|
عندما يصبح الدفاع عن حرية الرأي تهمة وجريمة
عندما يصبح الدفاع عن حرية الرأي تهمة وجريمة بدون مقدمات بدون فلسفة مرّ عام على اعتقال كريم عربجي والتهمة المعلنة هي نشر أخبار كاذبة من شأنها إضعاف الشعور القومي ، ولكن التهمة الغير معلنة هي رعاية ودعم حرية الراي في موقع اخوية ورفضه الاستجابة للمطالب بتقييد حرية الرأي أو التعاون بخصوص هذا الشأن أو بالشئون الأخرى المتعلقة به . واتوجه الى سيادتكم (قراء كريم او حتى من قرأ له ولو لمرة واحدة )بسؤال بسيط ألا وهو : مَن مِن سيادتكم قرأ خبرا واحدا لكريم عربجي ويعتقد ان الخبر كاذب وأدى به الى إضعاف شعوره القومي ؟ |
اقتباس:
والله ياصاحبي انا ما بعرفو ولا قرات بس على هوا ما سمعت الزلمي ما لو علاقة بكل هالتهم من حقو يكتب بحرية باعتبار حسب مافهمونا انو نحنا بلد يخطو نحو الديمقراطية الله يفك اسرو بسرعة :D انا ما صوتت لانو ما قرأت |
ممكن رابط لمقالة كتبها الاخ كريم
|
اقتباس:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - اذا بدك موضوع محدد (هاد بيعجبني جدا) - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - بحس إن كريم كان عبقري بهالموضوع جدا جمع بين البساطة والوضوح وبين قوة الفكرة وعمقها (الموضوع ملأ عقلي ولمس اوتار قلبي ) وياريت المشاركين ما يشعبو الموضوع (رجاء ) واسف اني مارح اقدر كون هون للرد او للمناقشة نظرا لانشغالي الشديد جدا جدا والبركة برواد المنبر ومشرفيه واعضاء اخوية . |
التاريخ عم يعيد نفسة من اكتر من 50 سنة ومعاملتهم مع المواطن والشعب بهل الطريقة
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - مافي شي تغير لهل يوم . مابعرف قديش لازم يروح ضحايا على هل الطريق على أمل انو يجي يوم وتفرج |
اقتباس:
بتعرف شغلة ابو حميد ... ما حسيت بشعوري القومي ... وما حسيت انو انا لازم دافع عن كريم كــ ( قضية ) ... وما حسيت بانو من واجبي دافع عن سوريا ( الوطن ) ..... وما حدا قوّالي شعوري القومي ..... الا بعد ما قرأت مواضيع كريم المشكلة هون .... في التهمة وفي ما وراء التهمة ... التهمة مبينة ... بس ما وراء التهمة فيني اختصرها بجملة صغيرة ... المثقف هو العدو الأول للدولة ... وفيني عرف المثقف هون ... بالشخص المطلع على الحقائق .... لهيك كريم هلق مو معنا ... ولا حتى طارق او حسام او علي او او او او الخ وتحية حمراء ... لأجل كريم ورفاقه بالأسر :D |
أنا للأسف الشديد ما كنت بعرف لا كريم ولا البقية
بس من كتر ما سمعت باساميهم صرت كل فنرة ابحث بمواضيعهم وبصراحة يا ريت لو كنت بعرفهم من قبل .... بس يلا ي أمل بالمستقبل مواضيع كريم وتعليقاتو شدتني كتير وبالعكس اللي بيقرا كلماتو ما بيقدر يحس الا انو هالشب بيعشق سورية ومن عشقو لسورية قدم حالو كرمالها .... يعني قولكم ما كان فيو يتراجع عن آراؤو ويضل معنا لليوم !!! وبتصير بتعشق سورية اكتر من وراه ومن ورا كتاباتو وبتحس بالخجل من نفسك لأنك ما عم تحكي وما عم تحاول ترتقي بالبلد وما عم تقول وين الغلط ووين الصح وبتضل دافن راسك بالرمل متل النعامة وبتقول ماشي الحال أما هم كل اللي عملو انهم ما دفنو راسهم بالرمل وقالوا الامور على حقيقتها وقالوا وين برأيهم صاير الغلط أما تهمة نشر اخبار كاذبة مافي أسهل منها لتتوجه لأي شخص خصوصي أنو أمر طبيعي جدا الناس تتناقل خبر على انه صحيح وبالأخير بيطلع اشاعات ,,,,, بس وين اضعاف الشعور القومي بالموضوع :? اي من يوم يومها وسائل الاعلام السورية ما بتحكي شي صح الو علاقة بالواقع ونازلة ضحك عالمواطن ومن بعد ما الناس تسمع الاخبار يشتغل السب :p و :akh: لكريم والبقية منتمنى نقدملكم ياها بالحقيقة وبالمستقبل القريب جداً |
انا طبعا ما بعرفو لكريم بس بعرف انو معتقل لانو انسان واعي مثقف بيؤمن بالحرية وبانو البلد هوي مسؤول عنا متلو متل اي مسؤول كبير فيها..
المهم اني بدي قول شغلة كتير ضرورية الكل بيعرفها بس بيتغاضوا عنا كريم لما ما رضي يكون متل غيرو ما كان همو انو تحبو بس كان بدو يكون شمعة تحترق منشان غيرو يعرف انو الحق حق وانو احيانا ممكن نتكلف مستقبلنا كلو لنكون اصحاب مبدأ وقيمة.. كريم كان بامكانو يتراجع ويكون متل اي حدا يعني متلنا بس رفض ليش يا حزركن..؟؟؟؟لانو ما بيتقن فن الهروب ...لانو بعشق سوريا ...وبعشق الوطن ...وبعرف انو العشق بدو يكون قول وفعل...لانو تعلم يتحمل المسؤولية وتعلم كمان يكون رجل....تعلم انو لازم يكون في حدا بيبلش منشان يكون في حدا قطع شي بالدرب... كريم لازم يكون فخر لكل حدا منا ومعلم لكل واحد ولازم نقدر نفرح لانو في كريم بمجتمعنا....ولازم هلق ندعيلو ونقدر نمشي عدربو.... |
محسوبكون مدمن تصويتات لذيلك اشتركت مع انو كنت ناوي ما اشترك بس ، العيب على الكيف والادمان ، صوت ل "لا" ، اذا مهم يعني اني احكي ، رح قول انو كتابات كريم لم تؤدي الى اضعاف شعوري ، على الرغم من اني مابحط هيد اند شولدرز على شعوري |
صديقي التصويت بدو تعديل
التهمة هي وهن الشعور القومي هلأ أنا مابعرف شو يعني وهن . بس بحس حالي دائما موهون . رغم أنو دائما بيعتقلو يلي عميوهنوا الشعور . بس مع ذلك بضل موهون . بتمنى يغيرولنا العلاج . لأنو رغم أعتقالهم وحبسهم ضليت موهون . بعتقد يا تشخيص الداء غلط . يا الدواء غلط في نقطة تانية : أنو أحيانا بتكون التهمة محاولة تغير الكيان الأقتصادي للدولة . بتمنى القانون يشمل الكل . ويعتقلوا الحكومة . لأنها غيرت أقتصاد الدولة من أشتراكي . لأقتصاد السوق الأجتماعي بدون تغيير الدستور أو مبادئ الحزب الحاكم . بما أنو من ضمن دستورنا حزب البعث العربي الأشتراكي هو الحاكم في سورية :? :p :larg: |
يعني شو الفايدة من التصويت ؟
|
اقتباس:
ربما تكون رسالة |
على اية حال ، هون بهالمنبر كتابات كريم ، وهون العالم قرئت لكريم ، بعتقد من هون ، افضل شيئ هو التوجه رأسا للعالم يللي قرئو لكريم ونعرف منون مباشرة ، مدى صحة الاتهام الموجه اليه ، ونشوف كم شخص من المجتمع يللي كريم اتوجه الو بفكرو وبكتاباتو رح يجيب باي على هالسؤال "هل قرأت خبرا واحدا لكريم عربجي وتعتقد ان الخبر كاذب وأدى بك الى إضعاف شعورك القومي ؟" اعتقد الوضع اشبة برسالة ، بس بلا اسم مرسل اليه او عنوان محدد . والله اذا راحت للقاضي المخول له بالحكم على كريم "تروح " اذا راحت لمنظمات حقوق الانسان "تروح" اذا راحت لاي شخص او جهة "تروح" واذا ماراحت "شو رح نخسر نحنا او يخسر كريم " ؟؟؟ واذا راحت وماصار شيئ كمان مافي خسارة - بس ما معقول انو قراء كريم ما يقولو كلمتون لان الاتهام "بنفس الوقت هو سؤال الاستقصاء" بيتعلق بقراء كريم مش بس بيتعلق بكريم ، لذلك في علاقة ارتباط وثيقة بين القراء وبين الاتهام ، بالاول وبالاخير مافي غير اني قول "الله مع كريم " الله يقويه وينصرو . |
اقتباس:
بس بدي احكي شغلتين... الأولى هي انو بنصح الناس تقرا كتاب جورج أورويل (1984)... و يبقى احكولي اذا لاقيتو شبه بين سياق الرواية و بين ما جرى و يجري في... بلاد العجائب الثانية... و الأهم لما نقول كريم و نحكي عن كريم و غير كريم.. ما عم نعني معارضة و موالاة و لا عم نحكي عن موقف سياسي معين أو فكر من أي نوع.. عم نحكي عن قضية انسانية بحتة.. عن شب متلي و متلك و متل أخوك و ابن عمك... شب بأجمل أيام حياتو ملقوح بزنزانة على حكي.. كلام... فكر... ما مهم هالفكر شو هوي.. المهم انو مسجون بسبب فكر .. لذلك يا اخوان القضية انسانية فقط.. مالها بعد سياسي أبدا ما بيهمني ان كنت بعثي أو اخونجي, ان كنت حاطط صورة بشار ببروفايلك, ان كنت عشقان ميشيل كيلو أو كوليت خوري.. ما بيهمني تكون سني شيعي علوي درزي مسيحي أيزيدي ملحد مؤمن... ما بيهمني تكون حلبي شامي ديري حموي حوراني.. بيهم انو كلنا... شئنا أم أبينا.. عجبنا أو ما عجبنا... كلنا ولاد بلد واحد و محكومين ببعض و مجبورين ببعض و قدرنا نعيش مع بعض و نفهم بعض و ندعم بعض... و كل ما وصلنا لهالنتيجة قبل كل ما بلشنا نبني بلدنا مزبوط قبل... مربوطين بالدم.. و الدم مهما حاولنا ما بيصير مي كل ما هدمنا سجن و بحجارو عملنا مدرسة... بنتطور قبل.. و أول سجن لازم نهدمو هو سجن التفرقة... بالنهاية... بس بدي قول انو اتمنى من كل قلبي الحرية لكريم عربجي و لكل شبابنا بالسجن... و ألله يسعدكون و يسعد بلدكون فيكون |
ما بعرف ياس
مالاقيت بكلامك غير اليأس كلام بيوجع كتير متل الواقع اي متل الواقع |
اقتباس:
كلام الشب صحيح |
بالله ..
|
لعمى وين انا :shock:فتتت بالغلط لهون :?
الهريبة تلتين المراجل بخاطركم |
| الساعة بإيدك هلق يا سيدي 17:03 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون