مسح اجتماعي
 

خالد عم يمشي في أحد شوارع العاصمة دمشق و إذ بيلاقي مواطنين كتير قدام مدرسة التي هي بالضبط مدرسة للمعاقين
خالد : صباح الخير يا أخي خير شو في هون حدا صايرلو شي (أجت ببالو أول شي المصايب)
المواطن : هون بيسجلوا الناس اللي ما بيشتغلوا لياخد راتب من الحكومة
خالد : راتب شو وكيف
المواطن : مابعرف سأل هاد الشب
خالد : كيفك يا شب
الشب : أمور أخي بدك مصنف
خالد : لا لا بس بدي اسئلك انو شو القصة هون ليش العالم مجتمعين وشو ناطرين
الشب : قال الدولة بدها توزع رواتب للناس العاطلين عن العمل
صار يمشي خالد ويفكر ويضرب أخماس بأسداد انو معقول الحكومة تعمل هيك شي!!!!
وصل خالد ع البيت وهو لساتو عمبيفكر بالقصة تبع الرواتب
أم خالد : لك أبني ما تروح تسجل بهي تبع الرواتب
خالد : من وين سمعتي أمي ؟
أم خالد : والله جارتنا من أحمد سجلوا ولادها التلاتة وجوزها بوكرة بدو يسجل
خالد : وهني من وين عرفوا؟
أم خالد : قال حاطينها بالتلفزيون بهاد الشريط الأزرق اللي بيضل يمشي متل الحية بس ما بيخلص
خالد :طيب أمي طيب لنشوف انشالله خير
طار خالد ع التلفزيون وقعد يشوف شريط الأخبار ويقراهون خبر خبر حتى طلع أخر شي خبر عن انو وزارة الشؤون الاجتماعية والعمل بتدعي المواطنين للاشتراك وتسجيل أسمائهم لدى مراكز المسح الاجتماعي لتوزيع معونات شهرية
خالد بينو وبين حالو العمى والله القصة جد وبلش يفكر
انو كيف هيك
انو نحنا 20000000 مليون نفر ع حسب احصاء سنة 2005 واذا قنا انو 3000000 بالكتر الكتر الكتر موظفين و وبما انو نحنا شعب فتي فمنقول انو 10000000 نفر بين طلاب وأطفال بيبقى قديش 7000000ملايين بني أدم وادمة ويعني اذا كل شخص راح يعطو معونة 1000 ليرة راح يدفعوا بالشهر 7000000000 ليرة أي والله مو ظابطة
مرق خالد تاني يوم من قدام المركز وبشوف انو العالم زادت مبارح كانو 100 اليوم 200 ولسا الشغل ما راكبة براسو
خالد : أمي شو طبختي اليوم
ام خالد : قبل ما تسأل ع الأكل قلي سجلت مشان تاخد راتب
خالد : طولي بالك أمي لنتأكد ونشوف شو القصة
أم خالد : يوه لك امي شو بتخسر
خالد : والله يامو ما بخسر شي بس موظابطة معي انو شلون يعني راتب
أم خالد : لك أبني شو بدنا كيف وشلون المهم راتب
خالد : طيب أمي طيب بوكرة بشوف
بعد كم يوم
عم يقرا خالد بموقع أخبار ع لانترنت
الخبر بيقول انو لافي رواتب ولا شي القصة كلها مسح اجتماعي ليشوفو نسبة الفقر بالبلد
قا انو بدون يعرفوا نسبة الفقر ما كلنا فقرا ماعدا السلطة وحواشيها
خالد شال الفكرة من راسوا
أم خالد : لك أم شو صار معك ليش ا سجلت
خالد : يامو القصة كلها كذب
أم خالد : يو لك أمي كيف كذب شو كل هالعالم ما بتفهم
خالد : والله يا أمي ما بعرف
أم خالد : برضاي عليك يا بنيي روح سجل ما بتعرف شو بيصير
خالد :بيصير خير أمي
خالد عم يمشي بذات الشارع بيمر ع المكتبة بياخد جريدة رسمية مع الوسيلة والدليل مشان يدور الشغل
وهوي عم بيقلب بالجريدة بيقرا موضوع بالجريدة عن المسح الاجتماعي فحوى الخبر انو وزارة بدها تعمل مشاريع تنموية للناس العاطلين عن العمل طبعا الكلام لوزيرة الشؤون الاجتماعية والعمل ديالا الحاج عارف اللي بيسموها الناس أم التنورة القصيرة خالد فات بالحيط لانو كل شوي بيقرا خبر شكل وأخر شي قري خبر مع أحد موظفين الوزارة بيقول انو غاية المسح هي منح تعليمية و اجتماعية
أم خالد: سجلت يامو
خالد : أي يامو سجلت (ياربي سامحني لأني عم أكذب ع أمي)
أم خالد :الله يرضى عليك يا أبني
خالد :الله يخليلي ياكي يا أمي
خالد عم يحاكي حالوا ويقول انو شو نحنا بهالبلد مثلا انو تصنيفنا بشري حيواني فضائي او ما حدا عرف طلع يوضح للناس شو قصة المسح
حرااام هالناس اللي عندون أمل مابعرف عشو عم يلعبو فيون فوق ما فقروهون وهلق صار عندون رغبة مابعرف شو هي يشوفوا الناس عم تشحد عبوابون
بس متل ما بيقول سعد الله ونوس (نحن محكومون بالأمل)
بس انو أمل بهالبلد أي من طي*** بيكون في أمل
وراح خالد نااااااام وصار يحلم انو بلدو صارت بلد
زين الفينيفي
:D

رهيبة معلم .. خلينا نايمين :D

انو نايمين فايقين ما فارقة
المهم يمسحونا عن وش الأرض
:D

قوم فوت نام ... وصير حلام ... انو بلدنا صارت بلد ...

قوم فوت نام .. هالأيام حارة بيحبّلها ولد

عذراً زياد الرحباني .. تسكير الحارة لم يعد مجدياً :)

قلتلي رواتب لكن :lol:

طيب ليش هالشي ما بيصير عنا و بعملوا هيك عنجدمنو الدولة بتستفيد
و المواطنين بيستفيد

بس وين بدو بصير هالشي و نحن بعدنا منقول انو المازوت طلع و التكسي مو على العداد و مافي زيادة بالرواتب و التصدير ممنوع و نحن لسنا جزيرة انما نتأثر بزيادة الأسعار (اما اذا نقصت الأسعار فسمعان مو هون)و..و.و.و.و.و.و.ووو............... ........................



بس فعلا خلينا محكومين بالأمل

:shock::shock::shock::shock::shock::shock::shock:

أبو حميد هني عم بيقولوا بس كل شوي بيقولوا شغلة شكل
بس أحلى أحلى شغلة
انو بدون يعرفوا نسبة الفر بالبلد
انو شو بتتوقع تطلع
يعني كلنا فقرا ماعدا عوائل السلطة السويسرية بالصلصة البنفسجية

هلاء قصى بدك ننحكم بالامل مننحكم
بس بدي خبرك انو أمل ماتت عنا بالبلد
أو بيوز انتقلت ع جزر الباهاما تصيف هونيك

انو ليش مصدوم
هي كتير بتحب التنانير القصيرة معروفة الوزيرة
:o:o:o

مابعرف ..شي بكفر ...وشي بيقهر ...

عادي أنتي في سوريا
بلد الصمود والتحدي
بس شو
تصدي للمواطنين
:cry:

خيو وينك
لا تشط ولا تمط
انتت مواطن من الدرجة العاشرة بعد المليون
يعني انت هون مجرد حيوان ناطق
لك ولأ يا سيدي مو ناطق
يعني مفكر فيك تنطق
لك كنك زلمي تنطق ولاك
حبيب انت هون بتنفذ فقط لا غير
وسا محونا أماني

كمان تذكرت نكتة حتها بغير موضوع بس هون كمان مناسبة





اجا الله (دخيل اسمو) بدو يحكي مع رئيس امريكا و فرنسا و سوريا

اول شي سأل الرئيس الأمريكي انو ايمتا ممكن انو امريكا تصير منيحة
اجا قلو الله بعد شي 100 سنة
قام الرئيس الأمريكي و بلش يبكي لانو بعد 100 سنة ما رح يكون عايش


تاني شي سأل الرئيس الفرنسي انو ايمتا ممكن انو فرنسا تصير منيحة
اجا قلو الله بعد شي 200 سنة
قام الرئيس الفرنسي و بلش يبكي لانو بعد 200 سنة ما رح يكون عايش


تالت شي سأل الرئيس السوري انو ايمتا ممكن انو سوريا تصير منيحة
اجا الله قعد يحسب
قام الله و صار يبكي

يعني مو على عهد الله :lol:

بإختصار للأبد

خلي العالم تحلم لبين ما يفرضو ضرايب ع الأحلام ..
حلوة كتير منك زين .. :D

مروووش نحنا ماعنا ضريبة للأحلام
لأنو ممنوع حتى نحلم
:D

يا سيدي رهيبة عن جد وقوية كتير , يسلمو ايديك :D

وانا هيك رايي , مشان هيك طفشت من البلد