|
تـمّ افتتاح باب التصويت لمسابقه اخويه للرسم و التصوير و هون بهالموضوع رح يتم الادلاء بالاصوات مع ذكر السبب .
ترتيب الاعمال عتمادا على تاريخ التسليم كالتالي : المشاركه # 1 - غابي المشاركه # 2 - مايا* المشاركه # 3 - Sarita المشاركه # 4 - ميدو بالتوفيق :D |
مسابقة ... gabriel
مع اني طجيت توقيعي بالمسابقة بس بيني وبينكم انا بصنف حالي رسام درجة عاشرة " هاد بحسب تصنيفي ويعد من أفضل التصنيفات اللي حصلت عليها "
بس ما بعرف شو صار فيني بعد موضوع ياس تحمّست اني نزل رسمتي ... حتى اني كنت حاطتها ضمن ملف اسمه " يمكن " يعني كنت عبشاور عقلي .. ومشان التوقيع بتعرفوا يعني العمل جدا رائع فما حبيت اني حط اسمي على الزيق مشان ما يجي شي ابن حلال يلطشه .. بتعرفوا بيكاسوا وآنجلوا رفقاتي عانوا قبلي كتير من هي النقطة خوفا اني اوقع بنفس مشاكلهم استعرت قلم شمع من مقلمة التلوين اللي صار لها عندي من وقت ما كنت صف تاني وكتبت بالأصفر على الرسمة اول 3 احرف من اسمي " GAB " لان اسم GABRIEL كتير كبير وبده لوحة بحد ذاته .. وطجينا بطريقة فوتوشوبية GK فوق بتعرفوا مشان التراث يعني :gem:  منجي على التحليل للوحة والمقطوعة تبع مرسيل خليفة ... ما بعرف شو اللي صار معي اول 15 ثانية حسستني ببداية شي اسمه حرب وشي اسمه آمر ومامور وشي اسمه خاضع ومُخضع .. بس بعدين تغيرت القصة شوي ... صار في شي انضج بالقصة وصار في شي بحبه كتير سواء من الموسيقى او من تناغم الأصوات المحبذ كتير بالنسبة ألي حتى قريب الدقيقة التانية .. شي ضرب لي على عصبي .. حسيت شي مش ظابط على بعضه وما عبتتشكل صورة براسي تمام واستمر هاد الوضع حتى الدقيقة التامنة تقريبا ورجع على الوتيرة اللي بفضلها وعلى الطبقة اللي بحبها ... وطلعت معي هي الصورة .. صورة الحمامة كانت جدا معبرة بالنسبة إلي لهيك مقطوعة .. وكان في مشروع شيلّ الحمامة غصن زيتون على منقارها دلالة على اعلان السلام لأن اللوحة متل ما حسيت عبترمز للحرب ومن بعده السلام .. بس عدّلت عن الفكرة لأن المنقار طلع معي صغير والحمام ما عنده مهارة الحمل على الضهر ..:lol: والبنت اللي بالصورة اجت صورتها على بالي بآخر 30 ثانية بالفترة اللي بتروق فيها كتير .. مع ان البنت بذات نفسها اذا شافت الصورة ما بدها تعرف حالها بس على خبري اني كنت عبحاول ارسمها وهاد اللي طلع معي .. شو بدي اعمل بحالي اذا ما زبطت الصورة معي ؟! يمكن ما طابق البنت اللي عبرسمها غير بانفها .. اضافة لعيونها اللي دائما هال فترة للاسف .. مدمعين .." وبعدني مصرّ انه سبب فاضي وما اله طعمة ابدا " يمكن ما طلعت الصورة متل ما كنت متخيلها .. بس الصورة اللي براسي .. انا شخصيا كتير راضي عنها حتى لو ما كانت مطابقة للصورة اللي بين ايديكم .. بس المهم اني راضي على الشي اللي عملته .. ليش يالازرق ... كمان بعيف السبب لحالي .. بنصح جميع المتبارين ينسحبوا لأن انحسمت المسابقة بجيمع اصداراتها لالي :ss: |
مسابقة / مايــا * /
اقتباس:
بصراحة : مخيلاتي بإجازة طويلة .. راحت و ماعادت رجعت , فبعرف أنو كلها مالها علاقة بالمعزوفة بس أنو هيك طلع معي :cry:  |
التصـويت لمــسـابقه الرسم
مرحبا كيفكون ان شاءلله بخير
اليوم جايبة لوحتي <<<<<<<<<ما حدا يعلق هه لانو لعب عيال :frown: بس اللي حسيتو من الغنيي بيت مهجور من ايام الحروب ...الخ ....الخ بس الشي اللي كان بدي وصلو ما قدرت اني ارسمو ما بعرف شو صرلي كسل كتيير كبييير بس انا راضية على الصورة حاليا  هي صاير عليها تعديلات والاصلية هون :frown: - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - او هووون يالله سلالالالام |
التصـويت لمــسـابقه الرسم
هلئ هون المفترض بظن انو احكي انا شو شفت بهاللوحة
فصل هاللوحة شبر شبر وفسرها بس رح اجلها شوي ... لضعف الامكانيات المعنوية .. بالوقت الحالي بكل حال بدي وضح شغلتين اول شغلة .. انو هي اللوحة لسا ما خالصة بشكل نهائي ... يعني كانت احلامي فيها كبيرة ... واكبر من الي طلع معي هلئ ... بس الظروف ما سمحت اني كمل فيها للاخير .. بحكم انو اليوم اخر يوم .. قررت نزلها تاني شغلة ... ما كان عندي ماكيت كبير كفاية .. لحتى ارسمها .. فاضطريت ارسمها على ماكيتين موصولين ببعض .. مشان ما تستغربو من الخط الي بالنص ... مانو خط الافق ما تخافو :lol: هلئ رح ارجع اعطي وجهة نظري .. باللوحة .. بس لاصحى شوي ومخمخ عليها وهي اللوحة  |
تم فتح باب التصويت بتمنى من الجميع يشارك بالتصويت :D ..
و برجع بزكّر بانو النتيجه رح بتكون اعتمادا على تقدير اللجنه و تصويت الاعضاء .. لجنه التحكيم مؤلفه من خمسه ادارين : Madmax, The morning, yass, sezar, butterfly |
الرسمة يللي راسمها ميدو شدتني بالرغم من اني ما فهمت جزء كبير منها....
بس حسيت انو فيها شي متل المجهول شي بعيد وقريب بذات الوقت...حسيت انو فيها رفقات ووحدة حسيت انو فيها أمل وسراب...ويمكن انو الشي يللي جذبني فيها انها غير مكتملة وانو خطوطها مو وااضحة وهاد خلاني عيش غموضها بالشكل يللي انا برسمو وكأنو ميدو حط الخطوط العريضة وانا عم كمل.... الرسمات التانية ناعمة كتير بس ممكن لانو انا عندي شغف بالشي يللي مو واضح وغامض صوتت لميدو:D عالهامش..اللون الكحلي برسمتك ميدو حسيتو مالو داعي او لو بلاه افضل |
اقتباس:
|
80 مشاهدة
3 اصوات 4 أيام باقية للتذكير بس :larg: |
عفوًا يعني.. شو هيي الغنية يللي انسمعت ويللي على وقع مسامع الغنية انرسمت الرسومات؟
لنقرر مين عبّر اكتر عن معنى الغنية بالرسم .. بنظري يعني.. وكذا اي وكـ رسومات انا كتير محتارة.. بقا بلكي ادا بتجاوبونا ع السؤال بنقدر نحسم لمين بصوت |
الغنية كانت معزوفة لمرسيل خليفة باسم شروق ... فيكي تطالعيها بموضوع المسابقة
:D |
اقتباس:
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - ..لكن الهدف مش كان التعبير عن المعزوفه برسمه انما استخدام المعزوفه لاثاره شي بهالفنان اللي بدو يرسم يعني كأداه بتخص الفنان فقط , فيكي تختاري مين تصوتيلو من ايّ اكتر لوحه عجبتك بشكل عام بدون ما نفوت بدراسه الغنيه و الحاله النفسيه للفنان و ترابطهم .. :D |
للتـذكير انو ما رح يتم احتساب الاصـوات اللي ما بتزكر السبب اللي خلاها تصوّت لفلان مش لعلان . هالسبب مش بالضروره يكون تعمّق بالحاله الفنيه انما كلمه او تنين عن شو بميّز هاللوحه عن غيرها بيكفي - مثلاً متل ما شرحت وشم كيف قريبه الها اللوحه حستها - :D |
اقتباس:
فيها لمسة إبداع وكمان الالوان بتضفي نوع من الحميمية والارتياح للمشهد اللي عم نشوفو ... مــا بـعـرف بالمخـتصر حبيتها :D |
الصراحة .. انا الللي صوتلو هوة ميدو .. واسطة ها .. ما اكتر :p
اي .. لا جد .. بس انو ميدو رسمتو طالعة مميزة عن الباقي هلا انا مالي بالفن وما بعرف شو يعني ما لح خبّص .. بس انو جد الرسمة طالعة معو حلوة .. حبيت كتير طريقة الرسم .. حبيت فكرة النار الطالعة من المي .. من ورا الشخص .. ما بعرف ازا قدرت عبّر صح يكون هوة قاصد شي تاني .. بس انو حسيتا ممميزة .. وثانكس للباقي .. في منن حلوين طالعين .. :D |
حبيتها كتير .. تدرج الالوان فيها متقن .. ورغم طبيعة الوانها بتعطي شعور مريح اي شو بعرفني ليش :lol: حبيتها وخلص ..يعني نفسي اعرف شو كان خاطر ببالها لما رسمتها .. حلوه كتير |
طيب انا رح قول شغلة.. كل اللوحات حلوين
بس انا عنجد كتير احترت بين لوحتين لوحة مايا* & لوحة MiiiDO ... كـ شكل عنجد اللوحتين كتير كتير حلوين...وما قدرت حدد لـ اي لوحة بصوّت يعني كـ اعجاب ، انا معجبة باللوحتين كتير.. خاصة انو كل لوحة الها ميزة بتختلف عن التانية لهيك قلت بدي اختار من حيث تدرج الالوان او ترتيبها وتناسقها... يعني بهالمعنى.. فـ مع اعجابي باللوحتين ( شكلاً ومضموناً ) الفكرة حلوة بكل لوحة من هاللوحتين ... بس قررت صوّت لـ لوحة مايا*.. مع انو بقية اللوحات حلوين خاصة لوحة MiiiDO بس لوحة مايا* اخترتها لانو عجبتني كـ شكل وكـ تدرج الوان كتير منظم ومرتب.. وخاصة انو ادّق التفاصيل باللوحة ملونتها بـ اسلوب كتير حلو..ومهتمة لكل نقطة.. يعني حتى بـ ابسط النقاط التدرج كتير منظم ومرتب ومتناسق عنجد.. بقى هيك..والاختيار كتير صعب :D |
حبيت لوحتين لوحة مايا* ولوحة ميدو .. حسيت التنتين كتير حلوين ومتقنيين عنجد .. بس صوتت ل ميدو لأن في رواء باللوحة شدني الها كتير يعني شغلة احساس هيك طلع معي :D
|
| الساعة بإيدك هلق يا سيدي 09:33 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون