|
الداعية الاسلامي عمرو خالد أغنى "نجوم الدعاة" في العالم العربي
"فوربس العربية" :الداعية الاسلامي عمرو خالد أغنى "نجوم الدعاة" في العالم العربي  تحت عنوان "نجوم الدعاة"احتل الداعية الإسلامي المصري عمرو خالد المرتبة الأولى في قائمة أعلى دعاة الدين الإسلامي دخلاً للعام 2007 بـ2.5 مليون دولار والتي أصدرتها مجلة "فوربس العربية". وتعتبر هذه القائمة الأولى من نوعها في الوطن العربي، وقد اعتمدت "فوربس" في تصنيف الدعاة على العائد المادي من حقوق الملكية الفكرية التي حصل عليها الدعاة من شركات الإنتاج الفني التي اشترت تسجيلاتهم الصوتية ومؤلفاتهم، والأجر الذي يتقاضوه مقابل ظهورهم في برامج تلفزيونية. ونقلت الـ"bbc" عن مجلة "فوربس" قولها إن الدعاة ووسائل الإعلام والنشر والإنتاج الفني أصبحوا ينظرون إلى الدعوة على أنها مصدر للثروة لا تختلف عن غيرها من نشاطات الأعمال، واعتبرت في الوقت نفسه أن ذلك لن " يؤثر في أهمية هذا النشاط..كما لا ينتقص من أهمية الرسالة التي احتضنتها وتحتضنها الدعوة إلى الإسلام". وجاء في المرتبة الثانية بعد عمرو خالد الداعية الكويتي طارق سويدان بدخل وصل إلى مليون دولار، تبعه الداعية السعودي عائض القرني مؤلف كتاب "لا تحزن" بدخل وصل إلى 533 ألف دولار. أما المرتبة الرابعة فكانت من نصيب الداعية المصري عمر عبد الكافي المقيم في دولة الإمارات بدخل وصل إلى 373 ألف دولار، وجاء الداعية السعودي سلمان العودة بالمرتبة الخامسة بـ267 ألف دولار. وترى "فوربس" أن دخل الدعاة يعتمد أساساً على الإنتاج التلفزيوني والبرامج التي تبثها المحطات الفضائية، إلى جانب التسجيلات الصوتية والمؤلفات الدينية والأدبية، إلى جانب مشاركتهم في المحاضرات التدريبية والتثقيفية. وعرضت المجلة إلى جانب قائمة "نجوم الدعاة" إحصاءً لعدد المؤلفات الفكرية والتسجيلات الصوتية التي أصدرها الدعاة الذين احتلوا المراتب الخمسة الأولى على القائمة، ونشرت المجلة أيضاً أهم المحطات في حياتهم والمشاريع المستقبلية التي ينون القيام بها. والجدير ذكره أن المجلة استبعدت في تصنيف الدعاة المال الذي حصلوا عليه من استثمارات لا علاقة لها بالدعوة بما في ذلك الهبات والعطايا التي حصلوا عليها إما من جهات حكومية أو غير حكومية. والداعية عمرو خالد من مواليد عام 1967 واسمه الكامل عمرو محمد حلمي خالد، تخرج في جامعة القاهرة كلية التجارة عام 1988 وبدأ الدعوة من مصر ثم ذاع صيته في جميع أنحاء الدول العربية والإسلامية. سيريانيوز |
اي ما هنن دعاة لشو غير منشان يقبضو ويلهفو مصاري منن جيوب العالم على صف حكي ...:frown:
|
بشكرك على الموضوع
كنت مفكر الداعية ما بهمو المصاري لانو في هدف بدو يعملو بس طلعت الشغلة مو هيك |
رزق الهبل ع المجانين :pos: |
أذا الكلام من فضة السكوت من ذهب
تفو تفو عطائفية |
اقتباس:
|
ليش مين قال أنو الشغل ببلاش
يعني عيب شخص متل الوليد بن طلال يجيب داعية على محطة الرسالة ويعطيه مصاري مقبل برنامج بدو يقدمو وشغل بدو يعملو. بكل الأحوال مابيكون عطاه ربع يلي بتاتخدو شي فنانة تعري على غير محطة من محطاتو فبالنتيجة لازم تكون ثروتون أكتر لو بيتقدر علمون وأذا ما أشتغل الداعية من وين بدو يجيب مصاري وكيف بدو يعيش |
اقتباس:
بس شغل فنانات التعري ..بضل أفضل .. عالأقل ما عم يتاجروا بكلام الله اقتباس:
بقى ممكن تشرحلنا شو الجهد يللي عم يبذلو عمرو خالد مقابل هالـ 2.5 مليون دولار هاد اذا استثنينا البكي و النواح .... لأنو بيبذل فيهون طاقة فظيعة |
د. طارق السويدان دارس بأميركا و ترأس مجلس اداره شركه .. معو دكتورا بالبترول في موقع نازل الو عشر ملفات عن تاريخ الأندلس كل ملف شي 11 Mgbيعني شي ساعه و شوي .. قديه من الوقت قرأ لحتى قدر يحاضر .؟
عايض القرني دكتور بالشريعه و سعودي و بظن دخلهن عالي بالسعوديه .؟ بعدين وين الغلط بأخدهن مصاري .. بعدين اذا مهتم بالتاريخ بالفكر بالاطلاع او المطالعه حتى فأكيد رح تسمعلهن و تقرالهن .. مو بس لأنهن يحكو عن الاسلام كمان عن ترتيب الحياة و صناعه الحياه . و اذا ما في عندك اهتمام فحكيلك شي كلمه حلوه بذمه التاريخ . |
اقتباس:
وبأستثناء عمرو خالد المختلف عليه . ويلي بيبكي أحيانا بأخر الدعاء . وين شفت البقايا المذكوريين عمينوحوا |
اقتباس:
عموماً ..... فاقد الشيء ... لا يعطيه مو معقول رجل يكون معروف بجشعو ...... يقعد ينظّر عليي بمكارم الأخلاق |
اقتباس:
مين أنتو ...؟؟ أنا عم احكي عن رجل جشع ....عم يقبض تمن نصايحو ..... بالدولار .... ليكون بيقربك شي ..؟ اقتباس:
بزيادة عمرو خالد ليش مين غيرو عم يقبض 2.5 مليون تمن النواح |
اقتباس:
ما فهمتك مين الجشع .؟ قصدك الدعاة .؟ و الله ما بعرف شو بدي قللك بس اذا مو عاجبك لا تسمعلو و خلص . كمان شو هي فاقد الشيئ ليش هنّ " اذا كان قصدك الدعاة فاقدين شيئ بحياتهن او بشخصياتهن " |
اقتباس:
اقتباس:
يجي يحكيلي عن القناعة مثلاً |
اقتباس:
و الله حبيب فلبي سامر ما بعرف كتير عن تعاملهن مع الفضائيات منشان احكي بس بنصحك تسمع الدكتور طارق سويدان " كلامو أقرب للمنطقيه و العقلانيه و مو متزمت و بيعمل محاضرات للنساء " |
اقتباس:
يعني اذا في صبايا بالقعدة ....... ممكن يتشجع الواحد و يحضرلو شي حلقة عموماً ... و أنا بدي ادعيك لتقرا لداعية كتير كوووووول ... الو زاوية ثابتة بجريدة الاخبار بعنوان ( ما العمل ) :larg: |
هلأ ع حكاية انو الدعاة بياخدوا مصاري ع شغلون
بتتوقع في حدا هلأ بوقتنا صار مستعد يعطي شي و ما ياخد شيء مقابلو ؟؟ ما بعتقد,, و بعدين انت ما عليك اديش عم ياخدوا عليك انو بتستفيد من كلامون و بتاخد الشي المنيح يعني الواحد يحكي الحق في منون كلامون مقنع كتير و كتير منيح نحنا ما النا بشو هني بيعملوا لحتى يدعوا الناس النا انو نحنا بالاول و الاخير عم ندور ع شي نستفيد منو و يمكن هني يكونوا بيفيدونا |
حلال على ربو 2.5 مليون دولار
الشاطر الي فينا يطالع ربع ربعون بيكفي ماسرق ولا اختلس ولانصب ولافتح محل لدعاره ولاقال الشعب السوري بياكول من حاويات لزباله بعد ماعبا بنوك أوربا يعني أنا شخصياً لو بيصحلي اشتغل رقاصه بشي قناه ايباحيه ويعطوني ربع ربعون مابقصر نشالله صحتين على قلبو وتقبل التعازي عند ابو سمرا للسياحه والسفر   |
اقتباس:
|
طيب يعني وين المشكة والغلط بالامر ولا بس لانه داعيه وشيخ صار شويتين حكي ما عندو التزمات ما عندو مصاريف يا عمي بكفي رزقه بالحلال لكان لو كان جورج السكران الي بصرف على كل حفلة ما يقارب 150 الف دولار مصاريف خمرة ومخدرات الو ولشلتو ما بتؤلوا هيكي عنو
كافي انو بذل جهد كبير بنشر الرساله واسلمو على ايديه كتير ناس له الاجر الاكبر عند الله وللمعلومه عمرو خالد كافل ايتام يعني نسبة وقدره من دخلو بتروح لله وكافل اليتيم نيالو عند الله ............. |
اقتباس:
:? |
سؤال حيرني حبيت اسأله
هلىء أنا بقدر اعرف شوفي بجيبة كل واحد فيكم مصاري؟؟ شو عرفها ها المجلة بثرواتهم؟؟؟ داقت عينهم على المليونين ونص دولار ونسيت الغنى الفاحش لشخصيات عربية كبيرة من مالي ومالك يلي بيتعدى المليار دولار واكتر واكتر وانا معك كيف بقدر ساعدك !!:larg: |
بالنسبة الي, يعني ان كسب مليونين و نص و للا اشتغل ببلاش ما بتفرق معي بنوب... بس انو كلام سامر صحيح.. اللي يقبض كل هالمصاري ثمن الكلام عن الدين ما خرج يحاكيني عن القناعة و التقشّف و حب الآخرين و ما الى ذلك... كنت حابب اعرف انو عمرو خالد قديه يتبرع من مصارية هدول؟
بما يخصني ما بيفرقو عن مشاهير المبشرين اللي يعملو هالاستعراضات الضخمة بأميركا... هدول كمان بيربحو بلاوي, و نفس النهج و المنطق و بعدين يعني ما حدا قال شي, لا حدا عم يقول روحو اذبحوهون و لا حدا عم يقول سكرولهون القنوات, كل ما هنالك عم نحكي عن قناعة, و القناعة اذا رميتها على راس واحد ما بتفجّو... يعني ما بتأذي |
و تم حذف السبام الخارج عن الموضوع
|
اقتباس:
[quote=مسلم موحد;926331]طيب يعني وين المشكة والغلط بالامر ولا بس لانه داعيه وشيخ صار شويتين حكي ما عندو التزمات ما عندو مصاريف يا عمي بكفي رزقه بالحلال لكان لو كان جورج السكران الي بصرف على كل حفلة ما يقارب 150 الف دولار مصاريف خمرة ومخدرات الو ولشلتو ما بتؤلوا هيكي عنو.[/quote] حلو هالكلام ... يعني بالنهاية ما بيفرقوا كتير عن بعض و لا تنسى أنو كمان دخل جورج السكران .... حلال اقتباس:
السؤال هو ..... أيهما عندو أهم .... نشر الرسالة ...و لا الـ 2.5 مليون دولار يعني لو قالولوا ..و الله نحنا مو قادرين ندفعلك بقى بس لازم انت تضل معنا مشان تنشر الرسالة شو رح يكون موقفوا يا ترى ..؟؟ اقتباس:
و جورج وسوف كمان كافل أيتام ....و عم يدرس ناس ع حسابو بالجامعات كمان :larg: اقتباس:
و كمان .... لما بصيروا يتعاملوا بهالطريقة المادية البحتة لازم يتركوا هالهالة يللي عاملينها لحالون |
طيب الرجل مو موجود وانتم عم بتحاكموه.....
انا واثقة انو لو خير بين الدعوة والمصاري رح يختار الدعوة.... وشي طبيعي انو ياخد اجر والا كيف بدو يعيش وهو كل حياتو بسبيل الدعوة؟ |
اقتباس:
عم قول انو فاقد الشيء لا يعطيه... متل الشيوعي اللي بيشغّل مصاريه بالبورصة وجاي يحكيلي عن البروليتاريا... أي دخيل البروليتاريا أنا و تأكيد على كلام سامر.... يربح اللي بدو ياه, و يعمل اللي بدو ياه, بس هالة القدسية هاي بلاها.. الداعية يدعو لنشر رسالة حق و دون مقابل, أو على الأقل مقابل بسيط يضمن له الحياة الكريمة.... مو بيصير ديفيد بيكهام!!!! |
لك ماد ليش غيران :p
يعني اوكي معكو مليون بالمية حق انو الدين مش للمتاجرة بس يا سيدي هنن ما عم يتاجروا بالدين..داعية مشهور ومحبوب بالعالم لما بيروح على برنامج بدو يروح ببلاش يعني؟ ولا كيف بدو يعيش يعني فهموني؟؟!! يكرس حياتو للدعوة بدون مصاري يعني؟!!..صحيح العدد كتير كبير..بس هيك اعطوه يقللن لا :o (اي مين بيسترجي يعملا؟ :lol:) ونحنا لا حاطين عليهن (او عالاقل انا) هالة قدسية ولا شي:frown: وشكرا ع المعلومة :gem: مع اني بعرفها من قبل ...(سمايلي مادماكس) |
اقتباس:
|
اقتباس:
اقتباس:
|
اساليب جديدة بتحصيل المال أكتر زكائاً واكتر استغلالاً للناس.
قال شو أسئلة استفتاء على ارقام موبايل محددة وبيضل ربع ساعة عم بيعرفك بفضيلة العلامة قبل الفتوى والرد !!! يعني متل التصويت لستار اكاديمي بفرد شكل بس بطريقة دينية مشان جهلة الناس تتسابق متل العادة. مشان هيك قلت رزق الهبل ع المجانين مع انو هالشيوخ مو هبل بالعكس دواهي وممثلين. :D |
بس ققبل ما نفوت بالموضوع مباشرة ..
يعني في كمان رجال دين يهود ورجال دين مسيحين .. بوخذوا اضعاف اضعاف هالاجور المذكورة .. يعني حلال عليهم وحرام علينا !!! .. وما حدا يفهم من هالكلام اني ضد اي طائفة ثانية .. وغيروا .. يعني 2 ونص مليون كثير !! .. وهذا اعلى اجر .. يعني كمان ما في حدا بعيش بدون مقابل .. يعني الدكتور والمحامي ورجل الدين واحد .. اتعلموا واجتهدوا وتعبوا .. ليصلوا لمراكز عاليه .. " بس باجر معقول " وما في حدا بشتغل ببلاش .. فمبروك عليه .. وبستحق اكثر من هيك .. |
اقتباس:
اما بتجي لعمرو خالد يعني على كل جلسة عم يساويها بالتلفزيون عم ياخد هديك الحسبة !!!!;) |
اقتباس:
يامعلم الرقم مبالغ فيه قناة الجزيره الآخباريه بلغت ميزانيتها لعام 2006 "120" مليون دولار بلغت حصة التمويل الحكومي القطري منها %55 وعلى ذمة قناة الجزيره في احتفالها بمرور عشر سنوات على أنطلاقها مايهمنا الرقم 120 مليون دولار وكلنا يعلم حجم الكادر الهائل لهذه القناة والاعلاميين والمراسلين ومعدي البرامج الوثاقيه الخ... وأذا حسبنا ميزانية عمر خالد على ذمة المجله فا ميزانيتو لح تكون شي 30 مليون دولار في العام مايعادل مليار والنصف مليار ليره سوريه وشغله تانيه عمر خالد غير محبوب من التيار السلفي الوهابي وفي شبه أجماع على أنو عميل وكافر و.و. و. وخاصتاً برنامجو ( دعوة للتعايش) ويلي تكلم فيها عن قضايا تعتبر مساس بالنصوص المقدسه وبشكل خاص الحوار وحقوق الاقليات الدينيه وشعبيتو تراجعت بسبب هل الباب الي فتحو على حالو ذهابو الى الدينمارك بسبب الرسوم المسيئه للرسول (ص) في المره السابقه شو نتج عنو وشقالو عنو ؟ تلبيتو دعوات أمريكيه شو قالو عنو رغم أنو مابحب ظاهرة الشيخ المتلفز الفضائي بس الي بيتابع تحركاتو وكلامو وتصريحاتو بأمور معينه بيكتشف أنو الزلمه عم يحاول يغير بمجتمع :sick: وعقول ناشفه ومتحجره وفي كلام تاني عندو بدو يقولو بس مو قادر بسبب لوبي الديني :sly: برأيي الشخصي حطو الزلمه تحت المجهر وشوفو وعملو مقارنه مع غيرو بيجوز الخبر كلو على بغضو بروغو والله اعلم |
و الله مابعرف... فوربس من ناحية المصداقية (اذا تابعة لفوربس الاميركية) تقريبا لا غبار عليها. لاحظ انو الدخول محطوطة الدخول السنوية, يعني مو 2,5 مليون دولار شهريا انما سنويا
|
اقتباس:
أنا إذا فشلت بدراستي واتسكرت الدنيا بوشي شو رح أعمل يا حزركن؟؟!!! أكيد رح اتجه للشريعة وأعلن "توبتي عن الوقت الضائع الذي قضيته أيام الشباب بأخذ العلم الذي لا ينفع والركض وراء الشهوت" وهيك مع شوية حربقة بالحكي على كام دعاء مصحوبين بالدموع والآهات، بكون ملك زماني!!!!! ومرة تانية بأكد،حلال عالشاطر ;););) |
اقتباس:
بعدين الزلمي أول ما طلع كان ماشي حالو، لحتى بلش يفتي إنو حجاب المرأة فرض، والمرأة إيمانها ناقص بدون الحجاب، يعني باختصار ساوى المو محجبات متل العاهرات تقريبا!!!! بعدين بإدني سمعتو عمبحرم الحب!!!! آل إذا بتحب وحدة لا تجتمع معها لحالكن حتى لو بمكان عام متل الجامعة أو مطعم، وممنوع تلمسها حتى لو بدك تسلم عليها!!!!!!! يعني نسف الحب من أساسو!!!!! والأهم من كل هاد، إنو بحياتي ما اسمعت إنو عامل برنامج منح دراسية للطلاب العرب مشان يدرسوا بالخارج، مع إنو بيقدر يحصل هالشي من خلال علاقاتو مع الأمراء والأغنياء الخليجيين، وهالشي أهم للعرب والمسلمين من القنوات الفضائية يللي الفقير ما بيقدر يشوفها،وعلى الفكرة الإسلام إجا نصرة للفقراء والمستضعفين بالدرجة الأولى، يعني متل ما قال ياسيين إنو الرسول-عليه الصلاة والسلام- كان يسند بطنو بحجر-فداك روحي يا رسول الله- مع إنو انعرض عليه كل كنوز قريش والحكم، حتى عرضو عليه كل هالرزق الوفير وفينو يكمل دعوتو بس عالخفيف وبشكل سطحي وبدون لهفة ورغم هيك رفض!!!!!!!! فمشان هيك عمنقول إنو الزلمي عميستغل عاطفة العرب والمسلمين، وما بظن إنو بيشتغل لله 100% أو حتى متل ما عميتروجلو. |
هههههههههههههههههههه
مسلم مجدد بتاع كله |
بس يعني .. لو كان راتبوا 250 جنبية بالشهر ..
بصير 100% !!! يعني ما في عليه حكي ؟؟ |
أي ما بيدفع ضرايب...:x
الحكي ماعليه جمرك...:pos: |
| الساعة بإيدك هلق يا سيدي 19:11 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون
(اي مين بيسترجي يعملا؟ 
)
