|
مشاعرنا المكبوتة ..اسلوب المجاملة الأعرج..
وقت كنا اطفال صغار ..كان اسهل شي ممكن نعمله هو التعبير عن مشاعرنا
ضحكة وقت فرحنا دمعة وقت زعلنا كان سهل علينا نهرب من اي حدا مش عنا رغبة فيه.. لدرجة انه اهلنا يفرضو ها الشخص علينا فرض من باب المجاملة .. كنا اطفال لانجيد اي فن من فنون الكذب والمجاملة والمشاعر المكبوتة والمخفية.. كبرنا وياريت ما كبرنا والله يكبرنا.. صرنا لازم نسلم على فلان من باب العيب ونضحك بوجه فلان من باب الأخلاق ونزور فلان ببيته من باب الواجب ونقدم هدية لفلان من باب الاحترام لازم سلم على جارتنا وسلم على بنت جارتنا واخت جارتنا وبنت اخت جارتنا وتضحك بوجه مديرك وسلم واحكي مع كل اصدقائي هو اكيد في اشخاص بيستحقو مننا كل ها الشي بس في اشخاص انت بقلبك ما بتحبهم مابتستسيغهم.. خلينا نقول انه افكارك مش مطابقة مع افكارهم ومستحيل تتفقو على نقطة ما.. ومضطر مجبرا انك تعطيهم اقسى ماعندك من اهتمام ورعاية تبادر ها الشي لذهني لما كنت اليوم مع احد الاشخاص يلي كنت مضطرة اضحك وجامل واخترع الاحاديث والعبارات المنمقة والمجاملات السخيفة وحسيت بحرقة بقلبي انو....لأي درجة نحنا مضطرين على ها الاشيا هي؟؟ هل هي من باب بدنا نعيش..بدنا نساير..بدنا نجامل لأي درجة لازم نحتفظ بشعرة معاوية؟ |
اي والله معك الف حق المجاملة بهالحالة نوع من النفاق
بصراحة انا لما انفر من شخص اتفاداه على قد ما اقدر ةاذا اضطريت اكلمو اكيد رح يكون كلامي بارد وواضح جدا برودي خصوصي ادا الشخص بيعرفني وطبعا ما رح طول واهرب من هالوضع بس لو متلا هاد الانسان كان عندي بالبيت طبعا مستحيل لازم تجامليه وتخليه يحس بالراحة كمان عيب وتتحملي اخطاؤو بالكلام هو بالاول صعب كتيير بس بعد ربع ساعة تتعودي على الوضعية وتصيري تحكي عادي يعني عجيب كانو تكدبي كدبة وتصدقيها |
أنا بشوف إنو بالعموم نحن لازم نتعامل مع الجميع باحترام وباخلاق عالية والابتسامة على وجهنا, وهاد منبعو احترامنا لنفسنا ومن بعدو للأخرين من بني جنسنا, وهالشي بيضمن إنو الاحترام المتبادل بيظل موجود بالمجتمع وبالتالي بيظل في ترابط اجتماعي..... طيب هلا لما بيكون بدنا انخص حدا بمعاملة خاصة, فلأنا بنحنبو أو لأنو مابنهضمو, وهاد شي خاص, ولهون مافي مجاملة, طيب, الحالة اللي عم تنذكر هون هي حالة إنو الشخص مضرين على معاملتو بخصوصية رغم إنو مابنهضمو, أوكي الموضوع متل إنو عم ننافق, ومع حق, هاد شي بيزعج, مشان هيك أنا برأيي, لتخرجي من هالمشكلة, حاولي إنو ماتفرضي ع حالك هالشي, بأن تطرحي مواضيع مملة لهالشخص, أو آراء حادة .... يعني خلي الرفض يجي من جنبو لترتاحي
|
انا بشوف انو كل واحد يتعامل بما تحتمه عليه تربيته واخلاقه....
وكما قال الشافعي: يخاطبني السفيه بكل قبح***فاكره ان اكون له مجيبا يزيد سفاهة فازيد حلما *** كعود زاده الاحراق طيبا انا هاد شعاري في التعامل مع الناس... |
اللي بقلبي ع راس لساني ...
|
بصراحه موضوع كتيير مهم!!!
المجامله : صارت شغله كتيير مهمه بحياة الناس (وأنا واحد منهم) خاصه للناس الي ألك عندهم شغله !!! بحس أنه بالمجامله بتوخد الأشي الي بدك أياه من الشخص الي أدامك!! ولما بتجامل هاد الشخص بتحس أنه بيكبر راسه وبيصير يحترمك!!! بالنهايه : المجامله من أساسيات الحياه لأنه ازا بدك تحكي كل الي بقلبك رح تخسر ناس كتير ممكن تحتاجهم بعدين!! شكرا كتير وايت روز |
انت تعرف قيمة نفسك
فابتعد عن من يجعلك اعلى من تلك القيمة لانه اكيد عم يجاملك و لغايةمعينة بداخله لذلك بهذا الزمان الرهيب اللي ما بجامل يتهمه مجتمعنا الراقي بالدروشة و انو مو قادر يدبر راسو |
المجاملة في مجال العمل فن يجب اتقانه وطبعا الى حدود معينة ومتى تخطى تلك الحدود اصبح امرا يدعو للاشمئزاز...
وأما المجاملة في غير محلّها(مجالات اخرى) فهي نوع من الكذب والتمثيل الممل ووجع راس عالفاضي لست مضطرا لاتباعه... |
اقتباس:
|
| الساعة بإيدك هلق يا سيدي 19:20 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون