يلي مابياخد من ملته بيموت بعلته
 

مرحبا جميعا

هاد وبهي اللحظة عم يدور نقاش بين زملائي حول هالمثل
وصحته ودقته وتفاصيله

وخاصة انو نحنا بعصر الزواج المدني والتطور

فحبيت شوف رايكم و تعرريفكم لها المثال هاد

ومدى صحته ودقته وواقعيته ومصداقيته

وشكرا :D

برأيي هالمثل تلت رباع صحيح..ما بعرف ليش بس بلاقي فيه شي من الصحة:-? :smile:

صوح:pos:

واقعيتو؟
أي نعم.. واقعي لدرجة كبير..
يعني بيشبه واقع مجتمعنا (أما شو واقع؟ يعني واقع وقعة بدها حلم الله ت يقوم منها)

صحتو؟

برأيي إنو هالمتل فيه مقدار من الصحة بقدر ما فيها قنينة البيسبي فيتامين



هيك مبدئياً.. ممكن نرجع

والله يا ناصر .. يا بو شريك ..

بغظ النظر عن الانفتاح والتطور وهدول الشغلات قشة لفّة ..

انو في منّو هالحكي ..

وعن تجارب كتيرة قدامي ..

مزبوط هالحكي بس احيانا بتصير شغلات استثنائية مو بأيدنا

ما بيخروط مشطي بنوب بنوب هل المتل المعت:pos:

مو قلتلك قبل ... يموت بغير علتو :sly:


يعني انا بشوفو مو كتير صح ... لان اذا ناخذ النتاج احصائيا بشكل عام.. لازم ناخذ كل شي

لان نسب الطلاق مرتفعة جدا بين اللي متزوج من ملتو ... اكثر مما نتصور


قــ برأيي كل حالة زواج هي جالة مستقلة بذاتها ...

لك ايه ايه مزبوط هالحكي والحكياية مو حكاية تحضر وتخلف
لحتى وضحلكون الفكرة يعني بدي اسال مثلا مثلا ها بدي اسال حبيبنا suryoyo تخيل حالك متجوز من ربع الخليج وتحديدا من مملكة الانسانية :lol:

أينما وجد التوافق ذهبت العِلة

حبيبنا .. من ياخذ من غير ملتو يعني من طائفتو او بلدو .. بس هذا لا يعني من غير افكارو الخاصة و اسلوب الحياة

بايدو الانسان يحدد تأثير ثقافتو المتوراثة و تأثير الانفتاح ..

كثير حالات عنا عرب و اكراد و تركمان متزوجين مع بعض .. و ماشية الامور كأي عائلة اخرى ...

لذاك اتخيل حالي ممكن ارتبط يابانية الها نفس افكاري و الاحلى اذا نعيش بمجتمع ثالث !


بالنسبة الك دغري رحت ع الخليج .. اي حبيبي اكيد صعب نتعايش معهم و خصوصا في مجتمعهم بس ممكن تتعايش هي معنا بمجتمعنا ...

ارجع و اقول كل زواج هي حالة مستقلة .. يعني ممكن واحد ياخذ بنت عمو او جارتو ... و تعلق كل يوم بالاسلحة البيضاء :larg:

wherever you see sects you'll see insects :lol:

الغريبة إما أن تذوب فيك أو أن تذوب فيها..
:D

انا ابن هالحالة تحديدا

الوضع مو واصل لدرجة الموت من هالعلة بس كمان مو جيد لدرجة كبيرة


القصة اكبر من افكار
القصة انو يلي عايش بملة او طائفة ربيان على عادات و تقاليد و اعراف مو من السهل انو تتوافق مع الطرف التاني و كمان مو سهل التأقلم مع العادات الغريبة الجديدة بشكل سريع مما بيولد مشاكل
لا تفهمو من كلامي اني ضد التطور ابدا ابدا
بس و خصوصا بمجتمعاتنا الدينية منربى على انو نحنا الصح و غيرنا الغلط و الالعن من هيك كمان منربى على كره الاخر و هاد الواقع للاسف :sick:

بظن انه الشغلة مو بس من غير بلده ممكن يكونوا من بلد وحدة بس من طبقات مختلفة ( اجتماعيا يعني )
يعني الموضوع مهو مقتصر بس على بلد وحدة او دين واحد ولكن حتى على الطبقة الاجتماعية وحتى العلمية احيانا

القصة نسبية جداً




يللي قال المثل صحيح .... معو حق ..

و يللي قال مو صحيح .. كمان معو حق

صباحو أنا موافقك الكلام أنا عملت بالمتل هاد وتركت أجمل ما خلق الله من نساء فى أوربا وأخدت من ملتى وحاسس حالى رح إنفلج وموت منتحر وفينى ألف عله لأنه صار فينى متل ما بيقول المتل تجوزنا لننستر صألله أيام الفضيحه (خليها لله) تخوزقنا بالمتل:cry:

ياسيدى بتستاهل 100000000بوسه على هالحكى المدوزن كلامك صحيح العربيات تعودو أنه هنه القمه و الباقى عله ولازم ينافقهم الواحد ويكذب عليهم لأنو إذا حكا الصدق ولى مصيبه ومع العلم نحنا أكتر الشعوب تكسرا و تفكك
بالنسبه للحياه الزوجيه وكملوها معنا بمسلسل باب الحاره و الحياه الدمشقيه التى إنقرضت منذ عهد نوح عليه السلام -والشعوب التانيه بيشوفوا المسلسل وبيصدقوا مو عرفانين أنو اليوم مافى من هالكلام منوب منوب :jakoush:

مظبوط، المشكلة مو بالملة أو بغيرا، المشكلة بالمنظومة الفكرية لأي شخص، وقدرتو على تغييرا أو لاء، في أشخاص عندون قدرة كبيرة على التغير والانسجام مع مجتمعات مختلفة عن اللي نشأوا فيها وفي أشخاص ما بيقدرو يعيشو غير بالمجتمع اللي متعودين عليه، المشكلة بالزواج من غير ملة أو بلد أنو بيكون السبب وراه غلط، يعني أغلب اللي بيتزوجو أجنبيات بيكون السبب السعي ورا الجنسية أو الحاجة للسكن بالبلد اللي هني فيه، وساعتا بيغض الطرف عن موضوع الملة وكونو بيحترم أو ما بيحترم ملتا، وبس يرجعو لبلدون بتصير هي الغريبة وبينتفي السبب اللي كان رابطون فيها، بس أكيد نادراً ما تلاقي واحد يعترف أنو هو غلط بقرارو فبيكون الأسهل أنو يحط الحق على الملة وغيرا.

طيب ملتو

كل مالها عما تصغر اول شي
نفس الدين
بعدين نفس البلد
بعدين نفس الحالة الاجتماعية و المالية
بعدين نفس الشارع
بعدين نفس البناية

على المشفى يا بو فهد

التفسير صحيح وأنا مثلا لما أخذت بنت بلادى حسبت حساباتى على أنو إذا لا سمح الله الواحد وصل للطلاق لعدم التفاهم بيضل بيشوف أولاده قدام عيونه إمتين مابدو بس بأوربا مثل ما بتعرف ممنوع تقرب عليهون إلا بإذن الدوله و المحكمه و شفت شو صار بأصحابى وشو صار معن مشاكل منشان هيك قررت آخذ بنت بلدى ولكن رح موت بعلتى يمكن لأنو تعودنا بالغربه على نمط معين من الحياه ما عم تقدر بنت البلد التكيف معه منشان هيك عم قول رح موت بعلتى بس أكيد بنت بلدك أحسن لولدك (أبوحاتم)

يعني استنادا الى واقع المجتمع فهمو مضبوط تماما
ولكل حالة استثناء

ما هاد بيثبت أنو المهم النقطة اللي عم تنطلق منّا بتفكيرك وقت تاخد قرار بالزواج، يعني أنت ما كنت عم تدرس شخصيتا وانسجاما مع شخصيتك وطريقة الحياة اللي بدكن تعيشوها، انت عم تاخد وحدة بتضمن أنها تربي ولادك بالطريقة اللي أنت حاطا ببالك، لأنو غيرك ممكن يقول الأجنبية أحسن لولادك لأنها بتضمنلون شي جنسية محترمة وتعليم وضمان صحي وغيرو ، المهم أنو ما عم تفكر بشروط نجاح الزواج بين الرجل والمرأة يعني مو نجاح الزواج هو هدفك الأهم.
مظبوط كل بني آدم هو حالة خاصة واللي بينفع لشخص ممكن يضرّ غيرو.

تحليلك بمحلو تمام بالفعل هذا كان الهدف والحمدلله - بس أناحصلت على جنسيه محترمه ولكن دون أولاد وبهيك بقدر أضمن لأولادى جنسيه ولو إنو أمهم كانت عربيه لأنو صار عندى الصوره معكوسه و صرت بقدر أن إمنح الجنسيه لزوجتى العربيه

ما في شي ثابت

يعني اللي بفكر بشوية عقل مو بكتير و مو شرط يكون فطحل زمانو بيبين معو انو بأي مكان ممكن يلاقي شريكو ، مو نحنا بشر ؟؟

بس يكون فكرنا محرر من العادات و التقاليد السخيفة اللي عايش تلات رباعنا فيها بدون سبب ....

أنا بشبه هالمتل بالولد الزغير اللي مو قدران يفارق امو ولا لحظة :lol:

يعني لأيمت بدنا نضل خايفين من الأستكشاف ؟؟!!

ولأيمت بدنا نضل مريضين بهوس الخوف و الخشية من المجهول أو التعرف على الآخر ؟؟

لأيمت تلات رباعنا بيضل متعلق برأي أهلو و عادم قرارو و مسكر مخو ؟؟ شو ولاد ؟؟

بس انا بقلكون

اللي حط هالمتل واحد تنبل :lol:

معلم كنا نحكى الحكى أيام العزوبيه ولكن عندما صار عندى ولد تغيرت النظره ولما شفت شو صار بصحابى اللى عم بيشوفو أولادهم عن بعد و بناتهم بأحضان الشباب لأنو أوروبين صدقنى بتغير رأيك و بعدين الشرقيه بدمنا و لا نستطيع الهروب من هذا الواقع صدقنى بيجى يوم و فجأه بيضرب الفيووز وبتطلع الشرقيه كلها دفعه وحده و بتقرر الرجوع عن جميع الأراء والأفكار التى عشت عليها وفجأه تتغير نظرتك للحياه بيقول المتل ما متنا بس شفنا اللى ماتو

ولك عمي ازا انت مقتنع بهيك منطق طبعا رح يتحقق

أي شو الطفل الأمو أو ابوه اوروبي بيخلق مختوم Made in europ يعني مثلا :?

الطفل الزغير لما بيولد والدو ووالدتو و تربايتهون ألو هو اللي بيقرر تصرفاتو و حياتو المستقبلية مو لأنو امو أو ابوه أوروبي بيصير اوروبي و دمو اوروبي وما بعرف شو :?

والله انو من ورا هيك معتقدات غريبة ربيانين عليها بعض مجتمعاتنا وصلتنا لهون ...

انت بتحط بذهن ابنك أو بنتك أنو هاد التصرف خطأ أو صح من خلال تربيتك ألهون ، و الأفضل دايما تبين النتايج لكل خطأ مو بس تبين الخطأ بدون تعليل السبب ..

هي أزا بدك تحكي من منظور أخلاقي ....

مين اللي تخلى عن الشرقية وعن أصلو بس قللي ، نحنا شرقيين وعنا شي بيميزنا كوننا شرقيين وعنا أيجابيات ، بس كمان عنا سلبيات ... ومثال عنها هالأفكار المعفنة اللي ناخرة عقولنا متل السوس و بعدنا مآمنين فيها ..

انا بالنسبة إلي من الناس اللي بياخدو بهالمتل لأني شخص مرتبط بمجتمعه وعاداته وكل شخص من هالنوعية بينطبق عليه المتل
بس في اشخاص تانيين عندهم مرونة أكتر وحب للاستكشاف والتجربة وقابلية للتكيف فهدول مافينا نعمم هالمتل عليهم .
وبالتالي بنرجع لنفس النقطة الموضوع نسبي

المهم التفاهم هاي انا ابي جزائري وامي سورية
الوضع عادي رغم اختلاف البيئة لكن ما باييد الزواج بالجانب يعني عرب بين بعضون مافي مشكلة

الله محى أصلك نحنا قصدنا إنو إذا تزوج العربي من أوربيه أو أمريكيه وبالطبع من غير دينه وحتى لو كانت من نفس الدين والطائفه ولكنها ولدت وترعرعت فى البلاد الغربيه وثم تأتى لتكمل بقيه حياتها عند زوجها ضمن بوتقه العادات والتقاليد ولا يوجد لها ذكريات من الطفوله أو من أيام الدراسه فهذا برأى زواج غير ناجح ونهايته أنها فى يوم من الأيام سوف تعود لبلاد أمها وليس أباها فالأفضل أن يأخذ الواحد من ملته يعنى بنت بلده أحسن للمستقبل البعيد لأنو بيوم من الأيام سوف يحتاج الإنسان لأولاده ليكونوا أمامه حتى ولو قست عليه الدنيا والأولاد هذا رأى الخاص ومع إحترامى لأراء الجميع أنا ضد الزواج من غير بنت بلاده ولو( أعجبتكم )( أبوحاتم)

معك حق انا اذا باخود من غير حارتي ما بقدر بموت

حتى لو الحارة المجاورة ما بيمشي

لأنو في اختلاف بقوانين لعبة الدحل و الشرطة بحرمية

شلون بدو يربى ابني و في هيك اختلاف بيني و بين امو

والله مو قليلة أبداً



دير بالك يا عمي ...... بيضيع الصبي