الثورة في عالم التغذية و خسارة الوزن - مهم جدا
 

الثورة في عالم التغذية و خسارة الوزن



طرق التنحيف السابقة
تعتمد طرق تخفيض الوزن المتداولة على مبدأ واحد هو: A high-carb, low-fat diet. أي نظام غذائي يعتمد على الإقلال من الشحوم و الدهون و الإكثار من الكربوهيدرات.

هلق لحظة شوي, ما تاخدني بالعبطة, الدهون و الشحوم فهمتا, يعني السمنة الحيوانية, او اي دهن حيواني, بس شو يعني كربوهيدرات؟؟

الكربوهيدرات يا سيدي هي ما نسميه بالعربية النشا, و هي بشكل عام سلاسل السكر و نشويات و ألياف. و الألياف مهمة جدا و وفائدتها تكمن في جعل عملية الهضم أبطأ... و هو شيء جيد.
الكربوهيدرات هي الخضار و الفواكه, هي الخبز و البطاطا و الشيبس و المعكرونة و البيتزا و غيرها من المواد السكرية و النشوية.

الجمعية الأمريكية لأمراض القلب كانت دائما تنصح المرضى المعانين من السمنة بتخفيف الدهون... أو لربما قطعها بشكل شبه نهائي أو نهائي. مما لاشك فيه, إن تخفيف الدهون و الشحوم الحيوانية يحمي من أمراض القلب, و لكن لم تكن لتخفف الوزن. الأغلبية لم تخسر أي وزن, و البعض كان ليدخل في معركة مع الطعام و نظام غذائي قاس جدا مع تمارين حتى يخسر بعض الوزن, و لكنه سيسأم في النهاية من الشعور بالجوع و يشتاق الى الطعام المحروم منه و يعود للأكل, مما قد يؤدي الى زيادة الوزن الى أكثر مما كان عليه. المشكلة في هذه المواد الخالية من الشحوم و الخالية من الكوليستيرول التي كان ينصح بهل لتخفيض الوزن, أنها كانت تحشى في المقابل بكربوهيدرات مصنعة, أي تسحب منها الألياف, و هنا المشكلة الحقيقية في نظامنا الغذائي. و سأعود لشرح ذلك بعد قليل.

النظام الغذائي الذي أتحدث عنه هنا اليوم, هو ما يسمى ب South Beach Diet. و هو نظام غذائي ابتكره طبيب أمريكي سأذكر اسمه لاحقا. و الكتاب موجود عندي هنا. أنا شخصيا لم أجرب هذا النظام بعد, و لكن أمي تفعل هذا و قد خسرت 2 كيلو بظرف أسبوع, و بدون أي جوع و بنظام غذائي صحي ليستمر معكم طول العمر!

يتبع

South Beach Diet

لا يعتمد هذا النظام الجديد, و سأسميه هنا النظام الجديد, على تقليل الكربوهيدرات, و لا على تقليل الشحوم أيضا. بل على معرفة ماذا علينا أن نأكل و ماذا علينا ان نتجنب و لماذا!!

هناك ما نسميه: الشحوم الجيدة, و الشحوم السيئة. و أيضا الكربوهيدرات الجيدة, و الكربوهيدرات السيئة.

الشحوم السيئة هي الشحوم المشبعة. أو ما يسمى ب Saturated Fats

هل لحظة ما تبلش تخربطني... شو هاي مشبعة دخلك؟

هلق كل شحماية, فيك تتخيل أنو إلها راس من غليسيرول... و دنب طويييل من الكربون و الهيدروجين. عادة بيكون في 3 رؤوس موصولة ببعضها و 3 أدناب كمان... شي وحش يعني

اي لما تكون الروابط بين كل كربوناية و كربوناية بهل دنب عبارة عن رابطة ثنائية, منقول عنها غير مشبعة unsaturated, و إذا كانت رابطة واحدة... يعني زوج واحد من الالكترونات, منقول عنها مشبعة.

قولوا ما كتير رح تأثر معرفة شو يعني مشبعة, بس ما حابب أعطي كلمات مبهمة.

منرجع...

الشحوم السيئة بتشمل الدهن على اللحمة, السمنة و القشطة و الكريم و الزبدة الحيوانية... و كمان الجبنة. هذه المواد تؤثر على السمنة بما لا شك فيه, و لكن اتضح أن تأثيرها ليس لهذه الدرجة من القوة و الخطورة كما هو سائد بين العامة. هذه الشحوم تؤثر على أمراض القلب و الجلطات و يفضل التخفيف منها.

و لكن بالمقابل يوجد دهون جيدة, و هي فعلا جيدة جدا, متل الزيوت المتوسطية (و أعتقد أن متوسطية عائدة على منطقة البحر الأبيض المتوسط الله يخليلنا اياه و يكتر سمكاتو), و أيضا زيوت الزيتون, و ما يسمى بالزيوت المستخلصة من السمك و تسمى ب أوميغا 3 .
او Omega-3 fish oils

نأتي الان على أهم و أمتع فقرة في حديثنا, و هي الحديث عن الكربوهيدرات و أثر السكر على الجوع.

يتبع

اي وينننن قطشتلنا سلسلة افكارنا .. هات المزيد عشان نعرف نحكي اذا في شي بينحكى او عشان انجرب خوش الصيفية على البواب وحنتبهدل :cry:

اي و الله معك حق بس لانو عم ترجم الكتاب و مابدي اكتب شي كمان ما كون متأكد منو مية بالمية انو هيك معناه الصحيح بالعربي... و انا ما كتير بعرف احكي باللغة العلمية بالعربي ماني متعود بقى انتظروا شوي :cry:

OK

مرحبا مجددا

بعتذر كتير عن التأخير في المتابعة...

نعود

الكربوهيدرات و السكريات

الكربوهيدرات كما سبق و قلت هي سلاسل من السكر (و أعتقد ان اسمها بالعربي النشا) و تحتوي أيضا على ألياف. و قد اتضح أن هذه الالياف مهمة جدا في عملية الهضم.. يعني مفيدة كتير

بناءا على هذا هناك نوعان من الكربوهيدرات.. كربوهيدرات كويسة و كربوهيدرات سيئة.. الكربوهيدرات السيئة هي أي كربوهيدات سحبت منها الالياف... إما بطرق صناعية أو بسبب الطهي. معظم هذه الكربوهيدرات السيئة تود في الاطعمة المخصصة ضد السمنة في أميركا! و بالتحديد الاطعمة التي يكتب عليها low-fat .. و هذا سبب السمنة عند الشعب الامريكي.. حيث ان الشحوم تسحب من بعض الاطعمة خوفا منها.. و لكن يتم ادخال كربوهيدرات مصنعة بدل عنها

لنأخذ هذا المثال حتى نفهم أثر السكر و الألياف على الجوع

جيت تعبان أنت من برا... دخلت عل البيت.. بدون لا سلام عليكم و لا شي... صبيت كاسة عصير فواكه كاملة و شربتا فرد دفشة.
هلق العصير هوي عصير فواكه... يعني سكر... سكر بدون اي نوع من الالياف... يعني انت بتكون كأنك كبيت كمية هائلة من السكر الجاهز الذي لا يحتاج لاي نوع من الهضم في معدتك
هذا السكر... يستطيع الوصول الى الدم بسرعة كبيرة... لانه خالي من الالياف و لا يتعب المعدة في الهضم (أن تأخذ معدتك وقتها و جهدها في هضم الطعام هو شي جيد!)... فهذه الكمية الكبيرة من السكر وصلت الان الى الدم بشكل مفاجئ
ماذا سيحصل يا حزرك؟
سيقوم البنكرياس بافراز كمية كبيرة من الانسولين.. ايضا بشكل سريع
الانسولين هو البروتين الذي يقوم بإدخال السكر الى داخل الخلايا من الدم
يعني تقريبا فيكم تقولوا الخلية عليها اقفال على الغلاف... و كتير من المواد ذات الحجم الكبيرة بتدخل عن طريق اقفال معينة.. و في حالة السكر يحتاج الى الانسولين لادخاله
بس المشكلة... انو البنكرياس ما كتير ذكي... يعني غالبا ما سيحصل هو ان البنكرياس رح يتحمس كتير... و يفرز كمية أكبر من اللازم من الانسولين... يعني بيعمل يلي عليه و زيادة
هادا الشي رح يسبب استهلاك أكبر من اللازم لسكر الدم... يعني متل ما بسرعة دخل السكر على الدم.. متل ما بسرعة راح.. شو النتيجة؟؟ النتيجة انو سكر الدم رح ينخفض كتير تحت المستوى يلي كان عليه قبل... يعني انت رح تجوع بزيادة.... و تاكل كمية اكبر مما بيحتاج جسمك. لما السكر بيدخل ببطئ على الدم... الانسولين بينفرز ببطئ.. و السكر بيرجع بينخفض ببطئ... يعني ما رح تجوع كتير... بينما بالحالة يلي وصفتها رح يصير عندك ما يسمى ب cravings ... يعني اشتهاء كبير للأكل
و غالبا الانسان بدون ما يعرف بس الدماغ بيقلك روح كول حلويات او خبز... يعني مندخل بحلقة مفرغة

هلق في مشكلة تانية مع موضوع الانسولين... انو على هل حالة... احيانا بتتولد مقاومة عند البنكرياس ضد تنبيهات السكر القوية.. و هيك ما بقى بينفرز الانسولين عند درجة التنبيه الاصلية من السكر... يعني صار بيلزمو سكر اكتر لحتى يتنبه و يفرز انسولين... و فيكم تقولوا انو هاد مبدأ مرض السكري

بس طبعا ما تخافو يعني.. ما رح يتولد مع الانسان سكري من وراء كاسة عصير فواكه... بس احيانا بتتولد نوع من المقاومة و هاي المقاومة بتزيد مع الايام و الواحد بيصير بيضطر ياكل سكريات اكتر

يتبع

معنى هل كلام انو في اطعمة كتير لازم ننسى موضوعها نهائيا نهائيا

اول شي رجاءا ما حدى يشرب عصير فواكه و كولا و هيك حركات
بدك فواكة ارجوك تفضل كول فواكه طبيعية.. مشان المعدة تاخد وقتها بهضمها و يدخل السكر شوي شوي على جسمك

كمان يؤسفني اني رح قول شغلة.. و اكيد ما حدا رح ينبسط... بس للأسف الخبز الابيض العادي يلي بياكل منه كل الناس ما كويس كتير... لانو مصنع و مسحوبة منه كل الالياف
يعني اذا بتقدر حاول تخفف منه و جرب شوي الخبز الاسمر او النخالي... احسن بمليون مرة

انا شخصيا صحيح اني ما عندي وزن زائد... بس عم حاول غير من نظام غذائي... النظام الغذائي هاد يلي عم بحكي عنو ما بس للتنحيف... بس كويس كتير للتغذية بشكل عام

شباب انا بتذكر حالي منيح احيانا على العشاء اذا لحقت و اكلت رغيف خبز هيك بسرعة ما بلاقي حالي غير آكل مدري كم واحد بعدو فورا و بدون ما حس... هادا هوي السبب انو الواحد لازم ياكل الاكل الطبيعي اكتر و يلي بيصعب على المعدة هضمو

نحنا ما بدنا نعطي المعدة اكل مهضوم و جاهز بالمصانع

و كمان لازم الواحد ما يجوع ... يعني ما تترك حالك كل النهار بلا أكل و بعدين تطرق خمسين رغيف
و الفطور مهم كتير... ع فكرة الفطور أهم وجبة بكل النهار

حاجة لهون اليوم بس للكلام بقية

تحياتي
جو

يعطيك العافي حبيب
والله حكي نضيف .. العادي

عادة الواحد لما يكون جوعان و حابب يخفف وزن... بيقول خليني روح اكل شوية خبز حاف احسنلي مشان ما اسمن و هيك بشبع

بس الحقيقة انو اكل الخبز حاف ما كويس ابدا لانو رح يخليك تجوع بزيادة
اذا بدك تاكل خبز الاحسن انك تاكل معها جبنة بيضة او صفرا مدهونة
شوية دسم (جبنة) مع الكربوهيدات (الخبز الابيض يلي هوي من الكربوهيدرات السيئة لخلوه من الاليلف) بتجعل عملية الهضم أطول... يعني بتبطئ من امتصاص السكر بالدم... و هاد شي احسن بكتير من انك تاكل خبز حاف

كمان اكيد معظم الناس بتحب البطيخ و الجبس.. و هني من اكتر الفواكه يلي بتعطيك سكر بسرعة... يعني كتير بيجوعوا... يعني اذا كويس اذا بتاكلوا شوية جبنة مع الجبس كمان. ع فكرة طيبة الجبنة البيضا السورية مع البطيخ الاحمر اذا ما جربتوها لسا

و كما تذكرة انو الحليب كتير ضروري.. و بينصح بوجبتين حليب او البان باليوم.. يعني المفروض نشرب كاسة حليب الصبح و كاسة المسا بس اذا ما بدك لازم تاكل وجبة لبن أو جبنة.. ضروري كتير

هادا الريجيم بيتقسم ل3 مراحل
المرحلة الاولى اسبوعين و الواحد ما بيدوق جنس الفواكه او الخبز و النشويات.. يعني كاتو او بيتزا او معجنات.. بنووب.. ابدا و لا خبز
هلق انا ماني عم قول روحوا عملوا هيك لاني عرفان ما فيكم لانو بسوريا ما في اكل بديل
بس لما الواحد بيعمل هيك بيخسر حوالي 4 كيلو و اكتر كمان خلال هل اسبوعين
و المرحلة التنية بيدخل فيها خبز شوية و قطعة فواكه صغيرة باليوم
و المرحلة التالتة كمان الها شغلات خاصة..
و الواحد بس يلاقي صار وزنو ثابت و بطل ينزل بيقدر يرجع على المرحلة الاولى

- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا -

منيح حبيب .. بس الحقنا بهال الريجيم هلق بلش الحكي النظامي
بدنا شي ريجيم هيك يردنا شباب
انا ما افهمت تفاصيل الريجيم
فص فص شي شوي اكتر .. مثلا بدائل متل شو هاي بالاسبوع الاول ..

وبعدين وين الريجيم بالموضوع :?:

من قسم الصحة:D