|
اقتباس:
الانانية و الجشع نتيجة محبتك الزايدة لابنك و تعويدو على انو كل طلباتو مجابة ... و أكبر مشكلة انو يكون عطائك واهتمامك للولد التاني أقل من الاول ...وهاد اللي بيصير للاسف..دايماً الولد الاول بيحظى بالرعاية الكبيرة و الاهتمام العظيم ...ليس فقط من الوالدين ...من الجد و الجدة و العمّات و الخالات ... سماع ...ولاتواخزونا ازا رح نطّول ... أخوي البكر , أكبر منّي ب11 سنة .... لانو أول ولد لاهلي.... و لحسن الحظ....انو والدي كان أول واحد من اخوته اللي بيتزوج و كذلك الوالدة ....فكان أخوي هو أول حفيد للعائلتين ...خزيت العين .... لما بلّش اخوي يكبر شوي ماعرفو شو يقدّمولو ..سجّلوه بنادي رياضي ..سباحة ..العاب ..هدايا ...كتب ..تدريس ..رعاية ...لك جابولو فيديو و تلفزيون ملون بهديك الحسبة ..كرمالو ... و أهل ابوي و اهل امّي مالون سيرة غير سيرتو ...الوالد تغرّب كم سنة منشان يأمنلو متطلباتو .....ودرس طب و صار دكتور ...و أقلك الصراحة ...أخي اصابو الغرور و التكبّر واصبح اناني جداً ...اهلي يشوفو انو كتير من امور حياتو غلط و مابيقدرو يعملو شي ....وصل لمرحلة مابيقبل النصيحة من أي حدا ...انو انتو شو فهّمكون ...انا طبيب انا فهمان , انا زكي .. فشل بحياتو الزوجية فشل محزن....مع أنو الكل بيشوفو انو تسع و تسعين بالميّة من الفشل هو اللي بيتحمّلو نتيجة استهتارو و عدم تحمّل مسؤوليتو و انانيتو الزايدة...ومع ذلك الاهل شدّو معو ...مع انو بيعرفو انو هو اللي غلط ....بس مابقى يتجرأو ينقدوه أو ينصحوه.... بينما محسوبك ...ماحسيت للحظة انو انا مميّز بشي ...يعني نروح عند بيت جدّي مثلاً ...مع هالبشر ولاد عمّي و ولاد عمّاتي ...جدّي توفى وكان عمري 5 سنين ...بصراحة مابذكر شي من جدّي الا انو كان ينهرني و يبهدلني .. بينما أخوي لما كان عندو بكالوريا , جدّي جابو لعندو عالبيت ...ليبتعد عن ضجيج بيتنا و يركّز بدراستو.... اخي بحياتو ماعرف الشغل الا بعد ماتخرج من الجامعة ....بينما انا من صف السابع للبكالوريا اشتغل بالصيف...وبالجامعة صرت اشتغل صيف شتة ...اخلص دوام الجامعة و عالشغل .... بصراحة ...انا و أخوي انظلمنا من اهلي ....هو انظلم بالاهتمام الزائد والدلال و انا انظلمت بقلّة الاهتمام .... |
اقتباس:
اقتباس:
هو انا بالاصل كنت مفكّر بواحد ...اجت البنت و حمدنا الله ....بعد شهور قليلة اجاني خبر انو التاني جاية... الصبي اجا بالغلط ...شو أعمل ...ترجيع مافي ...البضاعة لاتردّ و لاتستبدل !! :lol: أول فترة انزعجنا و بعدين قلنا كالعادة ...شلفناها عالنصيب ....صبي وبنت ...بيناتن سنة تقريباً ... ومن بعدها عملنا حظر شامل تجنّباً للوقوع بأي خطأ ....سواء كان مقصود أو غير مقصود ... متل ماقلت انته ..الوضع كلّو بيقلب لمّا بيصير عندك ولاد ....والمعاناة بتضاعف بالغربة ...صحيح هالحكي ... |
بهل الزمن أكتر من اتنين فعلاً صعب، هو اتنين أصلاً صعب بس الواحد كمان صعب. بس أنو الواحد يقرر يصير أب أو أم فهاد قرار كبير، يعني إذا الواحد مو قادر يضحي ويغير حياتو ويتخلى عن كتير أشيا بيحبا وعن جزء كبير من وقتو فمن الأفضل أنو ما ينجب، لأنو إذا الواحد صار عندو ولاد وما كان قادر يتكيف مع هالوضع فبيكون عم يظلمون وعم يظلم حالو.
الواحد بيكون محضر حالو ومفكر حالو مستعد للإنجاب وبيفوت بالحيط ليربي ولادو فكيف إذا كان أصلاً لا مستعد ولا رغبان. |
أنا من ناحيتي ما رح أتجوز ابدا ولا بدي ولاد
بكفي انو عايشين في ظل نظام دكتاتوري ارهابي وحريتنا مسلوبة بالمطلق, كمان فوق هالشي زواج وتقييد أكتر للحرية الشخصية والاجتماعية!! لا ما بدي. |
اقتباس:
الك ولكل الصامدين و المكتفين بولد او ولدين بهديك هالفيديو - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - :D |
اقتباس:
هو اكيد مو هدف الاهل الدلال الزائد والافراط فيه بس لما يكون الولد وحيد بيكون كلشي عمليا الو الالعاب المشاوير اي شيء هاد بيصير بلا ارادي بس كمان مو شرط انك لما تجيب ولد تاني فورا ما يصير غيرة بينهم الا في حال عدم وعي الطفلين يعني يجي الاخ التاني والاول لسه عمرو سنة الغيرة بتصير بين ناس بالغين فمابالك اطفال اخ حلبي الله يخليلك ولادك ولا تعتبر حالك غلطت بالعكس انت كنت عم تعطي من قلبك بس متل ماقال الاخ ابو نجبو انت زودتها شوي والفرق الكبير بين الاولاد الاخوة مو حلو هاد بيعمل بالكبر شرخ بين العلاقة بينهم وتحية:D |
| الساعة بإيدك هلق يا سيدي 13:56 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون