|
ما بيعرف الواحد شو بيصير معو
اليوم وأنا راجعة من الشغل، وقفت ع احدى الاشارات،، والاشارات هون بتطول يعني بياخدلو الواحد غفوة لبين ما تصير خضرا،، مالكون بطول السيرة... وأنا واقفة واذا صبي صغير بيدق ع الشباب بدو مصاري... قمت أنا دبت فيي النخوة قمت مسكت الجزدان حطيتو على حضني وفتحتو، وبلشت أتطلع بالكراكيب يلي فيه وبعدون يمين وشمال ولفوق ولتحت وميلو على جنب بركي بتميل الفراطة معو،،، ما كان يطلع معي شي،،، قررت غوص بأعماقو،، حطيت ايدي وبلشت شيل منو غراض وزت ع المقعد يلي جنبي... بهالأثناء صارت الاشارة خضرا ومشيوا السيارات وبلشوا يزمرولي... أنا هون كبرت راس أنو كيف بيزمرولي وهنن شايفيني بدي ساعد هالمسكين... حطيت الفلاشر جكارة فيون،، وتابعت سباحتي في أعماق الجزدان،،، واستمرت الأشياء يلي بالجزدان بالتطاير في كل أركان السيارة،،، وهالابن الحرام الدينار ما كان يطلع......... هيك لحتى الصبي مل ومدري شو بربرلي وخبط بايدو ع الشباك وراح..... هون كانت الاشارة صارت حمرا من أول وجديد وأنا وجهي صار أحمر من الاشارة،، وصار يطلع الدخان من أدنيي،،، وصرت زمجر متل النمر المجروح وسبسب لحالي على الجزدان وساعة الجزدان ويلي اخترع الجزدان وأخدت قرار حاسم بتبديل هالابن الكلب بجزدان صغير ما بيسع غير محفظتي الصغيرة والمفاتيح والموبايل وبس.... وصلت ع البيت وأنا عاقدة العزم على إحالة الجزدان على التقاعد ورميه رمية الكلاب بالخزانة (ما رح كبو إلا ما يلزم)... وعملت فنجان قهوة لاستمخ وأنا عم مارس هواية القتل العمد وجبت الجزدان وطرحت أرضا كل ما فيه من أشياء وأدوات لحتى نضفو كلو وما أتعرض لموقف محرج متل تبع اليوم.......... وبلشت أفصل الأشياء،، وحط على جهة اليمين الأشياء الضرورية فقط يلي رح حطها بجزداني التاني الصغير،، وبجهة اليسار الأشياء السخيفة التافهة يلي ضيعتلي وقتي اليوم وأحرجتني قدام الشحاد الوديع مممم، ملمع شفايف!! بيلزم بالأخص بالصيف بهالبلاد هي،، ع اليمين علبة خياطة صغيرة.... شكالات وخيوط كل الألون وابرة وزرار... بركي وقع شي زر وبدي أقطبو!! ع اليمين مقلم أضافر... ايه هاد ضروري وما بياخد محل... ع اليمين علبة ظل صغيرة.... طبعا هي ضرورية ما في كلام،، كلو إلا جمالي،،، ع اليمين قلام حمرا وكحلة ومسكرا وبودرة خدود،،، هي تتمة المكياج،، ع اليمين الموبايل،،، هلئ هاد شي أساسي طبعا... ع اليمين سماعة الموبايل،،، صحي ما بستعملها بس القانون بيقول ما لازم تحكي من الموبايل دغري وانت عم تسوق،، ع اليمين بيت للموبايل.... مهضوم البيت تبعو ولازم صير استعملو،، ع اليمين شاحن للموبايل.... ما كل وقتي عم احكي ع الموبايل بقا بيخلص شحنو بسرعة وبلا ما انقطع،،، ع اليمين مناكير،،، من اللون يلي حاطتتو لحتى اذا انتزعلو شي اضفر ما يطلع منظر اصابيعي متل الشوايا،،، ع اليمين محارم معطرة،،، خفيفة وما بتاخد محل كتير،، وخاصة بعد ما أكلي شي سندويشة،، عاليمين سائل تعقيم،،، هاد ضروري كتير وبالأخص بعد ما يسلم عليي بالايد شي حدا،،، ع اليمين علاقة مفاتيح،،، هلئ صحي فيها مفاتيح ما بعرف لشو بس أنو فيها مفاتيح الدروج والبيت والسيارة،، ع اليمين علبتين مسكة وشوية بونبون وشوكولا،،، المسكة ألي والبونبون والشوكولا مدري مين ضيفني ياهون،، إلا ما شوف شي ولد صغير وأعطيه ياهون،، عاليمين مممم،،، كمشة بزر وفستق،،،، بيسلو لما بوقف بعجقة السير،،، ع اليمين تلت قلام،،، كيف لكان بركي بدي سجل شي معلومة مهمة وأنا عم سوق،، وبركي شي واحد ما عاد كتب،، أكيد البقايا بيكتبوا،، ع اليمين شوية صور،،، رفقاتي واهلي وزوجي،،، ايه هدول هنن يلي بيأنسولي غربتي،، ع اليمين مقالة من مجلة.... ايه لفتتلي نظري هالمقالة،، صحي ما قريتها بس ناوية اقراها،، ع اليمين جزدان المصاري الصغير،، يبعتلو قتلو ما في ولا فرنك،، واقعين منو،، لازم صير استعملو،، ع اليمين دفتر ملاحظات،،، طبعا لكان على شو بدي أكتب... ع اليمين مشط ومراية،،، هدول من تتمة علبة المكياج ما بينطلع بلاهون... ع اليمين بارفان وديودوران،،،، كمان هدول يعتبروا من عدة المكياج وما في استغني عنون،، عاليمين قداحة وكبريتة،،، بركي انقطعت الكهربا محل ما أنا!! بعدين قد الكمشة تنيناتون مو أخدين محل،، ع اليمين علبة دخان،،، مع أني مو مدخنة بس بركي اجت عبالي شي مرة وأنا معصبة،،، ع اليمين حب وجع راس وحب للمغص ولزقات طبية،،،،، هدول فيون حياة أو موت لازم ما نستهين فيون بنوب،، عاليمين علبة النظارات الشمسية،،، ضرورية احسن ما حط النظارات بشي محل يقوموا ينكسروا،،، ع اليمين فواتير،،،، هلئ هدول ما فيني كبون هيك كيف ما كان،، بركي فيون معلومات عن حسابي بالبنك،، خلص شي يوم بحرقون بس هلئ لازم رجعون،، ع اليمين علبة كريم للايدين،،، والله صغيرة كتير ومشان ما يقشبوا ايديي،، ع اليمين شو اسمو،،، للاحتياط..... ع اليمين شوية كروت محلات تجميل ومطاعم وما الى ذلك،،، بيلزموا،،، ع اليمين فردة حلق........... مدري وين اختها.......... لازم دور عليها،، خليها بالجزدان لحتى ما انساها،،، ع اليمين وهيك رجعت كل شي من أول وجديد ع الجزدان،،،، ولعنت حالي لمجرد اني فكرت باحالتو ع التقاعد،،،، واستصغرت حالي كيف فكرت انو ممكن استغني عن أي من هالأشياء الموجودة بالجزدان،،، ايه كلو ضروري،، باختصار ما بيعرف الواحد شو بيصير معو |
:pالاعتراف .. بالخلصان فضيلة ..
اي اقسم بالله .. بتكون بالجامعة كل وحدة ماشية .. وشنتايتا على ايدا متل شنتاية السفر .. اي العمش فهمنا .. شو عم تنقلي غرفتك متل ما هية .. لك شو بيخطر عبالك بتطالع .. هداك اليوم كنا بمعرض الجاليات بالجامعة .. لك .. ههههه اضطر واحد من الشباب بدو يرسم شوارب .. كرمال يزبط اللبس كلو .. لسا ما قال .. مين معو مسكرة مدري كحللة مدري ما بعرف شو .. ولا 100 الف بنت كلو فتح هالشناتي وبلشو .. لا مو هي هي حمرة .. لا مو هي هي .. ما بعرف شو . واخر شي كل وحدة مطالعة شي 4 انواع .. بدا تعطين .. ياه .. يعني جنان مع درجة امتياز .. :o لسا في .. شوفات عجبة بتنشاف .. :D |
ماشالله جذدانك صار بيت كلشي فيه
|
ذكرتيني بالغراض الموجودة بالخزانة !!!!!!!!!
بس الفرق تظل بالبيت :lol: |
اقتباس:
|
اذا ما بتعرفي وكاتبة جريدة
انا كمان ما بعرف من فين بده يجي لي نخوة وطولة بال حجتى اقرا الكتاب اللي منزلتيه هون بصراحة من كتر المواضيع اللي بتبدا بشكل " ما بعرف " " ليش هيك عبصير " " حدا يخبرني ليش هبصير معي هيك " قرفت عمري الله يعين الله شو شغلته صعبة معه حق يطنش البشر وما يرد على حدا :o |
كل شيء وقت حاجتنا اليه سنصنفه يمين اليمين
في وقت الضوء الاحمر لا تفعل الخير والا ستعاقب والمتسول المسكين لم يعرف بانه موظف في الوقت الممنوع في مكان اللا والاحمر يعني اللا .. لا .. تقف كالابله تحت سماء انثى تمطر لونا احمر ...... |
اقتباس:
|
اقتباس:
|
همم
هالموضوع زكرني بوحدة بعرفا اول حرف من اسمها ريتا:oops: |
شو بحب ألعب بجزادين البنات :o
|
ممممم
الموضوع كان كللو مفهوم بالنسبة الي و بسيط و محير بس في شغلة صغيرة ما عرفتها او ما فهمتها او ما اكتشفت شو هي .... شو هي ... و منشال مشكلتك انا براي اعملي جزدانين واحد خليه بالسيارة و التاني شيلي لما تنزلي و حطيلك شوية فراطة جنب الفوتيس منشال لما يجيكي شحاد او شرطي توصلي بسرعة و بعدين لما بدك توقفي على الخضرا و تعطي فلشر قربيلك شوي لقدام لانو اللي وراقي بيكون لازق بسماكي ما بيعود فيو يتجاوزك ..انا شو دخلني ؟؟ المهم شو هاي اللي ما عرفتها انا يا بيرلا؟ |
بعدين ماكنتي تلاقي فراطة ليش قديش بتعطي الشرطي لما بيوقفك :p
|
اول شي بيرلا الصراحة انا فكرت موضوعك رح يكون عن اولاد الشوارع وتوقعت انو رح تحكي بخصوص هالشي بس مو مشكلة ....بالنسبة للجزدان لك والله حسيت اني مو مستوعبة كل هالشي فكيف المسكين جزدانك؟؟؟
اقتباس:
|
اقتباس:
|
اقتباس:
|
والله معك حق الواحد ما بيعرف شو بصير معو
يعني انا لما روح عالجامعه بحط الاغراض يلي بدي ياها قبل ما حط كتبي :lol: مافينا نستغني عن الموبايل ولا عن شاحن الموبايل ولا عن سماعات الموبايل ولا عن الميك اب ( الفرق بيني وبينك هون اني بحط الميك اب بشنتاية صغيره جوات الشنتا الكبيره :lol:) ولا عن جزدان المصاري :? ولا عن دفتر الصغير يلي بتكتبي فيو الشغلات المهمه :larg: ولا عن النضارات ولا عن علبتها :frown:( في نوعين نضارة شمسيه ونضارة طبيه يعني علبتين ونضارتين :lol:) مع هيك انتي شوي مزودتيها :lol: |
طيب في مجال تاجريني الجزدان تبعك مفروش و حط بئلبو تخت و خزانة
بس في شغلة ما فهمتا مممم، ملمع شفايف!! بيلزم بالأخص بالصيف بهالبلاد هي،، ع اليمين شو دخل البلد بملمع الشفايف |
| الساعة بإيدك هلق يا سيدي 03:17 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون