|
حتّى نوصل لنتيجة
مرحباً....
أكيد كلكن عندكن آراء.. شو ما كان نوعها... ومتل مو مكتوب فوق، هاد قسم الفساد... فيا معارضين وموالين ومادخلكن وإلخ.... نحنا أكيد منعرف أنّو في مشكلة بالبلد.. شو هي عالضبط الآراء بتختلف... بس هي موجودة... وإذا أنكرناها منصير عم نضحك عبعض.. يعني عحالنا.. يا ريت لو سمحتو كل شخص بيدخل على هذا الموضوع يشرح شو برأيو هي المشكلة.. ومنتناقش وبعدين منشوف الرأي اللي بعدو... ولأني منسق هون رح أحرص أنو الموضوع يمشي بالطريقة الصح |
اقتباس:
عندي كتير أفكار بالنسبة لهالموضوع .. منها: ورح بلش بالمواطن . لأنو هو انا وانت .. وجميع الأعضاء بأخوية .. لما يكون المواطن أخرس .. المسؤول بدو يعمل اللي بدو ياه وبدو يركب المواطن وما يسأل لأنو ما في مين يحاسبو لأنو القانون بإيدو .. ولو في مواطن واحد يقول لا بينقص خبرو .. اجمالا هاي الدائرة هيي اللي بتدور فيها عجلة الفساد .. في مليون مسبب ومسبب للفساد بس لا دولة تخلو من الفساد .. وبرأيي الشعب يحاسب المسؤول .. الصحافة تحاسب المسؤول .. القانون يحاسب المسؤول .. وهاد كلو بإيد الشعب ... بس الشعب ما بيعرف يستعمل قوتو .. ليش لانو خايف .. ومقموع .. بهاي الحالة الفساد موجود .. ومتل ما بقول المثل "المال السايب بعلم السرقة" لأنو ما في لا حسيب ولا رقيب .. أو بالأحرى الرقيب والحسيب هو اللي عم يسرق .. العمى العمى دوامة .. دخت :hashish: أكيد أكيد متابعة معكم .. |
هلا بعد الرد السابق اللي حطيتو بهالموضوع والي بتمنى تكونو فهمتو فيو علي .. لاني انا شخصيا ما عدت فهمت شو حكيت بعد ما نزلتو .. :oops:
بس لضيف كام شغلة وبتمنى هالمرة اقدر اعبر عنها منيح بدي اذكر عدة أنواع من الفساد : الفساد الإداري : وبكون في المؤسسات والوزارات والدوائر وذلك بأخذ الرشاوي والابتزاز والنهب و التلاعب بالأوراق والمعاملات والتطويل والتقصير، استغلال المنصب لمصلحة شخصية، منجي متأخرين ومنروح بكير ومنضل نص الوقت نايمين .. الخ . الفساد الاقتصادي: الاحتكار (مو الاحتكار الشريف لشي صناعة أو تجارة) لا أبدا بل احتكار بطرق غير مشروعة متل عرقلة المعاملات لمستثمر ما، تخويف رجل أعمال وتهديد مصالحه، .. الخ، وطبعا السرقة اللي عيني عينك وحكلي تحكلك وكمان الرشاوي، وقصص تبعون منخترع شي ضريبة جديدة أو قانون جديد وبدك تدفع رسوم يا مواطن، لأ لأ واحلى شي بخترع شي قانون مشان مشي مصلحتي .... وكتير وكتيير.. الفساد الاجتماعي: الدعارة غير المنظمة، الكذب والرياء الاجتماعي، المحسوبيات، (العشائرية وهاي من عنا) و الخ.. الفساد السياسي: ما بفهم فيو كتير بس بعتقد بشمل الاغتيالات والتلاعب بالقوانين و استغلال المنصب، والمفاوضات من تحت الطاولة، وخدمة مصالح شخصية وعدم الأخذ بمصلحة البلد.. |
ما بعرف اذا هي مشكلة ...
بس برأيي مشكلة اجتماعية / مجتمعية عويصة ... نحنا كمواطنين .. و أشباه مواطنين ... بنفتقد للغة حوار ... !!! ما بنعرف نحاور بعض ... !! يمكن هاي مشكلة قبل ما نبلش نحكي عن المشاكل اللي بدنا نتحاور عشانا !! ابصر اذا قدت عبر عن الفكرة !! شكرا جدا حزيلا |
الدولة شو هي: هي مجموعة من الناس ضمن إطار جغرافي محدد بنظمها قانون (ناتج عن خبرات وتراكمات تاريخية وانسانية ووضع لأجل تنظيم المجموعة) ويحكمها شخص هو قائد لهالجماعة ومنتخب منهم (هيك يفترض) .. وكل انسان ضمن هالجماعة الو دور في هالاطار الاجتماعي وهالدور بيتلخص بواجبات معينة بقدمها وبعملها في هالمجتمع وبالمقابل الو حقوق تضمن مساواتو مع غيرو من أفراد هالجماعة. وبالتالي بكون عنا مجموعة ناجحة.
الخلل وين بصير .. لما بقصر هالانسان بواجباتو .. أو لما تنتقص حقوقه .. في موضوعنا هاد الخلل عم بصير من الجهتين وتراكم هالخلل بأدي لفشل المجموعة كلها مو الفرد بس. الفساد (ببساطة وباعتبار انو القانون هو الصح) هو خروج عن هالقانون .. والانسان لما يكون صاحب سلطة أو صاحب عمل وجزء من هالمجموعة اللي عم نحكي عنها ويخرج عن هالقانون ويتجاوزه بكون قد أفسد .. والمواطن لما يسكت عن هالفساد بكون سمح لهالفساد يستمر ويتراكم ويتضخم. |
عم بلعي كتير اليوم .. بس الأفكار عم بتكون متشابكة ويمكن بصورة مبسطة كتير ..
من أسوأ اشكال الفساد لما يستغل صاحب السلطة المؤتمن على المصلحة العامة سلطتو ويستعملها لتحقيق مصالحو الشخصية والمشكلة ما يكون في حرية انو هالشعب يعترض ويقلو وقف عندك .. بطبيعة الحال لما ما يلاقي صاحب السلطة حدا يوقفو ويحاسبو عند حدو رح تتفاقم المشكلة ويصعب حلها .. |
هلا ما بعرف اذا قدرت عبر عن رأيي بهالمشكلة بشكل يوصل للجميع .. بس الحل برأيي هو الحرية ..
الانسان بدون حريتو هو عبد .. ونحنا عبيد لنظام الفساد مسيطر عليه بشكل كبير .. وانا مقتنعة انو في سوريا تحديدا امكانيات بشرية واقتصادية لا بأس بها .. ولوما الفساد اللي نازل يجتر من هالمواطن كلشي بيملكو (ماديا ومعنويا) .. كان بكون الوضع غير . ما رح نقدر نكافح الفساد إلا لما نملك حريتنا. |
بس عندي رأي صغير من بعد اذنكن
انو ايه ممكن نقول المجتمع كلو فاسد هلئ القانون واضح واللي حطو هو الشعب واللي بمثل هالقانون هو احد افراد هالشعب وعن طريق الشعب وصل للسلطة ومن خلال السلطة مارس الفساد بالمجتمع هلئ فساد اصحاب السلطة واضح لانهن تحت الاضواء بس اذا بنكبر النظرة بالموضوع بنلاقي الفساد منتشر بدم الشعب من بياع الخبز اليابس لرئيس الدولة فاذا المجتمع بحاجة لاصلاح الفساد المنتشر فيه ...طبعا هالحكي بنسبة 90% من الشعب بس هون خلينا نحكي عن سبب هالفساد او انو ليش هالمجتمع فاسد طبعا كل واحد إلو اسبابو يعني الاسباب اللي بتخلي الموظف الصغير يعمل فساد غير الاسباب اللي بتخلي مسؤول يعمل فساد بس بالنهاية النتيجة وحدة وهي النظرة المادية يعني بشان المصاري بس واحد ماعم يكفي راتبو وبدو يعيش والتاني عم يكبر ثروتو ع حساب باقي افراد المجتمع هلئ وفي اشيا تانية بنحكي فيها .....يعني يتبع |
شكرا عزيزي كهربجي مثقف على الموضوع الخطير والمهم والمميز
هلأ خلينا نبدأ بهل سؤال : الشعب السوري كان فاسد قبل ما ييجي حرامية النظام؟؟ أم أن الفساد نشأ بسبب سياسات الاشتراكية البعثية التي أدت ( كما أدت في كل العالم ) الى افقار الشعب وقلة مواردة وتكميم انفه وفمه وتفكيرة ، ومن ثم بدأ النهب والسرقات... والذي أدى للفوضى الأخلاقية ... فأنتشر الفساد؟؟؟؟ |
المشكلة انو تفكير الانسان صاير مادي .. والحياة أصعب .. في كتير فقراء بيتعبو ليحصلو اللقمة ولا بيغلطو ولا بيفسدو وفي أغنياء بيغلطو وبسرقو وبفسدو بس ليحصلو مصاري أكتر ..
شو نوعية الانسان اللي بدنا ياه ليكون صالح في مجموعته ؟؟؟ بظن المشكلة بالانسان نفسو .. |
ممكن أدلو بدلوي لو سمحتو؟
برأيي أنو المشكلة إذا كانت بالإنسان فمعناها أحسن شي منعملو انو نفركها على أكتر جزيرة منعزلة بالعالم لأنو مافي أمل.. القصد بدقة أنّو ما ممكن تكون المشكلة بالإنسان لأنو لو كان الإنسان مشكلة خلص، ما عاد في أمل... لهيك، ومن هاد المنطق الضعيف، بس الإجباري ممكن أنو نقول أنو المشكل بإفساد الإنسان، واللي ممكن أنو يصلّحوا جيل واحد... أكيد الإشتراكية البعثية (والبعثية حصراً) كانت شيء غبي، خرب البلد بطريقة أو بأخرى، بس المشكلة انو الليبرالية الجديدة يا زاهي مانها أحسن أبداً، ليش؟ لأن المنطق بيقلك أنّو تشوف الفرق بين الأميركان والفرنسيين مثلاً، فبينما الأميركي النمطي هو شخص ما عندو هموم بالحياة غير الشغل والتسلاية.. يعني مكنة الإلام خلّت الأميركان بغالبيتهم المؤثرة عبارة عن قطيع.. شو مابدّك بتعمل فيه.. أمّا الفرنسيين فالفرق كبير كتير، يعني الإنتخابات الفرنسية ضمت من أقصى اليسار لأقصى اليمين والكل جاب أصوات.. أما الأميريكية فما بتحلم تشوف مناظرة بين مرضح يساري مع واحد جمهوري مثلاً... فهمت عليي؟ المشكلة الأساسية برأيي أنّو كنّا مقموعين متل السوفييت والصينيين.. صرنا متل الأميركان.. واللي هو أسوأ وأدق رقبة |
لا يا كهربجي .. المشكلة بالانسان مو المشكلة هي الانسان ..
الفقر بيعمل فساد، الطمع بيعمل فساد، الرغبة في السلطة بتعمل فساد ، وغيرو ... كلها أمور موجودة بالانسان .. بس مو كل انسان .. الانسان بحاجة لاصلاح متل إعادة تأهيل .. |
طيب وشو الطريقة للحل برأيك؟ إذا الإنسان عم تربيه سبيس توون بعدين العلاكين تبع المدارس إذا عم يفيق من قفا الصبح على أمة عربية واحدة.. إلخ.. بعدين بيستلموه بالثانوي والجامعة على نفس غسيل الدماغ... شو الحل بقى؟
بالمناسبة.. أنا رح ثبّت الموضوع مؤقّتاً.. |
لو عندي حل كان بلشت فيو بنفسي ..
أنا لما بلشت بدي ادخل وناقش بالموضوع ما عرفت كيف بدي بلش وكيف بدي رتب أفكاري .. المشكلة كهربجي انو نحنا وصلنا لمرحلة فيها تراكمات كبيرة وأخطاء شنيعة ولما حاولت أشوف الصورة العامة .. لقيت انو الانسان اللي بدو يعمل شي صح أكيد وبطبيعة الحال لازم يكون انسان صالح (يعني مستقيم، أو عندو أخلاق أو .. سميه اللي بدك ياه) وهالانسان لازم يكون عندو حرية ليتصرف وهالحرية بأمنلو ياها القانون .. ما بعرف اذا هالمشكلة رح تنحل بتوعية الشعب .. أو بإعطاؤه حريته ... بس لازم يتوفرو هالشغلتين لنقدر نبلش نحكي بالفساد على العلن .. |
ع فكرة نيرفانا أنت عند حل ومبلشة فيه ومو دريانة؟؟ بكفّي أنو درجة وعيك على هالمستوى لتكوني بلّشتي...
أنا متلك تمام.. عندي أفكار غريبة عن المجتمع، أو مرفوضة.. بس لا تنسوا أنو هاد المجتمع هو نفسو اللي كان ديمقراطي بالخمسينات لحد بعيد، وكان مناضل بكل معنى الكلمة... ومتميز حضارياً وفكرياً عن كل المنطقة.. طيب شو صار؟ في فجوة هون بين الصعود والانحدار.. في فراغ ما عم بعرف فسّرو... يا ترى الحرب الأهلية هي السبب ولّا القمع؟؟ يعني المشكلة أنو يا وعي يا حرّية.. نقي وحدة... بس هنن ما بيجو غير سوا.. ما بيشتغلم غير سوا..... خود بقى تعا قيمني |
بتمنى يكون هالشي عندي .. بس أنا ما عندي أمل .. كان عندي .. بس بلشت افقدو ..
أصلا هاد اللي بيقهرني انني بعرف انو المجتمع كان غير وكان أكتر حرية وكان كلو وطنية ونضال وعندو امكانيات ليكون غير .. بس ليش ما عم بيرجع هيك .. مو عارفين نرجعو هيك .. انت قلتها .. الوعي والحرية ما بيجو غير سوا .. وما بيشتغلو غير سوا .. هالشي صحيح تمام . لانو الحرية بدون وعي = تجاوز لكل المعايير والوعي بدون حرية = نظريات بدون تطبيق :hashish: |
اقتباس:
أما بالنسبة لحكيك نيرفانا... ففي حلّ، لأنو هيك البشرية من أول ما بلشت كانت.. فكرك ما في عالم كان وضعهون أسوأ منّا؟؟ أكيد.. بس كان عندن أمل... فرجاء حاولي تخليه على كل حال للحديث صلة... يعني ما رح طول لردّ كمّل بالنقاش بس هدول النقطتين عالهامش |
أنا معك .. في عالم كتير كان وضعن سيء ويمكن اسوأ منا .. بس لنشوف التاريخ .. الدول اللي كانت تحت ظلم ناضلت .. الثورة الفرنسية، ايرلندا، أمريكا ، كوبا ، .. كل شعب كان تحت ظلم كان يحاول يغيرو ...
ولهلأ مو بس زمان .. البطالة بيعملو مظاهرات .. تدني الأجور بعملو إضرابات، الوزير الفلاني بيغلط بيكتبو بالجرايد .. نحنا شو بنعمل: أراضي محتلة (الجولان في حالة سوريا) .. ما بعرف حالة هدنة أو تفاوض.. بس أكيد مو بحالة حرب .. الوزير الفلاني بياكل أموال الدولة ما بنسترجي نحكي.. الموظف الفلاني عم بمرمطنا وشحشطنا مشان معاملة مضطرينلها منسايرو. أصحاب الأموال بيتحكمو بالبلد ما بنسترجي نقول ليش. تعبر عن رأيك ممنوع اذا كان مخالف لرأي اللي فوقك .. نحنا بس بنعرف نستسلم .. مين الشعب الي فيو تهديد خارجي وظلم داخلي وما بيفتح تمو (ما حدا) .. غير شعوب المنطقة بشكل عام وخلينا بسوريا هلا بشكل خاص. نحنا مو أغبياء نحنا بنخاااااااف. وما عنا حافز .. !! الوطن مو حافز كافي لإلنا .. ؟؟؟!!!! |
| الساعة بإيدك هلق يا سيدي 04:43 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون