أخوية

أخوية (http://www.akhawia.net/forum.php)
-   أدب ساخر (http://www.akhawia.net/forumdisplay.php?f=44)
-   -   اختراقات يومية , مقدمة (http://www.akhawia.net/showthread.php?t=112743)

مجنون يحكي وعاقل يسمع 11/11/2008 07:55

اختراقات يومية , مقدمة
 
اختراقات يومية , عبارة عن مذكرات مجنون , يعني مجنون يحكي مذكراتو , من خلال حياة عاشها في مكان معين وزمان متلو معين أيضا , كيف؟ ..... والمجنون اللي عم يحكي مو العاقل يعني ممكن ما يكون المكان أو الزمان اللي عم يحكي عنو ‘مو دقيق كون المجون بيخلط بالمكان والزمان , بس بما أنو اللي عم يسمع عاقل , وبالتالي العاقل بيعيد صياغة الزمان والمكان من جديد وبيتابع السمع على حكي المجنون , أو حكايات المجنون وبيصير المجنون يحكي والعاقلين يسمعو
وبما أن الدنيا اليوم بسوريا برد وقرب كانون " أخ يا شي شوي برد من بردات الكفارين أو صلنفة أو صافيتا بتروح معنا سنة من شوب الصحرا"
اجتمعو حول هالصوبا "أو الصوبيا" يعني المدفأة , وبما أنّو أنا اللي رح أحكي يا بقعد تحت الكوع يا أما بسكت وبيخلص الفلم قبل ما يبلش
اللي أثار الموضوع عندي هوي الحوار اللي فتحو الشباب بالمنبر للحديث عن الخصوصية ’ ةبما أنّو أنا اللي بيملك أو بيتمتع بأكبر خصوصية هون , وبدون ما ابذل أي جهد بالدفاع عنها , لأني مجنون والمجنون بيعمل اللي بيريحو , فأقل واحد ممكن تنتهك خصوصيات , ولا أحد منكم يفكر يعمل مجنون منشان هيك لأنو بيكون عم ينتهك خصوصية المجتمع العاقل وخصوصية المجانين , هوي صحيح متعودين على الإنتهاكات اللي آخرها انتهاك السيادة الوطنية لجمهورية الأبو كمال الصديقة المجاورة , بس لن نسكت ولن نحتفظ بحق الرد , مو منشان شي , المستودع تبع حفظ احتفاظنا بحق الرد امتلا عالأخير
يالله ماضل في وقت يا شباب , حطولكون شي قرمة شجرة بصوبيا الحطب , وبين ما تشعل مظبوط بكون رجعت من الدوان ومنبلش قص ,........ شو بدنا نقص ؟ يعني نروي .. ولك لا ..لا..... نحكي أول قصة

VivaSyria 11/11/2008 08:45

منتظر... وبشغف :D

Remember Me 11/11/2008 10:04

الفكرة ملعوبة كتير , وكلنا عم نستنى

غيديون 12/11/2008 02:23

لك رح صير مجنون من وراك ما فهمت شي:pبس مستنية مع المستنيين

مجنون يحكي وعاقل يسمع 12/11/2008 07:56

متى استعبدتم الناس
 
الإنسان يولد حراً , كما يقول جميع العقلاء , فما الذي يقوله المجنون , شيء مضحك أن يقتنع البني آدم بهذه الكذبة التي كذبها على نفسه وأراد أن يصدقها, وهو مقتنع أنه بني آدم ,أي ابنه لآدب أبو البشر , والذي ارتكب أول معصية عندما حاول الحصول على المعرفة وأكل من شجرة المرفة وانسحب جريمته على بنيه من البني آدمين , لذلك ولدت يا أخي من جد جدو لجدو لجدي آدم عليه الجريمة الأولى وليس عليه السلام إلا إذا أردنا السلام لمرتكبي الجرائم , فأنت أيها البني آدم المنتهكة خصوصيتك قبل أن تأتي إلى الضو وأنت تغني :"طلعنا على الضو , طلعنا على الحرية.
لإنتقال جريمة إليك بدون معرفة حتى رأيك فيها
والإنتهاك الثاني لك أنك لا يد لك ولا راي في قبول المجيء إلى هذا العالم من عدم قبوله أيها المسكين المغلوب على أمرك , وحتى لو كان لديك الرغبة في أن تطل علينا وتؤنس وحشتنا الممتدة ملايين السنين , ولكنك لم تختر لا زمن الإطلالة البهية ولا مكانها , فربما كنت ترغب أن تأتي في القرون الوسطى ,إذا كنت من المستمتيع والمعجبين بأساليب التعذيب , ولست ممن يحبون الموت بطلقة رصاص أو بإبرة الموت الرحيم, وربما كنت تحب أن يكون موطىء قدمك الأول في العراق أو أفغانستان بدلا من السويد أو السويسرا ,لأنك إنسان تحب الهدوء والسكينة والإيمان بالله بدلا من العيش في بلاد فاسقة فاجرة لاتعرف الله ولا تجله ولا تقتل البشر باسمه ولا تلتزم بأوامره , عز وجل , وعلى ذكره عز وجل ,فقد عز على النوم وطيفك على بالي
وتصبحون على خير وللحديث بقايا

العربي الأصيل 12/11/2008 08:44

أكمل يا صديق..انفخ بعض النار في رماد أيامي....وبعض النور في ظلام نفسي....

أقرأك يا مجنون...علّ كلماتك تذيب بعض الجليد عن تلافيف دماغي المثقلة بتفاهات الزمن الحاضر...وللسخرية..الزمن الغائب أيضاً....

أتابعك..بما تبقى داخلي من شغف

yass 13/11/2008 11:42

و طوبى... للجنون


متابع

:D

مجنون يحكي وعاقل يسمع 13/11/2008 13:19

اقتباس:

كاتب النص الأصلي : VivaSyria (مشاركة 1157352)
منتظر... وبشغف :D

انتظر يا ابني بس بتبرك عاقل ما بتحكي بالسياسة , لأنو ما بيجي منها غير وجع الراس , وبعدين الحكي بالسياسة بهالبلد بيجنن , اسلني أنا على مبدأ اسآل مجرب ولا تسأل حكيم, فكيف إذا كان المجرب حكيم متل حضرتنا , ومو حكيم وبس , حكيم ومجنون ,وكمان بيقول المثل " خذو الحكمة من أفواه المجانين

اقتباس:

لك رح صير مجنون من وراك ما فهمت شيبس مستنية مع المستنيين
طبعاً إذا ما جنيت شلون بدك تفهم لغة ,إذا بدك تفهم لغة لازم تتعلم وهاي مو حيّالله لغة

اقتباس:

لفكرة ملعوبة كتير , وكلنا عم نستنى
كل الحياة لعبة وعم نلعب كلنا خلينا نكفي لعب بس بطريقتنا

مجنون يحكي وعاقل يسمع 13/11/2008 13:23

اقتباس:

كاتب النص الأصلي : العربي الأصيل (مشاركة 1158346)
أكمل يا صديق..انفخ بعض النار في رماد أيامي....وبعض النور في ظلام نفسي....

أقرأك يا مجنون...علّ كلماتك تذيب بعض الجليد عن تلافيف دماغي المثقلة بتفاهات الزمن الحاضر...وللسخرية..الزمن الغائب أيضاً....

أتابعك..بما تبقى داخلي من شغف

يكفيني أن يجعلك حكي مجنون تكتشف شغفاً في زاوية ما من روحك , وإن استطعت أن أرسم ابتسامة ولو فيها من المرارة الكثير على وجهك أكون مسرورا لذلك

اقتباس:

و طوبى... للجنون
يحيا الجنون
ويسقط العقل في زمن ال..........
وكلنا مجانين

Sun Shine Art 13/11/2008 23:22

ياريت هل الجنون ...بزيد شوي تاني ومنخلص ...:D

مجنون يحكي وعاقل يسمع 14/11/2008 19:31

اقتباس:

كاتب النص الأصلي : Sun Shine Art (مشاركة 1160055)
ياريت هل الجنون ...بزيد شوي تاني ومنخلص ...:D

لولا شوي كنت رح قلك "فوق كل تعبك على هالرد ,الله لا يعطيكي العافية " أكتر من هيك جنون ,منرجع عاقلين شو منكون اعملنا , ومين قلك أنو بعد هالجنان منرجع منعقل , بعدين إذا أنا اقتنعت بأني رجعت لعقلي شو بيقنع حضرتك وحضراتكون

مجنون يحكي وعاقل يسمع 14/11/2008 20:00

طلعنا على الضو
 
كأنو وصلتني الأخبار من إذاعة لنضن أنو الجو برد كتير بسوريا , رح منتحمل برد متل كل الشعب السوري حتى نكون بنفس الإحساس
أنت هاي Sun Shine Art , وين داحشي حالك بالصوبا , برد , طيب إذا بتعرفي شو بتعني كلمة صوبيا خليكي ملدحشي تحت كوع الصوبا , وإلنا رجعة لقصة الصوبا
ما إن تمد رأسك إلى النور يا بني آدم وأنت تغنّي أغنية السيدة فيروز طلعنا على الضو , طلعنا على الحرية , وقبل أن تلفظ كلمة الحرية تكون إحدى الجميلات المحيطات بوالدتك المصون قد التقطتك , مباشرة إلى مسبح المياه المالحة , ولشدة المفاجأة وعدم وجود الذخيرة الدفاعية لديك إلا سلاح الواع ويع , وثم يشد عليك النطاق المجهز مسبقاً حيث يتم لفك بقطعة قماش لفاً شديداً كما يلف سيخ اللحم وتصبح كالصندويشة الباكية , وكل ذلك حتى يتم الحفاظ على الجسم قوياً مستقيما لتستطيع مستقبلا أن تدافع عن حريتك المستلبة , منذ هذه اللحظة
وقبل أن تصمت , إذا كنت ولداً تستقبلك النسوة بالزغاريد والفرح وربما بالتطبيل والتذمير لكونك الحافظ على أمجاد العائلة والأسرة والحي والقبيلة من لحظة الميلاد وإلى دهر الداهرين , آمين
أمّا إذا كان المولود أنثى , فحدث ولا حرجا , وخاصة إذا كنت الأنثى الثانية أو الثالثة ولا أخ لك , فتصور ي ما الكارثة التي أتيت بها معك ,وربما وصل الأمر إلى الحلفان بالطلاق وانتقل انتهاك الحقوق من حضرة جنابك إلى المسكينة أمك التي لا تعرف أن تنجب إلاّ مقصوفات الرقبة البنات ,وبالتالي ربما كان ميلادك في هذا الوطن الممتد من الماء إلى الماء مبنياً على مشاكل لا حل لها ولا ربط
وفي الحالتين إن كان القادم صبيا أم صبية , فقد أصبح من عداد الموجودين , وأصبح يستطيع أن ينتهك خصوصيات غيره لأنتهاكهم لخصوصياته قبل وأثناء وبعد الولادة , وكل الذي حدث هو عملية ازدياد لعدد المنتهكة خصوصياتهم وعدد منتهكي الخصوصيات

suryoyo 14/11/2008 20:22

متابع للعظم ........ :D

Sun Shine Art 15/11/2008 09:43

اقتباس:

كاتب النص الأصلي : مجنون يحكي وعاقل يسمع (مشاركة 1160814)
لولا شوي كنت رح قلك "فوق كل تعبك على هالرد ,الله لا يعطيكي العافية " أكتر من هيك جنون ,منرجع عاقلين شو منكون اعملنا , ومين قلك أنو بعد هالجنان منرجع منعقل , بعدين إذا أنا اقتنعت بأني رجعت لعقلي شو بيقنع حضرتك وحضراتكون

انت بتعرف انه بتمون تقول الي بدك يا... يا صديقي ...

بس المطالبه بزياده الجنون احسن من انه نفقد الاحساس ..انا بدي ضل حس بالجنون .ومابدي اعقل لان ماشي ...بضل داحشي حالي بالصوبيا ع قولتك ...

متابعه بشغف كبير :D..وماطول علينا ...

مجنون يحكي وعاقل يسمع 18/11/2008 07:57

وبعد ذلك
 
أيه ياسيدنا ملا أنت أو ياستنا ملّا أنت , وهاي زاد عدد الناس اللي رح تنتهك خصوصياتون وأعراضون ويلتعن سلاف سلافون ,لأنو رح يعيش بين الماءين ,أو بين المحيط والخليج , وشو ؟يا سيدنا لسا ما إلك بالقصر من مبارح العصر ودغري صرت عندك تاريخ ولا في أختو , رح يعطوك اسم , منشان شو ؟ مومنشان شي يقطع هالعيشة , ودورها لشوف , كل الغاية من الآسم حتى تتميز عن غيرك من البشر ,كذبة كبيرة . كبيييرة كتير , ححياتك بتبدى بكذبة كتييير كبيرة لعدة أسباب, شو الإسم منشان التمييز ,مين قال هالحكي , وشلون بدنا نميز هالأسماء لنهرف مين الأفضل وشو الفرق بيناتها يعني الفرق بين قرد وجحش واضح وضوح الشمس رغم الإلتباسات الفكرية وثورة تغيير المفاهيم,بل قلبها 180 درجة دورانية ويعني لما الحرامية بيصيرو أبطال وطنيين وعم يسرقو ليعملو شركات كل الغاية منها تشغيل أبناء الوطن , وكل غاية الحرامي اللي سرقك "هاي الكلمة بالمعنى الحداثوي هون"أنّو شايف حالو وصي عليك لأنك قاصر اقتصاديا ومو عارف تدبر أمورك الإقتصادية والحياتية, منرجع على الأسماء العربية , طيب شو لو سموك خالد ,ياسلام شو هاد ياهيك الأسماء يابلا , ولك لسّا ما بين خيّرك من شرك صرت خالد , في ناس عملو عمايل ما عملها عنتر ليحصلو على اسم خالد , ومع ذلك كمان في ناس بترفض تطلق عليهم هالإسم وبتقول على شو خالد , بعدين لا تقلّي اسم خالد أخلد من اسم نيرون , لا بتكون غلطان كتير ,وإذا سمّوك مصطفى ياحبيب القلب , بشو أنت مصطفى ومين اللي اصطفاك . وعن مين اصطفاك , وشو علاقتك بأغنية مصطفى يا مصطفى ... تعا لقلك يا مصطفى
أو إذا سموك حسن . حسن بالنسبة لمين ولشو أنت حسن ,كأنّو نظرية النسبية تبع أين شتين اللي بيسمو بالفرب اإنشتاين ما وصلت لعنا لليوم , شو في انقطاع حضاري بالأمة , طيب هالإنتقطاع الحضاري مقصود واللا مو مقصود ,وأنت مو من حقك الشخصي أنو ما يصير عليك انقطاع حضاري , طيب هيدا مو انتهاك لحقك الشخصي
بالآخر وين بدك تهرب , كل الأسماء كبيرة وكل الأسماء عظيمة , وكلها بتهد جبال وبعدك كل شي إلك تحت منك , شلون بدك تشيل هالإسم وتفز من الورطة اللي ورطوك فيها , تصور حالك أهلك سموك سعيد وانت بين الماءين , لا لسا لو كنت لبناني والقصف بكل الوسائل وخاصة وسائل الشتم وبيمرق عليك واحد وبيقللك نهارك سعيد يا سعيد " هاي تحية في بعض مناطق سوريا ولبنان متل مرحبا "وأنت ياسعيد ما عارف حالك لا وين كنت ولا وين رايح
وعم تتمنّى يكون أهلك مو عامليلك غير شغلة وحدة صح وهيي لو أنّو مسمايينك تعيس بدل سعيد على القليلة كانت حياتك بديت صح على الأقل
ونهاركون سعيد كلكلون قشّة لفة


الحلقة القدمة نفس الموضوع بس أسماء الإناس
وأنا رايح فوت أنعس ونام ,يعني رايح فوت نام وصير احلم ..أنّو بلدنا صارت بلد
الحديث القادم

sslieman 01/12/2008 02:54

الاسامي كلام شو خص الكلام عينينا هني اسامينا

مجنون يحكي وعاقل يسمع 01/12/2008 07:08

الأسامي كلام
 
اي صحيح ,,, الأسامي كلام ,ومتل ما بتقول فيروز اللي اسمى عطى للفيروز قيمة إضافية , وشو خص الكلام عنينا هني أسامينا
ومتلما وعدتكون نحكي اليوم عن أسماء الحبيبات والأمهات والأخوات وبعض الإنتهاكات لحقوقهن , وهاي نون النسوة
الصبح لبكرا , مش سهلة والواحد لما بدو يستخدمها لازم يدير بالو ,
زبلة اسم جميل , لأنو هو مرحلة من مراحل حياة الوردة , وهي حالة الذبول , ومتل ما شاعرنا الأخضل , واللي سمو عكس ما هو , الصغير, وهو أكبر من تلات رباع شعراء عصرو من الكذابين والتزلفين وشعراء البلاط , حيث قال
وعمر الورد ما يهمي شذاه
على دنياه لا شهر وعام
وزبلة بطلة الموضوع اليوم . بدوية من الصحراء , وهي التي يصف عيناها شاعرنا نزار قباني بالعيون الحور , ويمكن يكون إلها علاقة بحوريات الجنة , ما بحط شي على ذمتي , لسا ما رحت لهنيك , بس قريت كتب في وصف الجنة وزنه حوالي تنين ونصف كيلو لأحد الأئمة اللي ما بحياتو كمان راح لهنيك ورح يروح علىما يبدو
منشان ما نطول علبم وبما أنو الأدب العربي عوَيص وبالفاموس زبلة تعني الوردة الزابلة , بس إلها معني آخر حيث بيقول لسان العرب
مصدر زَبَلْت الأَرض إِذا أَصلـحتها بالزِّبْل وزَبَل الأَرضَ والزرعَ يَزْبِله زَبْلاً سَمَّدَه ,الـمَزْبَلة
فريحة شو بدها تعطينا هالحورية بعد كلشي صار وشلون بدها تتخلص من هالورطة ,ومين رح يصدق أنو ريحتها ريحة الورد مو ريحة الزبل بالمعنى الآخر
عندي صديقة اسمها صفاء , والإسم على مسمى وهون الكارثة , بدك تقلي شو المشكل , المشكل أنّو صفاء هي أكثر صفاءاً مو من كاس الماء , أكثر صفاء من الكاس اللي مقطر قطرة ورا قطرا , تبع أبوها لنفنافة , بغنية نفنافة يا نفنافة انتبهيلي عا هالجرة مليانة عرق صافي . كمان بدك تقلي شو المشكل , بعرف بعرف , المشكل وين بعد في صفاء بهالدنيا وبهالعصر , وخود يا فوت بالحيطان , من يوم ما وعيت صفاء وهيي من حيط لحيط ,حتى صارت صحبة بينها وبين الحيطان.
يعني بهيك بلد وبهيك زمن لازم تكون الواحدة أسمها صفا وصفا يعني الصخرة , يعني الحجر الكبيرة اللي هيي بينعمل منها الحيطات , ونحنا متل ما بتعرفو بزمن الحيطان

حلقتنا القادمة باللاءات العشرة تبع اللوح المحفوظ المفروض عليك تنفذها كلها , لا لا لالالالا واللي كانت سبب غنية ال لالا

مجنون يحكي وعاقل يسمع 01/12/2008 07:16

عينينا هني أسامينا
 

أي صحيح ,,, الأسامي كلام ,ومتل ما بتقول فيروز اللي اسمها عطى للفيروز قيمة إضافية , وشو خص الكلام عنينا هني أسامينا
ومتلما وعدتكون نحكي اليوم عن أسماء الحبيبات والأمهات والأخوات وبعض الإنتهاكات لحقوقهن , وهاي نون النسوة
الصبح لبكرا , مش سهلة والواحد لما بدو يستخدمها لازم يدير بالو ,
زبلة اسم جميل , لأنو هو مرحلة من مراحل حياة الوردة , وهي حالة الذبول , ومتل ما شاعرنا الأخطل , واللي سموه عكس ما هو , الصغير, وهو أكبر من تلات رباع شعراء عصرو من الكذابين والمتزلفين وشعراء البلاط , حيث قال
وعمر الورد ما يهمي شذاه
على دنياه لا شهر وعام
وزبلة بطلة الموضوع اليوم . بدوية من الصحراء , وهي التي يصف عيناها شاعرنا نزار قباني بالعيون الحور , ويمكن يكون إلها علاقة بحوريات الجنة , ما بحط شي على ذمتي , لسا ما رحت لهنيك , بس قريت كتاب في وصف الجنة وزنه حوالي تنين ونصف كيلو لأحد الأئمة اللي ما بحياتو كمان راح لهنيك وما بظن رح يروح علىما يبدو
منشان ما نطول عليكون وبما أنو الأدب العربي عوَيص وبالقاموس زبلة تعني الوردة الزابلة , بس إلها معني آخر حيث بيقول لسان العرب
مصدر زَبَلْت الأَرض إِذا أَصلـحتها بالزِّبْل وزَبَل الأَرضَ والزرعَ يَزْبِله زَبْلاً سَمَّدَه ,الـمَزْبَلة
فريحة شو بدها تعطينا هالحورية بعد كلشي صار وشلون بدها تتخلص من هالورطة ,ومين رح يصدق أنو ريحتها ريحة الورد مو ريحة الزبل بالمعنى الآخر
عندي صديقة اسمها صفاء , والإسم على مسمى وهون الكارثة , بدك تقلي شو المشكل , المشكل أنّو صفاء هي أكثر صفاءاً مو من كاس الماء , أكثر صفاء من الكاس اللي مقطر قطرة ورا قطرا , تبع أبوها لنفنافة , بغنية نفنافة يا نفنافة انتبهيلي عا هالجرة مليانة عرق صافي . كمان بدك تقلي شو المشكل , بعرف بعرف , المشكل وين بعد في صفاء بهالدنيا وبهالعصر , وخود يا فوت بالحيطان , من يوم ما وعيت صفاء وهيي من حيط لحيط ,حتى صارت صحبة بينها وبين الحيطان.
يعني بهيك بلد وبهيك زمن لازم تكون الواحدة أسمها صفا وصفا يعني الصخرة , يعني الحجر الكبيرة اللي هيي بينعمل منها الحيطان , ونحنا متل ما بتعرفو بزمن الحيطان

حلقتنا القادمة باللاءات العشر تبع اللوح المحفوظ المفروض عليك تنفذها كلها , لا لا لالالالا واللي كانت سبب غنية ال لالا
وعاللالا ولالا ولالا وليش الزعل يا خالة وهيي زعلت لحالا



الساعة بإيدك هلق يا سيدي 05:08 (بحسب عمك غرينتش الكبير +3)

Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون

Page generated in 0.04599 seconds with 10 queries