|
قدسية الفرد وقداسته من اي تستمد قوتها
مرحبا شباب صرله فترة شاغلني هالموضوع
انو بكل بساطة بتلاقي بالمسار التاريخي لتطور التاريخ بيمشي وفق افق واحد لكل فترة في شخصية مقدسة عم تطلع وبيصير النقاش فيها ممنوع وبتطلع فوق مستوى البشر وببنسى كل اخطاءها . يعني اول شي كانوا الأنبياء حلو .... ولهلأ ما عم نقبل نناقش انو الأنبياء غلطوا رغم اذا بدنا نيجي للإسلام ما القران نفسه بيقول انو النبي " محمد " غلط بقضية الأسرى بعدين صرنا بقدسية اشخاص فمثلا حاليا لا يقبل النقاش بشخص ماركس او لينين او انطون سعادة او حتى جيفارا وموضوع رغم انو جيفارا غلط مثلا لما استلم وزارة الإقتصاد بكوبا . طيب هيك جو من وين بيستمد قوته برأيكن؟ انا برأيي من الجهل ........ يا ريت نناقش الموضوع تحياتي الحارة ظل جيفارا |
سيدي لربما كانت قدسيت نابعة من رغبةالسدنة الذين يتسلقون على تاريخه
فهم المستفيدون الاوائل من قضية الحفاظ على الهالة القدسية حوله وبالتالي هم يتسترون بها لمصالحهم الخاصة ولو اعملنا مبدا النقد على اساس كلناكالقمر ه جانب مظلم فاعتقد انهم سيخرجون من المولد بلا حمص |
في اعتقادي انه توجد عدة اسباب لهذه الظاهرة, بس حابب اشدد على واحد الي انا شخصيا مقتنع فيه كثير, وهو انو هؤلاء الاشخاص يستمدون نفوذهم من حاجة البشر (الطبيعيه برأيي) للناس المقدسين والابطال. فتصور معارك من دون ابطال, مع العلم انو لو بتفكر فيها بتلاقي انو يمكن شوي سخيف نقول عن القائد الفلاني بطل, يمكن هو شجاع بس بدون جيشه والتكنولوجيا والخبره الخ... ما كان حدا سمع عنو. او تصور حركه فكريه بدون رمز. باختصار اعتقد انو الناس دائما بحاجة لهذا الشخص العظيم الذي يستمدون منه قوتهم وقد يشكل لهم دافعا للمتابعه في هذا الطريق الذي اختاروه.
لو بتفكر فيها بتلاقي انو هالمقدسين بختلفوش كثير عن غيرهن, اذكى او اقوى شوي يمكن. بس حاجة الناس لشخص من هذا النوع (وبالتالي استعدادهم لتجاهل عيوبه) وتزامنها مع وجود احد هؤلاء, زد على ذلك الظروف وعوامل الصدفه... وهاي هي الخلطه عشان يصير عندك بطل, بتقدر تضيف ملح حسب الرغبه :lol: |
وبالتالي استعدادهم لتجاهل عيوبه)
وجيل بعد جيل سيكون التجاهل مدعاة لخلق الطغاة وقد يكون الطغاة احزاب ايضا يسحقون منتقدي الهيهم المزيفة بفتاويهم الحقيرة التي لا تنطلي الا على البسطاء الذين يحكمونهم تارة بالفوبيا الجحيمية او اي فوبيا اخرى المثال الذي تحتاجه الشعوب هو البطل العادل الذي يورث عدله وليس البطل الكذاب والا ستكون نهايتنا نهاية وخيمة جدا على رؤوس مستقبلنا وتاريخنا |
لما الانسان بيحب شخص دائما بيحاول يغطي على اخطاءو او يتغاضى عنها ويعتبرها امور تافهه او سطحية مش كتير مهم نعطيها اهمية لان بنعتبر انو ايجابياتو اكتر من سبياتو هاد بس لان حبينا فكرة فيه ممكن تكون هالفكرة فعلا جديرة انو تنحب فيه
يعني جيفارا حبينا فيه نضالو مع الشعوب المقهورة لهيك ما عد عنا مهم اذا غلط بموضوع استلامو وزارة لان رح يكون تبريرنا دائما انو الانسان بيغلط وهيدا غلط صغير وتافه اذا قارنتو بنضالو الطويل وهيك هيك بيزيد حبنا لشخص من حبنا لماقدمه من ايجابيات وماعاد نفسنا او حتى قلبنا يطاوعنا انو نلتفت لاخطاءو لانو عم نفكر بحب وبقلب مش بعقل هيك لما بنكره شخص تماما بيصير همنا نشوف اخطاءو مهما كانت صغيرة لان عم نحكم بقلبنا لما بنصير نشتغل بالعقل بدون اهمال القلب بيصير في كتير من التكامل والتوازن:D |
اقتباس:
اقتباس:
اتعرفين ان الامر سيصل بنا كما وصل بغزة حينما تغرق بالدماء والاطراف المبتورة والنساء الثكلى والاخوة الذين يقتلون اخوتهم باسم الله ثم نقول هذه مجرد تفصيلات بسيطة وتاريخ النموذج يغفر له لا بد ان تكون المقارن بين الخطا ونتيجته وما يترتب عليه مستقبل وليس المقارنة مع تاريخ النموذج احترامي احييك |
اقتباس:
مش انا يلي عم قيم هيك انا عم قول السبب يلي بيخلي الشخص قدسي عند بعض الناس وممنوع نحكي عنو انا ما عندي شخص مقدس والكل قابل للنقد والتقييم متل ماذكرت فعلايلي انا ذكرتو هو بيعمل الفاجعة لكان تقديس الناس حاليا مش فاجعة برايك:deal: |
واللهي شوف انا بشوف متل ما قال الزميل (فلسطيني لا تقرف)
بشوف انو في حاجة لحتى العالم تاخد قائد عظيم او بطل كرمز لانو الناس بتتاخد بالمظاهر بجيك واحد بيحكي عن لنين مثلا -----مع اني بحترم الشيوعية ----------- بس ما بحسن بقول انو الشي يلي ساوو مثلا ببولندا كان شي منيح اكيد لأ وانا كتير بحترمك على هل شغلة يا ظل جيقارا ياخي مو مجاملة بس انت زلمة فهمان مو متل بعض جماعة ما بيعرف الله وين حاطو المهم انشا الله ما كون طولت ومتمنا العالم تحي تشاركنا الموضوع |
طبعا اسلوب التقديس والتأليه فاجعة بحد ذاتها اذا كان التقديس معناه
تمهيد الطريق الى خلق حج عقلي على من ينتقدون هذا الشخص المتاله اعتذر اذا كانت رسالتي قد وصلت على اني اعارضك انا لا اعارضك وانما اكمل رسالتك وردك بقدر المستطاع :deal: |
اقتباس:
بالنهاية الموضوع بيرجع لمتل ما قال جيفارا الوعي العامل الاهم في نزع فكرة القدسية من عقل اي شخص وانو ننزع الافكار المسبقة سواء كانت ايجابية او سلبية ونتعامل على اساس الايجابيات والسلبيات والنتائج |
مجرد تقديس الشخص وإلباسه رداء الالوهية هو امر سلبي بحد ذاته
حتى لو كان هذا النموذج يُخلق لتحفيز الناس والهيئة الاجتماعية للتقلد به والتمثل لانه ببساطة بمرور الوقت سيتحول هذا النموذج الى طاغية او سيتحول سدنته الى طغاة في ظله لذلك من بداية المشوار غلق الباب امام النقد البناء لذاك النموزج مهما كانت صورته براقة فجيعة بحد ذاتها كمبدأ :deal: |
رد
هلأ اول شي بشكر كل اللي شاركه وفخور انهن كلهن فاتوا عنجد بجو النقاش
اول شي بدي ارجع كرر فكرتين اساسيتين مرقوا الفكرة الأولى من صديقي أرسلان انو اللي حوالي الشخص إلهن فائدة كتير كبيرة بأنو ينعطى هادا الشخص قدسية لأنها بالضرورة بتنعكس عليهن وتاني فكرة من فلسطيني ولا تقرف وانا بتمنى منه تغيير الإسم ... انو لحنا عنا حاجة اساسية لخلق بطل واكبر دليل على هيك الأساطير اللي تمحورت حول شخصيات افراد من شمشون إلى جلجامش و مستر إخلس والعديد من الأساطير التي كانت تتغنى ببطولة الفرد كمان بنفسجة نبهت على فكرة حلوة هي ألية حصول القداسة وترسخها في الفكر .... وبتوقع انها حطت السبب الرئيسي هو الجهل هلأ انا برأيي صار عنا شيء فكرة منسقة بنقدر نعتمدها كمقياس مشان نتلافى بينا وبين حالنا قدسية الفرد وبتمنى الكل يفكر فيها وانا رح فكر فيها وخصوصا اني حاطط ببالي شخصيات افراد حواليها هالة بالنسبة إلي . هلأ اول شي الألية بتصير انو ننسى عيوب شخص امام ما قدمه وهيك بنكون بلشنا نخسر المصداقية بتقييمنا له . السبب بيكون ولازم نركز كتير على السبب مشان نقدر نشوف اذا عنا هيك او لأ الأسباب اللي طلعت معنا لهلأ تلاتة وهي 1- الجهل العام وقلة الوعي كعامل اساسي واول وهيدا مقياس بنقدر نقيم في حالنا 2- ان يتاجر اشخاص بأسم الفرد المعين وهيك بيصير من مصلحتهن ترسيخ فكرة قدسية الفرد لأنها بتنعكس عليهن وهيدا بنقدر نتلافاها بحيث نشوف مثلا مين اللي عم يحكي كتير بإسم شخص وهيك ظاهرة بالعادة بتاخد شكل ابراز حسنات شخص معين دون مساوئه وبتتجلى وبوضوح بإعتبار كلماته تابو مقدس وهون بتذكر رفيق الحريري وعلاقاته والإنتقادات اللي كان يتعرض إلها من اشخاص لما كان عايش وكيف صار نفس الشخص عند نفس الأشخاص بطل وشهيد وصار اخ ورفيق نضال عندهن نفس الشي برجع لأتذكر ناجي العلي اللي كلنا بنعرف انو كان يتلقى تهديديات من اطراف للأسف فلسطينية ولما توفى صار الكل يتاجر بدمه ... 3- وهو عامل اساسي ومهم جدا ألا وهو العامل اللي قدمه الأخ الفلسطيني وهو الرغبة الداخلية من ذاتنا انو نخلق ابطال نرمي عليهن اساطيرنا وهيدي الحالة ما بنقدر نعمل مشانها إلا الوعي الزائد .... بأخر ردي ما بقدر غير أتشكر سوري محشش على مشاركته الجميلة واطرائه الأجمل واشكر كل المشاركين بالموضوع وانتظر اراء لسا بموضوع قدسية الفرد ... تحياتي الحارة ظل جيفارا |
اي على راسي حارتك واكيد انا يأيدك بهل الكلام
وانا برأيي انو كل شخص يجي يحكي عن شخصية معينة وانا بدي احكي صالح العلي وابراهيم هنانو وسلطان باشا الاطرش اكيد مستغربين بس المشكلة انو العالم يلي بيعرفو حقيقتن كتير قلال هلأ هدول العالم كانو عبارة عن اقطاعيين ولما شافو انو فرنسا بدا تاخد كلشي فما لاقو الا انو يقاومو مو بدافع حب الوطن لأ كان الامر لمصلحتن يعيني الشغلة كلها مصالح بمصالح اكيد مو غلط انو الواحد يحافظ على مصالحو بس كمان غلط كتير كبير انو انقدس هيك ناس مع اني هنة ما ساوو شي للوطن كل يلي صار اني مصالحن اتلاقت مع مقاومة فرنسا لذلك صار هل شي ويا شباب بتمنا نزيل الهالة او جزء من الهالة عن غير اشخاص كمان وشكرا |
اقتباس:
صح عندهن التلاتة وخصوصا عند هنانو كان في تلاقي بين الوطنية والمصالح الشخصية يعني الزلمة حلو نشوف إنو لولا عنده اراضي يمكن كان ما فكر يعمل شي ... شكرا لمرورك تحياتي الحارة ظل جيفارا |
اقتباس:
أنو البعض كمان بفكروا انو اذا انتقدوا شخصية كبيرة أومحبوبة .... فهني بكونو عم يخرقوا القاعدة و عم يتميزوا عن غيرهون ....و على أساس أنو هني أفهم من غيرهون و أحيان بكون هالشي بغض النظر عن مصداقية الحكي لازم تنظروا بتجرد و موضوعية للظرف أو للعمل ... بغض النظر عن الشخص أو عن الأفكار المسبقة |
اقتباس:
فإذا مشان نقدر نفيد ونستفيد من هالموضوع لازم يكون طرحنا للأشخاص جميل انا برأيي انو لازم ما نقول للأعور اعور بعينه ... نقول لحنا بنشك ... :yahoo: شو رأيكن ؟ تحياتي الحارة ظل جيفارا |
هون ما صفت قصة قدسية بشر ، يعني ما صفت انو والله تقول فلان معصوم عن الغلط يعني بالنهاية احنا عم نحكي عن بشر عاديين بدايتهم متل بداية كل انسان وحياتهم متل حياة كل انسان ومأواهم النهائي متل المأوى النهائي لـ اي انسان ..
بس القصة برايي صفت قصة ثقة اكتر مانها قدسية ... ثقة وتجربة كمان .. انو انت سبق وعرفت هالانسان بمختلف احداث صارت اللي خليتك تثق بـ مدى ذكاء هالشخص وتثق بـ عقلانيته وبـ انه بـ عقله وحكمته وايمانه وقوته الذاتية بلا شك قادر يخلصك من شئ ما ، وانه رح يكون مخلّص الك باذن الله... وطبعاً هون حكيي عن بشر عاديين متل كل الناس لكن عندهم حكمة زيادة عن غيرهم يسلمو صديق |
اقتباس:
فنحن عندما نثق بالشخص نعطي افكاره حيزا من افكارنا ولكن القدسية هي ان نقتبس اقواله ك تابو مقدس لا يجوز البت فيه وفعليا هي فعل مرافق لكاريزما شخص وليس للثقة به شكرا كتير إلك على المرور اقتباس:
تحياتي الحارة ظل جيفارا |
| الساعة بإيدك هلق يا سيدي 11:02 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون