|
لهجة اللادقانية من واحد شامي
ولك عراسيييي الشبيحة كلكن
منبليش قواعد اللهجة اللادقانية: 1. في اللهجة اللاذقانية يحذف دائما اخر حرف في الجملة او الكلمة اذا كانت مفردة 2. في اللهجة اللاذقانية تمد الكلمة دائما ثلاث حركات مد لازم 3. في اللهجة الللاذقانية تشدد دائما الكلمات في اوسطها 4. في اللهجة اللاذقانية الافعال الضعيفة تضاف اليها كما ( نهنه ) في مؤخرتها مثل ( اخدوهنه ) ( اتلوهنه ) ( دبحوهنه ) ( ابوهنه ) مع كسر الهاء 5. كافّة الكلمات التي تحوي حرف الألف تقلب إلى واو عريضة الكلمات : اهم كلمة في اللهجة اللاذقانيةهي كلمة عيّن ، حتى انو اللادقاني بينعرف من هالكلمة ، لدرجة انو مرة كان صاحبي بإيطاليا طالع بعثة مع الجامعة ، فكان بدّو يسأل واحد عربي عن شغلة، فقللو: عيّن!! فسألو الزلمة: إنت من اللادقية ما هيك؟ :p عيِّن = انظر زتـّا = ارميها اشْلفا = ارميها ازْركو = احْشكو = حاصرو خـَيسو = اضربو بالسكين لمّط = لم = شيل قـبّوع = كيس و تقال أحياناً للشخص الغبي بغيابو أبتول = غبي كريم (تلفظ الكاف متل الجيم المصرية)= كريم اللي يستعمل للدهن متل كريم الوش تتشيّع = هادا الفعل حالة خاصّة جداّ ، لأنو يستعمل بدل أي فعل ، طبعاً و تشتقّ عنو الشايعة و الشايع ولكن طبيعة هالفعل بتنقال في حالة الإشمئزاز من شي أو الالإنزعاج من شيء معيّن مسكليتة = بسكليتة الدراجة ريحة = بارفان جاكيّة = جاكيت باكيّة = باكيت خفّافة = بوط رياضة عليا طول = على طول ولكن نادراً ما تسمع هالكلمة السيبا = السلـّم العمىىىىى = تقال في حالة الصدمة و غالباً من شي ما كويّس كتّ = عبّي إبّا = ارفعها جلموء = مصلحجي حمزة = يلي يحشر حالو بكل شي معلاء = بيتدخل بكل شي اسْكمْبري = نوع من السمك = حجش اشْكمو= اخذلوا يبأبــِش = يلخْبــِص= يلعب بأصابعه بالورب = بالمايل عواءبك = شرف العيلة آآآ ( مد لازم 12 حركة مع فتح الفاه ) = للتعجب و الإستفهام اعْركا = حكّا شْـفاتير = شفايف كلاكيش = غراض مأنتن = وسخ صفدعة = ضفدعة ملنـّص = واصل عل قمة ( توب ) ضبع = طنط إيّاعااا = إيّا عزّةةة = شَحّاري= شحميطي = للتعجب الكتير مكن = قوي عكّيد = أبضاي عَمْشة = وسخ الانف سأرأ = علبة معدنية دَرْبَكو = دَعْتـَرو = اوقعه ارضا زنزوءة = مرجوحة شئليبة = قلّيبة مْأنشِح = وسخ ألشين = جرابات ألْشِت = زحطت لـْبيسة = كيلوت أشأ = الطريق الغير معبد = خرج عن الطريق طـَرْوَشو = صرعو زْلاعيم = لوزات خروء = ضعيف اكْعَرو = اصْغـَرو = اطردو زَمَأ = مر بَحَت = مات طـَشّة = أهبل إيش ياه = شو ياه مَكـَـنة (الكاف هون متل حرف الجيم بالمصري) = موتور مشْنِص = نوع من الموتورات في عام ال 20 مشنص ( مصطلح ) = حظو حلو دشّـو = تركو أهتر = أهبل جيعان = جوعان هبّور = شرشوح معتـّر = مسكين = ضريب سكاكين تليانة = مليانة صحفة = نفاضة سواكير بتـّو = بنتو أخوّي = أخي زاوة = زاوية كبّينة = تواليت هردبشت = هبور يا بو = للمناداة لألوء = الذي يتنقل من مكان الى آخر و يلي بيلزق عليك عليّ ما عليّ (مع تسكين الياء) = للحلفان مَـش = دليل على اللاشيء إتـّة = انت فـَهْنه = يوجد آي = نعم بردلي = أنا بردان بربيش = خرطوم أو مربيش فا = يوجد إسّا = لسّا يحمّك = دعوة بالشر و الحمة فلوكا = مركب الصيد المتوسط الطول لنش = مركب الصيد الطويل و الكبير بَبّور = سفينة رَيسي = معلمي ما عن طـَيبي = ما عن قصدي يلعن سلسفيلك = يلعن اجدادك لزّ = زيح = بعّد خمخوم = الذي يحشر انفه في كل مكان شو دحشك = شو دخلك أتـّورة = نـَتـّوسه = أتـّوسه = شوي صغيرة فط = نط خربر = مثقب وهو أداة كهربائية للنجّاريين و الكهربجيّة حربوْء = ذكي كـَحَشو = طردو دَرمِل = احليء = انقلع فوِّج = انقلع ليش عم تزاور = ليش عم تتطلع مسأسئ = مليانة مي أو متشتش شنتيانة = سيف طويل طري جدا للعلئة = مشكلة حبْكت = كمْشت = لـَنـْصِت = وصلت للذروة يو عين = يا عين بلعِط = لوص = تحرك بسرعة أو احتار لحالك وهي مشتقة من بلعوط و هو ابن الضفدع قرقوعة = مهرهرة سيبو = تركو شكودري = شاوي حجش يطلع صوب برا = يذهب إلى دورة المياه كل يوم تعا = يا ميت اهلا و سهلا بس لا بآ تعيدا شكارة = شكيلة ، وهي كلمة سيئة للفتاة الرخيصة جداً ضبجي = من فعل ضَبْجَن = من يحب ملامسة الاولاد فقط ولا خَي = يا أخي تقال تحبّباً أو إذا كنت آخد وش عالشخص اللي عم تحكي معو طرْوَشو = طـَوَشو = خـَيَـلو = جنـّنو صرْضْعو = مشتقة من الصرضعون وهو السلطعون ، الحيوان البحري الذي يمشي على جنب و معناها = جننو طيك العوفة = يعطيك العافية لأ ولو (مع التشديد على الهمزة في الـ لأ) = للإندهاش الشديد بسّة = قطة مريّة = مراية ملحوظة: لازمكن شخص يحكيهن شفهي مشان تعرفوا كيف بتنلفظ كل كلمة طبعاً لسّا في كتير كلمات ، بس هدول اللي طلعو معي مع اني شامي :lol: |
اقتباس:
حلوووووووووين ولك شامي ، تاريك آخد دورات :p |
اقتباس:
لك هدول موسوعة لحالن :lol: اللي بيقراهن لهدول بيقول انك من نص اللادقية :p |
اول شي الله يعطيك العافية مع انو بعتقد انو كان في واحد لادقاني عم بيساعدك.......تاني شي:
كل منطقة باللادقية الا لهجة شكل اقتباس:
بمنطقة الرمل الشمالي قريبة عالضيعجي بمنطقة الصليبة وقنينص ..بيشتغل مد الحركات يعني هي معك حق فيا: اقتباس:
ومن عندي هي كم مصطلح: عالزويقة: تقال ....والله اخدها عالزويقة ............يعني مكان ضيق محجوب مافيه حدا.... كال كولي: يعني: حول .تعا معي.....لحقني....... بلعوط: هي بتنقال للي مابيعرف يسبح .....بلعط بالمي.....يعني رح يغرق محّنك: بيفهم بكلشي العفاااااااااا: العمىىىىى..............: للصدمة والاندهاش اقتباس:
معلاق وجلق : هي بتنقال للواحد الي بيحشر حالو بكل محل ماخرج=مافيني= مابقدر فبركا:يعني=: دبرا بمعرفتك......... هتيرو=اهبل=هبور صّواب:ضرب: تقال والله شفتلك اليوم صواب للعمى ......يعني بنت او شب كتير حلو شحطو عالفيّ.........هي معناتا وسخ شوي بس بمعنى انو ضبو تحت باطو........ دبقو= لزق فيه= عربط فيه: يعني ماتركو منغولي........مصطلح شايع كتير عنا ...يقال للاستهزاء والمسخرة... ظبلوط: تقال للشب باول طلعتو وللشب الناعم........ دكو=بطحو=طرقو: = يعني ضربو او قتلو فافوش=فالصو = شغلتا فاضية هدي: مهل: بطىء=وقف رميا= كبا= شلحا= زتا عبيّا= مليها=املأها عبطو: تقال ...والله عبطتو هو وصاحبتو عالكورنيش.........=كمشو=لقطو=وج ده شاروخ:=طربوش الاركيلة أحّيط= حليق= ضوي=يعني روح من هون هلق هاد الي طلع معي هلق عالسريع اما بضّيع اللادقية:::::::::::::::::::::::::::::::::: :::: لاقوش = هي تقال للتلفون بضيع اللادقية (لوقشو عالاقوش)يعني حكي عالتلفون مدراية=شوكة الطعام خاشوقة: ملعقة الطعام هيكو= ليك وينو هنتستخ= هون بشلوقة= القبقاب= بابوج= شحاطة حاكورة: حديقة صغيرة امام المنزل ساعة عزا والشحار= يعني قرد كنو صحيح= للاستغراب هاد الي متذكرو .........وشكر لصاحب الموضوع.............. |
ما قريت غير أولو لانو الدرس طويل
|
زحلقوا من هون =هوينا إنت وياه هذه بالحمصي
|
يعني فيك تقول منيحة
بس الأكتر فيه غلط |
قرد ولا...من عم يحكي بالسياسة هون ولا :?
قررررررررررررررررري |
لك أنا اللي من اللادقية ما فهمت شي وبعمري مو سمعان بهالكلام
لك إنت متأكد إنو صح |
اقتباس:
|
شكرا ياشامي افندي ع الموضوع.:سوريا:
|
اقتباس:
|
اقتباس:
|
حلوة مللك
لك انت منين جايب هالمعلومات كلون يومين قعدتون هونيك |
| الساعة بإيدك هلق يا سيدي 23:00 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون