|
متفاجئ انا .... اذا انا قطيع
مرحبا شباب تحية للكل ...
طبعا وضعي هالإسبوع كتير معجوق ويوم السبت بيظهر معي شغلات تانية يا بتعجق بزيادة لدرجة انو يصير اسمي على لائحة طويلة يا اما بيمشي الحال برجع بظهر من جديد كالقمر اقبر قلب اعدائي .." صحي تذكرت انا زلمة كتير كول ما عندي اعداء" خلاصته انا متفاجئ كتير ...... متفاجئ فكرت انو رح اقدر شيل الزير من البير... بس اكلت هوا ... شوفوا شو القصة عرفت انو الشعب الصامد البطل المناضل الأبدي الموقف الرافض للإستسلام ..إلخ لا يعدو عن كونه شعب قطيع ... شوفوا من وين بلشت القصة " قبل ما نروح على انابوليس كانت الروحة ع انابوليس مرفوضة طبعا مرفوضة شو بدكن ايانا نروح ع انابوليس شو هالحكي الفاضي بدكن ايانا نقعد مع بوش و مع عباس ومع شلة " الخونة " ع نفس الطاولة ...ولا لإنابوليس اخر شي بقدرة كيلو البطاطا رحنا ع انابوليس وصارت الروحة ع انابوليس هيي نقطة صمود وذهابنا إلا انابوليس هو اعتراف من تلك القوة بدورنا المحوري وبنضالنا ... حلو الحكي شو رأي الشعب بإقتصاد السوق .,.. من زمان كنا نقول مرفوض وموقفنا مبدأي مع العدالة الإجتماعية ومع توزيع منصف للثروات ومع الإشتراكية لحنا وشو شعارنا اللي بنقوله كل صبح .... و .... و اشتراكية ..ولحنا ضد الرأسمالية لحنا ضد الخصخصة لحنا اشتراكيين ما بدنا قطاع خاص قائد بل منقاد ولا يسيطر ...هيدا كله الحكي ما صرله زمان انا فكرت انو لحنا رجالك يا لينين رجعت تفاجأت انو شو رأيك بالإستثمار او بإقتصاد السوق المفتوح اللي هو بالنهاية شي رديف للعجلة الرأسمالية .. استغربت انو جواب نفس الشخص اللي حكى عن اقتصاد السوق ليك شو بيحكي مثلا : رأيي انو هو مظهر من مظاهر الإنفتاح وهو ضرورة ومطلب لتطوير الإقتصاد الوطني ولو صار في عنا قوانين استثمار وصار في عنا بنوك خاصة وشركات خاصة وبعد فترة رح بيصير في عنا مرافئ خاصة ومطارات خاصة ويمكن " جبهات " خاصة .. يعني كلشي تخصخص وعلى قولة انو هيدا امل البلد في تطوير الإقتصاد الوطني واهلين بالمنتج الغربي ليدعم المنتج الوطني عادي كنا نشرب مندرين ما عاد فينا البيبسي مطلب هام جدا وملح على ارادة وصمود شعبنا .. شعب القطيع شوف كيف بيتصرف .." بيجي امر من فوق لمدير المدرسة او لمدير هيدي الدائرة انو خيو السلطات العليا قررت تعمل مسيرة مشان دعم صمود ابناء فلسطين او لبنان مثلا او العراق ... طبعا مدير المدرسة او الدائرة شو بيقول .... طبعا لحنا فدا فلسطين لحنا فداك يا وطن والمشاركة بتصير واجب انساني و وطني طبعا المشاركة واجب وطني عن نفس المدير اللي ما بيطلع بالمسيرة هو انسان خائن للوطن وللقضية طيب حلو الحكي هالمرة اللي دعا للإعتصام مو السلطات العليا ...يا اخي مشغولة نسيت تدعي لهيك اعتصام بيقوم شو بيصير مين بيدعي على هيك اعتصام شي شبين تلاتة اربعة خمسة بيحضروا حالن مشان اعتصام وبيعملوا الإعتصام وبيطلعوا من مدرسة المدير نفسها او من دائرة المدير نفسه وشو بتكون ردة فعل المدير انو هيدا تهور وما بيصير هالحكي انتوا اشخاص مهملين انتوا اشخاص غير كفؤ للبقاء في تلك المدرسة او الدائرة ... خلونا ننسى ... بيروح واحد بيقول لرفقاته والله يا اصحابي السلطات العليا عاملة اعتصام ...وبتركض العالم الشاطر اللي يعلي صوته ..." بالروح بالدم نفديك يا فلسطين ...." والشاطر اللي يخلي العلم الفلسطيني يلولح فوق راسه نفس الحالة ...بس بيروح واحد بيقول لأصحابه ليك في اعتصام بس الدولة ما خصها في ...بيقوم شو بيقول الأخ المناضل نفسه اللي انبح صوته بالمرة الماضية ....بيجاوب انو مو فاضي وما وقتها .... طيب كل هيدا ولسا إلنا عين نقول شعب مناضل شعب صامد .... لسا قلنا عين نقول عن حالنا اي شي الا قطيع .. اي يا اسيادي انا قطيع انتو قطيع والدي من بعد ما قضى نص عمره مناضل رجع مرة تانية انضم لقافلة القطيع ...." بس بغير مرعى " يا سادتي وسيداتي نحن كلنا لسنا سوا جزء من هذا القطيع ننتظر خشبة مهترئة في يد احدهم ليحدد لنا مواقفنا وليحدد لنا تصرفاتنا وقد اعتدنا .... شايفين هالموضوع ما هو موضوع تفاجئ شديد اللهجة حتى هالموضوع كان محدد سلفا ...بروح القطيع نفسها فلتحيا الروح القطيعية ... دمتم بحب .. تحياتي الحارة ظل جيفارا |
عراثي
بس شو الحل برأيك .. شارح الوضع شرح مفصل . وهادا الحكي 90 بلمية من العالم بتعرفو مع انو ماني كتير معك بس الحل يامعلم .. مابدنا نضل نحكي ونقول هلشي غلط وهلشي مانو نظامي . . و هيك مقضايينا ها حكي ب حكي يعني راوح مكانك .. لالقدام ولا لورا كانت رح تطلع ظريفة شوي لو قلة رأيك بلحل .. مو تفسير للواقع لأنو كل واحد شايف وعارف |
ماااااااااااااااااااااااا اااااع
أنا من القطيع . أنو شعب مناضل عم تحكي عنو يا زلمة :p. شعبنا من زماااااااااااان تحول لقطيع من لما قدم أول تنازل. شعب قطيع لا يرضى الا ما قسم له ويدافع باستماتة عن مواقف رعاته ويثق بهم ثقة عمياء في انهم أدرى بمصالحه. رحمة الله عليك يا جدي ..لو انك ترجع يوم تشوف وين نضالك السياسي صار و وين صار اللواء. بعتزر منك لأنو ما بعرفك وكلماتك بالمزكرات الي توارثناها هزتني وبعرف انو بدك ياني احمل اللواء بس شايفو تقيل عليي ووضعي بالمرعى كتير كويس. عفواً جدو خليني بالقطيع. و ماااااااااااااااااااااااا ااااااااااااااااااااااااا اع. |
اول شي مرحبا بعد زمان مشتقلك والله
تاني شي ياسيدي المشكلة انو في نسبة كبيرة منل ناس مالا قد كلمتا يعني جبانة اليوم مثلاً عم اتناقش مع صديق الي حول انو الحرية مابتاخد الا بتضحيات متل الثورة الفرنسية او او او اوروبا هيك اخدت حريتا ولا بجي بقلي (انا ماني مستعد اضحي بحياتي منشان وطني) مع اني بنفس الحديث كان عم يقول انو لازم الانسان اذا بدو شغلة لازم يعمل المستحيل منشان تتحقق والمشكلة هادا واحد منل ناس يلي مفكر حالو صاحب قضية فتخيل الانسان العادي البسيط شو بكون تفكيرو المشكلة الناس جوعانة وللاسف اغلب الناس بتلحق لقمتا وبتنسا الحرية يلي هية رح ترجع اطعمين ومشكور عل موضوع يا ظل |
تحياتي الحارة شباب .....
بشكر ردودكن . وشفت انو اللي في شخص فات معي بالجو وطلب حل .. خيو انا بتوقع انو بالحد الأدنى عندي الحل لحتى نطلع من حالة القطيعية هيدي .. طبعا اول شي برفض رفضا قاطعا هيدي فكرة انو الواحد يشتغل ع حاله ويطور حاله فكريا وبس ... لأ يا سيدي الإنسان اللي وصل لمرحلة وعي قدر يطلع فيها عن مقدسات الشعب لازم يشتغل ع فكرة نشر الوعي ..." اجبارية الشغلة " خلاصته .... بإمكان اي مجموعة تزبط شغلات متل اعتصامات ما داخلة الدولة فيها بس المهم يكون هدفها واضح وما بيسبب مشاكل مع الأمن ... وطبعا الإستمرارية بهيك شغلات اهم شي يعني اعطيك مثال ...ممكن اعتصام مشان فلسطين بتلاتين اربعين خمسين شخص يؤثر اكتر بكتير من اعتصام منظمته الدولة كله موظفين وطلاب مدارس طلعوا على الأعتصام احسن ما يتسجلو غياب .. طبعا بتبدأ الشغلة هون يمكن اول تلات اربع تحركات يكون تأثيرها قليل بس على بعد كل اعتصام عدد المشاركين رح يزيد بشكل ضخم وهيك بتكتر قاعدة المشاركة الشعبية في الحياة الإجتماعية .. ممكن تبدأ من فلسطين ترجع ع جريمة الشرف وع اكتر من موضوع اهم شي فيهن انو ما يكونو بأهداف سياسية بل اهدافها انسانية بحتة مع تطوير الهدف وملامسته للناس في كل مرة ... على كل اذا حضرتك من سوريا ممكن ننسق سوا .. تحياتي الحارة ظل جيفارا |
هادا ياصاحبي .. وقت لي رديت ع موضوعك .. كان رفيقي فوق راسي .. فا ماأخدت راحتي علمظبوط ماعلينا انا قلت انو ماني كتير معك بتفسيرك أو بنظرتك هلأ أنا أول شي بفتخر ب كوني سوري . ولو انو بجوز موضوعك مابيتناول هلفكرة ك فكرة . بس حكيت هيك بناءً على لي قلتو حضرتك . من أنا بوليس وانتي نازل كلشي صار وكلشي عم يصير . مابخليني قول انو أنا تابع للقطيع . يلي سبق شرحو وتفصيلو معلم . شيلك عن الشعب العتيد والعنيد . شيلك عن السرقات والمحسوبيات والوسايط والرشوة . شيلك عن انك عربي وصاحب قضية . شيلك عن اسرائيل ولي عم يصير . هدول قشة لفة شيلن نتوفة . هلأ سورية هيي دولة مهيك ؟ أنا بظنا دولة . وبإعتبار انو دولة . فهيي متلا متل أيا دولة بهلخليقة . إلا مصالح وأمور بدا تديرا . ياأخي في شعب بدا تسهر على راحتو شبك انتى . ومتل مابقلك المتل مطرح مابترزق الزق . أنابوليس . معروف لكل هلخلايق انو كانت الفكرة مرفوضة . أو قيد التفكير . وبجوز نحني الدولة الوحيدة ب هلدول المستعربة المستكلبة . يلي قرارنا السياسي نابع من مصلحتنا أولاً . فا شو المانع إذا قدمولنا شي لحتى نروح ونحضر . قلتلي فلسطين . ومو بعيدة تقلي العراق ولبنان والوصومال كمان . طيب انو شو مشانا نحني ؟ بدنا نضل متل لي حامل السلم بلعرض ؟ بدنا نضل نقول فلسطين وأخواتها ؟ انو لشو ؟ مين عميسمعنا لك خيي . تاني شي ماني شايف حدا عم يقول كتر خيرن والله . حاملين همنا وعميطالبو بحقوقنا . ولو انو كلشي عم نساوي كرمال مصلحتنا ها . مصلحتنا أبدى من كلشي وهادا الصح . والبقية باقية . ومن ناحية انو مابحقلي قول انو انا تابع ل لشعب مناضل . فا هي ماظبطت معي . انا وقت لي بشوف انو مافي غير سورية عمتقول لاء . ووقت يلي بنتهاجم من أمريكا أو السعودية . ماهوي اسرائيل لحالا بتكفي وبتوفي . بيطلع معي انو اي بحقلي . لاء وأكتر من هيك . برفع راسي انو معي هوية سورية . وبرجع بقول شيلك عن الوضع الداخلي . أما بلنسبة ل وضع السوق والاستثمار . بتكون انتي هيك عجقتا . يعني يلي بينفهم منك انو مانو عاجبك شي . كلو غلط ب غلط . اما فكرة انو الواحد يشتغل ع حالو ويطور حالو فكرياً . كمان ماظابطا معي . والواحد وقت يلي بكون ع مستوى من الوعي . لازم يقعد ببيتو . ويسكر الباب عحالو . ويمتنع عن مخالطة البشر . لأنو هي لعنة ب هيك بلد . مين رح يسمعلو . مين رح ينعدى منو . ولا حدا . ماحدا خرج يوجع راسو . بس هي مادخلا ب هي . انتي عم تحكي عن فلسطين ومشتقاتا . والله يكون معن . مافينا نقول غير هيك . نحني بدنا نعيش . مابدنا نضل حاملين همن وهم غيرن . طولت بعرف . ووجعتلك راسك بعرف . بس بدنا نعيش بقا . لاتحملا كتير وتركا لربك واي أنا حمصي سوري |
اقتباس:
لا والله عيوني كل الدول قراراتها من مصلحتها بتنبع. اقتباس:
في فرق بين ادعاء حمل القضية العربية وبين المصالح الي بتحكي عنها. انو معناتو سوريا متل السعودية دولة ما الها اي هم غير مصالحها وبس. وبتغر دعمها للأطراف بتغير المصالح. لزلك شيل عن سوريا صفة دولة المواجهة والصمود لو سمحت ازا هاد رأيك. اقتباس:
كمان مرة بقلك ليش ادعاء حمل الهموم العربية لكان. |
اقتباس:
اقتباس:
وسورية متلا متل أيا دولة بلعالم . مو بس متل السعودية . وطبعاً ماإلها هم غير مصالحها . هيك كل دول العالم . لكن بدك ياها شغلة عواطف . اجينا علمهم عاد . انا هي كلمة ( لزلك ) مافهمتا كتير . انو تزلني تزلني ؟ ليش أنا أسئت لحضرتك بشي . لحتى تزلني ؟ أصلاً شو عملتلك لحتى تزلني ؟ هلأ انا لساتني شاكك بلمعنى ك معنى . بلرغم من انو واضح . بجوز تكون مانك قاصدا مابعرف . مارديت عليك مظبوط تحسباً . بلكي مانك قاصدا . لأنو مستغربا شوي اقتباس:
|
اقتباس:
انت فهمتني غلط منيح انك ما رديت لزلك = لذلك بدون الشدة وتعني بالانجليزية so وتفيد الاستنتاج. والتقطيع العروضي: ( لذالك). بس عربيتي ضعيفة شوي :p. المهم رداً على الي قلتو انا كتير بكره موضوع انو البلد يتبنى قضايا ويصرع الدنيا بحجة وقوف بجانب الاشقاء ازا بالنهاية هي مصالح متغيرة وغير ثابته. والمشكلة نحنا مندافع عن خيارات الدولة بالحالتين اذا دعمت او تخلت او شو ما عملت. يعني منرجع لعنوان الموضوع تبع ظل جيفارا الغالي انو فعلاً نحنا قطيع. :D |
نرفزتني ياصاحبي . عمقول شو ذلك ماذلك .
ماعلينا انا أول شي عم احكي عن حالي . أنو أنا ماني تابع للقطيع يلي حكا عنو ظل جيفارا . وشرحت ليش . وموضوع انك بتكره او بتستنكر او بتشجب . فا هادا لا رح يقدم ولا رح يأخر . هيك عم تصير الأمور . مابدنا ن جمل الواقع . |
كرهان حالي ..
تحياتي الحارة صديق بس ما فهمتني حاول ارجع عيد قراءة الموضوع ..............لإنو انا ما عم علق لا على اقتصاد سوق ولا على موقف من اسرائيل او من انابوليس انا عم احكي عن عامة الشعب اللي كيف ما اخدوها بتروح . قبل ما نقرر " كسلطة سياسية " المشاركة كانت المشاركة ممنوعة " كموقف شعبي" بعد ما قررت السلطة السياسية المشاركة صارت المشاركة " مصدر قوة " كموقف شعبي يعني بدي افهم رأي الشعب كيف عم يتحدد لا انا رح افهم ولا حدا بيقدر يفهم تحياتي الحارة ظل جيفارا |
اقتباس:
أنو ما حدا اجا على اعتصامكون من كم يوم ..؟؟ :p |
اقتباس:
أنا معك . بس انتي نطلقت من هلقضايا هي . لتوصل فكرتك . يعني متل مانك شارح انو من ورا انابوليس وإقتصاد لسوق والمظاهرات . توصلت لهلنتيجة . لذلك وجب التوضيح . أما من ناحية النتيجة ك نتيجة . أنا معك . شعبنا 90 بلمية مسلم أمرو ورضيان ب بعيشتو . عقولة المكتوب مامنو مهروب . و العالم قرفت صدقني . ملت مانا خرج توجع راسا . إلا قلة قليلة . مدري ليش حبو هلستايل . لذة أو نوع من النشوة . مابعرف . ماعلينا فلور فور يو :D |
لاتعليق...........................
افضل النقاش بالموضوع شخصيا انا وانت جيفارا واكيد رح نحكي بكتير اشيا:pos: |
اقتباس:
شوف الصور بالمنبر ...:p تحياتي الحارة ظل جيفارا |
اقتباس:
ومن هون بتتكون الموالاة العمياء والمعارضة العمياء اللي شو ما بيقول الناطق الرسمي باسمهم فورا ,, بيعتبرو مثال وبيحطو اخرتو صدق ,,,, العظيم يعطيك العافية ابو حميد وعم حاول كون ما قطيع امّا الحل برأيي: بتقبل الكلمة ,, من الطرف الآخر اول شي تاني شي ,, التفكير بكل كلمة يقولها الطرف تبعنا ومو ضروري بكل الاوقات يكون صادق خيّو حتى لو ما بدك تقول انو هدا الانسان كاذب مشان ما تكذّبو قدام العالم بس مشان تعرف انتي الله وين حاططك :D |
انا صار رأيي انو الحل بيبدأ من عند الأجهزة الأمنية ...
وخصوصا بعد الإعتصام اللي نظمناه وبعد الحركة الجاي شايفين انو بأي لحظة ممكن نعتقل كلنا " كل المنظمين " وهيدا بيثبت فكرة القطيع . جميل جدا اعترافك سيدي ... تحياتي الحارة ظل جيفارا |
اممممم
بلا تعليق
مع تحياتي وخمسميه محروقة للشباب |
| الساعة بإيدك هلق يا سيدي 21:00 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون