أخوية - سوبر ماركت الإخوة

ظهيرة أحد الأيام دخل أبو صطيف الى سوبر ماركت الأخوة الواقع في البناء المقابل لبيته و استقبله العامل أبو شريف.

-مرحبا أبو شريف كيفك؟
-أهلين و سهلين عمي أبو صطيف! كيفك و كيف أخبارك؟
- ماشي الحال أبو شريف نشكر الله. كيف الحال حواليك؟
- و الله كمان نشكر الله يا أبو صطيف, بس خيو الوضع شوي صعب يعني متل ما بتعرف التموين منعنا نبيع بضاعتنا لأهل الحارة, و عم يفوتو أهل الحارة بالهريبة من الباب الورّاني متل ما حضرتك دخلت يعني. و ما عم نشتغل الا مع أهل الحارة اللي رضيانين يفوتونا بالهريبة متل حكايتك و كمان أهل الحارة اللي ساكنين بالحارات التانية و في كمان زباين من الحارات التانية مالهون علاقة بالحارة بنوب بس انو بضاعتنا عاجبتهون و بيجو بيشترو من عنا.
- أي و ليش منعوكون تبيعو التموين خيو؟
- و الله يا أبو صطيف قال لأنو منتجاتنا الغذائية لا تناسب طبيعة العصارات المعدية و نوعية خلايا الأمعاء تبع أهل الحارة. قال منتجاتنا انباعت بحارة باب بغداد و صار مع أهل الحارة هنيك تسمم و عسر هضم و لهلأ بالمستشفى... بس و الله مو مزبوط عمي. نحنا هون بضاعتنا نظيفة و مكفولة. بضاعة حارة باب بغداد كانت منتهية صلاحيتها و غير مطابقة للمواصفات و جايبينها تهريب من برا... نحنا ما بنبيع الا منتج وطني و انت سيد العارفين حبيب.
-أي خيو ما بعرف.. انتو كمان زوتوها شوي يعني بدكون بالزور تبيعو بضاعة لا تناسب نظام الريجيم تبع أهل الحارة اللي عمللنا ياه المختار
-حبيبي أبو صطيف شيلنا من سيرة المختار هلأ يستر عرضك مو ناقصنا غير المحل يتشمّع و تتصادر البضاعة.
- له ليش ما الحكي بيناتنا أبو شريف بزعل منك.
- لك حبيبي أبو صطيف هات بوسة لا تزعل ,و ما دامك قربت علي تعا أشاورك مشان ما يسمع كيس الرز هداك لأني ما ارتحتلو... يا سيدي في زباين عم تفوت عم شك انو موظفين بالتموين.
-أوف! شو هالحكي؟ معقول؟؟
- ليش في شي مو معقول بالحارة عمي أبو صطيف؟ يعني الله وكيلك منيح فرانسيس فورد كوبولا ما بيعرف الحارة كان اجا صوّر "العراب 4" هون.
- لا عمي هاد ما بيستقبلوه هون بالحارة أبو شريف و لا يهمك. هاد من حارة مانهاتن و هدول ما بنتعاطاهون لأنو مختارهون بوشت و ابن بوشت كمان يلعن شكلو هوي و سكريتيرتو أم الريّس.
- أي عمي مزبوط هدول كلاب ولاد كلاب معجونين بمرقة كلاب ما اختلفنا... بس ياأخي كتير من حارتنا عايشين هنيك يعني و بيقولو انو أهل الحارة صحيح في منهون مخهون مقفّل بس و الله عالحكي انو في منهون عين الله عليهون مناح.
- خيو شو بعرفني.. أنا بعرف انو بيّاعين السمك سوقهون ماشي هنيك و يبيعو ع كيفهون.......
- يستر عرضك لا تجيبلي سيرة السمك و لحم الخاروف و الفروج و النباتيين
- شيه!! لك شو صار عليك أبو شريف قلب وشّك؟ لك بعرفك نباتي بس ليش تنزعج يعني هيك؟
- و الله مو مشان هيك أبو صطيف بس مبارح اجاني أبو عزّام و بهدلني و زعل مني, و بيني و بينك غلط علي و على باقي الصنايعية بالمحل, و قال حتى بدو يحكي كلمتين مع مدير السوبرماركت بس يرجع من موسكو
- لك مديركون بموسكو؟ لك و الله مالي خبر! شو أخدو لهنيك؟
- و الله يا أبو صطيف راح سياحة و بطريقو يشوفلو كم واحد من أهل الحارة هنيك و بدو يجيب فودكا بدون كحول لأهل الحارة اللي بياكلو لحم الخاروف شنّو متل ما بتعرف اللي الهون مراق بلحم الخاروف ما بيحبو الكحول معو.
- لك أي مزبوط بس مو الكل يعني.. أغلبهون هيك لأنو اذا بدك الصحيح لحمة الخاروف بدها معلمية كتير و اللي فهمانين بيقللولك انو الخروف ما بيصير ينشرب معو غير عيران أو مي, لأنو بتروح بروتيناتو... بس في منهون الله وكيلك قال أكيلة خروف بالاسم بس و مو فارقة معهون بروتينات و لا هم يحزنون.
- أي بعرف أبو صطيف بعرف, على كل بس يرجع المعلم بلكي خليه يدقلك و تشوفو لأنو هو كمان حابب يشوفك.
-أي و الله خليه يدقلي لا تنسى... على كل هات لنشوف ليش زعل منك أبو عزام. بلكي في سوء تفاهم بالموضوع و بحكيلك معو لأبو أكابر أبو عزام كتير محترم و ما بيخجلني بطلب.
- أي و الله يا ريت يا أبو صطيف.. أيدي بزنارك حلها معو و الله ما بحب زعلو يعني
- طيب ماشي بحكي معو بس انت فهّمني شو القصة..
- يا سيد يا أبو صطيف مبارح اجاني ابو عزام هيك متل هالوقت. اشترى رز و فاصوليا و مدري كم شغلة كمان...
- أي زبون محترم أبو عزّام ...
- يا سيدي جدا أكابر و أنا دايما براعيه و لما في هدايا مجانية بعطيه...
- أي بعرف ما بتقصر لا انت و لا باقي الصنايعية و الله و نشهد
- أي و الله يا أبو صطيف.. المهم بعد ما أخد كل شي قاللي حطلي كيلو و نص لحم خاروف هيك هبرة مشان صينية و قلتلو و الله مافي لحمة يا أبو عزام متل ما بتعرف ما منشتغل هالشغلة
- و بعدين؟
- و الله يا أبو صطيف طلّع علي هيك و قاللي: شو يعني انت نباتي و بتبيع ع كيفك يعني؟ شو مشان سوبر ماركت و اضرب و اطرح و مافي لحمة؟
-أوف! مزعوج و الله مو عادتو
- هيك الظاهر... قمت قلتلو ابو يا روحي يا أبو عزام... ما بنبيع لحمة نحنا, لا هي شغلتنا و لا النا مصلحة يعني, و عدم المؤاخذة اللحامين معبين الحارة يعني لازم انا كمان أحوي لحمة؟ و الله مافي سوق يكفي يعني و بعدين أخي و الله مو صنعتنا و المحل يعني ما فيو مطرح مناسب.
- تمام... و شو قللك؟
- و الله انزعج كمان و صار يعيّط علي و يقللي كذاب و منافق..
- الله أكبر... ليش؟ مو عوايدو أبو عزام..
- أي قال انو مين أنا لحتى أقرر وين يشتري يعني؟ هو بدو يشتري لحمة هون يعني بدو يشتري لحمة هون.. و طالما في فروج بالمحل فلازم يكون في لحمة.
- لك صحيح ليش عندكون فروج؟
- هدول كم فروجة شوفة عينك من المزرعة القديمة اللي كنا مشترينها و مجبورين نحطهون هون.. و شوفة عينك يعني حاطهون ببراد البوظة لبين ما نعرف شو نساوي فيهون.
- أي طيب فهّمتو الحكي لأبو عزام؟
- أي فهمتو و الله حكيتلو كل القصة.
- تمام... شوقال؟
- قال انتو محل بيع فروج و بدكون تعملو حالكون سوبر ماركت منشان الرخصة و الضرايب...علي ما بتمشي هيك حركات فهمت؟
- له يا أبو عزام له... خلص أنا برضيلك ياه..
- و ما خلصت القصة هيك.. كمان قال انو نحنا عدا محل بيع فروج عالمستّر كمان نباتيين.. و متل ما بتعرف يعني عمال المحل في من كلو.. في نباتيين و في ناس مراقها خروف و ناس مراقها فروج و في بكّور بيحب كل شي.. خروف و سمك و فروج...
- ههههههههه يحرق حريشو بكّور نهفة... قال مرة سألتو انو شلون زابطة معك لك بكّور؟ قام قال انو اللحوم للقصّابين و البروتينات الحيوانية للجميع..
- أي هيك بكّور ظريف كتير ... المهم و صار يحكيلي عن بياعين السمك و انو نحنا عم نشتغل لصالحهون و هيك..
- ولي.. بياعين السمك؟
- أي, و قال انو هدول هنن اللي خاربين المدينة كلها بريحة الزنخة تبع السمك, و انو حارتهون مو نظامية لأنو المحافظ و قائد الشرطة عطوهون ياها هيك عينك عينك و مو من حقهون يعني
- لك أي معك أنا... بياعين السمك ما بحبهون, بس ياخي كمان انو مو كل شوي بيلزقو كل شي يصير فيهون... يعني شوارع حارتنا وسخة و الوسخ اللي فيها مو بس حسك سمك.
- مزبوط.. و خيو في ناس تاكل سمك و تصيدو لحالها و ما بتتعامل مع بياعين السمك و لا بدها شي من حارتهون
- أي و الله في.. بالحارة ما بقيانين كتير بس في و الله..
- بيقولو انو بحارة الالمانازي بالزمانات مختارهون أبو الفهر ما خلا أكيل سمك واحد.
-أي بس علاك هداك يعني كان... يا طخو يا اشلع مخو.. بعدين بيقولو بصغرو كان يحب السمك كتير كتير
- المهم انت لا ينشغل بالك أبو شريف.. بحكيلك مع أبو عزام و براضيلك ياه و لا يهمك. هلأ بدي روح. بس يرجع المعلم سلملي عليه و قلو يدقلي
- مشي عمي أبو صطيف الله يعطيك العافية يا رب.

Yass