|
حين ميسرة..!
حين ميسرة..!
26 كانون ثاني, 2008 "أنا مش كافر بس الجوع كافر، أنا مش كافر بس المرض كافر، أنا مش كافر بس الفقر كافر، وأنا مش كافر لكن شو بعملك أذا اجتمعوا فيي كل الإشيا الكافرين أنا مش كافر"... ربما سيكون على المخرج المصري خالد يوسف ان يصنع فيلما جميلا آخر اقترح أن يطلق عليه "حين مسخرة"... في اليوم الأول من وصولي إلى الإسكندرية لاحظت أن إحدى صالات العرض "ستراند" الموجودة قبالة الفندق الذي نزلت فيه تعرض فيلم المخرج خالد يوسف الأخير "حين ميسرة"، ولما كان الفيلم أثار ضجيجا بلغ حد تكفير المخرج واتهامه بالعمالة للصهيونية والامبريالية العالمية فقد قررت مشاهدة الفيلم، مع أن الإنسان في السفر يوفر الوقت للتجوال وليس للحشر في قاعة سينما... حجزت تذكرة لحفلة الساعة العاشرة مساء، وفاجأني ان الحضور من الجمهور المصري كان كثيفا نوعا ما، نساء محجبات ورجال وأطفال أكثر عددا من البالغين... بائع التذاكر تقاضى 6 جنيهات مني ومن الحضور مع ان السعر الرسمي للتذكرة خمسة جنيهات فقط ولا ادري لماذا اخذ الجنيه السادس... دخلت الصالة وكانت تتطابق تماما مع موضوع الفيلم "العشوائيات"، صالة عرض متآكلة تماما، تهدم اغلب سقفها فوضع أصحابها خيمة مدعمة بالأعمدة تحجب الرؤية تماما، مكبرات صوت تعبانة تماما لا يكاد يسمع منها شيئا، كراس بلاستيك مقوى باردة جدا، الصالة كلها كانت عبارة عن ثلاجة... أطفال يشاهدون بانتباه شديد الفيلم الذي لم يخلو من مشاهد عنف واغتصاب شديدة الألم... بالطبع، نحن في بلاد لا تعرف معنى للطفولة، فالفيلم الذي حرص على تناول حياة أطفال العشوائيات وأطفال الشوارع لم يلفت هذا الموضوع تحديدا نظر رجال الدين الذين هاجموه.. لم يتحدث احد منهم حول هذا الشأن ، الكل انشغل بلقطات بسيطة في الفيلم عن "السحاق"، هل هذا الموضوع أصبح كل همّنا؟؟ فعلا شي مسخرة..! على أي حال، لم استطع تحمل برودة الصالة ولا رداءة الصوت فخرجت ابحث عن صالة اخرى وشاهدت الفيلم في عرض متأخر في صالة فخمة... فيلم "حين ميسرة"، هو فيلم ببساطة عن حياة "العشوائيات"، الفقر والدين والتخلف والجهل والارهاب وزنا المحارم اطفال الشوارع ، كل مخلفات الفقر عالجها الفيلم، وان كان لا يخلو من بعض المبالغات او الاثارة لانجاحه تجاريا... لا اعتقد انني اريد الكتابة عن الفيلم ولكني وانا أشاهده تذكرت مسالة وحده فقط" اليس العالم العربي كله اصبح احدى عشوائيات العالم"؟؟ لم يبالغ خالد يوسف في تصوير حياة الفقراء المصريين، بل هو في نهاية الفيلم يقدم اعتذارا عن عدم نقل الواقع كما هو، ذلك انه اقسى كثيرا من الفيلم، وهذه حقيقة يعرفها كل من عرف ويعرف معنى الفقر، ما صورته كاميرا خالد يوسف هو غيض من فيض منتجات الفقر... بالنسبة لي كرجل قادم من " Low Profile " فاميلي كما قالت لي إحداهن ذات مرة، او كانسان نهض من تحت خرائب خط الفقر، كان فيلم خالد عني وعن طفولتي شبه المشردة... لكن خالد يوسف ككل من يحاولون خرق الجدران ورفع السقوف سيواجه كل هذا الهراء والتخلف ممن يدعون الحرص على الشرف والدين... حين ميسرة، فيلم يشعر الإنسان بالقرف والغضب على كل هذا الظلم، الغضب على مصير ملايين الناس تركوا لمواجهة قسوة الحياة. الحياة عندما تضيق بدون فرج وبدون امل وفي انتظار رضا لن يأتي ابدا. عندما يصبح كل شيء مباحا الحب والطفولة والأمومة والعائلة والجسد والكرامة والكبرياء... وانا شاهد مقطع صلاة سكان الحي العشوائي يوم عيد الفطر وهم يهللون "الله اكبر الله اكبر ولله الحمد"... تذكرت ان الله تخلى عن هؤلاء.. وتذكرت مقطع قصيدة محمود درويش "يا خالقي هذه الساعة من عدم تجلى لعل لي رب لأعبده لعل..!"... بالمناسبة، خلال وجودي في الإسكندرية اشتريت كتاب "تاكسي، حواديت المشاوير"، لخالد الخميسي بـ15 جنيها، وقرأته في ساعات، وهو ذكرني بمدونات كنت كتبتها عن حواديت سائقي التكاسي عندنا، لكن هناك رابط بين "حين ميسرة" خالد يوسف و"تاكسي" خالد الخميسي وحياتي ومدوناتي : الفقر واحد والظلم واحد وعشوائيتنا واحده...! محمد عمر |
مشكورة ام الريم ... وشكلو اللي كاتب كتير متاثر بصغرو ..
وعكلن .. ما لح اقدر علق لحتى اني شوف الفلم .. وناطرين لينزل بالصالة :D |
والله يا مشرفتنا الحلوة الموضوع عامل
ضجة بالوسط الفني ما بعرف ليش بنستغرب وقت نشوف متل هيك فلم الي هو لحد كبير واقع من وقائع حياتنا و بالذات الطبقات الي اتدنت مرحلة الفقر وشي طبيعي انه المخرج يتعرض لكل هاذه الضجة حول الفلم لانه عكس صورة حقيقيه لمجتمعات يمارس عليها كتلك اللقطات الموجوده بالفيلم لانه غالبا الحقيقه نجدها مرة و نهاجم كل من يحاول كشفها امام أعيننا وثانكس مرة تانيه لالك:D |
صرت بدي شوفو هالفيلم يعني..... كتير سمعت عنو و على كلام اللي بيفهمو بالسينما الفيلم جيد.....
بالنسبة للاعتراضات عليه, أمر بديهي التعلّق بالقشور الواهية.. أنو عيب ما بيصير.... لك يا أخي هاد واقع موجود و الكل بيعرف انو موجود.......... للأسف جزء من الواقع الرقابة "الأخلاقية" الكرتونية شكرا :D |
اقتباس:
بدي علق على شغلة :D |
خالد يوسف يشكر على اللي قدمه
انا شفت الفيلم وكان فيه شوي مبالغة بس للصراحة كان اكثر من رائع بواقعية العشوائية اللي فيه وخاصة لمصر بس نسيت الناس كل شي وتذكرت بس السحاق اللي هوي كم مشهد بس وكانه عم يجاوب عن فيلم يوسف شاهين السابق هي فوضى؟؟؟؟؟ عالهامش ريمي مو احسن ننقل الموضوع للسينما |
والله انا تحمست كتير احضر الفيلم ما بعرف لأي درجة بيستاهل اللي انحكى عنه بس بتوقع من الأفلام العربية الأولى التي تطرح قضية المثلية الجنسية لدى الفتيات ..
كما ورد في المقال ايضا فهو يسلط الضوء على المهمشات ... وعلى هذا بورك خالد يوسف على ما قدمه ولربما لي تعليق اخر بعد ان احضر الفيلم . تحياتي الحارة ظل جيفارا |
اي مزبوط هاد الي بدنا نوصلو ...انا الفيلم ناقش قضايا مهمه متل العشوائيات والفقر والي بيصير بالشوارع الخلفيه ... مو بس قضية السحاق الي العالم ما شافت شي من الفلم غير هيي!!
|
اقتباس:
رجعنا .. كيفك ياس:D خيو عندي نقطة بس حبيت اني احكيا .. ما فهمت هالجملة تبعك منيح .. انو الرقابة برايي ضرورية وضرورية جدا .. يعني بالاحرى ... لو ما في هالرقابة الـ " كرتونية " الـ " اخلاقية " كانت نص الافلام وكرمال كلو يشد بعضو شفت فيو شغلات .. عجبة .. ما تقلي انو اوك كلنا عم نشوف العن من هيك .. اوك .. وكل واحد يصطفل بس بكون بجو خاص فيو بكون لوحدو .. بكون .. عجزء ما عليو رقابة .. بس برايي الرقابة ضرورية كتير .. خصوصي بهيك حالة .. يعني اوك انا مع انو يتم عرض الواقع عرض على التلفزيون .. وحاج نكش عبعض كل مرة .. بس بضل في شي لازم يكنلو حدود .. مثال صغير لو ما كان في شي اسمو رقابة بجوز حدن تاني وتحت اطار انو بدو يدرس حالة معينة ما من المجتمع وفلنفرض بدو يسلط الضو على نفس الحالة بجوز يحطلك مقطع كامل .. كرمال يورجيك كيف بصير مثلا !ّ! بتمنى تكون وصلت الفكرة .. وان كان كلامي ما مطابق مع جملتك .. وضحلي جملتك اكتر .. وعراسي ياس :D |
عم نحكي بشي مشابه في مكان آخر و الله
خيو أنا برأيي كل رقابة حكومية خارج نطاق تحديد العمر الأدنى لمشاهدة بعض الأفلام أنا بشوفها استحمار و استغباء بالمواطن... انو يا مواطن يا تيس انت ما بتعرف شو بدك تشوف و ما بتعرف مصلحتك فراح نقرر عنك... يعني حتى لو في مقطع جنسي.. . شو فيها. لهيك شغلات في اشارات باعلانات الافلام انو فيو مشاهد "باينة" أو لأ و انت تقرر تشوفو أو لأ... مو يقررو عنك. عرفت شلون؟ |
اقتباس:
القصة انو .. في شي اسمو ادب عام .. يعني ما حتكون قاعد مع اهلك وعم تتفرج على مقطع جنسي يعني .. لزلك .. عم قلك مفروض يكون في رقابة محدودة او الرقابة المدروسة .. :D |
اقتباس:
بشكل عام عالتلفزيون بالدول اللي تحترم حالها فيها شي اسمو "توقيت محمي" و هو التوقيت المتوقع انو يكون فيه أطفال عم يتفرجو عالتلفزيون, و خارج هالتوقيت لما بيحطو فيلم عالزاوية فوق تطلع اشارة خضرا أو صفرا أو حمرا... حسب المشاهد الموجودة فانت من اول الفيلم تعرف انو فيو مشاهد أو لأ (اذا طلعت خضرا الاشارة يعني ما فيو و نشيل حالنا و نطفي التلفزيون و نروح ننام :o) و بالأفلام بالسينما أو دي في دي نفس الشي... يعني انت سلف بتعرف شو راح تشوف.. هاي نوع " الرقابة" الوحيد اللي ممكن اتفهّمو... غير هيك, أنو منع عرض و هيك شغلات أنا كرأي شخصي اعتبرو استخفاف بعقول الناس. |
انا برأيي ..
انو اوكي القصص اللي طرحا الفلم عن العشوائية والفقر والخ .. هي كلياتا تمام وع العين و الراس وبدن يورجو عيوب بالمجتمع وما اختلفنا .. بس شغلة السحاق هي حاطينا شغلة تسالي واكل هوا .. ومابظن سمية الخشاب لما مثلت هالكم مشهد بدا تسلط الضوء ع هالقضية وتوعي الشباب منا :lol: لانو كتير خايفة ع مشاعر الشباب لانو هي ياحرام ;) يعني بتوقع القصة هي اللي مدخيلنا بالنص مدخيلنا هيك لمجرد انو قصة وبدن يعملو وانو صارت عادة عامة انو مابصير ينعمل فلم ومايكون فيو شوية مقاطع جنسية وهيك .. وطبعا هدول اكيد مابخلو الفلم يعدي هيك الا مايدحشلولن كم مقطع بس متقلين العيار شوي ورايحين ع السحاق .. ومتل ماقلت مابظن سمية الخشاب او المخرج لما طرح هالقضية خايفين ع مشاعر الشباب والناس وبدن يحذرون من هالشي ;) طبعا للتوضيح فقط .. انا مالي ضد الفلم بالمرة وعادي مو فارقة معي بالعكس بنبسط لما بشوف هيك افلام :p بس انو عبوضح الفكرة من الفلم من وجهة نظري بس وبعدين هالقضية مو هالقضية العظيمة اللي حتى يسلطو الضو عليها هيك كتير وقصة ويصير حكي فيا وينصرع سمانا فيو مو مستاهلة يعني .. بس بالاخر هالافلام هي شو مابنعرض فيا قضايا بتوقعي الشخصي مابتوقع انو بعرضو وبحكو عنا خوفا ع مصلحة حدا او مشان يوعوا لشي او مشان يصلحو شي بالمجتمع بتوقعي هي كلا شغلات بتنعمل بالافلام هادا الاول والرئيسي هو الكسب المادي والكسب المادي فقط .. وكمان لشوية مارب اخرى من هالفنانين المعروف صيتن الشريف والعطر متل الممثلة الكبيرة سمية الخشاب ;) |
تسااااااااااااااااااااااا اااااالي
لك شفت بحياتك رجال يسرح و يمرح و ينبسط و فوق كل هاد بيجيب بنت من بنات الليل و الشوارع بيكيف معا للسكر و للثمالة لك هاد حمار عالقليلي بيجيب معو باكيتة اقراص منع الحمل ويبلعلا ياها مشان الاحتياط لا و شو بتحبل و بعدين بتخلف ها بتخلف ع اساس وقت الزنى مو حرام تزني بس حرام تجهض لك ليش ما اجهضتو وريحتنا؟لاء نطرت لخلفتو و تعبت منشانو بلكي الله قبضلا روحها عالولادة ؟ طيب و بعدين قام الشب راح ع سكة التراين متل فارس كرم قولي لابوكي و جاب معو شهود الليه وي امو و خيو و مدري مين و حامل الولد الرضيع ملبسو منيح و عم يضحك الولد و بدو يزتو ع التراين لك شو هااااااااااااااااد ؟فلم هندي و مو هيك... و التانية قال شو الدنيي علمتني كون هيك انو تطلع ترقص و تصير سحاقية و تبيح حالا نحنا الدنيي ليش ما علمتناهيك ؟بفضل اشحد شحادة بموت من الجوع الحس الاراضي و لا ببيع جسمي برخيص او ببلاش هيدي هيي حالة بنات العرب هيك صارو بنات العرب سالت وحدة مصرية قلتلا شفتيا لفلم الفلاني ؟قلتلا هيك عندكون عن جد ؟قالتلي اي بس مبالغ فيه كلنا عم نشوف مخرجين و فنانين بيضلون يصورو هيك افلام انو شو واقع ما فكرو ثانية يعطونا او يعرضو علينا حلووول بنوب بنوب ما شفت مخرج متل هيك قلّمااااااااااااااااااااا ............. السينما المصرية 0 و كل السينمات كمان ... و اللي فاضي شغل بيشوف هيك اشياااااااااااا |
:shock::?:shock:
شو يعني والله ما فهمت شي ؟؟ |
| الساعة بإيدك هلق يا سيدي 01:54 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون