيبتو وبلاها المصاري |
هلا انو تقدم مصاري؟؟ انا ماكتير بحبذ الفكرة هي فكرة عملية وانو ازا مابتعرف شو رح تجيب اوكي حلوة الفكرة.. هلا هون محل مو اعدة في فكرة الـ gift cards وهيي اللي بتحط عليها مصاري وانو هوي بيشتري اللي بدو ياها...وهيي بتصير حسب انو ازا بتعرف هالشخص بيحب هالمحل الفلاني بس مابتعرف شو تجبلو...فيك تحط المبلغ اللي بدك ياه ع هالكرت..وتعطيه ياه..وهوي بيقدر يروح يشتري اللي بدو هي بحبذها اكتر بس بيضل للهدية المعنوية وقع عالنفس اكتر...حتى لو ماعجبت الشخص اللي حيتلقاها |
ليش لاء الفكرة ظريفة
يعني اهديني مصاري احسن ما تهديني شي تاني يمكن بتفك ازمة او مشكلة و بترجع لطبيعه العلاقة بين الاشخاص بس احلى هدية (لما بنت بتهدي شب شي مبلغ محترم انوو روووح مني الك ;) |
هي اريح شي.. عطين مصاري و هني بيصتفلو شو بيعملو فيا.. مين عاد الو خلق بينزل عالسوق و بيدور على هدايا:pos::pos:.. اي انا كلما بسمع كلمة سوق بمرض :sick::sick: :D |
اقتباس:
متل ما قلتي المصاري حلوة خصوصا وقت بكون واحد محتاج الها بتجي بتفك ازمات كتيرة . ووقت بتكون الهداية غير مفيدة بتجي المصاري انفع للانسان اللي عبتلقاها من الهدية بحد ذاتها بس ما كأن وقت بدها المصاري تصير هدية بدا تفقد قيمتا المادية ؟! الشي بيرجع بحسب مفهوم (( الهدية )) بالنسبة لكل شخص بس انتي بحسب مفهومك بتقدري تتذكري شي وحدة من هلنقط اللي نقطولك ياها اهلك او حدا من قرايبينك ؟! ويا هلا :D |
اقتباس:
انا عندي المقربين بضيفوا مصاري (( كونن من اهل البيت )) والبعاد بضيفوا هدايا ملموسة :shock: بس لهلق ما فهمت معادلة العيب ومش عيب :? |
اقتباس:
انه المصاري كتير اوقات بتنفع اكتر من الهدايا الملموسة كونك بتقدر تصرفا بالمحل اللي بدك ياه والمحل اللي انت فعلا محتاج اله وبتحل ازمات كتير خصوصا اذا كنت عامل عرس ودافع عليه هديك الحسبة فبتجي البحصة اللي بدا تسند الجرة :lol: بس في الها شي قيمة فعلية ولا الهدايا الملموسة قيمتها اعلى واكتر ؟! |
اقتباس:
انه بدل ما تقدم المصاري بظرف صغير بتروح على البنت بتحط المبلغ هنيك .. يعني اختلفت الطرق والمفهوم واحد يعني بدك تقوليلي انك بتحبذي مثلا يجيكي على نجاحك 15 طقم فناجين قهوة على انه يصلك مصاري تصرفيها بالمحل اللي بدك ياه ؟! ** هاموش : على فكرة الهدية المادية اختراع شغل ايا بلد على حد علمك يعني فين بديت هون ولا هنيك ؟! |
اقتباس:
نفس الشي، المقربين جدا (الجد - العمة ... الخ) يجوز يعطوا هدايا مالية بس الاصدقاء المقربين الك ..... يجيبوا هدايا ملموسة العيب .. انو ممكن تجي من باب ... روح انت اشتري اللي بدك ياه .... ! يعني الهدية المعنوية ... فيها تقدير اكبر للشخص ... حتى لو ما تفيدوا 100% .... يعني صحيح المبلغ افضل من مزهرية او خاتم ذهب من الناحية العملية .... بس مو حلوة بحق المقابل بس في شي مو حلو ... انو الهدايا تتنقل بين البيوت ..... و لذلك نشوف يحتفظوا بورق الهدايا (التغليف) حتى ما يغلطوا و يؤجعوا نفس الهدية للشخص اللي هداها سابقا :lol: |
اقتباس:
هلا مشان اصة الاعراس بشكل خاص...ع حد علمي ومتل مابشوف انو الهدية المادية(المصاري) هيي اللي بتتقدم حصرا فانو بالاعراس مافي هيك اختلاف اجتماعي فيني قول...الا في حال حدا كتييييييير قريب من العيلة بالاضافة للمال اللي بينحط نهار العرس في هدية تانية بيكون العرسان بحاجة الها بس انو ازا بمناسبة اجتماعية تانية...بحسها انو لسا مااخدت القبول الاجتماعي الكافي... ومشان الهاموش: بعتقد عنا بديت ابل بسبب الهدية الاجتماعية بالاعراس بس ماعندي فكرة ايمت بديت هون |
اقتباس:
وتخوزقو اصحاب العرس ! انو منين رح يغطو المصاريف ؟ بس بباقي مناسبات انا شخصيا ما بحب حدا يهديني مصاري لأنو ساعتها الهدية بتفقد قيمتها المعنوية وبتحسسني انو هالشخص ما جرب حتى يعطيني شوي من وقتو ومن تفكيرو لينقيلي شي ... انو لو أد ما كانت رمزية الهدية بتعطي الواد احساس انو لي قبالو فكر فيو مو خود هي مصاري وحل عن سمانا .. !! :D |
اقتباس:
خيو سؤال : في بذاكرتك شي هدية من هالنوع ؟! يعني كونك تحب هالهدايا وبتحسا مفيدة .. وقت بتذكر مثلا هلشخص وبتتذكر هدية قدملك ياها بكون في مصاري بالموضوع ولا بس الهدايا الملموسة هية اللي بتعلق بذهنك ؟! |
اقتباس:
قولتك هدية (( عملية )) وخلصت القصة :lol: |
اقتباس:
لك خيو مو بس عملية, العالم صاير بدها مصاري ما بقت تسأل على هدية خصوصي بهالاوقات.. بعرف كتير عالم تجوزوا او انخطبوا و قالو للعالم المقربين الن انو ما بدهن هدايا, بدهن مصاري ليدفعوا حق الحفلة و ما الى هنالك. و هيك هيك ما بعتقد في حدا بيرفض مصاري..او ما في حدا ما بيحب المصاري:lol::deal:.. :D |
اقتباس:
هلا متلا بين المخطوبين والازواج الهدية المالية ما بتنفع بالمرة وكمان لحد مادياتو منيحه مو مناسبه ابدا انا كان قصدي مناسبه بمكانها الصح زواج ولادة تخرج وحسب معرفتك بالمهدي تاني شي الهدية المادية ما فيها لبس بقيمتها يعني متلا ممكن تاخد طقم كريستال لحد يقوم يرجعلك اياه طقم زجاج انو هاد متل هاد بس المصاري مصاري بدو يردها نفس القيمه |
| الساعة بإيدك هلق يا سيدي 03:08 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
