|
سيدة أعمال أم سيدة أطفال ....
هل تعمل المرأة … أم تلزم المنزل إرضاءً للرجل …
شددالتقرير الصادر عن البنك الدولي على ضرورة منح المرأة الحق في اختيار مجال تعليمها، وما إذا كانت ترغب بالعمل أم لا، دون إملاء الأسرة أو الزوج وغير ذلك من الضغوطات التي تحول دون المضي في حياتها الطبيعية جنبا إلى جنب مع الرجل. ويثيرهذا الأمر الكثير من التحفظات في المجتمعات التي شملها التقرير، وبخاصة تلك المتعلقة بالدين والشريعة، رغم تشديد البنك الدولي على احترام التعاليم الدينية والعادات والتقاليد وهذه جميعها لا تحرم المرأة من حقوقها وتشير الإحصائيات إلى زيادة حجم مشاركة المرأة في القوى العاملة في العالم العربي لأقل من 23 بالمائة عام 1970، إلى 32 بالمائة عام 2000، إلا أن ذلك يعد الأدنى على مستوى العالم. Cnn والسؤال ؟؟؟ هل أنت مع عمل المرأة ...أم لا ؟؟؟ لا تكتف بالإجابة على الاستفتاء .. عبر لنا عن رأيك ؟ لم برأيك يخاف الرجل من الارتباط بامرأة عاملة ؟؟؟ لم يحقق المجتمع العربي أدني نسبة عمل للمرأة في العالم ؟؟ ولكم حبنا ... |
عمل
بهل أيام الزلمة عمبدور على مراة عمتشتغل لأن كتير من الأحيان عمتقدر المراة أنه تطلع أكتر من الزلمة خاصة إذا كانت متعلمة وواصلة لشهادات دراسية عالية
أما إذا ما بدو برتبط بمراة عاملة فبعود بأغلب الأحيان لتخلفه العقلي ولشرقيته يلي ما إلا طعمه:x |
برأيي أنو لازم المرة تشتغل متلها متل الرجل وبدون تفكير زايد بموضوع انها امرأة
بس عندي تعليق صغير انو الاولوية تكون لولادها يعني يفضل انو السنة او السنتين الاوائل من عمر الطفل تضل الام معو بدون ماتترك العمل بشكل نهائي يعني فيها تاخد اجازة واللي اسمها بسوريا اظن استيداع وبعد السنة او السنتين يفترض تأمن للطفل جو تكون واثقة انو كويس وترجع للشغل والفكرة من عمل المرأة مو بس مشان الوضع المادي للبيت بس كمان للوضع الاقتصادي للبلد يعني مو معقول انو نص سكان البلد قاعدين بلاشغل ومجرد مستهلكين وكمان نقطة كتير مهمة وهي احساس المرأة بنفسها يعني العمل رح يعطيها احساس قوي بانسانيتها وبحريتها وبيعطيها ثقة بالنفس وشكرا لطرح الموضوع |
صباح الخير للجميع
طبعا للمراة الحق في كل شيء كما للرجل , فالرجل مساو للمراة , الرجل بحكم قوته الجسدية قام بالاعمال الخارجية لسد حاجات العالية المعيشية , المراة بحكم كونها المربية للاطفال بقية في البيت , و لكن هذا لا يعني انها لا تستطيع التوافق بين الاثنين , و لها الحق بان تكون رئيسة وزراء و ايضا ربت البيت اذا كان زوجها مو زلمه !!! و عفوا شباب |
واو .. وقت شفت انو 9 مع عمل المرأة ... وبدون أي قيود ... وقريت الاحصائيات ... قلت لا الوضع كتير منيح وأنو أكيد هالأحصائيات عم تحاول تظهرنا متخلفين مع أنو نحنا شمس الحضارة المشرقة وعرفت فوراً أنو هي مؤامرة مشارك فيها اعداء الأمة
اقتباس:
أما عصعيد المرأة بحد ذاتها ... بيفتحلا أفق كتير كبير وبيعطيا ثقة بأنها شحص منتج مو مستهلك بس . وأنو هي شريكة حياة في هذا البيت مو ضيفة مدفوعة الخدمات ... اقتباس:
لأنو الرجل الشرقي ببساطة ما بيبحث عن مرأة ند وشريك بيبحث عن زوجة يبدي عليها تفوقو ( عقد نقص ذكورية ) .. ما بيقبل بندية الأنثى فهي ضلع قاصر وهو عليه أن يتباهى كالطاووس بريشه الملون وهي عليها ببساطة انو تصفق له ... كتير حلو أنو الشباب عم تصوت بأي بس اعذروني الواقع مو هيك .. الرجل بيخاف الأرتباط بالمرأة لأنو ما بيحب استقلال المرأة بيحب التبعية ألو اقتصاديا .. ولانو الزواج في مجتمعنا للأسف ليس شراكة أنما تبعية اقتباس:
البنت استسلامية وبتمشي عرأي رجلها وهي تابعة للرجل ( أبوا أو أخوا أو جوزا ) والرجل مسيطر لأنو عنا كتير مفاهيم غلط .. شو هوي الزواج ؟؟ شو هية الأسرة ؟؟ ليش تربية الأولاد مسؤولية انثوية ؟؟ ولهيك عم نحقق ورح نضل نحقق أخفض نسب لأنو منتميز بمفاهيمنا الخاطئة .. |
اقتباس:
|
انا بعتقد اي انسان بالوقت الحاضر بيفضل المرأة العاملة عن غيرها
لأنه حتى ينبنى مجتمع صحيح لازم يكون اساساته قوية اللي مبنية على الرجل والمراة وبعنقد المرأة الناجحة واللي بتحب عملها فيها تنجح بشغلها وتربية ولادها تحياتي |
الحقيقة يجب الاسراع في تحرير المراة من الضغوطات التي تجبرها و ترغمها على الاندحار في البيت و الحقل احيانا كثيرة في القرى ! عندما نتكلم عن عمل , نعني به العمل الحر الناتج عن اختيار المراة بنفسها و ارادتها ... من اجل مصلحتها اولا ثم المجتمع اخيرا ...
|
اول شي لقلك انا شو صوتت ...
( نعم .. لكن مالها لها فقط ... ) لانه برأيي متى ما صرفت مرّة .. رح تصير هي من " مسؤولياتها وواجباتها " .. فالاحسن انّو هيي لو " حبّت " من حالا وبالا انّو تصرف عالبيت بيكون كتير منيح وكتّر الله خيرها .. بس انو تنجبر على هالشي متل ما بيعملوا ازواج هالايام .. معناها خليها تقعد بالبيت وخليه هو ينجبر يصرف عليها ... هلأ نرجع لاسئلتك .. اقتباس:
اقتباس:
بعدين شغلة تانية .. انه المرأة العاملة بتكون ( الها لسان يحكي ) :p .. يعني بتجادل كتير وما بتفرق معها .. "وشو يعني لو صار ما صار ؟! هي انا بشتغل وبقدر اصرف على حالي" .. اما اللي بتكون ربّة بيت بلاقيها مسالمة اكتر لانها بحاجتو :pos: .. مشان هيك - برأيي - اغلبية الرجال بيريحوا حالون من البداية وبيرتبطوا بصبايا يا امّا ما بيشتغلوا يا اما بيشغلوا بس شرط يتركوا الشغل بعدين (هي الحالة مو عامّة .. لانو في ناس بحاجة لانه يتساعدو سوا ليوصلوا لمكانة منيحة ).... وطبعاً لو كانت صغيرة ومو مكملة تعليمها بيكون لسه احسن واحسن ... لانه التعليم بيفسّد عقلية البنت :lol: اقتباس:
يسلمو عالموضوع :سوريا: |
مربية اطفال و لاحقا سيدة أعمال
المساواة بين المرأة و الرجل هي حق طبيعي.
رأي شخصي انو يلي شغلو بجيب مصاري أكتر هو يلي بيشتغل برا و التاني بيقعد بالبيت بيهتم بالأولاد حتى يصيروا بعمر مناسب يقدروا يعتمدوا على حالون لما يكونوا الأهل برا طبعا العمر المناسب أكيد مو سنتين لأنو هاد اسمو حكي فاضي العمر المناسب يتراوح بي 7 - 10 سنوات بالنسبة لتربية صحيحة بس المشكلة أنو أغلب الأهالي حاليا بخلوا الولد ما يقدر يعتمد على حالو لمراحل لاحقة يعني 15 17 19 22 25 مو مشكلة ( مثلا الولاد جاعوا وين الماما لتعمل أكل ما حدا بيعرف يلف عروسة , حدا بدو يروح مع رفقاتو مامااااااااااا ليش مو كاوية التياب تبعي لأنو ما بيعرف كيف يحط المكواية سعادتو بالكهربا شو رد الماما على هلحكي روح تقبرني الله يوفقك ما تواخذني نسيت خمس دقايق بكويلك ياهون ) هاد وضع تقليدي عند كتير من الناس يلي بعرفون. أنا عندي بنت و صبي و أنا بشتغل تقريبا من العشرة الصبح للعشرة المسا إيمتا مرتي بدا تروح تشتغل برات البيت إذا راحت تشتغل الولاد شو بصير فيون يلعن أبوون يعني مو راكزة لازم حدا يضل بالبيت يهتم فيهون المنطق بقول ( لا أقول المنطق الذكوري الشرقي ) أنو يلي فينو يجيب مصاري أكتر يروح ينقبر يشتغل برا لأنو ماني فهمان شو يلي شايفينو حلو بانو هلكائن الحي يروح يتغل متل الحمار 12 ساعة باليوم و ساعة لساعتين مواصلات بالمكاري فوقون كمان لك ليش حاسدينو ووووووو عتقوا حاج تأرو عليه هلق بتصيبو بالعين. المشكلة بمجتمعاتنا الشرقية إذا المرأة بدا تشتغل شي شغلة شريفة ما بتاخد نص يلي بياخدو الرجال غير الازعاجات و التحرشات يلي ممكن تتعرضلها بالشغل و على الطريق. يعني بهيك مجتمع فاضي لازم الصبايا ينبسطوا أنون ضلع قاصر :سوريا: و بس الوحدة يجيها عريس ما بدو ياها تشتغل لك أحسنلك من البهدلة و وجع القلب و العتعتة مع العالم طولت عليكون الحكي و يمكن ما حدا فهم شو بدي ما تهتموا كتير شنو أنا مواطن سوري ( علاك ) |
| الساعة بإيدك هلق يا سيدي 15:38 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون