|
العطب مننا ولا منن
الموضوع ما يلي :
يا جماعة بدي أحكيلكم على شغلة صارت معي من شوي أجاني زبون أمبارحة وأعد يقيس ويتقيس وأعد يقيس ويتقيس وأعد يقيس ويتقيس وأعد يقيس ويتقيس وبلا طول سيرة بالاخير قال الزلمة قصرولي هالبنطلونات ونقا بنطلونين تلاتة وأردف وقال مو الخياط تبعكم بيفهم قلناله أيه بيفهم قال لكن خلوا يعملي ياه من قدام أقصر من ورا ويرجعلي الكحتة متل اول و..و..و..الخ المهم قلناله تكرم وبكرا بيخلصوا إن شاء الله حمل حاله الزلمة وراح وبعد 5 دقايق رجع وقالي ياريت تبدلي هاللون بهاللون وتحطلي هالبنطلون بدل هالبنطلون قعد ساعة يونون ويتونون حتى أنا طاش حجري وبديت أتنرفز منه بس بلعتها لأنه هو زبون ولازم نحترمه المهم حمل حاله وراح الزلمة وبعتنا الاغراض على الخياط وشرف اليوم سيادته وقعد يتفحص البطلونات وقال : هي الدرزة عويجة وماي مظبوطة قلتله : هي من المعمل ومظبوطة والفرق تقريبا نص سم على خود وهات وخود وهات وخود وهات وقال انا ابن مصلحة وكنت بأميركا 35 سنة بهالمصلحة يعني والمعنى الي فهمته منه أني بما أنه قعد بأميركا فلازم يكون فهمان أكتر من أهل سوريا وتحديدا حلب ومع انه الخياطة مظبوطة بس هيك بده يتشودق لأنه جاي من أميركا النقطة الي بدي احكي فيها ليش كل ما أجا مغترب بيعقد بيقسم وبينظرعلينا وبيكون عبيجلي صحون وبعبي بنزين يعني هالتنظير لازم نهضموا يعني ؟!!!! يعني نحنا ولاد السبعة وهنن أولاد التسعة مع أحترامي للمغتربين ما عبجمعهم كلهم بعض منهم يعني العطب مننا ولا منن ما عبعرف ؟  |
عقدة الخواجة هاي يا خال.... هاي متجذرة عندنا انو كل شي اجنبي احسن من عنا.... يعني متل لما كان يجي تهريب من تركيا غراض المطبخ من شي عشر سنين... انو ستوك الستوك تبع ستوك بضاعة تركيا يعني تلاقي وطني أحسن بألف مرة منو... يجي يبيعو بضعف سعر الوطني لأنو تهريب... و لأنو تهريب الناس تفترض انو أحسن
هامش: في بحلب خياطين الله وكيلك يحطو الأخوين ARMANI بجيبتهون الصغيرة |
على أساس انُ كل فرنجي برنجي
يعني |
يا سيدي بدي اقلك الفرنجي برنجي
بس سبقني فيها ارسلان الحبيب بس يا اخوي ياس أوقات الوضع بجد ما بينحمل وخاصة وقت بيبدا بيقارن هون بقا بفلجك بكلامه لك والمصيبة وهي بكل امانة وبستحي أكتبها بس بدي أكتبها أنه بيشقني وقت بينظر علي وأنا بدي اعمل ادني متل قرص البيتزا واسمع سيجا على نهاوند على طبطبة قاظان مخنق وتحمل إذا بتتحمل |
اقتباس:
اقتباس:
|
لأ حياتو الغلط من الكل
يعني لو مستوى العمل ببلدنا بيصل لشي اسمو مواصفات عالميه كان ما استرجى ابن مرا يفتح حلئو بس المشكله ان المواصفات ببلدنا حسب الصانع او المنتج وعليه ما في مقياس ينحكم الو وقت بصير خلاف هاد مشان الشق الأول الشق التاني تبع التمنظر والله يابوشريك ما بعرف شو بدي الك اي في نا س بتتمنظر وفي ناس هيك طبيعتها تعبي بانزين لسيارتها فل يعني بشي 4 او 5 تالاف ليره وشغله تانيه نسيت اولها الله يرحم ايام زمان لما كان في معلمين اهل صنعه بالبلد يعني المعلم الو مقايسو ما بيتنازل عنها لو بدو يخسر ميت زبون دخلك هل الحكي موجود هل الأيام تقبل مروري:D |
عراسي مواصفات وترتيبات
يعني هلق إذا قلب البنطلون وطلعله خيط بيشبه شعر أنفه وسألك مع زورة وقلك شو هاد؟:o شو بدي أقله خيط نسيانه الخياط وبيبرم تمه وبيجقم حنكه وبيقلك ايمتا بدنا نعتني بالفنشينغ وإذا بتوزنه بقبان شويحنة ما بيطلع 300غرام مع لبسه الشتوي بس هيك بده يقسم ومنشان شق البنزين ضروري الأوكتان وريحة السيارة والقعدة الي 180 درجة على فردة وفردة فهمان علي:deal: |
هم مو مهم الشعره حياتو مالك
المهم بعد ما يلبس النطلون ما يجي يقعد ع ش كرسي واطي يقوم يفلع معو البنطلون شقفتين ال فينشينغ ال فهمان علي مو :o |
يمكن لانو اتعودنا نشوف كلشي مزبوط
|
صدقا مو العطب بالقطعة
بس بيجي وبيطرق بهالطناجر وبيقلك ريجيم طيب بقلك شغلة بكل أمانة واحد سبح بطنجرة محشي ومغترب هو والمحشي مقيم عنا ولبس البنطلون وقال شو هالقياس الخرنكعي بيكون نامله على شي 50 محشية وإذا حكى بتلاقي اخر محشية بباجوقه ونمرة خصره تغيرت شو بعمل أنا وبيقلك قياسات غلط عنا على قولك اميركا أحسن قياساتها لك طول عمره المواطن عنا بيروح بيتسوق وبيطر العملة برات البلد وبيجي على البلد بيحلب البقة البقة = بقاية يعني ما بتنشاف بالعين المجردة ما هو فهمان وبيشق الشعرة بالطول بأرماني بيوقف متل الدركي العصملي قدام بياعة عطورات وبيضحك متل الهوتة هيك عبيصير الله وكيلك تنظير بتنظير |
مو تنظير حياتو مالك
ولا تظلم المغتربين المغتربين ملتعن انفاسهم ببلاد الغربه هاد نقص بشخصية الأنسان هي الي بتطرح هيك طريقه بالتعامل يعني بدك تقنعني ان ما مر عليك ولا واحد من اهل البلد المقيمين بنفس هل المواصفات الخايسه حبيب البي ما بتقدر تعمم اصابيعك مو متل بعضها :D |
معلمي وتاج راسي
انا بعرف المغتربين عايفين حالهم بس والله عبحكي عن فئة معينة من المغتربين وهذا والله اعلم الي حاصل وفي مونونين بالبلد عنا :D بأنتظارك يا غالي |
بتعرف والله قبل مااكمل الموضوع
قلت هاد اليبطيخ كان بشي دوله غربيه يعني انو هو فهمان كتير وهن بلحقيقه جهال بس بضل متل هدو الناس فيهم مرض وهو مالو اي شخصيه لهيك بتغير وهاد الحكي مظبوط وبصير معي كتير |
:D:D:D:D:D:D:D
|
بس ما يكون شغلك متل شغلي معرف
لأنه حاسس حالي متل الببور الخربان وما بقا حدا يصلحه |
يعني تقريبا مش هل قد
|
أنا بظن إنو هيك ناس عندون عقدة النقص أو ما حملون عقلون يعني أنا مثلا مغترب والي بحكي عنو لرفقاتي بس لما ارجع على سوريا عالنظام الي موجود عندون مو أكتر وبصراحة أنا عندي ثقة كبيرة بالمنتجات الوطنية لأنو جد أثبتت جدارة
|
اقتباس:
|
ولك اخخخخخخ بس من هيك مساطر .. انو منيح بالك طويل انت عليهون . بدالك بقلعو فوراً. خليه يروح يفصل لحالو ما يجي يتفلسف على سمانا . انو شعبنا نحنا لايمتى رح يضل ما عندو ثقة بمنتجات اهل بلدو وخريجين اهل بلدو. الغلط منا نحنا مو منن. :x |
العطب بواقع الحياة بالحياة نفسها هالقصة بتصيرة وين ماكان حتى لو مثلا انت طلعت على امريكا ورحت على شي مطعم حستير تقارن الأكل بالأكل الي كنت تاكلو بسوريا يعني القصة قصة نفسيات وبس
|
يعني الحقيقة في موضوع كتير مهم
أنو بتفوت على مطعم من سلسلة مطاعم بأي ولاية بأمريكا بتلاقي الأكلة اللي أكلتها نفس الطعمة يلي أكلتها بمطعم تاني أما عنا فكل مكان ألو طعمة شكل خوش لأنو الشيف ألو نفس عالأكل أكيد في خدمات ومزايا بالتعامل مع الزباين بشكل عام بأمريكا مو متوفرة عنا فيلي متعود على هيك بيشكك أنو جماعتنا هل عندون قدرة يحققولوا رغبتو بالشكل يلي متوقعو وهي اختلاف ثقافات ليس إلا |
الزبون اللي اجى لعندك لو كان باميركا و لو كان بسوق النـسوان فهو رح يتفلسف عليك نفس الفلسفه لانو نفسيتو هيك بغض النظر عن مكـان اقـامتو و خبرتو , يعني حتى لو ما بيـعرف شـي و لا ابن مصلحه اصلا بدو يعلمك شغـلك لانو هو مفكـر حالو فهـيم بالمجمل ,, يعني هيك ناس في منهـم كتـير و ما بالـضروره يكونو جاين من الاغتـراب ..
هلـئ , الموضوع شكـلو بيـطرح اكتر من نقطه وحـده و كل واحد كمش طرف منها و بـلش يشد فيه بس تـعليقا على النقطه اللي ,متل ما فمت ,انت يمكن كنت حابب تطرحها من كل الموضوع اقتباس:
الـسؤال اللي بـعن - بعن متل ما بتعن دعسه البانزين لما بتكون السـياره عالبريك و انت نازل دعس بهالبانزين - ببالي وقت حدا بيقول كل ما اجى مغترب بصير بنظر انو لــــــــيش دائـما بس يـغيب الواحد فتره عن البلد - لو سـنه وحده بس - و بكون راجع زيــاره فتره كم اسبوع او كم شـهر و هو مشـتاق و بدو يسـتغل كل لحـطه و اوّل ما بفوت من الباب بــصير الكل بـعاملو انو ضـيف و بدهم يورجوه انهم كرماء و مرتبين و الخ الخ من اشيا بورجوها للضيف عاده , كأنو هو ما كان عايش معهم من سنه و بيعرف كل شي عن حياتهم العاديه و بيعرف و حافظ هالحركات ؟ انو حتـى الاهل بـيحتفلو و بـصيرو يـعملو عزايم و بـطلعولو طـقم الـصحون تبـع الـضيوف :lol:.. و اذا بتـجي للاصـدقاء مثـلا بـصيرو بنـقرو انو كـيفو الامـيركي - مثـلا - و كل ما لبـس قطـعه او حط نضارات شـمس -مثلا -بقولو اي لكن هلئ ما عاد تعرف تمشي بلا نضارات شمسيه اسئالله ايام زمان , متناسين طبعا انو هالمغترب عم يكبر و انو الواحد بس يكبر في شغلات و عادات بغيرها مع الوقت . وبتـصير هالمغترب و زيارتو اسـيرين بواجـبات و تعقيدات انو حتى جارتون اللي بحـياتو مو شـايفها بدها تـجي تسلّم عليه .. ايه شـو فرجه :? !! بـعدين بينزل عن الـسمان ابو محمد يـشتريلو شي كاظوظايه بتلاقي ابو محمد وقف و سلّم بحراره و جبلو طاوله و ما رضي ياخد حق الكاظوظايه بقوم المغترب المـسكين بـيقلو شـكرا كتير والله انت مافي منك .. ابو محمد اوّل شـغله بـرد عليه فيها بحماسه غير معهوده دائما .. هالكاظوظايه هي لو بتفتل اميركا - مثلا - كلها ما بتلاقي متلها هي اختصاص عمك ابو محمد .. و الخضري و اللحام و البويجي و الكوى و لك حتى الزبااال .. كلو بيـصير بطلع من هدو العبارات و ردات الفعل الرنانه.. و هنن مفكرين انو بهالحركات عم يبسطو مغتربنا السعيد لا و احلى الشي انو كل ما الواحد بيجي بدو يعزمو عشي محل بقدملو الجمله الشـهيره : هـو اكيد هالمحل لا يقارن بانتو شو عندكن هنـيك بس هاد المـوجود عنا يعني ورجي عزرك و لا تورجي بخلك .. و بالاخر على اوّل تعليق صـغير بـيحكيه المـغترب بقولو يي شـو مفزلك و شـايف حالو و مفكر حالو شغله كبيره يعني اذا كان عايش بـ - اسم بلد الاغتراب - بفكر حالو صار افهم واحد .. تســــالي :lol::lol: |
اقتباس:
مية وردة |
إي معك حق مالك في مغتربين ...... بيعملو حالهم أوروبيين أكثر من الأوروبيين و أمريكان أكثر من الأمريكان :lol:......
أخس ما أسرع مالواحد بينسى أصلو و البيئة اللي جاي منها:pos: |
جنون العظمة سمعان فيه
احتمال يكون مصاب فيه |
لو تشوفو البياعين شو بساو بالزباين
كنتو التو ان الله حق ولا شو رأيك ابو الملك حياتو انت :D |
النقطة يا جماعة هي متل ما أنحكى بالمجمل وليس العموم
يعني لما بيجي هالمغترب الي قعدلوا كم سنة بدولة أجنبية حتى أصبحت لغته شي معيب أله حتى لو كان الكل ما عبيفهموا عليه وهو منشان يتميز عنهم -----الكلام على ناس وناس يعني الي بيتقصد يعوج زلعومه المهم هلق المفلسف والمنظر في منه مشكل ملون في على عربي متأمرك أو عربي متفرنس أو عربي ممورييل وتوت وشوكلا وعوامة بس أنا نقطتي ما يلي النقد حلوا بس أله أصول ومو معقول أمسك نقطة وأضل أعن فيها وأشتكي وأعملها سيرة بني هلالي يعني مثلا نحن مثلا عشوائيين ما هو كان متلنا عشوائي أبن أبن أبن عشوائي على حد وصفه راح العينتين حجز بالطيارة وأشتغل وعمل وجمع ثروة أو بورد أميركي أو .........الخ وتطبع مثلا بطباع معينة ورجع منهم شريحة رجعت شافت الناس هي هي ما تغيرت أبدا ونفروا وأستنففروا من الواقع عمنحكي على الفكر والتقاليد والعادات والطبائع ومنهم دينامييكين مشيوا مع المجتمع وطبائعوا وتصرفاته يعني مشيها وأنسا هلق كتير الغلبة قلنا وين ما كان بتلاقيه بس النقاق وألي محسب حاله فهمان وبينظر وبيحكي وبيخطب هذا ألي بيوجع الراس مثلا بيقلك: عنا بالغربة منرجع اللبس بمدة 3 أشهر طيب بتجاوبه التي شيرت الي أخدته 50$ عنا حقه 5$ طيب كيف ما بده يرجعولك ياه وهنن بايعين 10% من بضائعهم ومطالعين المال والرسمال بيقلك: بس بضاعتهم حلوة وجديرة بالشراء بتقلبله التي شرت بتلاقي مكتوب من جوا ميد إن سيريا بيقلك طيب ليش بضاعتنا الداخلية غير هيك ؟ بتجاوبه لأنه الألمان عندهم شروط قاسية ومخابر منشان الأصبغة وقصص وحكاوي ....الخ طيب ليش هيك ما بيصير عنا ؟ بتقله كريم الله بتوقع بعدنا شوي عن الموضوع ومنرجع للنقاق والمتفلسف والمحاضر وخاصة الذي يقول مالا يفعل ويفعل ما لا يقول يعني خود مني حكي وكب بالبحر -------------------------------------------- هلق المداخلة الي أدلت بها الأنسة مورنينغ حلوة وبدي أحكي عن كلمة النقد وقت قالت اني الناس ردوا على المغترب أي شو هاذا ما عاجبه العجب وروح قلبه يتفلسف علينا هلق نقدنا لبعضنا بعتبره جايي من الفراغ طيب أوك شلون يعني فراغ يعني فاضيين ورايقين وإذا أشتغلنا 8 ساعات جدي حربي لما يبقالنا روح وقلب نحكي لمدة ساعتين أو 3 نرتاح بهالمدة يعني منقدر تستقبل الأقارب والخلان وبالويك أند وما بيكون ألنا قلب نجيب سيرة زيد وعبيد وزيدة وعبيدة شو لبست شو عملت شو ساويت وشو بيملك وشو ركب وشو بنى ---------------------------------------------- هلق رد صديقي ماغنوم كتير حلو وهو الثقة الزايدة ما بين البائع والشاري والخطط والطرق والأساليب التي يحيكها كلا الأطراف للظفر لشدشدة الحرامات لكل مين لطرفه وفي قصص عندي ليوم القصص من شغلة الخطط بين الطرفين وأحلى ماغنوم وأحلى شباب وصبايا ومنتظرين تعليقاتكم لأنه بتوقع الموضوع مفيد وأتمنى تثبيتي |
انا واحد من الناس المغتربين
عمري ما تصرفت بمتل هل التصرف الي نذكر بقصتك وبعدين هي بترجع دائما لنفسية الشخص بائع كان او زبون وعليه المودوع جدلي كتير ابو الملك يعني بيقبل كل الأوجه يعني حياتو طق حنك ع الفاضي ولا شو اولك ;) ع الهامش: عجبتني كتير هي تبعت 180 درجه لك انت من وين بيطلع مع هل الحكي |
والله يا صاحبي أحسبني جايب معدل هال5 بالمية من المغتربين مثلا
أو بصورة عامة يعني الموضوع بيجوز ما ينحكى على المغترب نفسه برات البلد هلق في ناس مغتربين داخل البلد بيجوز عبصيبهم برمحي بس برفع القبعة لكل المغتربين خارج وداخل بس شو رأيك بال 180درجة وطرف وطرف قاعد أحلى ماغنوم :D:D:D:D:D |
يا زلمه خوتتني هي 180 درجه
بس صحيحه هاه بس ما التلي انت شلون عرفت :o |
| الساعة بإيدك هلق يا سيدي 17:36 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون