|
العيد ...... الفرحة المنسية
العيد ... الفرحة المنسية ليش العيد ما عاد الو نفس الطعمة يلي كانت قبل من شي 10 سنين او يمكن اكتر يعني من كلشي من التحضيرات للعيد ... للزيارات ... لك حتى حلو العيد ما عاد الو طعمة كلشي صار معلب المعايدات SMS و اذا فلان ما بعتلي مسج مالح ابعتلو هدول 10وحدات ( مو حيثما ) من زمان بتذكر الفرحة انو التياب الجديدة تبع العيد مع انو كنا نشتري تياب بغير فترة العيد بس انو هدول تياب العيد هلق منشتري تياب العيد تاني يوم ينشرطو معليش كنا نعقد نخطط شلون و كيف بدنا نصرف العيدية من مرجيح و فتيش و فول نابت و فرود الخردء و الكاونتر و غيرو و كيف بدنا نرجع على البيت قبل الستة مشان نبلش زيارات العيد و جولة اخرى بلم العيادي و نكون راجعين و الفرحة بيعونا و لما بجحش العيد يفكوا المرجيح نحسون عما يفكوا قلبنا او شي قطعة من جسمنا بينما هلق بتطلع بعيون الولاد ما بتلاقي هالفرحة كانو مشريع العيلة تتلخص بين زيارات الأهل الاقاراب و البعاد و الطلعة على الضيعة و السهر المسا مع شي مسرحية( العيال كبرت او مدرسة المشاغبين ) و هلق المشروع الوحيد لوين بدكون تطلعوا على طرطوس و لا اللادئية لك حلو العيد كان الو طعمة غير لما كنت انزل على الميدان مع ابي نحس انو هالحلو شي غريب شي مقدس بينما هلق ما عاد الو طعمة مريض السكر اذا اكلو ما بيرتفع مع السكر هون السؤال نحن يلي تغيرنا و لا العيد تغير و ما عاد يناسب هالزمان ؟ :D |
فقدنا لذة الأشياء بـِ استهلاكِ الإنسان ِ فينا لم نعد نشعر بـِ السَعادة في اللحظات التي يُفترض أن تكونَ سَعيدة ,. |
نحنا اللي تغيرنا , لما كنت صغيره كانو اهلي يقولو نفس الشي و هلئ نحنا عم نقول هيك و بكرا الصغار هلئ بيقولو هالحكي لولادهم ..
نحنا اللي عم نتغيّر و اللي كان يفرحنا مبارح ما عاد يفرحنا بذات القدر اليوم , و اليوم مش عم نلاقي اللي بفرحنا و يييييييييي شغله عويصه و لكن أنا و الحق يقال ما حاسـّه انو ناقصني فرحه بالعيد .. |
ما بقدر افهم تماماً شو بتقصد أبو وليم
بصراحة أنا فرحة العيد لهلا ما تغيرت فيني ولهلا بنطرو متل الصغار :p الفرح نحن يلي نحن نصنعو العيد ما تغير ... العيد كان وما زال وسيبقى حلو ومناسبة مفرحة |
كل ما كبرنا لازم يتغير مفهوم العيد معنا
بس نحنا جيلنا التغا معو مفهوم العيد مثلا انا عمري 23 سنة بقول انو من عشر سنين كان العيد أحلى وامي ذات الشي بتحس انو من عشر سنين لهلاء تغير شي كبير\ماعاد في حميمية ولا شي من هالقيبل طبعا انا كلو برجعوا للوضع العام بهالبلد اللي كل مالو لورا الله وكيلكون الناس صارت بتخاف كل ما قرب موعد العياد وبتحط يدها ع قلبها الله يعنا هالشعب المسكين |
مع انو فرحة العيد شئ نسبي وكل واحد بيحس فيها بمكان وبزمان وبطريقة.
لكن اجمالاً تغيرت فرحة العيد لأنو الفرح صناعة مستحيل اختصارها بأيام محددة. الفرح اعقد من هيك . باختصار الحياة الي عم نعيشها قاسية وبتفرض علينا ما نطلع من جوها او نستريح منو بالفرح الجماعي الي انا بعتبره خداع للذات. الفرح كان زمان ع بساطة الحياة وبساطة الناس . ولأنو الأطفال هم الوحيدين الي الهون عالمهون البرئ والبعيد عن العالم القاسي فهني دايماً الي بيحسو بجمال وفرحة العيد بكل الأزمان تقريباً. هي وجهة نظري انا . |
بأي حالٍ عدتَ يا عيدُ
يا عيد في مهجة البركان مشتعل فلا تلم أدمعي يا عيد لا تلم :cry: بيت الشعر هاد بيلخص حالة العيد الكلام الي حكيتو صحيح تماما وخصوصا بالنسبة للمراجيح يمكن العيد بالنسبة الي صار ذكرى حاضرة يعني بعيشها هلا بس بتذكر فيها الأعياد الماضية الزمن تغير ونحنا تغيرنا وصرنا نستكتر الفرح على حالنا مع ذلك كل عام وانت بخير بتضل غير شكل ;) |
كل ما بتسالني كيفك,بتذكر انه ماني منيح, وكل ما بيجي العيد,بتذكر انه ماني مبس.....؟!:shock:
|
مساله فرحة العيد هية مساله نسببية جدا انا بحس انو فرحة العيد للولاد بس لانه كلشي فيه على مستوى احلامهم من تياب جديدة لألعاب لمراجيح وملاهي لمصاري لكل شي ممكن يفرح طفل لكن نحنا كشباب وحتى اهليناشو مستوى فرحة العيد عنا ؟؟ واجبات ممكن نأديها بمحبة وبصدر رحب وواجبات ممكن نأديها لأنو هيك لازم نحنا هون بالمنتدى اغلبنا جيل التمانينات يعني انا هلىء 27 سنة من 10 سنين فقدت فرحة العيد وبالعكس عندي العيد فرحة بدمعة آدان العيد متل موسيقا بتدخل لقلبي وبتخليه ينزف بفرحات الايام الماضية لما كنا صغار اخواتي يلي ماعاد شفتون ولاد عمي خالتي عمتي خالي كل واحد بديرة وكل واحد ملطوع ببلد :cry::cry: اكتر انسان ممكن اتذكره بالعيد وحنله واشتاق لفرحة العيد معه هو والدي لانه هو سبب فرحتي بالعيد بتخيل كلام شوش اقرب للصحيح نحنا تغيرنا والعيد ماتغير كل سنة عم يجي ب 10 ذي الحجة نحنا يلي تغيرنا وكل عام وأنتو بخير فتئت جروح يا ابو وليم |
صار فينا مثل قصة شادي.. صرنا احنا نكبر و شادي بعدو صغير..
كبرنا احنا و العيد ما كبر معنا.. ضل طفل صغير بنتذكرو.. و نتذكر قديش كنا بنفرح، و نشتاقلو و نضال نعد الأيام لييجي.. ما عاد فينا نحس بهجة العيد إلا في فرحة الأولاد لصغار.. بس بيضال العيد دايما "ذريعة للفرح".. كل سنة و أنتو بألف خير:D |
الله يرحم السعادة ! :cry:
ازا انتبهت لتوقيعي .. يعني لكلمة "جبران": "المحبة لا تعرف عمقها إلا ساعة الفراق " بتنتبه انو لما ما يعود في عيد بالدنيا .. فاكيد رح نرجع نتزكر هالعيد ولما يرجع ... رح نفرح فيه متل وقت كنا صغار .. بس التكرار والتكنولوجيا هني يلي بينسونا العيد ! :cry: ابو وليام :D |
المشكلة المظاهر الزائدة كرّهتني بالعيد...والمجاملات بلا طعمة..نسينا معناه الحقيقي وصفّا للصغار بس لأنن ما بيعرفوا يكذبواا
|
هلأ هلأ ..
رجاع صغير .. بتفرح بالعيد .. العيد يا حبيبي .. وقت ما بتعرف انو بالعيد في مجاملات .. وقت ما بتعرف انو ابوك بدو يرجع المصاري للعالم.. ببساطة .. كل ما عرفنا معنى الاشيا .. كل ما بتصير بشعة .. |
اقتباس:
بس مو كل الاشيا بس تعرف معناها بتصير بشعة..غلط مية بالمية واسمحلي في اشيا بس تزيد معرفتك فيها بتتعلق فيها أكتر واذا كنت بتحبها بتصير بتحبها أكتر |
اقتباس:
هي الجمله بالذات الها معنى كبير كبير كبير وخصوصا عندي |
رغم برود أناملنا في مصافحته فإن للحياة على لسان العيد وجهٌ آخر |
يا جماعة افرحو اكزبو على حالكم وافرحو اطلعو ع اطفال غزه وافرحو
انا اقسمت على نفس ان احزن فرحا |
كل عمر االو حلاوتو
هلا أكيد العيد بالنسبة الي مش هو نفس العيد لما كان عمري 10 سنين بس هالشي ما بيعني أني ما بفرح بالعيد أنا بشوفو فرصة لالتقي بناس من زمان ما حاكيتهم ويمكن العيد هو الفرصة الوحيدة لالتقي فيهم فرصة لاشتري هدايا لولاد العيلة ولما بتكون أنت سبب بفرح طفل هالشي رائع فرصة لتجتمع العيلة كلها على طاولة وحدة فرصة لصالح حدا متخانقة معو فرصة لاشتري تياب جديدة ... هو دايما منشتري بس لبس العيد غير :oops: فرصة لناكل أكلات طيبة :p يعني في اشيا كتير صغيرة إذا منراعيها ومننتبه عليها منحس بحلاوة العيد العيد الو طقوس حلوة كتير بجد جد تضايقت مشانكم .... عيشوا الفرح لا تلتفتو لورا لأن ما رح نحس بفرح العيد متل لما كنا ولاد لأننا بكل بساطة كبرنا ... فعيشو الفرح بطريقة مختلفة وكل عام و أعيادكم كلها فرح :D |
| الساعة بإيدك هلق يا سيدي 18:13 (بحسب عمك غرينتش الكبير +3) |
Powered by vBulletin® Copyright ©2000 - 2024, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون