|
كان أحمر..
من فترة مو قصيرة بطلت كلمة الإشتراكية براقة بسورية متل أوّل.. والإقتصاد السوفييتي اتبهدل بعد الإنهيار وكنّا رحنا بالعجقة معو.. بس لحسن الحظ ما عملت سورية إجراءات متل الأرجنتين أو لبنان.. وهاد الشي خلّى الطبقة الوسطى السورية تحافظ على بقاءها كإحدى الطبقات الوسطى القليلة الباقية بالعالم... طبعاً هاد الحكم كتير خاضع للشرط السوري.. لأنو لمّا كانت تنخفض حدّة الأزمة كانوا الناس ما يازالوا تحت خط الفقر السوري.. اللي هو أدنى من خط الفقر الأوروبي... بالتالي ولو مو كتير دقيق التوصيف.. حافظت الطبقة الوسطى على مكتسباتها لدرجة ما... الكلام هاد هو مقدمة لشي لاحق... أنو من فترة كم سنة... طلع السيد عبد الله الدردري على وسائل الإعلام وأعلنها بصراحة... اقتصاد السوق.. والاستفادة من التجربة الماليزية.. طبعاً هاد بعد فترة من الخطابات التحديثية والإصلاحية اللي أدت بطريقة ما لربيع دمشق والتراجع عنه... ببساطة سوقت الحكومة الخصخصة على أساس أنها الإصلاح.. وصار الخلط بالمفاهيم (مع شعب غير مثقف بالمصطلحات الإقتصادية بشكل عام لضعف هاد الجانب بالتعليم...) ما أدّى لكسب تأييد كبير لهي الإجراءات.. (أنا بذكر أنو في ناس كانت على شوي رح تفتح مباركة بمناسبة افتتاح أول مصرف خاص بسورية).. طبعاً بعد هي الإجراءات بكم سنة بلشت تطلع النتائج.. نتائج التحالف مع صندوق النقد الدولي ومحاولات يائسة لكسب رضا الإتحاد الأوروبي انتهى الموضوع إلى رفع الدعم والأسعار والضغط... وبدأت الحكومة تباهي بكونها حققت أرقام تنمية.. معدل النمو كبعاً مع تجاهل التضخم والزيادة السكانية السؤال المهم هو.. عندما أيد الشعب هذا التوجه، هل كان واعياً تماماً بم يؤيّد؟؟ هل التحويل الاشتراكي هو الاشتراكية؟ هل اقتصاد السوق هو الديمقراطية؟ مشكلتنا عدم فهم المصطلحات، بل بالأصح المراهنة على مصطلحات لم نفهمها... ما الفائدة من معدل نمو شركات لا تمس المواطن من قريب أو بعيد؟؟؟ بعدين... على فرض.. على فرض كان الاقتصاد أحمر.. للأسف بقلكون.. أنو صار أسود
|
اقتباس:
ولسّا الأسوأ لأدام .. لانو المستوى المعيشي ودخل الفرد ما رح يرتفع .. وما رح يرتفع الا الضرايب والأسعار وارصدة أصحاب السلطة اوالمال.. |
اقتباس:
يعني إذا ما معك مصاري تاكل... شو بدك بالمحارم؟؟ قال خصخصة قال... بعدين شؤال واضح وصريح... أنو كلنا منعرف لوين رايحين.. وكلنا منعرف أنو مو مكان حلو بنوووب... مدام هيك.. ليش منروح؟؟ أو عالأقل إذا مجبورين نروح.. شلون عاجبنا هاد الوضع؟؟ صحي مدري ليش لما كتبت الموضوع عرفت أنك رح تردي أول وحدة!! :D |
اقتباس:
يمكن لاني بعرف شو مستوى المكتوب .. :D موضوعنا .. في نقطتين أول شي .. كل مواطن عندو وجهة نظر ونظرية في الاقتصاد .. هاد بدو اقتصاد رأسمالي وهداك بدو اسلامي وغيرو بدو مختلط .. الخ .. وكتير منهم واولهم محسوبتك اللي عم تكتب ما بيفهمو بالاقتصاد . يمكن نحنا بحاجة لاقتصاديين مختصين ليوجهونا بس يكون قلبهم عالشعب مو عجيوبهم وبدنا حكومة تتبناهم. تاني شي .. اللي بدو يكون عاجبو بدو يكون مستفيد أو معو مصاري .. لانو وقتها اكيد بناسبو هيك نظام. اللي مو عاجبو ما بيقدر يحكي ولا يعترض ولا يفتح تمو بسبب شُح الحرية وقلة الحيلة .. يعني كيف ما بتيجيها بدك حرية وبدك ناس تقول رأيها وبدك ناس بدها تشتغل للبلد وقلبها عالبلد .. وين بدك تلاقي هالشي؟؟؟؟ |
عالورق انحكى عن خصخصة ..
ابو الحروف . عملها ( حصحصة ) .. وتم توزيع الحصص بالطوابق اللي فوق .. المهم .. مو بالضرورة يعرفوا الناس المصطلحات و الكلمات والمفاهيم الاقتصادية .. مو بالضرورة نحنا الناس نفهم النظريات والتطبيقات !! عنجد بيكفي - نحنا الناس - نعرف وين احتياجاتنا .. وشو هي مشاكلنا .. لحتى نفهم هالدنيا كيف بتمشي .. وكيف عم تنسرق !! شكرا جدا جزيلا .. وبالأحمر !! |
اقتباس:
بس رد قهوة دايمي شي بيجنن وحلو كتير كتير وسلمولي ع ابو الحروف .. بعدين شو المانع نلاقي محارم ونحسن نشتريها ......... يعني يا منموت عالدور يا بنموت بحسرتها انا مع الاحمر |
أول شي مشكور على هالطرح الموضوعي كتير ...
- بدي قول أنو سياسة أقتصاد السوق سياسة بتتعارض مع مبادئ ( حزب البعث العربي الأشتراكي ) و أكدلي على أشتراكي !! بس يا ترى شو المانع لما حزب أو حكومة أو اي شخص كان .. لما بيشوف حالو أنو ماشي على غلط أنو يصلح هالغلط بشئ يتعارض مع مبادئو .. هلأ التغير لازم يصير .. و الحزب أو الأقتصادي لازم يتطور ليواكب تطور العالم الي حواليه .. رغم اعتراضي الشديد على فكرة البنوك الخاصة ( على سبيل المثال ) بس ما بتتخيل الخدمات الي بتقدمها البنوك بالعالم لعملائها .. و ما فيك تتخيل بدول تانية يمكن انو يقدروا يعيشوا بلا بنوك ...بالمقابل بينظرولنا نظره المتخلفين لأنو ما عنا غير ( البنك التجاري السوري ) وما أدراك ما التعامل مع البنك التجاري السوري .. يعني .. سوريا لازم تخلع عنها عباية الأشتراكية ( و هادا الشي عم تعملو من فترة مو قصيرة ) و تواكب السوق .. هلأ المأخذ الي بتاخدوا على حكومتنا .. الضحك على الناس بمصطلحات يدري ربك من وين بيجيبها الدردري و هادا كلو حتى ما يظهروا بالموقف الضعيف قدام مؤيدي و مراقبي تصرفات الحزب و الحكومة ... بكل الأحوال بدنا كتير كتير لندخل بقطار التطور الأقتصادي العالمي .. من 5 سنين و أنا عم اسمع بــ بورصة دمشق !!!! دخلكن حدا بيعرف شو أخبارها ؟ |
أول شي بحب أشكركن شباب على الحوار اللي شكلو ماشي صح..
هو أنا فكرتي أنو الخصخصة متل التحويل الإشتراكي بناحية مهمة كتير واللي هي أنو التنين خارجين عن التطور التاريخي الطبيعي... بمعنى أنن اقتصادات (معدلة جينيّا) إن دقّ التشبيه... فلنحكي حسب مرجعية مهمة كتير بالاقتصاد واللي هي كارل ماركس (ما حدا ينط هلق يقلي سنة 1800 وما بعرف قديش.. عم نحكي نظري) برأي ماركس.. التطور الطبيعي للنظام المشاعي هوالعبودي.. بعده الإقطاعي.. ومن ثم الرأسمالية وبالنهاية الإشتراكية أي الثورة (برأي ماركس) هلق العطل النظري بالتجربة تبع سوريا بينقسم لجزئين.. الأول هو الثغرة اللي كانت بين المرحلة التانية والرابعة.. أنو نطينا خطوة.. هلق بأواخر الخمسينات انتهج خالد العظم استراتيجية كتير مهمة، وهي تعزيز الإقتصاد الوطني عن طريق تعزيز الصناعة الوطنية... وألزم الشركات الخاصة بشي تدفعوا كضريبة بتصب بمصلحة الوطن... هلق لهون كنا ماشيين حسب التطور الطبيعي، بس بعدين صارت أكبر غلطة بتاريخ سوريا الحديث، واللي هي التحويل الإشتراكي، على الطريقة السوفييتية، واللي هي اعتماد وسائل الإنتاج الرأسمالية اللي هي كتير سريعة و فعالة اقتصاديّا لبناء الاشتراكية.. هلق الثقطع هون في مشكلة أنو أدوات الإنتاج والبنى التحتية الإقطاعية غير قادرة على أنها تكون حوامل الإشتراكية، بالتالي فرح يصير في أزمات اقتصادية.. وهاد الشي برأيي مو بحاجة لشرح نظري لأنو على أرض الواقع بانت صحته بتجربة السوفييت هلق الغلط الثاني اللي صار هو القفز مرة تانية بس بغير طريقة... هلق أهم منظري الليبرالية رتبوا التطور الطبيعي للإقتصاد كالتالي مشاعي- عبودي -إقطاعي- رأسمالي- وبالنهاية الليبرالية أو الليبرالية الجديدة الاقتصادية (اقتصاد السوق) ونحنا كمان ردينا حاولنا نقفز نفس القفزة... بس كان هالشرح المطول (ما تواخذونا)توضيح أدق لوجهة نظري... آسف للإطالة.. إي هات لنردّ! اقتباس:
أكيد مو مهم الناس تعرف النظريات و قصصها.. بس مهم يكون في وعي لدرجة معينة أنو الحصحصة اللي أنت حكيت عليها تكون مفهومة من العامّة (واعذروني على استخدام هاد المصطلح)... يعني أنو أنا أعرف ليش ارتفعت الأسعار.. وليش كل ما زاد راتبي بيزيد مصروفي دبلين وتلاتة.. وليش هجرة الأدمغة هي كارثة وطنية ومشكلة أمن دولة ثقافي واقتصادي.... يعني الموضوع هو خارج التنظير والعلاك المعتاد.. الموضوع بيمسنا ونحنا ما عم نقدر نستوعب أنو فينا نتغير.. اقتباس:
أنا مو مع الأحمر.. ولا مع الأسود بسوريا.. ممكن كون معهن بموزمبيق أو كمبوديا أو أرمينيا.. بس مو هون اقتباس:
مواكبة السوق في إلها ميتين طريقة.. عالأقل ندخل السوق متل الدول القوية ليكون عنّا قوة سياسية وعسكرية إضافية.. ليش لندخل عالسوق إذا بدها تفقرنا؟؟ الدول بتفوت عالسوق لتبيع وتشتري.. مو لتتدين وتصدر البطاطا والبقوليات ع حساب المواطن. أنا مو ضد المؤسسات الإقتصادية الخاصّة أبداً.. أنا ضد الإطار تبع هي الاستثمارات والمشاريع.. وطريقة وضعها بسوريا.. وتحياتي للكل مرة تانية:D |
اقتباس:
الهام والمهم واللي بنفس الوقت كان عودة لبعض المواضيع الجيدة في المنبر واللي افتقدناها من مدة تانيا انا عندي تعليق صغير أكيد انه كل شخص عنده آراءه وميوله واهوائه وهي كلها بتأثر على حكمه بالأمور يعني في ناس متل ما قال احد الردود بدها اقتصاد سوق في ناس بدها اسلامي في ناس اشتراكي في ناس شيوعي وبتمنى نفرق بين الأشتراكي والشيوعي بس انا عندي رأي صغير بعد ماقريت تعليقك على تطور الأنظمة والأقتصادات المعدلة جينياً النقطة يا صديقي انه كل هاد اللي انحكى هو نظريات والنظريات هي مو اشياء غير قابله للتعديل يعني انا برأيي الشخصي انه ابدأ مو غلط انه انت تبتدع لنفسك الشكل اللي بيناسبك من اي نظرية يعني مو ضروري تاخد اي نظريه وتطبقها متل ما هي لأنه كتير مهم انه تفتش عن خصوصيتك وبهالحالة الخصوصية الأقتصادية لمجتمعك وعلى اساسها تقدر تعمل التوليفه اللي بتناسب واقعك وتطبقها لتضمن نتائج افضل طبعا هي من ناحية عامة اذا بدنا نجي على واقعنا بالبلد المشكلة انه بتحس انه القصة حقل تجارب يعني لخلق المجموعه الأقتصادية بالحكومة ما قدرت تقدم مشروع متكامل يكون واضح وكامل حتى نقدر نناقشه ونحكي فيه كل اللي عم يعملوه هي مجموعه من "الأفعال او ردود الأفعال" الفردية والمشكلة انه احيانا بتحسها غير مترابطة يعني من حيث المبدأ انا مو ضد اعادة تشكيل الأقتصاد او الدورة الأقتصادية من جديد والبحث عن ما يناسبنا من اي تجربة كانت ولكن انا ضد عدم الوضوح او عدم وجودة خطة متكاملة ومعلنه ليتم نقاشها ودراستها على الملأ بعدين بالنسبة للبنوك الخاصة انا كمان مو ضد انه يتواجد بنوك خاصة ولكن ضمن شروط وقوانين معينة المشكلة الكبيرة اللي بعدنا عم نعاني منها بنظري هي احد المقدسات بأقتصادنا "الخطة الخمسية" اللي لهلق ما عم افهم ليه ما عم نقدر نتخلص منها وهي اللي اثبتت فشلها على مر "الخطط الخمسية" السابقة كلها طبعا مو لازم ننسى اثناء نقاشنا صعوبة الوضع الأقتصادي ببلدنا وصعوبة الخروج به الى النور في ظل الوضع الدولي اولا وفي ظل الحالة الأقتصادية التي بيعيشها البلد ثانيا يعني لازم نحكي اللي النا واللي علينا وانه مهمة الحكومة الأقتصادية ليست سهلة على الأطلاق بل برأيي بحاجة الى اشبه بمعجزة ولكن هذا ليس بمبرر لهم كي يتصرفون بمبدأ المبادرات الفردية او انه بيمشوا بطريق لحتى يتسكر بغيروا على واحد تاني وأكيد الي رجعه |
اقتباس:
لأن الشعب اصلا ما بيعرف شو كان عم يصير متل ما انت تفضلت و حكيت ان اغلب الناس ما فهمانه هل المصطلحات |
اولا تحيات اخ كهربجي على الموضوع
ما فيني علق صحيح الكلام مية بالمية بس عم استغرب معقول تسارع العجلة الإقتصادية " الرأسمالية " كان بهالتسارع بسوريا لحتى الشارع بلش يحس بهالسرعة تصبحون على وطن ظل جيفارا |
لماذا العالم اللاتيني يا ترى يبتعد عن الراسمالية ويختار الاشتراكية
امريكا اللاتينية نموذج عن القارة التي جربت الخيار الليبرالي الاقتصادي وجربت مساوءه على السواد الاعظم من المجتمع والان تختار البديل الراسمالية خيار طبقة وليست خيار الشعوب |
أثبتت التجارب في البلدان الفقيرة أنه يوجد اشتراكية وحيدة وفعالة جداً ومجربة ولاتؤثر على مسار الرفاه الرأسمالي
الذي كان و بات وأمسى وأضحى يخرب كل الأشياء ويحرق الأخضر واليابس وما بينهما هذه الإشتراكية الجميلة هي اشتراكية الفقر حيث الفقراء فى كل البلدان الرأسمالية يشتركون بتوزيع اللاشيء في ما بينهم وهذه هي قمة الاشتراكية وفي نهاية المطاف لابد لهم من الإنتقال إلى شيوعية الموت الذي يأخذ الجميع في أحضانه .......... ودمتم سالمين |
قالها لينين من قبل
اما الاشتراكية او البربرية ولكن اية اشتراكية تلك ؛ لقد فرغت كل النظريات من مضمونها - السياسية الاجتماعية وقبلها الدينية ونعود لاصل البيضة والدجاجة ونسأل ايهما اولا ؛ تسلط فئة حاكمة رسمية اوغير رسمية ----- ام جهل الشعب أو معظمه بحقوقه أقول فقط بحقوقه لأن الواجبات يعرفها بالفطرة --- حيث حتى تلك الاخيرة ؛ يتحايل عليها واخاف ان اقول 20000000 مواطن اتفقوا على سرقة المستقبل |
| الساعة بإيدك هلق يا سيدي 03:48 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون