أخوية - تهاوي البورصات العالمية

شفتو إنو التخلف أحياناَ بيكون نعمة !!!

بما إنو سوريا ما عندها بورصة ...
و بما إنو القطاع المصرفي عنا بمرحلة الطفولة " بس طفل منغولي "
و بما إنو إقتصادنا لساتو بين قوسين إشتراكي و لساتو ما تحول لما يسمى و كمان بين قوسين ... اقتصاد السوق الإجتماعي "ولا رح يتحول"
و بما إنو أميركا محاصرتنا و قاطعة عنا المي و الكهربا و ما إلنا منفس على كلشي مغرِب
و بما إنو و بما إنو ... و العد يطول ...
لذلك ...
فينا نقعد نتفرج عالإقتصاد العالمي و هوي عم ينهار و لا ينهزلنا جفن :o
و فينا نسمع خبر تهاوي البورصات الخليجية و العربيةو الآسيوية و نحنا عم نضحك عليهن :lol:
و فينا نراقب أسهم البورصات العالمية عم تسقط كزخ المطر و ما نخاف يلطشنا شي سهم طايش
و فينا نراقب افلاس بنوك العالم بدون أي اهتمام يذكر !!! :larg:

طيب هاي مو نعمة ؟
هلأ تهاوي البورصات العالمية كان مستمر خلال أسبوع العطلة بالدول الإسلامية .. مشان هيك ما كان فينا نشوف شو الإنعكاس على العرب و الخليج تحديداً

اللي ذكرني بالقصة اليوم هوي خبر خسارة البورصة السعودية و فور بدءالأعمال اليوم بنسبة 10 %
رقم مخيف و بوقت قياسي ... باقي دول الخليج الخسارات كانت بحدود 5 %
و مبارح كان خسارات بورصات الإمارات بنسب حوالي من 5 % كمان
و أكيد بورصات موسكو و طوكيو و أوروبا عم تنزف كمان بعد الأميركية

خلال العطلة كانوا الإقتصاديين العرب الأغبياء طبعاً عم يحاولوا يطمنوا المستثمرين و يقولوا إنو بالخليج ما رح يتأثرو مشان ما حدا يسحب أسهمو

بشرفكن تفرجوا على شي قناة اقتصادية و شوفو الأسهم باللون الأحمر

يعني أنا بصراحة شمتان .. و هاي هيي نتائج "الإباحية" الإقتصادية .. إن جاز التعبير

أنا بصراحة ما بتخيل إنو سوريا ممكن تتأثر بالأزمة و إزا طلع شي خبير اقتصادي سوري خصوصاً الرجل الغامض المدعو "مصدر مسؤول " و طلع يحكي غير هالحكي فأنا بشك يكون مشان الشحادة مو أكتر .

خلونا نراقب و نشوف آخرتا لهالأزمة التاريخية .. لأنو 90% آخرتا رح تكون وخيمة و نتائجها رح تغير وجه العالم الحالي و يمكن خارطة القوة العالمية .