|
مو بنت البطة السودا ..
مو بنت البطة السودا .. .. بس بعد هيك بلش معي صراع لاثبت اني مو بنت البطة السودا. - لما كان صار لي شي ربع ساعة تقريبا على حفة الشارع بستنى الباص " القطع الكبير " لحتى ياخدني متل مبارح مرق ولا عبر مع انو كان فاضي؛ بس لاني ما قبلت ادفع ضعف الأجرة:?. المهم لما وصل " القطع الصغير " حن ووقف، ويا فرحتي لقيت شي بيشبه المقعد واتاكدت اني مو بنت البطة السودا. قام الكنترول واخد الاجرة، وما استرجيت نقص منا شي لحتى ما اكلها ساعة الاربع تأخير في الايام القادمة. -ليمون أصفر، فطر مشروم. كانت هاي لائحة المطلوبين لوجه العدالة، وعلي حصلهن بأي طريقة، لهيك وصلت مكان ما بينباع الليمون، دققت باللائحة أكتر من مرة واتاكدت انو المطلوب ليمون أصفر، مو " ذهب أصفر " بس ليش ليمون هالاخ بسعر الذهب ما كنت أعرف، أو معقول لاني بنت البطة السودا ؟؟ !! ؟؟ لفيت وجهي عجنب، وشغلت كاميرا الموبايل، ومن الصورة اتاكدت اني مو بنتها ولا حتى بالرضاعة. اخدت ليمونتين صفر وواحدة خضرا عن عين الحسود أما بالنسبة لعلبة الفطر فكان بدها مشوار شي عشر دقايق، ومن كرم السائقين ويمكن " المتسابقين " صاروا 15 دقيقة لحتى وصلت، والحمدلله ما في الا زيادة طفيفة عليه، وهون حسيت اني مو بنت المذكورة أعلاه. بس لحظة مو كانو بدهم الفطر عشان البيض بفطر، وبعلمي آخر مرة فات فيها البيض عالبيت لما أخي عمل عملية، وقالوا لازم ياكل حليب ويشرب بيض، ومن يومها ما دقتوا بس يمكن في خطة لعمل الطبق بدون بيض، مراعاة لسعر بيض العنقاء قصدي البيض. يااااه جد أنا مو بنت البطة السودا وعم يصير معي هيك !! الله يعين بنتها شو عم تتعذب بس لكون أنا البطة السودا نفسها:? ...... فكرك ؟؟؟ يتبع ازا حبيتو :D |
بس ماتكون البطة السودا هي القاعدة
ناطرين الـ يتبع .. :D |
مين جاب سيرة القاعدة :?
لا قاعدة ولا واقفة |
هلأ بداية وبما أنو حضرتكم عم تركبوا مكاري وباصات وما بتركبوا سيارات مفيمة, فبيسعدني خبرك أنو:
:deal:اطلعنا أخوات!:deal: لذلك ياريت تكملينا القصة لنعرف شو عمبيصير مع اختي, بنت أمي (البطة السودة)! :D |
لا بنت البطة السودة ولا هيي بزاتا
لانو ازا كنتي البطة السودا مابيعملو معك هيك البطة السودا كانت زمان |
هههههههه لك يحرىء حريشك رنا عهيك قصة:lol:
بانتظار اليتبع:D |
يعني لازم تكون البطة سودة مافي شهبا بعدين اذا ائلت بنت البطة السودة بطلع أنا بنت .... ؟؟ الجيران حسبي الله :lol: حلوة منك تابعي :D |
صرت شك بالموضوع بعد ما قرأت قصة الليمون بسعر الذهب ليكون أنتي بنت البطة السودا وما عندي خبر :lol: شو جديدك يلا بسرعة هاتي :D |
يظهر انو البطه السودا هي الام الروحيه ل90 % من اولاد البلد
ما عادت بنتها تلفت نظر صار نظر ولادها كلنا بتستلفته اي بنت بطه مو سودا .:D |
نستأنف
البطة السودا كائن حي يمشي على تنتين قوائم " شبهنا " يأكل ويتنفس هاد الي لازم نتفق عليه قبل ما نتابع .. البطة السودا هي كائن فاق من النوم على صوت الباص الي بيطلع في ابن الجيران أبو أربع سنين وشحطة لحتى يوصل عال KG وتروح هي بالمكاري كما أسلفنا . هي كائن صار يشعر انو ابيض شوي من جوا خرج خارج السرب ولم يعد لان ما حدا سأل . هي الكائن الي عم يحكي ويستغرب ويندهش . ورح نكمل معها للآخر لنعرف موقعها من الاعراب او الاغتراب |
زيادة رواتب واشاعة خمس نجوم بـــ 10%
مع بداية الشهر طار وحلق وصار بالعلالي خبر زيادة على الرواتب يومها حسيت بأنو البطة نامت وهديت وكفت بلاها عني وبما أنو في زيادة يعني في مجال نعيش شوي وما كذبت خبر وقررنا نغير عن طبخة " بطاطا مفركة " ولما اتعدينا الميزانية بشخطة حكيت مو مهم في زيادة .. هيك كنت أنا والي حولي وهون لا بنتها للمحروسة ولا أختها مو ;) وعلى صباح يوم الزيادة بيوصل الراتب لربوع الجيب المفروطة كما هو من اول التعيين لا زيادة ولا هم يحزنون لكن وهم مديونون أكتر من أي شهر تاني . بس كلو بيهون قدام اشاعة الخمس نجوم شيت الشهر هاد سمعتها أكتر من 30 مرة وصليت لحتى تكون متل زيادة الراتب ... اشاعة 10% حرية > رفع سقف حرياتنا المسقوفة عنا العرب عاربة ومستعربة ومستغربة \ حرية الحكي والنطق والتعبير ولأني بجد بطة سودا رح استنى آخر الشهر لحتى توصل حرية التعبير ورصيدها مصفر متل ما كانت دائما و تروح 10% ضريبة شو قلتو بتستنو معي ولا لأ ؟؟.؟؟ يتبع .. ازا حبيتو :D |
حبيتو حبيتو, يالله ناطرين اليتبع!
|
:lol:وين صارت البطه؟
|
| الساعة بإيدك هلق يا سيدي 14:49 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون