|
الخيانة الزوجية وموقفك منها ...
مرحبا :oops: كل واحد فينا بأول عمرو وبفترة مراهقتو بيكون الو أحلامو وتخيلاتو للمستقبل .. بس طبعا مو الكل راح يعيش هالشي متل ما سبق ورسمو وخططلو ... هلأ بالنسبة للحياة الزوجية البعض بيعيش حياة سعيدة ومستقرة والبعض لا ... وهون بوصل للنقطة اللي بدي أطرحها ... يا ترى لو كنت من الأشخاص اللي عم يتعرضوا للخيانة الزوجية من شريك حياتك فشو راح تكون ردة فعلك ... كيف راح تواجه هالأمر ؟؟؟ هل ممكن أنك ترد الخيانة بمثلها لحتى تنتقم لحالك بنفس الطريقة الي انخدعت فيها ؟؟؟ أو راح تتمرد على هالواقع وتطلب الانفصال ؟؟؟ أو راح تواصل حياتك بشكل عادي وتحاول تتكتم على هالموضوع منعاً للإحراج أمام العائلة والأصدقاء والمجتمع المحيط ؟؟؟ أماالنقطة التانية بتقول ... يا ترى إذا مريت بفترة برود مع الشريك وهالفترة تصادفت مع حب مفاجئ فكيف راح تتصرف ؟؟؟ هل راح تخون شريكك (طبعاً الخيانة مو بالضرورة تكون جسدية بس .. ممكن الخيانة تكون كلمة أو ابتسامة أو حتى نظرة) ... أو راح تكون صريح مع شريكك بهالأمور ؟؟؟ والنقطة الأخيرة فهيي ... يا ترى هل انت على استعداد انك تسامح شريكك على خيانتو سواء اعترفلك بهالشي أو انت عرفت بالصدفة عن هالموضوع ... وبكلا الحالتين يا ريت نعرف ليش ... بتمنى يكون الموضوع جديد بطرحو ونتعرف من خلالو على وجهة نظر كل واحد عليه سلام :D |
رد النقطة الاولى....
راح اموت من القهر بس بدون انتقام واطلب الانفصال وهي من طريق وانا من طريق لاني ما بحب وجع الرأس رد النقطة الثانية.... اكون جدا صريح و ابحث عن اللي تستاهلني رد النقطة الثالثة.... لا طبعا عشان كانت شريكتي من البداية وعارفة ادق التفاصيل عني ..... والف شكر على الموضوع..........:D |
اقتباس:
مرحبا اكيد لازم اواجه الامر ومستحيل ارد الخيانه بخيانه لان في طرق اخد حقي فيها من غير ما اغلط متل الطرف التاني .واحتمال طلب الانفصال يكون احدى الطرق.....واكيد ما راح تمشي الحياه عادي واذا عالناس والاصدقاء وكلامهم الطرف التاني يتحمل نتيجة غلطه لان اذا من ربه مش خايف بدو يعمل حساب للناس وكلامهم. اقتباس:
ما بعرف ما مريت بهيك شي بس ما اظن بعملها:o اقتباس:
يمكن بسامح بس بعد ما اطلع روحه بيدي بالاول انا يخوني:jakoush::jakoush:مااااااشي |
بالنسبة للنقطة الأولى ..
ما ممكن أحسن رد الخيانة بخيانة لأني بالنهاية رح كون عم انتقم من نفسي أولا ومن احترامي لذاتي تانياولا رح أحسن كمل كأنو ماصار شي! رح تكون ردة الفعل عنيفة أول شي .. ورح قرر الانفصال النقطة التانية أنا مالي موافقة عليها.. برأيي يلي بيقدر يخون بفترة برود مع الشريك .. مابيكون بيحب .. مابظن أبدا خلال حب حقيقي ممكن يكون في حب تاني مفاجئ النقطة التالتة ممكن أحيانا نفكر أنو فينا نغفر بس لا ما فينا رح يبقى دايما في شي مكسور وجرح كبير بالقلب ما ممكن يطيب شكرا عالموضوع خلاني عبّر شوي:D |
اهلين حبيبة
اقتباس:
بالنسبة لسؤالك عن اذا ما كنت رح رد الخيانة بالمثل في حين كنت بهيك موقف..فـ طبعاً لا..يعني قناعتي انو رد السيئة بالمثل (سواء خيانة او غيرها) بنكون عم نختم ملفنا الشخصي بنقطة سوداء لن تزول..هذا امر قطعي..بس بيبقى شي بدي قولو هو انو احنا صعب نقول شو رح نعمل لو صار معنا هيك موقف لانو بيبقى الحكي نظري مو ناجم عن تجربة (وانشالله ما بنجرب هيك موقف بكل الاحوال )..بس كـ قناعة وكـ فكر بجاوبك انو انا بفضل ابتعد عن الخائن..سواء صديق او غير ذلك.. + بحب قول انو بتبقى في امور بـ الحياة الزوجية حتى اذا ما تمت الخيانة.. هالامور هي امور اساسية يللي ممكن تكون عائق امام قرار الابتعاد..متل وجود اطفال والى ما هنالك... اقتباس:
اول شي ما رح كوّن علاقة حب متبادل بدون التيقن مسبقاً انو هالشخص فعلاً انا مقتنعة فيه كـ شريك حياة .. وفي حالة قناعتي باستمراري مع الطرف الآخر صعب انو يصير بديل له .. لانو قناعتي مبنية على اسس جذرية من الصعب تغييرها او استبدالها بسرعة او لمجرد انو شفنا حدا آخر .. اقتباس:
شوفي لقلك..كـ مشاعر داخلية..ما رح كن اي حقد لا لصديق ولا لخائن ولا لاي كان..الحقد يقتل صاحبه..بس انو يرجع كل شي متل ما كان..صعبة..لانو قلتلك الخيانة او العمل السئ بشتى اشكالو هو نقطة سودا بملف الخائن او يللي قام بعمل سيء..بقى صعب كتير يرجع كل شي متل ما كان..خاصة اذا كان الموضوع متعلق بخيانة وغدر شكراً الك |
طبعا بالأول ... قبل ما تبلش الحياة الزوجية .. لازم يبحث الشريك عن شريكة متفهمة وبتفهم عليه وبيفهم عليا ... لان التفاهم هوي الأساس ... ف شو بينفع الشكل والجمال بعد أربعين سنة وقت بيتختخ الزوحين ,,, فإذا كانو حلوين رح يصيرو بشعين وإذا كانو آخدين بعض ع أساس الجمال رح يعيشو حياة جحيم .,,, وإذا كانو متفاهمين رح يعيشو أحلى حياة ولارح يكون في خيانة ولا من يحزنون ,,,, لأن الخيانة من الطرفين أو من كلاهما بتجي من ورا نقص ما .. فلو كانت الشريكة بتعاني من نقص بالحنان أو بالعلاقة الجنسية أو بأي شي تاني .. رح تحاول تدور عليه بشي حدا تاني غير الزوج ... والشريك نفس الشي .. ف ... thats it ... thnx ..
THE PUNISHER " |
ومنرجع لنجاوب عالأسئلة ... مابرد عالخيانة بخيانة ... بس بحاول انهي أسباب الخيانة وعالج السبب مو النتائج .. وطبعا بسامح أكيد ... وبحاول ارجع ابني حياة جديدة ... وشكرا;)
THE PUNISHER " .. |
بالنسبة للخيانة الزوجية (موشرط تكون باطار زواج) انا شخصيا مافي شي ممكن يجرحني اكتر منها... بس ما بعرف ازا ممكن سامح عليها او لأ... هاد شي بيتعلق بالشخص وبالظروف وبالاسباب... اما ازا انا شعرت بيوم من الايام انو ممكن اقدم على خيانة شخص معين... فهشي بيستدعيني اني فكر بعلاقتنا وافحص وين العيب فيها... لانو لو ما في شي بيعيبها ما كنت فكرت اصلا بواحد تاني...
|
بالنسبة للنقطة الأولى لا مابخونه وبحاول افهم منه ليش خاني
بالنسبة للنقطة التانية كمان بصارحه وبحاول انه نتفاهم ونعرف شو سر البرود وبالنسبة للنقطة التالتة مستعدة سامحه ع خيانته اذا كنت انا السبب اللي خلاه يفكر يخوني اما اذا ما كنت انا السبب وكان هو خاين بطبعه فلا مابسامحه وبطلب الانفصال |
الحئيئة موضوع كتير مثير للحيرة
يعني المفروض فكر بالأول ليش هيك صار يعني ليش شريكي خانني ، أكيد في سبب معين يا إما تقصير مني يا إما العيب منو هوه عينو زايغة وما لو أمان ومن هون حل المشكلة بيطلع فإذا التقصير مني ما بقدر لومه متل ما ممكن لومه لو كان العيب منو هو زلمة عايش بلامربا وعينو زايغة والغلط مني إني وافقت اعمل علاقة مع واحد ما بعرفو منيح أو بعرف أنو عواطلي بهالشكل وممكن يخونني اما قضية الحب فانا بظن ان الأنثى عندها بحياتها حب وحيد لازم تعرف تشغل مخها مع عواطفها لتتوجه التوجه الصحيح وما تصطدم بشي يكسر هالشعور العاطفي السامي ، ومنهون لازم تعرف تنئي الشريك يلي بيستاهلها ويلي بيعرف قيمتها هلأ شيت أنو رد عليه بالمثل وخونه متل ما خانني بتصور توسيع أكبر للهوة بيناتنا والغلط والإساءة ما بتنحل بغلط وإساءة مماثلة هادا أسلوب سوقي لحل هيك مشكلة الحئيئة ما بعرف إذا فيني سامحوا أو لأ لأنو هيك تصرف طعنة لأنوثتي ولعلاقتنا وبأعز شي بملكه وما بقدر أعرف شو حيكون شعوري وقتها ، بيجوز يكوي إلي ألب ادبحوا واخلص منو صحيح الغيرة عنا نحنا الصبايا شغلة مو بإيدنا بس كمان ما فيني اعتبروا عم يخوني بتطليعة أو كلمة أو شي لأنو الشب أحياناً بيحب يطقق حبيبته ويخليها تغار عليه لما بيعمل هيك حركات ، وهيه لازم تعرف ترد عليه بالشكل المناسب أحياناً في نساء بينحطوا بمواقف بيتضروا يسكتوا ويطنشوا منشان يحافظوا على بيتهون وولادهون ، الشيطان بيلعب براس الرجال أحياناً وبيدهوره بس الحقيقة لحتى قول رأيي النهائي أكيد لازم الرجال يتعاقب عقوبة رادعة وقاسية على الخيانة الزوجية لأنو تصرف بهائمي لا إنساني يضرب بكل قيم الأسرة والمجتمع عرض الحائط |
رد النقطة الاولى....
راح اموت من القهر بس بدون انتقام واطلب الانفصال وهي من طريق وانا من طريق لاني ما بحب وجع الرأس طيب ما راح يكون عندك فضول لحتى تعرف سبب هالخيانةأو لحتى تعرف وين كان تقصيرك (لو كان في تقصير طبعاً) لحتى عمل شريكك متل هالتصرف ؟؟ وشكرا الك على المرور والتعقيب :D |
[quote=سوسن البراري;1048337]
ما بعرف ما مريت بهيك شي بس ما اظن بعملها:o وان شاء الله ما بتمري فيها :D يمكن بسامح بس بعد ما اطلع روحه بيدي بالاول انا يخوني:jakoush::jakoush:مااااااشي يا عيني عالثقة :gem: ميرسي الك عالمرور والتعقيب سلام :D |
تسجيل متابعة
و إلي عودة تحياتي الحاج متولي:D |
اقتباس:
اكيد مارح اتقبلها ورح تجرحني للموت مافي انسان بيتقبل الخيانة ولا حتى اي خيانه لو ماكانت زوجية ولا جسدية ممكن تكون الخيانة بين الاصدقا والاهل اقتباس:
بتخيل للأسف من طبيعتي انا مو كأمراة لا انا كوايت روز:oops:بختار الحل الأخير وخاصة اذا عندي اطفال يعني شو ذنب ها الآبرياء يتعرضو لأنفكاك بالاسرة والعيلة ةيشعروا بالنقص وفقدان حنان الابوين ويعيشوا بعيد عم احدهم وتربى هوة توسع الشرخ بالمحبة يعني بختار ها الحل فقط اذا كان في اطفال يا اقتباس:
انا للصراحة مريت بها الفترة لما كنت فعلا بفترة خناق وبرود مع خطيبي وبعترف اني خنته بنظرة واحيانا ابتسامة بس مو بأيدي لاني كنت حاسة انو خلص انا فقدت كل شيء حلو بس بتخيل بحالات الزواج بتختلفلأنه مستحيل رد الخيانة بالخيانة بس بحالات الزواج لانه رابط مقدس وغالبا الرجل يلي بدنسه اقتباس:
مستحيل مستحيل سامحه وابدا مهما كان السبب السبب يعني بكفي تعرفي انه هو لمس غيرك عاشر غيرك احساس كنتي بتتشاركيه معه على اساس الحب اما هون على اساس شو؟؟ فابها الحالة حقي احتقر زوجي واكرهه للأسف |
بالمختصر المفيد هلق الواحد وقت يكون بالاتساع بيحكي كتير
بس وقت تكون بالقصة و عايش احداثها رح تتغير الامور والحلول و رح تنفرض عليك مرات مواقف لا مفر منها منجي للحالات: هلق انا بنت متجوزة شب حبيتو و حبني من هالمنطلق بقى لو بعدنا مجوزين جداد و ما في ولاد منغفر مرة و ما رح يصير في شي اسمو طلاق .. لو حرّم و ما رج عيعملا بس لو تكررت هالجريمة اكيد هون الطلاق رح يكون اهون لانو ما رح تكون غلطة الخيانة او لحظة ضعف رح تكون مقصودة... تاني شي لو في عنا ولاد انا شخصيا لو خانني عشرين مرة بس علاقتنا رح تتغير جذريا ..كرمال ولادي مستحيل اتطلق و يربو بعاد عني او بعاد عن ابوهون هلق ابوهون يقدّر او ما يقدّر مو مشكلتي بنوب لانو رح نعيش شكليا و هوي حبلو اوكيه ما حبلو يصطفل بس مستحيل وولادي زغار اتطلق منو او يعيشو بلايي او بلا ابوهون..---هوي وقت رح يعملا ما رح يطلق لانو نو واي رجال يخون مرتو يطلقا لو نفسو يطلقا كان طلقا و تجوز بس عم نقول خيانة يعني في مراة بعصمتو ... |
الموضوع طويل عريض ع اساس اختصرت :o
|
اقتباس:
كل الشكر الك عالمرور والرد المعبر :D |
[quote=matya;1048513]اهلين حبيبة
+ بحب قول انو بتبقى في امور بـ الحياة الزوجية حتى اذا ما تمت الخيانة.. هالامور هي امور اساسية يللي ممكن تكون عائق امام قرار الابتعاد..متل وجود اطفال والى ما هنالك... كتير حبيت جوابك الواقعي لأنو نحن ممكن نكون مقتنعين بشي بس لما يصير أي موقف متل هالموقف ما نقدر نطبق قناعاتنا خاصة بوجود أطفال بالعائلة .. ميرسي الك عالمرور والرد :D سلام |
| الساعة بإيدك هلق يا سيدي 17:43 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون