|
مسلة رشيد, واللغة الهيروغليفية
1 ملف مرفق .
هلق البعض منا سمعان بحجر(مسلة)رشيد. هون رح احكي شوي عنها (شو هية؟,شلون التقت؟, شو كانت فائدتها, بانو سنة؟ مين لقاها, ومن هالحكي)
هلق بزماناتو كانت علقانة الحرب بين فرنسا وبريطانيا, كان وقتها المعلم نابليون بونابارت محتل مصر. المهم كانو علقانين ببعض وعلى طاخ وطيخ وطاخ وطيخ, وهاد اللي راحت رجلو وهاد اللي ايدو, وغيرو مات.:gem: المهم هلق شلون التقت الحجر بالحقيقة في شوي من النقاش حول هالموضوع لاكن الشي الاكيد انها التقت بشهر اب من سنة 1799 شمال مدينة رشيد اللي احتلها الفرنسيين سنة 1798 في قصة بتقول انو لقوها جنود فرنسيين كانو مكلفين بهدم حيط دفاعي معمول على زمن السلطان قانصو الغوري بين سنة 1501- 1516 وكان الحجر من بين الحجار المصنوع منو هالحيط وفي قصة تانية بتقول انو ضابط بالجيش الفرنسي لقاه لوحدو مافي شي حواليه بس استغرب من شكلو لانو مانو متل باقي حجار الصحرا (طبعا بتكون عادتا خشنة ما الها لمعة وكلها رمل) بس هاد كان غير شكل فحصو قام لقى عليه كتابات ب 3 لغات قدر يميز اللغة اليونانية, بسبب اتقانو لهلغة. هلق هالحجر انعمل عليه دراسات واكتشفو انو اللغات التلاتة هية الهيروغليفية, اليونانية, ولغة تانية كانو يستعملوها المصريين القدامة. وقدرو يعرفو انو انعمل بواسطة كهنة بسنة 196 قبل الميلاد, حيث انو كان بمعبد من المعابد بمدينة ممفيس. لفترة منيحة ما كان حدا يقدر يفك رموز هالحجر, مع انو كانو على يقين انو اليونانية هية كانت ترجمة للهيروغليفية لحد سنة 1822 قدر الباحث الفرنسي جان فرانسوا شامبليون (1790-1832) يفك رموز اللغة الهيروغليفية بمساعدة الترجمة اليونانية. بعد هالحدث صارو الباحثين يتسابقو باكتشاف معلومات عن الفراعنة وعن تفكيرهون ومعتقداتهون. هلق في شي لازم نعرفو عن الهيروغليفية. هاللغة كانت مقدسة, كان يستعملها الملك, وشوي من اتباعو, والكهنة, وكانت ينكتب بواسطتها بالمعابد. بس بالنسبة لعامة الشعب فهدول كانو يستعملو لغة تانية اسهل واسرع <<< هية اللغة التالتة اللي كانت على الحج >>> (وللصراحة انا شخصيا ما بعرف اسم اللغة بالعربي, بس اسمها بالانكليزي "Demotic") كمان في شغلة كانت مدروسة ومقصودة من قبل الفراعنة, واللي هية انو وقت كانو يكتبو شي وبدهون ينقشوه على شي مكان, كان الشخص اللي بدو ينقشو على غير دراي بهاللغة يعني ما بيعرف شو عم ينقش, كان بس عم ينقل من الورقة. هالشي عملوه تحسبا من انو يقوم يغير بالاحرف ويغير الكتابة. بعد هزيمة نابليون صارت الحجر من خاصية الانكليز, وهية موجودة بمتحف بريطانية من سنة 1802 طولا: 114.4 سم عرضا: 72.3 سم سمكها:27.9 سم |
بتأسف اذا لقيتو انو شوي مافي ترابط بالجمل
بس انجلطت مليون جلطة لقدرت اكتبو لانو الماوس مخرفة وكل ما بكتب كام حرف بلاقيها صارت بمحل شكل بقوم بمحي وبرجع بكتب |
زيادة على المعلومة انو يلي وجد الحجر ضابط فرنسي اسمو بوشار bauchard
بس اسمو الاول ما عم اتذكروا واللغة التالتة يلي كانت مكتوبة على الحجر هي اللغة الديموطيقية وهي لغة مختصرة عن اللغة الهيروغليفية واجت بوقت متأخر نسبيا عن اللغة الهيروغليفية لانها كانت تعتبر لغة مقدسة وكان في لغة كمان مستعملة عند الفراعنة اسمها الهيراطيقية |
اقتباس:
يا اللي اكتشف حجر رشيد هو الظابط الفرنسي شامبليون وميرسي willi علي المعلومات :D |
اقتباس:
حبيب يلي اكتشف الحجر هو الضابط بوشار اما يلي ترجم اللغة وفك رموزها هو العالم الفرنسي شامبليون والمصدر فيك تشوفو بكتاب قصة الحضارة ل وول ديورانت |
اقتباس:
بس انا اتكلمت علي بناء معلومات من ذاكرتي من ما درسته في التاريخ من عشر سنوات بس كل اللي افتكره انه شامبليون هو اللي اكتشف الحجر وفك الرموز ومش فاكر نهائي عالم اسمه وول ديورانت ممكن تكون ذاكرتي خايناني انت عارف بقي الزهايمر :lol: |
اقتباس:
:D :D يا سيدي هاد وول ديورانت صاحب مجموعة مجلدات اسمها قصة الحضارة وهي عبارة عن 44 مجلد بيحكو عن تاريخ البشرية وهاد رابط هون بالاخوية اذا حابب تشوف الكتب ومشكرور ذي لايت على الكتب - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اقتباس:
ومشكور انت وذا لايت النابغه :D |
على راسي الشباب
الف شكر الك كوستا على الاضافة اسمو الضابط ما كنت عم اقدر اتذكرو وشكرا على باقي المعلومات وبالفعل متل ما قال كوستا شامبليون هو اللي فك رموز الحجر ثانكيو شباب على المرور وعلى الاضافة:D |
شكرا علي المعلومات القيمه فعلا في معلومات اول مره اعرفها
انا كنت وضعت مشاركة حول الخطوط المختلفة من اللغه الهيروغليفيه لمن يريد معلومات اكثر - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
اها بالفعل
الرد كتير حلو وفيه معلومات كتيرة الف شكر الك خيو خلينا دايما نشوفك هون |
| الساعة بإيدك هلق يا سيدي 08:26 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون