|
بدعوة شبابية بحتة اعتصام شبابي في طرطوس
استجابة للمأساة الإنسانية التي يتعرض لها غزة ولنفي الشبهات التي تتحدث عن ابتعاد الشباب عن الوسط المهتم والمتابع قام مجموعة من الشباب بتنظيم اعتصام في ساحة الجندي المجهول في طرطوس كوقفة انسانية ضد المأسي التي يتعرض لها بشر من دم ولحم في قطاع غزة ..
بدأ الإعتصام في الساعة السادسة من مساء يوم السبت الواقع في الثامن من اذار واستمر لمدة ساعتين ونصف من وقته رافق الإعتصام رفع العلمين السوري والفلسطيني ورافقه ايضا موسيقى ثورية انطلقت وفق تنظيم رهيب في دقته .. اللافت للنظر في الإعتصام انه وبرغم التنظيم السريع إلا انه جاء وفق تنظيم دقيق للغاية ليبرهن قدرة الشباب على الفعالية فقد منع اي شعار او هتاف حزبي او فئوي وايضا منع رفع اي علم سوى العلم السوري والفلسطيني تأكيدا على ان الإعتصام جاء لأسباب انسانية فوق حزبية وقد ضم الإعتصام شخصيات من كافة الأطياف وكافة الألوان ولكنها شاركت بصفتها الشخصية دون محاولة لإظهار الإنتماء الفردي وكان مما نراه كمنظمين من ميزات الحدث ما ميز الإعتصام انه كان مخاطرة من الشباب الذي استجاب لنداء الإنسانية رغم ان موافقة امنية على اجراء الإعتصام لم تصدر من السلطات المختصة انتهى الإعتصام في الساعة الثامنة والنصف بالنشيد العربي السوري ونشيد موطني .... تحياتي الحارة ظل جيفارا - احد الشباب المنظم للإعتصام .. وإليكم بعض الصور الملتقطة ...ونأسف لأن التاريخ الوارد في الصور ليس التاريخ الحقيقي للإعتصام             |
الفكرة حلوة ...... و الله يعطيكون العافية ..
بس أنو كم شخص كان بهالاعتصام ..؟؟ لأنو مبينين قلال .....و كأنو كنتو سهرانين بمقهى سبيرو ....و بعدين طلعتو أنتو الشلة ...... عملتوا هالاعتصام .. |
عالهامش
ليش ما بتزبطوا قياس الصور على قياس الصفحة قبل ما تحطوهون ..؟ :jakoush: |
هلق اول شي الفكرة حلوة خيو
تاني شي عندي سؤالين: الاول متل ما قال ابو سمرة انو ليش العدد مبين قليل كتير هيك؟؟ :? و التاني انو ما فهمت قصدك وقت قلت انو الصور غير متوافقة مع تاريخ الاعتصام الحقيقي :? كيف يعني؟؟ هدول الصور من شي اعتصام تاني؟؟ولا شو القصة؟؟ |
اقتباس:
الشباب كانو عم يصورو بكاميرا والكاميرا فيها مو زابط التاريخ تبعها عرفت شلون؟ منرجع للموضوع: كفكرة,, رائعة كتنفيذ,, للأسف ضعيف شوي بدك تسألني ليش لا تزعل منّي بس التنظيم الرائع,, صح,, بس منين نبع هالتنظيم من العدد القليل والامكانيات المحدودة ما عم قلل ابدا من هالاعتصام وخصوصا متل ما قلت لانو اجا بدعوة شبابية ,, بس للأسف العدد ,, بيأكد على ضعف الفكرة,, او الخوف من الفكرة,, ويعطيكن العافية يا رب وانشالله يا رب السنة الجاية بتكونو شي مليون واحد وبتعملو اعتصام ما في متلو :D |
قبل كلشي يسملن جيفارا وشكر كبير لكل الشباب الي كانوا معك بس علي قلتهن بين قديش نحنا كشباب سوري عنا ايمان بقضايا الانسان ولسا الهجمة الرجعية والفوضوية ماقدرت تفضي روح الشباب عنا من القيم ومشاعر المحبة لاي انسان مستضعف علي هالارض
بحيكن من كل قلبي وكنت بتمنا اني لو كنت بالشام لكنت بالتاكيد طلعت بهالصور معكن ووحدنا صوتنا لضمير هالشباب الي يمكن نسي يحس بالاخر اقتباس:
القصة مو بالعدد القصة وقفة عز وتضامن وقفها هالشباب مع اخوانهم بعيدا عن كل الشعارات والاعلام الحزبية اقتباس:
بذكر ايام المدرسة كانوا بيطلعونا باعتصامات لشغلات وحياتك يابو سمرة نص الي كان طالع فيها مابيعرف شو القصة يعني وقبل ماتنتهي المسيرة 90% من الشباب بتكون صارت ببيتها القصة مو بالعدد القصة وقفة عز وتضامن وقفها هالشباب مع اخوانهم بعيدا عن كل الشعارات والاعلام الحزبية |
اممي
قرا الرد تبعي بتعرف ليش هيك الشباب عم يحكو عالهامش: ليش نسخت الرد مرتين:shock: |
اقتباس:
بس أنو ... شغلة اعتصام كان بدا تنظيم أكتر من هيك ....و بدا حشد أكتر من هيك عالأقل كان زبّط تاريخ الكاميرا:larg: |
اقتباس:
بتعرف ... صار عندي ايمان ان اي حشد بيتجاوز ال100 شخص عنا بيكون ماهدف قضية الاعتصام بيكون هدف اما اعلامي او فتل عضلات حزب معين يمكن مافي حزب مستعد يطلع يعمل مسيرة بدون مابيحمل علم يعني اذا استثنينا فصيل صغير من الشيوعين ما بذكر حضرت مسيرة بينظمها حزب بلا علم هالحزب وفي احزاب بتطلع اعلام حزبها اكثر من علم سوريا او حتي شعارات قضايا الاعتصام |
أهم شي مشاركة McDonald's من خلال الحضور الرمزي !!!
|
مع احترامي لوجهة نظرك اممي
خيو ,, هلأ هدا الاعتصام اديش في عالم مآمنين فيه آلاف مؤلفة بس هدول اللي طلعو والله يعطيهن العافية بس ما قلت وبرجع بقول في شغلة اسمها الخوف أما شغلة الاعلام نحنا ما عم نقول ما يشيلو اعلامهن بس يا اخي يشيلو اعلام البلد اللي عم يدافع عنها هالفصيل تبعون:D |
اقتباس:
عفكرة انا انتبهت وانغظت من ...بس يعطيهن العافية |
اقتباس:
هههههههههههههههههههههه هلأ بعرف انك عم تتمسخر بس انو ابو شريك ازا كان لابس McDonald's او لابس طاقية رفيقو في النضال الحزبي che المهم الزلمي عندو مبادء والله يخليلو هالمبادء اللي خلتو تطلع بهيك شغلة كان ممكن انو ينضب فيها |
فكرة رائعة وخضوصاً إستقلالية الإعتصام
بالطبع العدد مو مهم المهم أنو توصل الفكرة،يعني حتى ولو كانوا عشرة ونزلوا على الشارع بشكل مستقل لهدف واضح هو الإعتداء الإرهابي الأسرائيلي على غزة فهادا كتير شي حلو مسيرات المنظمة من قبل النظام شفناها هي مسيرات حق يراد بها باطل،يعني المسيرة تحت إسم غزة وبتلاقي ألاف صور لبشار تعطى للمعتصمين وشعارات تافهة مثل بالروح بالدم وما إلى هنالك يعطيكن العافية يا رفاق |
اقتباس:
القصة قصة شباب تحمس و تعاطف مع قضية و لو زادو نشاطون شوي بالتنظيم أكيد كانوا صاروا أكتر من 100 أو لو عملوه بغير وقت المباراة ......... كان كسبوني شخصياً معون  |
اقتباس:
|
اقتباس:
يعني يلعن السطل... لك خيي مافيك تتضامن او تكتب شي شغلة بعيدا عن مشكلتك الشخصية مع النظام لك لو بتلاحظ وبعيدا عن الشعارات فهالشخص الي عم تشتم فيه هوه اخر زعيم عربي عم يدافع عن هالقضية ويمكن هالموقف القومي الي متخذ عم يحط بوضع صعب وعزلة من قبل كل الدول العربية الي ارتضى زعماءها مبدا العمالة والتصفيق للاميركي ياريت تكون شي مرة منصف بكتاباتك اممي اسف اني طلعت برة الموضوع بهالمشاركة:D |
اي الله يعطيك العافية ظل جيفارا
بتمنى كون لو قدرت احضر معكون لكن ظروفي ما سمحتلي واكتفيت بالمعاضدة على الهاتف:p يعطيكون العافية بس بعرف انو الترخيص اجا من الحزب الشيوعي والمشاركات اجت من كتير جمعيات اهلية فيك تخبرنا شوية عن هالجمعيات ابو حميد;) |
اقتباس:
منرجع للموضوع يلي أنا ما خرجت عنو الموضوع كان واضح أنو المعتصمين كانوا مستقلين،والأعلام كانت فقط أعلام سورية وفلسطينية وكذلك الشعارات يعني ما صار رفع صور بشار أو حتى إطلاق الهتافات الغريزية بالروح بالدم وهادا شي جيد أما عن مدافهة بشار عن القضية فهادا شي مش صحيح يلي بدافع ما بيدافع بالحكي الفاضي ليجير مأسي الشعوب لحسابوا،مابدي كرر الحكي فينا نحنا نقاوم المحتل للجولان متل ما أهل غزة عم يعملوا!!!؟ يعني النظام السوري عم يلعب دور حكومة عباس بالضبط وحامي للحدود الإسرائلية لهيك أنا ما فيني أنزل بمظاهرة هي عنوانها حق التضامن مع الفلسطينين مثلاً،ويصير مضمونها بعدين التمجيد لشخص بعتبروا أنا غاصب للسلطة يعني خلص حاج على النظام أنو يختبئ وراء هيك شعارات وهي دعم المقاومة والقضية الفلسطينية حرام يزاود عليها ما بدي أطلع عن الموضوع برد بعيد ألله يعطي الشباب العافية،كان لازم يكون شي كمان ضد قانون الطوارئ يلي صادفت ذكراه بيوم تنفيذ هذا الإعتصام يعني لحتى كلنا نقول لا للأحتلال الأسرائيلي ولا للإستبداد أيضاً |
اقتباس:
انو من الحزب الشيوعي وبس هالشباب هي؟ بيجوز |
اقتباس:
انا بعرف انو محمد هو وكم شب هني يلي نظمو التجمع ودعو الو كتير ناس وفي كتير جمعيات استجابت مشكورة وانا للاسف مااستجبت غير مشكورة لاانا ولا ابو سمرا:cry::p |
شباب تحياتي الحارة ....
في نقطتين كتير حلوين بدي ركز عليهن .... اول شي الموضوع هيدا ما فينا نفصله عن موضوع القطيع رغم انه موضوع القطيع سبق الإعتصام زمنيا ... اول شي تفاجئت فيه كتير هو قصة الخوف عند الناس .......اي واحد خبرته انو ما في موافقة امنية على الإعتصام قطع قلبه تاني شي الصورة تبعت الشب اللي لابس طاقية عليها شعار الماك دونالد مقصودة كانت مقصودة مية بالمية ..." كان في اطياف مختلفة من اقصى اليمين إلى اقصى اليسار " تالت شي ما كان في جمعيات مشاركة بصفتها الشخصية ...كل الأشخاص اجو مستقلين ...وهيدا كان شرط .. طبعا ما كان في موافقة امنية لحتى تكون من حزب شيوعي او من غيره .. تحياتي الحارة ظل جيفارا |
صحيح شباب الظاهر موضوع العدد ما كان واضح كان مشارك حوالي 38 وبالنسبة إلي وبهيك ظروف العدد ممتاز ...
تحياتي الحارة ظل جيفارا |
اي صح
انت قلتللي انو رح تجي الموافقة على الاعتصام وبعدين ما اجت وانا ما دريت بالموضوع على كل حسب ما خبرتني كان الاعتصام كتير حلو وبرافو شباب الله يعطيكون العافية بالنهاية هيدا يلي حاطط ماكدونالد مواطن وبيحقلو يعبر هلا سؤال عمتي حكيو معك الشباب الطيبة ولا لسا;) |
الله يعطيهون العافية الشباب كل واحد يعمل اللي بيقدر عليه طبعا... و الحلو انو بس كانت اعلام... وشموع, حلو كتير.
---------------- ع هامش الهامش: قصة الطاقية عادية جدا و ما الها أهمية.. بس كان عندي تساؤل على هامش هامش الهامش: لو الاعتصام اعتصام معارضة أو أكراد و طلع واحد لابس طاقية ماكدونالدز كان كم نظرية مؤامرة طلعت في منتدانا الحبيب؟ |
اقتباس:
بس لو حضرت انا كنت خرقتون وطلعت موالاة بس للاسف;) على كل فعلا قصة الطاقية قصة عادية جدا وبذكر انو جيفارا علق كمان على يلي لابس مارينز وقلتلو الموضوع جدا عادي ومش مستاهل تنعطى ملاحظات عليه |
اقتباس:
قصدي من الحكي انو لو اعتصام بمطالب معارضة.. على كل كان مجرد تساؤل دون اهمية تعقيبا على قصة الطاقية اللي هي قصة دون أهمية أبدا.. |
موفقين شباب
أول شي مرحبا جميعاً تاني شي سلامي لأبو حميد وأنا بحييك ع هيك خطوة ما بعرف إزا فينا نسميها جريئة بس يلي بقدر احكي انو خطوة قوية بمرحلة كثرت فيها الشعارات القومية المجوفة ومن يعلى صوته أكثر بهذه الشعارات هو الشخص الوطني هذه حالنا كعرب ..... ع كل حال أنا بدي أعلق ع قصة انو العدد قليل اسمحولي أحكي انو يلي تفكيروا لهلق هيك انو كل شي قدامو مستحيل لأنو مافي دولة بالدنيا كلها فكرت بهاد المنطق واتقدمت أو قدرت تحقق شي وأكبر دليل هي بريطانيا يلي كانت بفترة من الفترات صاحبة أقوى أسطول بحري قدرت تتغلب ع اسطولين الفرنسي والإسباني بمنتهى السهولة مع العلم كان عدد سفن الأسطلول أقل من عدد الأسطولين الفرنسي والإسباني بس ع كل حال أنا مو مستغرب كتير ، بس يلي اتعجبت منو أكثر أنو الشخص نفسو يلي حكا عن العدد هو نفسو يلي حكا عن شغلة خوف الناس من هيك اعتصامات وهو يلي خلاني أسئل حالي سؤال أنو ما دام هو هاكل هم العدد كتير فا كيف قدر يحكي انو في عند شعبنا خوف من هيك اعتصامات مع زالك لقيت العزر لهلشخص أنو شعبنا العربي مليان تناقضات مو مشكلة ما علينا . وبس حابب جاوب ع شخص فوق قرأت تعليقو حول سياسة الرئيس بشار أنو عم بشبها بسياسة أبو مازن ما بعرف هل هاد هو نفص وعي سياسي عند شبابنا العربي أو شي تاني لهلق ما عرفتو أنو كيف بتشبه سياسة رئيس برأي خليفة عبد الناصر لشخص بهائي ولا يصلح أن يكون رئيس دولة شجعان كفلسطين ع كل حال بنصح يلي كتب هالحكي يقرأ عن أبو مازن شوي ويعرف شو أصلو ويعرف ع شو بتقوم سياستو . و أسف للإطالة ع كل حال موفق أبو حميد ونحنا بيلزمنا هيك إعتصامات لنبين للكل أنو في شباب عربي واعي ولو بنسبة خفيفة شوي بس في . سلامي للجميع .
|
اقتباس:
بس برأيي خلينا نركز على صلب الموضوع " بتعرف شخصيات اخوية " اقتباس:
تحياتي الحارة ظل جيفارا |
ظل جيفارا كتب :
اقتباس:
شو هي اللي مقصودة مية بالمية ؟؟؟ يعني مين اللي قاصد ؟؟ ..و شو قاصد ؟؟ بعدين وين الأطياف المختلفة ؟؟؟ ....بلا المختلفة ..وين الأطياف بالموضوع ؟؟؟ ...اربع خمس شباب صارو اطياف مختلفة ...و من أقصى اليمين ...لأقصى اليسار !!! ..و الله العظيم يعني منيح ما قلتلي من المحيط للخليج كمان ...الله ستر !!! |
حركة كتير حلوة .. الله يعطيهون العافية شباب .. و من وجهة نظري لو كانو تنين طالعين بإعتصام (( بدون موافقة أمنية )) هدول منرفعلون الطاقية .. الشباب طالعين ليوصلو فكرة .. ووصلوها بشكل رائع .. و العدد أبداً مو مهم .. لأننا كلنا شفنا مسيرة الشام .. الي طلع فيها الآلاف .. 80% منهون طالعين يطبقو بنات و ماعارفين الله وين حاططتهون .. و مين بيرفع صوتو أكتر بيربح مصاصة .. و ضحك على عقول هلـ البشر .. |
تحياتي ظل جيفارا ..
وكل الاحترام الك على تنظيم هالاعتصام .. |
اقتباس:
طيب:pos: |
الله يقويكن شباب
الله محيي الشبيبة |
اقتباس:
تاني شي .... واضحة الصورة كتير مشان هيدول الناس اللي حكوا انو الإعتصام كان شيوعي الجو ... تحياتي إلك .:D اقتباس:
تحياتي الحارة اقتباس:
اقتباس:
:p :lol::lol::lol: اقتباس:
تحياتي الحارة ظل جيفارا |
اقتباس:
ما بعرف عنك شي ك شخص ..يعني ما بعرف شو عمرك ..او شو دراستك ......بس اللي بعرفو انك عم تشلف !!!...عم تشلف حكي يعني . حضرتك عم تقول انك كنت من بين المنظمين لل ( اعتصام ) او ع الاقل كنت من المشاركين ...او حتى يمكن كنت من المصورين ..ما بعرف + ما كتير بهمني اعرف . المهم هو وقت بيجي شخص عم يقول انو نظم او شارك ...او حتى صوًر ( اعتصام )بيوصف هال ( اعتصام ) بانو كان بضم اطيااااااااف مختلفة ...و من اقصى اليمين لاقصى اليسار ...و بيستشهد بلوغو للمكادونالدز للدلالة .....بكون من واجبي نوه انو هاد الحكي تخريف.... او باحسن الاحوال تخويت! منواجبي نهو .مشان اذا في شخص عم يقرا وما كتير اخد بالو ينتبه ..و من واجبي نوه مشان اذا في شخص عم يقرا و ما بيعرف شي من اساس المضوع ما يكون فكرة بناءً على تخريفات . وشكراً الك |
اقتباس:
كنت بدي قلها انو بس انا شبيبة هون وماشاركت بالاعتصام هههه |
اقتباس:
يعني في فرق بين الرأي وبين المعلومة (الراي لا يعامل معاملة الحقائق ) لكن المعلومة يمكن ان تعامل معاملة الحقائق . وهذا لايمنع انو اقوم بتحية الشباب ومنهم ظل جيفارا على تنظيم الاعتصام والخروج للاعتصام . |
اقتباس:
صديقي يمكن شفت شو مكتوب وشو نزل بجريدة قاسيون عن الإعتصام انو الإعتصام كان بتنظيم شيوعي وكانوا المشاركين شيوعيين بالضرورة انا حبيت نزل الصورة هيدي تحديدا لحتى قول انو هيدا الشب اللي لابس ماك دونالد مستحيل يكون شيوعي .... بس هيك وضحت الفكرة صديقي ولا وضح اكتر ... يعني كلمة اطياف مختلفة كانت انصافا لأشخاص طلعوا معنا منهن الليبرالي والإسلامي تحياتي الحارة ظل جيفارا |
| الساعة بإيدك هلق يا سيدي 17:15 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
كيف يعني؟؟ هدول الصور من شي اعتصام تاني؟؟ولا شو القصة؟؟
