|
حملة توحيد الشعوب العربية
أحييكم بتحية الاسلام السلام عليكم ورحمة الله وبركاته احنا رح نطرح عليكن اليوووووووووم موضوع كتير هام وبغاية الاهمية كتير كتير نتمنى منكن انو نلاقي تفاعلات ومساندات منكن حتى ولو كانت هي المساعدات والمشاركات معنوية وطبعا انا عم احكي معكن بصيغة الجمع هاد لان انا مو لوحدي لاء والحمدلله احنا مجموعة صغيرة بالعدد واليوووووووووم قررنا هاد الموضوعالهام كتير كتير الا وهو موضوع وحدة الشعوب العربية انا واحد من ابناء الاسلام وحابب اني اعمل شي لخدمة الاسلام وللامة العربية لذلك كنت عم احكي مع احد اصحابي وفتحت معو هالحديث والله وعلى الفوووووور قلي انا معك ونسير على بركة الله بس طبعا متل ما بيقول المتل ايد لوحدها ما بتسقف وقررنا انو نعمل حملة يعني حملة توحيد الشعوب العربية واقترحنا هاد الاقتراح على احد المواقع اللي اصلا احنا كنا فيها ( أنا وصديقي) والحمدلله مبدئيا لقينا التأييد من بعض الشباب والصبايا بس طبعاعدد هالاشخاص ليس بالعدد الكافي بكل تأكيد للحملة وتوحيد الشعوب العربية لذلك نحن نقترح عليكم هذا الاقتراح ان تنضموا معنا في هذه الحملة ولكن للعلم ان موافقتكن على الانضمام معنا هذا معناه انكم مستعدين لمواجهة الصعوبات والمشاكل اللي سوف تواجهنا اهداف الحملة هي توحيد كلمة العرب والتآخي والتآزر بين الشعوب العربية والسلام بكل ما تحمله هذه الكلمة من معنى...... وأيضا الحب والعطف ومساعدة الفقراء والضعفاء والمساكين والايتام من العرب والمسلمين واذا سألتونا عن ماهية المشاكل التي ستواجهنا ؟ الجواب بالتأكيد سوف يكون المشاكل ستواجهنا من اعداء السلام والاسلام وأيضا من الذين يزرعون الحرب والفتنة بين العرب والمسلمين ومن هم على شاكلتهم وأيضا من الذين يزعمون انهم يخافون على مصلحة العرب والمسلمين وهم ابعد ما يكونوا عن العرب والمسلمين ومشاكلهم وبالتأكيد سوف يكون هناك بإذن الله موقع خاص يدعم الحملة وأفكارها السليمة والصحيحة ونناقش الاقتراحات والمشاكل التي يعانو منها العرب ومحاولة ايجاد حل نهائيا لهذه المشاكل وياريت اسمع تعليقاتكن على هاد الموضوع واللي بيحب ينضم معنا اهلا وسهلا فيه وحياه الله ولازم تعرفو شي كتير مهم هوى انو الله سبحانه وتعالى قال في كتابه العزيز ((إن الله لا يغير ما بقوم حتى يغيروا ما بأنفسهم ))صدق الله العظيم واهم شي احنا لمسناه اليووووووووووووووووووم من الموضوع هوى انو كان في توحيد بيننا احنا الشباب والصبايا اللي كانو بالموقع اللي اقترحنا فيه هي الفكرة وان شاء الله كل واحد بيحب يشترك اهلا وسهلا فيه مرة تانية بس ياريت يبعتلي ايميلو حتى نقدر نتواصل معو واسمو ومن اي بلد ووين هوى مقيم حاليا حتى نقدر نعطي كل واحد المهمة اللي يقدر يقوم فيها وكامل بيناتو اذا كان طالب بالمدرسة او طالب جامعي او بيشتغل لان متل ما قال الله سبحانه وتعالى ( لا يكلف الله نفسا الا وسعها ) وحتى ما نحملو اكتر من طاقته ويرجى من الذين لا يريدون الانضمام معنا أن يكتفو بالدعاء من أجل تحقيق أهدافنا من هذه الحملة وبكل تأكيد تحقيق أهدافنا يعتبر تحقيق أهدافهم أيضا برجع وبقلكن انا عندي ايمــــــــــــــــــــــ ـــــــان كتير كبير بشباب الامة العربية والاسلامية انو المستقبل النا احنا احنا الجيل الصاعد احنا العالم التالت اللي رح يفرجي العالن كلو جيل العالم التالت شو رح يعمل وكيف رح يغير الموازين رأسا على عقب ورح نرجع مجد العرب والمسلمين من اول وجديد إن شاء الله تعالى و في كلمة بتقول الله اعلم اذا كان متل او حكمة او حديث الله اعلم المهم انو بيقول يوضع سره بأضعف خلقه وتذكروا تمام انو اللي قتل ابو جهل لعنة الله عليه بيكونوا غلامين صغيرين يعني احنا بإيدنا نغير مجرى العالم كله وما تنسوا كمان انو مشوار الالف ميل بيبدأ بخطوة وحدة وإن شاء الله بس نفتح الموقع الخاص بهاي الحملة رح نقولكن شو المفروض عملو وجزاكم الله كل الخير على حسن استماعكم ويا ريت متل ما قلت انو اللي ما رح يشارك وينضم معنا ياريت انو يساعدنا ولو بكلااااام ومساعدات معنوية وبالدعاء حتى تزيد من همتنا ونشاطنا والسلام عليكم ورحمة الله وبركاته وتقبلو تحياتي لكم احمد اللهم ارزقنا قلباً سليماً نلقاك به آمين يـــــــارب العالمين |
:D ما فهمت عليك مظبوط ... بدك توحد الأمة الإسلامية .. ولّا العرب .. ؟
|
اولا و عليكم السلام بس عندى ملاحظة مهمة يعنى انت كاتب توحيد العرب فالعرب مو بس مسلمين فى منن مسيحين و يهود و شيوعين و من كل الديانات يعنى ما لازم نحدد المدهب او دين ادا كنا نحاول توحيد العرب
و على فكرة انا مسلمة يا ريت ما تعتبروه جواب من اعداء الاسلام :Dو هاى وردة لاالكم بس يا ريت تاخدو الملاحظة بعين الاعتبار و رح يصير موضوع كتييييييييييييييير رائع و هادف |
اهااا ...
|
مما لا شك به ان الاغلبية الساحقة للعرب مسلمين بس كمان في مسيحين في يهودوملحدين عرب so ازا بدك تقول امة عربية بدك تاخدهن بعين الاعتبار! على كل الفكرة كتيييييير حلوة وحتى لو بدات بتحية الاسلام لا اعتقد انو فيها مهانة لحدا وخاصة انها تحية حلوة ومميزة وحتى لو كان كاتب الموضوع مسيحي وكتب ايه من الكتاب المقدس كمان رح يكون حلو ومميز واعتقد انو لازم نبلش من هالنقطة انو عشان نوحد الشعب العربي لازم نقيم من تفكيرنا فكرة انو هاد مسيحي وهاد مسلم وهاد ملحد وهاد ما بعرف شو
! وانا مش عم قول انو ما نحب ديننا ونفتخر فيه بالعكس بس انو ما يكون تعاملي معك على اساس دين او المذهب السياسي والطائفي! والله يوفقك ان شاء الله يصير في اصلاح ذات بين العرب.آمين :D |
السلام عليكم ورحمة الله وبركاته
اخت /مي / الاخ /لوسكاف/ اهلا وسهلا فيكن احنا اكيد هدفنا هو توحيد الشعوب العربية والاسلامية و احنا الحمدلله في تقدم كبير من بين الشباب والصبايا وللعلم في منهم مسلمين وفي منهم مسيحيين يعني احنا مو بس عم ندعي للوحدة الاسلامية لاء وكمان العربية بشكل عام واهدافنا هي مساعدة الناس في جميع انحاء الوطن العربي وان شاء الله كمان رح نعمل موقع خاص للدعوة للاسلام باللغة الانكليزية ورح يكون موقع خاص بهي الحملة بتدعمها وحتى كمان نقدر نتواصل معكن عن طريقها ولكم فائق الاحترام منا......... واذا كنتوا حابين تنضمو معنا اهلا وسهلا بس يا ريت: تبعتولي ايميلاتكن لعندي على الرسالة الخاصة حتى نقدر نتواصل معكن مبدايا لبين ما نفتح الموقع الخاص فينا والسلام عليكم ورحمة الله وبركاته |
السلام عليكم ورحمة الله وبركاته
الأخت/ مروة : تحية طيبة وبعد احنا اكيد ما عم نطلع للفكر الطائفي وهاد مسلم او هاد مسيحي لاء احنا عم نحاول نكون اوعى من هالنقطة بتفكيرنا وحتى نوحد الامة العربية والاسلامية لازم ما نفكر بهالكلام لا بالعكس مش يمكن تعاملنا مع المسيحيين وغيرو يكون سبب في دخولو الاسلام احنا من هالمنطلق عم نتعامل المعاملة الحسنة متل ما امرنا رسولنا الكريم صلى الله عليه وسلم وشكر على مرورك الكريم وحياكي الله |
اي شعوب واية امة واي مسلمين واي مسيحيين وشو يعني توحيد :?
|
السلام عليكم ورحمة الله وبركاته
الأخت / لاوديسا : الشعوب اللي بقصدها هي الشعوب العربية والأمة هي الامة العربية والامة الاسلامية و اي مسلمين ( المسلمين موجودين والحمدلله بكثرة والغفلة اللي احنا فيها ان الاوان ان تزول وتنجلي) والغفلة التي كنا فيها لا تعني اننا غير موجودين ( لكل جواد كبوة ) وان شاء الله هناك صحوة من قبل المسلمين في كل مكان سواء بالوطن العربي او في الغرب اما عن التوحيد فأنا اقصد به توحيد الشعوب العربية على كلمة واحدة وان نقف وقفة واحدة وان نخاف على بعض وان لا يكون بيننا اي ضغينة وحقد او غل بل يجب ان نعمل مع بعض ويكون هدفنا كلنـــــــــــا هدف واحد هو النهوض بالامة العربية بشكل عام والامة الاسلامية بشكل خاص وهاد ممكن يكون حلم بس مو صعب تحقيقه ولكي كل الشكر |
اقتباس:
 |
اقتباس:
أنا بهنيك .....و بهني الأمة فيك بس بدي قلك شغلة المرة الوحيدة يللي توحدوا العرب .....و حدهون نبي...... مو موقع انترنت و وحدهون بقوة السيف ........مو بالاقناع |
مرحبا حبيب كيفك اليوم ...شوف لقلك :أنا مابقصدي يأسك.. تخيل معي بيت من البيوت العربية عند المسا وست البيت بدا تحضر مسلسل أشواك ناعمة والرجال بيحب ريال مدريد وبدو يحضر المباراة النهائية وصادف أنو المسلسل ما بدون يعيدو ه وموعدو مع موعد المباراة .... أي بدك تشوف العجاييب يعني طنجرة طايرة بسرعة الضوء باتجاه رأس الزوج بقصد إزالته من الوجود أو طربيزة نووية هدفها الأساسي تدمير البنى التحتية للزوجة وهكذا يستمر الصراع الأديولوجي بين أيهما في النهاية سينتصر .......وهيك يامعلم لحتى يصيح الديك وهيك على طول
والنكتة أنو بيكون طار المسلسل والمباراة يامعلم إذا كان الواحد مانو قادر يتفاهم مع مرتو كيف بدك توحد هالملايين من العرب وأقسم بكل مقدسات الأرض عندما سيتحقق ماتدعوا إليو فإني سأمشي إلى المريخ حافياً وأحمل صخرة سيزيف بدلاً عنه................ _ نصيحة أخوية قبل أن تقدم على مشروعك التاريخي عليك أن تجلب مكنسة كهربائية بقوة (2000000000000حمار =50000حصان)وذلك لكي تعمل جاهداً لآلاف السنين حتى نتظف مانسبته 99%من العقول العربية وتزيل العفن الذي عشش فيهامنذ آلاف السنين وبعد ذلك تابع مشروعك .....ولانتسى أن الإعتراف بالآخر كإنسان له كيانه المستقل بغض النظر عن دينه عامل أساسي في نجاح الإنسان .......... |
السلام عليكم ورحمة الله وبركاته
الاخ/ Madmax تحية طيبة وبعد: احنا عم نعمل اللي علينا وعم ندعي الناس حتى توقف معنا والعمل ان شاء الله رح يكون على ارض الواقع مو بس كلام والتوحيد ان شاء الله وباذن الله جايه عالطريق وانا معك انو توحيد الشعوب العربية ما رح يجي بيوم وليلة بالعكس انا يللي بقلك انو احنا حتى نوصل لهدفنا المنشود مو اقل من 15 ل 20 سنة هاد على اقل تقدير حتى نحقق هدفنا والحمدلله في اقبال من قبل الشباب والصبايا ومتل ما قلت قبل شوي منهم المسلمين ومنهم المسيحيين اما عن طريق الوحدة اذا كانت بقوة السيف ولا الاقناع احنا منهجنا هو الاقناع مو السيف والقتل والضرب لان هاد مو منهجنا وكلامك عن المرة الوحيدة يللي توحدوا العرب...... وحدهن نبي...... مو موقع انترنت احنا مطالبين وكل مسلم ومسلمة مطالبة بالدعوة للاسلام وهاد اكتر هدف احنا بنسعالو وهو عن طريق المعاملة الحسنة والحكمة في التعامل وعلى كلا احنا هلق يمكن عن طريق النت بس ان شاء الله قدام شوي رح يكون في عمل جماعي بيناتنا كلنا يعني الوحدة عن طريق النت ما هي الا خطوة اولى للوحدة الكبرى وتقبل تحياتي الك أحمد |
اقتباس:
و انشالله بتتوحد هالأمة على ايدك * * * و اذا خلصت بكير ..... ارجاع اضربلك نفس معنا :shisha: |
اقتباس:
ولا يعني الشباب المسيحي يلي معكون هني بيدعو لـ توحيد العرب .. و الفئة من الشباب المسلم بيعملو الموقع .. على كل حال سجلني معكون .. مبينتكون تسالي خيرات الله .. ولا تنسى خبرني شو بيصير معكون اول بأول .. |
السلام عليكم ورحمة الله وبركاته
الاخ/ Barleb اخي الكريم انا متلك تماما اتفاجئت لما عرفت انن مسيحيين مع هيك هن اكدولنا انهم رح يوقفو معنا ويشاركونا لان هن بالاول وبالاخير عرب متلنا متلن تانيا مشان الموقع الاسلامي اللي رح نعملو اكيد مو مسيحيين رح يعملو شي طبيعي هاد ولكن المسيحيين رح يساعدونا في مساعدة الناس المحتاجين وفي اشياء كتيرة تانية طبعا بعيدة عن دين الاسلام واهلا وسهلا فيك اذا كنت جاد بمشاركتك معنا ارسلي ايميلك حتى نقدر نتواصل معك وشكر الك تقبل تحياتنا الك احمد |
با سيدي الكريم .. بما أنو انت متفاجئ متلي لما عرفت انن مسيحيين .. فـ رح شارك معكون ..
الأسم : حسان اسم الأب : عمر النسبة : علي مواليد 1952 و أيميلي - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
عمي الأمة السورية :lol: وغير الأمة السورية .. صعب كتير
يفتح الله ... قفلنا وسكرنا وطربشنا كمان عمي .. رح نمشي باتجاه سوريا بكل اطيافا ... والدولة الاسلامية .. ذات الطيف الواحد هو خطوة لورا رح نمشي باتجاه سوريا وبس .. والعودة باتجاه العرب :sick: كمان خطوة لورا لهيك عمي يفتح الله وخلونا نمشي لقدام |
| الساعة بإيدك هلق يا سيدي 16:52 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون