|
لهجة اصحاب البلد, او اللكنة
هلق اللي عايش برات ببلد اجنبي, غالبا بيقدر يفرق بين لهجات الناس ولهجتو.
وغالبا بيعرف انو هالناس (سكان البلد الاصليين) لهجتون شوي مختلفة عن لهجتو. احيانا بكون الواحد لهجتو كتير مكسرة, واحيانا بتكون مكسرة بشكل بسيط, بس اللهجة موجودة. عالعموم. هلق انا شخصيا برأيي انو 99% من الاقوات اذا مو اكتر, الواحد رح يكون عندو لهجة مختلفة عن اصحاب البلد اذا اجا بعمر كبير شوي, خلينا نقول 10 سنين واكبر. طبعا في بعض الناس بياخد لسانها عاللهجة بسرعة. بس هدول عددهون بسيط. هلق انا عم احكي هالحكي عن "اكسبيرينس" فانا عايش بمنطقة فيها عرب سوريين باعداد مو قليلة. اللي شايفو انو الاكترية الساحقة من اللي عايشين هون (لاكن كانو خلقانين برات اميركا) عندون لهجة مختلفة عن باقي الشعب الاميركي. (طبعا انا واحد منهون) وهالناس في منهون اللي الو 30 سنة وفي منهون اللي الو 40 سنة وفي اللي الو 20 وفي اللي 5 و 2 سنين يعني وقت هدول العالم بيحكو بالانكليزي دغري اللي قدامهون بيعرف انو هدول مو اميركان. هلق بالزمانات كنت عم احكي مع انسة لغة. قلتلا انو انا كتير بكره انو عندي لهجة مختلفة عن باقي الناس قالتلي تقريبا دايما لما بتجي من بلد تاني او من منطقة مختلفة وانت اكبر من 8 سنين, فرح تكون عندك لهجة. هلق بالزمانات كمان كنت عم احكي مع شخص (مو عايش باميركا) وهالشخص مصرّ انو لاء الواحد لسانو بياخد على اللهجة تبع البلد اللي عايش فيه دغري. طيب هاتو لشوف شو رايكون انتو. متل ما سبق وقلت, الحكي عن الناس اللي بروحو بعمر كبير, مو صغير. ما تصوتو بس. عطوني رأيكون (بفضل يكون التصويت من الناس اللي عايشة ببلد اجنبي وبتعرف شلون اللهجة مزبوط) |
أنا برأيي تقريبا مستحيل ياخد عاللهجة المحلية ( هادا ازا عرف يتقن قواعد اللغة متل العالم بالأساس وخاصة ازا ماكانت اللغة انكليزي)
هلء أنا عايش باوكرانيا وتقريبا بمجرد مااحكي أول أو تاني جملة بيعرفوا أني أجنبي وهالحكي بينطبق على كل الأجانب حتى اللي صرلهم 30 سنة.. وعلى فكرة الشعب المحلي هون واللي عندو خبرة بالتعامل مع الأجانب (كمدرسي الجامعة) بيحسنو من مجرد سماع صوت الواحد انو يمبزو هادا عربي أو هندي أو صيني أو افريقي أو برازيلي أو.. أو.. ( حتى العربي المصري بمجرد ماتسمع صوتو بتحسن اتطلعو من بين ألف واحد:o) وبعرف شب أبوه عربي وأمو أوكرانية ودرس للصف السادس باوكرانيا بعدين سافر وبعدين رجع كمل جامعة باوكرانيا ومع ذلك بعد أقل من ساعة الا مايحكيلو شي كلمة تبين أنو اجنبي (طبعا بالنسبة للشعب المحلي) وفي نهفة أنو عندي صاحب متجوز من هون وعندو ولد عمرو ست سنين ولما بيكون هو وابنو كل مابيخبص الأب بينط الولد وبيصححلو شلون يحكي الكلمة:lol: وأنا لئيت في طريئة بتفيد بتحسين هالشغلة وهي متابعة الأفلام الناطقة بهي اللهجة.. لأنو لما بتكون عم بتناقش وتحكي مع الناس المحليين غالبا مابتكون مركز على كيفية نطقو للهجة وانما مركز على موضوع النقاش وشلون بدك ترد (هادا ازا ماكنت عم تفكر شلون عم يتقبل هو لهجتك) .. أما الأفلام فبتكون مركز عاللهجة أكتر وبتكون لحالك فينك تحاول تردد اللهجة... آسف عالأطالة وشكرا:D |
متابعة .. :larg:
ورح اجــّل التصويت والحكي لبعدين .. |
اي هلا اكيد دايما في لهجة بتروح او بالاحرى بتخف مع الوقت وهالشي بيعتمد ع طبيعة الانسان و ع شغلو ع حالو بس بتضل موجودة وبيضلو بيقدرو يميزوها عن لهجتووون
|
لا بالعكس ..
الواحد بس يعدلو اكتر من 5 سنين ( ع الاقل ) بالبلد .. بصير يحكي متل اهل البلد واحسن كمان .. بعدين الشغلة بتجي ع كتر السمع يعني مثلا حدا قاعد بقطر او بالسعودية او بالامارات وين مابروح بسمع هالهجة الخليجية اي بصير لا اراديا تفلت بعد المصطلحات منو من كتر مابسمع وكمان في مثال تاني هلأ الحلبي لما بروح هع حمص بضل بيحكي حلبي وقدام كل العالم بينعرف انو حلبي :gem: بس الحمصي لما بجي ع حلب بيطعج لسانو وبصير بحكي حلبي (ليش الله وأعلم ) :p وهكذا |
هلأ لما بكون عايش بمنطقة والناس اللي حوليه من البلد اللي هو فيها ومش عرب رح ياخد عاللهجة
بس ازا كان استيعابو بطيئء ما حياخد عليهم لانو انا جوز خالتي من زمان بأميركا وبيحكي متل لهجتهم فإنو فيه احتمال يحكي متلهم بدون شي بس الا ما تكون شي بلهجتو ببين انو مو من اهل البلد نفسها |
اقتباس:
بيحكي لغتهن مو معناتا بيحكي لهجتهن هون في اختلاف كبير باللهجات حتى بين الولايات يعني واشنطن الها لهجة وبنسلفانيا الها لهجة و كاليفورنيا الها لهجة |
اقتباس:
بس هوي عم يحكي ع غير لغة خالص متل الانكليزي اقتباس:
اول الشي متل ماقال هاني انو بيحكو لغتون مو يعني بيحكي لهجتون وتاني شي انو مثلا اللي بيكون بالبلاد وبيشوف حدا مننا عم يحكي انكليزي قدامو مارح يقدر يفرق باللهجة اللي عندو يمكن لانو مو سمعان اللهجة الاصلية بالزات بس مستحيل يعني رح بتضل عندن لهجة يعني في عالم بعرفا خلقانة هون وعايشة طول عمرها هون وحكيا بالعربي مكسر بس سبحان الله لانن تعلمو اللغة بالاول من اهاليون تقولو يللي عندن اللهجة تحس اللهجة عندن ببعض الكلمات... |
اقتباس:
لا ازا هيك اختلف الموضوع شوي |
انا بقول بتعلق وين خلقت وبأي وسط وشو الاكترية فيو!
يعني انا خلقت بدولة عبرية ياللي لغتها الرسمية عبرية ..وبالرغم من اني بعرف اللغة منيح وبالرغم من اننا منبلش نتعلم عبري من جيل 5 سنين!! بس لسا ما بحس حالي متقنة اللهجة..وخاصة انو من بلد لبلد اللهجة بتختلف! فا بضلني حس انو انا بحكي عربي-عبري(لاني عشت ببلدة عربية بحت) بينما امي متلا خلقت بحيفا وبحارة معظمها يهود..وعاشت بينهن..صحيح انها تعلمت بمدرسة عربية للراهبات..بس انو بكفي انها تعايشت مع يهود من وهي صغيرة..وبكفي انها علّمت اطفال يهود..فكل هالاشيا بتخليها تحكي اللهجة بكل اتقان! بس ما تخافوا عليي..بكرا بصير احكي متل امي واحسن :gem: شكرا عالموضوع :D |
أنا رأييي من اكسبيريانس انو أي واحد بيدقق عهالموضوع من أول ما يجي عالبلد ويشتغل على طريقة نطق الكلمة صح بيقدر يجيب اللهجة تمام الشغلة بدا مجهود كبيييييييييييييير و تعب وقدرات خاصة :D |
اللهجة رح تكون موجودة أكيد
بس بيختلف وضوحها حسب لهجتك الأصلية يعني مثلاً ...... ممكن تتعرف عالهندي اذا حكي بالانكليزي قد ما يكون قوي باللغة و المصري كمان نفس الشي السوري أقل بشوي |
اكيد الواحد بدو ايكسبيغيونس لحتى يتعلم اللهجة بس بيضل عندو لكنة خاصة بيه يمكن يتخلص منها مع مرور الزمن .من خلال ملاحظاتي للهجات اقربائي تم تقسيمهم كالتالي
الفئة المتغربة من سن صغير*تقريبا من سن 5 سنوات*هدول وقت بيحكو ما بتلاقي فرق بيناتهم وبين اهل البلد يعني تكون لكنتهم مطابقة للكنة اهل البلد الفئة المتغربة من سن 15 والعشرينات والتلاتينات*مع مرور الوقت بتلاقيهم بيتقنو اللهجة اربعينات وما فوق *هدول طال الزمن او قصر بيضل عندهم لكنة خاصة بيهم . هالاحصائيات اللي استنتجتا بتخص الاقرباء والناس اللي بعرفهم .بس بيضل الامر حسب التعود على اللهجة واستعداد نفسيتنا للتحدث بغير لهجتنا. |
اقتباس:
مرة كنت عم اشتغل واجا واحد سألني سؤال. قام دغري عرفت انو عربي. وفعلا دق تلفونو ورد عالتلفون وطلع عراقي :gem: الهندي كمان سهل تعرفو من لهجتو. والصيني مانك بحاجة للهجة لتعرفو :lol: اقتباس:
عالعموم مشكور على ردك. انا معك بكل اللي قلتو. اقتباس:
متل ما قالتلك ام الرور. المقصود هو اللي بروح على بلد لغتو مختلفة. يعني انا كتير سهل اني قلد اللهجة اللبنانية, او المصرية, او التونسية. او غيرون من اللهجات العربية. اقتباس:
يعني متل ما قلت 10 سنين وما فوق. (كعمر تقريبي) اقتباس:
هلق يمكن الهندي غالبا بكون عندو اسوء لهجة بحكم انو تلت ارباع الاحرف الانكليزية ما عندون ياها هني. بس في بعض السوريين لهجتون كتيير مكسرة. اقتباس:
مشكورين الكل عالمرور |
اقتباس:
قصدك متل ماقالت ريتا مو ام الرور :lol: صاير عبتعفس العادة :p |
اقتباس:
يعدمني هبلك وان ومن منبري هازا اندد واشجب له له خربطنا نبلش خلينا نركز:p واناا اوافقك جاد ع كل شي قلتو |
اقتباس:
|
اقتباس:
بس بالفرنسي |
| الساعة بإيدك هلق يا سيدي 06:10 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
