|
صديقي الزبال
تعودت ارجع من الخمارة أنا و سكران و امشي بهل الطريق أنا و كم كلب عم يدوروا ع شي ياكلوا أنا كنت غني و الكلاب تعوي , بس لما كنت وصل تقريبا لعند غرفتي كنت استند ع حاوية زبالة لجرب أني راجع(استفرغ) أو لحتى ارتاح ما بعرف بالضبط ليش ," يمكن لأني سكران" , بس العجيب إنو ثاني يوم كنت لاقي حالي بالغرفة , يعني ما بتذكر كيف وصلت , بتذكر كل الطريق لي امشيت في إلا هالمسافة من عند الحاوية لغرفتي و كان سر بالنسبة إلي , و ما كنت اهتم كتير يعني سكران و بدي اعرف كلشي, إي مو ظابطة ,ليوم كنت طالع ع الخمارة من بعد نص الليل و كان بإيدي كيس الزبالة و بدي حطوا حد باب الغرفة (بالشارع) , و اذ شخص (زلمي كبير بالعمر) بيقلي لا اتقل بالشرب اليوم لانو قربت النهاية , عصبت و قلتوا : خليك بحالك و ريح حالك , و لأني معصب بهديك الليلة اشربت و اسكرت لحتى انطفيت و متل العادة أنا و راجع ع الغرفة و صلت لعند الحاوية و بعد كم ساعة ضرب ضو الشمس بوجهي و فقت لاقيت حالي عند الحاوية , كتير انبسطت وراحت السكرة و ارجعت ع الغرفة لي عايش فيها و تحممت و انا بالحمام تذكرت شو قلي الزلمي أو ليش حكي معي و كيف عرفني ؟ بالليل أنا و طالع ع الخمارة وقفت قدام الغرفة لشوف الزلمي , بس ما حدا مرق بالشارع , رحت ع السهرة اليومية بس هالمرة فقت من النوم و فوق راسي شي 10-15 شخص و اسمعت عم يقولوا معقول ميت ,معقول حدا قتلوا و رماه عند الحاوية , فتحت عيوني و اسالت : شو في وين أنا , انتبهوا إني شربان و سكران , وبلشت تنهال علي المسبات و الدعوات , لملمت حالي و ارجعت ع الغرفة , و اسالت حالي شو تغير كيف كنت أوصل ع الغرفة ؟؟؟ و هلق صرت بوصل لعند الحاوية و بس ؟؟ أكيد في سر مع هالزلمة , قررت أعرف مين هوي و اعملت خطة إنوا تظاهر إني سكران بهل الليلة و روح وقف عند الحاوية , بالفعل هيك اعملت و انتبهت إنو اقترب مني (ختيار) زلمي كبير بالعمر و لابس بيجامه نوم و قال : لك اخ منك انت ما تربيت من فضيحة اليوم , قلتلك لا اتقل لانو انا خلصت بس ما رديت علي , تعا استند علي لوصلك ع الغرفة , حرام أحسن ما تنام إنت و الزبالة و ماحدا إلوا نفس يلمسك , قلتلوا: و أنت ليش إلك نفس (بطريقة أنو أنا سكران و لساني ثقيل للتمويه لحتى ما ينتبه ) قلي لك أنا زبال , قلتلوا يعني انت لي كنت توصلني ع الغرفة , قلي : إنت مو سكران ؟؟ اعترفتلوا إني مو سكران و شو السبب , تنهد و قالي إنت و سكران كنت الوحيد لي تسلم علي حد الحاوية و كنت تشد ع إيدي و تنام ع كتفي أنا و عم احكيلك همومي , قاطعتوا , و قتلوا أنا كنت اعمل هيك , قلي إي يمكن إنت في بداخلك إنسان طيب بس عم اتحاول تهرب و ادمروا بالشرب ,و دّعني وراح و أنا ضليت ساكت و خجلان من حالي , و بعد فترة اسالت عنوا قالولي إنو مات , (بهل الفترة الماضية تركت الشرب) رحت زرتوا بالقبر و اعتذرت منو ليش ما اسألت عليه و قلتلوا إني تركت الشرب و بعدين رحت ع البيت لي إلوا و اذ كان عايش لحالوا مو متزوج ولا حدا مهتم فيه , انتبهت إنو في مكنسة بأحد الزوايا , كانت المكنسة لي بيشتغل فيها , اخدتها و اطلعت و هلق صارت بغرفتي جزء أساسي منها و اعرفت إنو انت يا صديقي الزبال أحسن مني بكتير , شو تمنيت أعرف شو كنت تحكيلي أنا و سكران , وأنا شو كنت رد عليك.و حاليا أرجعت اشرب بالغرفة كل يوم كاسة لحتى قدم تحية لروحك يا صديقي لربما منجتمع بشي مكان ولو عند حاوية ...... |
يا أخي والله انو تحفة يسلم تمك
|
بتذكر اول مرة قريت فيها هالقصة....لما بعتتلي اياها وجد كانت وما زالت قصة رائعة جدا
بتعرف والله وانا عم اقراها كنت عم حسك انت عم تقراها بصوتك ولهجتك واحساسك ...كتير الاحساس رائع وراقي اسلوب القصة واسلوب سرد الحدث كتير حلو والعظة يللي فيها كمان حلوة ...واحلى ما في الموضوع انو الانسان بيصفي انسان بس وقت ما بغيب عن الوعي.... وكاسك يا انسان.... ويحد سوري....تزكر اني قلتلك بيوم من الايام انك مميز جدا:Dوهيني عم قولا مرة تانية |
رائععععععععععععععع
:D:D:D:D:D |
حبيتها :D
|
و انا كمان حبيتها وخجلت بيني وبين حالي
لأن ممكن بدون انتباه مني اكون زي وحدة من هالناس اللي بيمرقوا الطريق وما بيسلمو ع انسان لأنهم قرفانين منو يسلمو كتير |
شكرا الكن
شكرا لكل من قرأ
و انشاء لي ما عجبيتوا هالمقالة تعجبوا لي بعدها ( اسمها مواقف رسمية و 2100) قريبا رح نزلها لبعد نتائج المسابقة لانو مشارك فيها باحد المواقع و عامل جوائز للمقالة ال 1 و عندي شوية تفاؤل على كلن الهوم بيج لي الي kingjbr.page.tl موجودة :D |
اقتباس:
|
شو حلو نصادق واحد من الطبقة المسحوقة ومهروسة هرس...حتى لو بالكتابة..عظيييييييييم
|
تحياتي لكل ويحد سوري متلك يا صديقي , أمتعتني بكأسين مختلفين تماماً , الكأس الأول عندما قرأت قصتك كأدب ساخر , واكتشفت فيها عمق المأساة ؛ والكأس الثاني عندما قرأتها كمأساة إنسانية واكتشغت فيها سخرية الحياة
كل مافي قصتك جميل ورائع ؛ هات منّن هات ,وعيدا كمان بالله تعيديا........ |
انت ويحد حرام ماتنشكر لهيك موضوع مشكور
|
قريتها مرتين ... ما بعرف شو بدي قول
فيها شي بيشد يمكن لأنها بتحمل جانب انساني ما منشعر فيه ... بتحكي عن جانب انساني موجود بناس مهمشين كتير بالنسبة النا رائعة منك :D |
مؤلمه ...جميله ...هذه الكأس التي تعرينا من كل شي ....
رائع ما كتبت واتمنى رؤيه المزيد من كتاباتك ....... |
ok
اقتباس:
|
welcom
اقتباس:
|
اقتباس:
|
هلا
اقتباس:
|
رااااااااااااااااائع....كلا م انساني رائع جداً
واضح انو نابعة من شخص مبدع بالفكر و الكتابة... مشكووووووووووور :D |
| الساعة بإيدك هلق يا سيدي 22:57 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون