|
اغتيال عماد مغنية في دمشق ... يا عيب الشوم علينا
سوريا اللي منضل نفتخر إنو الأمان فيها عاااالي المستوى ... اغتيل فيها المطلوب الأول في المقاومة اللبنانية عماد مغنية
الرجل كان مجهول الملامح و ما إلو إلا صور نادرة بالإعلام و قدرت اسرائيل تغتالو بقلب عاصمة سوريا و على بعد كيلومترات قليلة يمكن من أحد القصور الرئاسية !!!!؟؟؟؟ عيب علينا و الله يصير هيك شي عنا بس الظاهر الأمن مو فاضي لحماية عماد مغنية... الأمن مشغول بتعقب شوية شباب بأخوية عم يمارسو أحد أهم حقوق الإنسان .. حرية الرأي ... |
اقتباس:
.. درر:D |
صحيح انو مسؤول بهالاهمية هيك من دون حماية
وليش ما تفلسفوا مبارح بهالقصة ؟ والاغرب من هاد انو الانفجار بتنظيم كفرسوسة حدا بيعرف شو في هونيك؟ بس كمان في شغلة انا مستغربا انو حزب الله يترك هيك مسؤوول لحاله من دون حراسة ولا هم يحزنون |
هلأ الأغرب من هيك انو الانفجار صار مبارح وما حدا حكى ولا كلمة وبتوقع انو ما حدا كان بيعرف او هو المستشهد ...!!!
يعني ومسؤول كبير متل هادا الشخص معقول تتركو السلطات هيك بلا حماية !؟ بالفعل غريب ..... يعني هلأ هو بيكون بالشام وما حدا بيدرا انو موجود بالشام متل السيد حسن نصر الله لما اجا وقابل الرئيس نجاد بالزيارة الأخيرة وما حدا دري لبعد ما رجع على لبنان (هي اذا رجع) ..... بعدين اذا مو حدا ريان انو موجود بالشام يعني عالقليلة القليلة يكون في حماية من السلطات او المخابرات السورية لانو لازم تكون دريانة ....متل ما مخابرات اسرائيل عرفت بمطرحو (يلي بتوقع توقع كبير انو هي يلي مغتالتو لانو اذا كانوا ارهابيين يلي عملوا هالعمل ما بيساووه بسيارة مفخخة عن بعد ...بيساوو هالنفجار بشي انتحاري جاي عبالو يروح عالجنة _على اساس_)!!!! هلأ بكفرسوسة ما بتوقع انو في شي وزير حابب السكنة هونيك او شي مسؤول ساكن هونيك يعني منطقة عادية او بالعكس فقيرة فيك تقول !!!! غريب!!!! |
تحية الى روحك الشهيدة عماد مغنية
|
رحمة الله على عماد مغنية.............
حزب الله يؤكد اغتيال الجاج عماد مغنية في تفجير دمشق في كفر سوسة أمس..... التفجير طلع مدبر وصرلو الموساد 20 سنة ناطر هالفرصة هي وبالفعل تم اغتيال مغنية .... الاغتيال حسب معلومات كان بتفجير صغير بسيارتو بس مفجرة حديثة و متطورة........ عدد من نواب الكنيست صفقوا ابتهاجا بهذا الانجاز العظيم أما قناة المنار ...فتبث آيات من القرآن الكريم |
أي 14 جهاز أمني شاطرين يجيبو نمر امنية لسيارات فخمة و ملاحقين العالم عالكلمة و عالتعليق... و كل هالتقدم التكنولوجي تبع التنصت و الترصد اللي يفخر فيه أحد "الأمنيين" اللي مسجّل بالمنتدى و شاطر يحكي عن "الثغرات" اللي بتوصل للي يكسر البروكسي.... هاد اللي شاطرين فيه
انو بلا ما نحكي زيادة و نطلع متآمرين على أمن الوطن و خونة و ما الى ذلك... الله يرحم القتيل و اللي عندو دم و يستحي عليه... بس يبدو ركاب البيجو ستيشن ماعندهون دم.... عيييييب انو طيّرو الزلمة قريب من مقر المخابرات العامة, مو بكفر سوسة؟ لو واحد جايب تلفون لاسلكي من شي بلد و ركبو ببيتو و كانت موجتو "ممنوعة" بيوصلوه فورا, هاد الشاطرين فيه فعلا شي بيمخول |
انا بقلكون شي
وقت اجا وزير البطيخ الفرنسي ع لبنان كان الامن السوري عم يحرس هالوزير اللي اسمو كوشنير مشان ازا صار اي شي ما يقولو سوريا مشان هيك و مو فاضيين بنوب يراقبو حدن الو اهمية متل الشهيد عماد قصدي اهمية عربية ...الله يديم الاجانب للعرب مشان ما بعرف شو ؟؟؟ بركي اللي قتلو يمكن من الامن السوري بس عميل للموساد ما منعرف مشان هيك .... و بعرف شي عن حزب الله ما بيتعاملو مع غير ناس ما بيوثقو فيهون مية بالمية يعني هلق شخصية من حزب الله مش ناطرة شي من الامن السوري ليحرسها و يعتني فيا الا لمن يكون هالحارس الشخصي مايد اين حزب الله عرفتو عليي ؟؟؟ الثقة معدوووووووووووووووووووومة ةة و معون حق اللي بتفكرو موسى يطلعلك فرعون |
و كمان عاللي بيشق او يكب جريدة فيا صورة الرئيس ...
يروح فيا حبس ع شو ؟لمجرد صورة شكل حبر ع ورق ...التقدم و الازدهار ان شاء الله يا رب |
اقتباس:
حزب الله كأي جهة أخرى ما بيصير يكون عندو أمنو الخاص خارج دولتو... سوريا ما بتسمح, أو ما لازم تسمح, لما تكون لاجئ بدولة العرف السياسي هو انو هالدولة مأمنة حمايتك (طبعا لبنان استثناء) ... بس مثلا أمن خالد مشعل سوري طبعا... يعني محلاه قاعد عنا و مو واثق بأمننا... ما بيصير, مو حلوة بحقنا, و حزب الله ما بيزعلنا |
عيني كل شي بيختلف بحزب الله
و الجيش و عناصر المقاومة لازم تخضع لشروط اكيد هالشي و ع قولة رجال المقاومة و الحزب ما عم جيب من راسي لعلمك و مشعل و حدن من حزب الله مو بنفس الكفة حط هالشي ببالك كل واحد و الو وزنو |
اقتباس:
طيب على كل مو هاد قصدي و يبدو ما فهمتي ردي منيح او ما وصل شو انا قاصد... مو مشكلة على كل ماني خبير أمني و الحمد لله و ما بعرف كيف اجراءات أمن حزب الله سلامات:D |
اللـه يرحمــو . .
|
اي على مهلكن شوي
شو ناسيين شو يعني "موساد" ؟؟؟ أخطر جهاز استخبارات بالعالم بعد cia وبتصور هلأ صار قبلو كمان و نسيتو العديد من الوثائق يللي نشرت و يللي حكت عن عمليات اغتيال الو بنص فرنسا وانكلترا وايطاليا هاد عدا عن عمليات التجسس ويللي كان احدثها يلي صارت بقلب البيت الأبيض هلأ بيجوز مظبوط انو عنا جهاز استخبارات قوي بس هاد لا يعني انو ما في حدا يخترقوا الله يرحم الشهيد و انشاء الله بلكي هالا غتيال بيخلي بعض اللبنانيين المغرر فيهن يعرفوا تماما مين ممكن يكون ورا هالاغتيالات يللي عم تصير عندن يعني اسرائيل |
تحية لروحه يا شباب |
اولا الله يرحمو فعلا لانو خسارة كبيرة بكفي انو كان من اهم المطلوبين للموساد واجهزة المخابرات الامريكية
تانيا انا مابستبعد ابدا تورط المخابرات السورية ببيع الرجل للامريكيين مقابل صفقة معينة على الاغلب الها علاقة بقضية المحكمة الدولية يعني لو كان موجود بلبنان كان من شبه المستحيل اغتيالو لانو حزب الله عندو جهاز امني بيتمتع بحرفية عالية ومتفرغ لحماية نفسو من الاسرائيليين مو ملتهي بمطاردة ابناء الشعب وتارك البلد مفتوحة للجواسيس وعلى ما يبدو تم استدراج الرجل من قبل جهة ما هو بيثق فيها وتم تفخيخ سيارتو اثناء وجودوا بالشام |
اقتباس:
اي سيدي عنا اقوى جهاز مخابرات بس على الشعب هدا نفسو جهاز المخابرات اللي مرق من قدام عيونو الصحفي الاسرائيلي اللي ضل اسبوع كامل يتفتل بالبلد وما خلى قرنة الا تصور فيها عن جد نظام فاشل بكل شي الا بتخريب هالبلد |
اقتباس:
لو سوريا باعتو ما يغتالوه بسوريا, أو على الأقل ما بيغتالوه بهالطريقة المخجلة لسوريا... يعني هو يبدو انو كان مسؤول خط التسليح و دائم الانتقال و السفر بين طهران و دمشق... كان ممكن يصيدوه باحدى هالسفرات, يقصفو طيارتو أو حتى يجبروها على النزول في العراق... هاد رأيي. ما بعتقد لو انو سوريا بايعتو يكون الاتفاق انهائو بهالطريقة و في شي آخر, ما بعتقد سوريا بتساوم على حزب الله أو شيء يتعلق بحزب الله... ما هو أداة ضغطنا الوحيدة و ليست ملكنا.... يعني مو وارد بالنسبة الي هالاحتمال.... بس في شي مؤكد... هاي خجلة جديدة لأجهزة الأمن السوري.... يعني مو معقول بيجيبو أدق التفاصيل عن أي مواطن "بيشاغب" و تاركين ثغرات مفتوحة بهالطريقة المقززة شخصيا من أجل كرامة سوريا أتمنى انو تكون الموساد أو المخابرات الأمريكيى هي اللي اغتالت الراحل... لأنو لو تطلع شي جماعة من شلة جنبلاط و الحريري هاي لطمة النا كسوريين بغض النظر عن كل شيء.... أنو عصابة زعران مخترقتنا... عالقليلة هدولاك مانا قدهون و ما نغلبهون بشي الا بفخامة السيارات الأمنية |
ما في شي مستبعد
سلام يا شباب, أنا انبسطت كتير بصراحة لما لاقيت هالموقع الى ممكن الواحد يفش قلبو في من دون ما تنحذف عضويتو عالحارك من أول كم كلمة, على الأقل هاد اللي بعتقدو هلق, بس بصراحة كتير تعزبت بالتسجيل
فوربيدن, فوربيدن, فوربيدن, جننوني بس هاد الشي اللي خلاني صر أكتر لسجل, وصار. ما رح طول لأنو والله لهلق لساني متوتر, والله ما قدرت ارتاح أو انسى اللي صار بيتنا ما بيبعد أكتر من 400 متر عن الموقع يعني فينا نقول بموقع الحدث تقريبا انا اسمعت الصوت وكنت بالشارع بس شي 700 متر عن الموقع والصوت كان كتير قوي وواضح انا بالأول ما خفت لأنو في عادة بيطلع هيك أصوات: مرة بيطق خزان كهربا, مرة بينطلق زمور الانذار تبع دمشق تجريب أو بالغلط مرة بيكون شوية فتيش يعني الواحد مابيعرف ايمت بدو يرفع الأدرينالين تبعوا, امهم بعد شي نص ساعة قرأت مانشيت الجزيرة عاجل انفجار سيارة, وقتها بلشت خاف ورحت بس اكتظاظ العالم والشرطة ما اقدرت قرب أكتر, رحت عالبيت وما حدا بيعرف شو بدو يحكي, الظاهر كانت لسا مرسومة الدهشة عالوجوه ويعني شوية رعبة لإنو جيراننا طق البلور تبع الصالون عندن والله الله ستر والحمد لله. بلشو يقولوا سيارة غاز وما غاز حلفت بالله انو مو شغلة سيارة غاز لك حبيبي هنيك عنا اللي ما بيعرف يسأل شو السيارات هنيك, يعني سيارات كلا 2006 7 8 معقول يكون صاحبها مساويها عالغاز, وبعدين والله المنطقة على مستوى مو متل ما قال واحد من اللي علقوا منطقة فقيرة وبحب قلكون انو من أترف مناطق سوريا تعد. لك المهم قلنا بلكي بيطلع شي خبر عالقناة السورية وبنرسى على بر بس ما في حس ولا خبر لأ المسلسل لسا ولا أحلى ولا كأنو شي صاير. ما بعرف شلون نمنا شي 2 بالليل ولسا عم نستنى يحكوا شي عنا بس ما في فايدة, الصبح كانت الصعقة لما اسمعت اللي صار والله والله والله تمنيت لو انو انفجرت فيني أنا وفديتو بروحي والله مخي ما عاد جمع, من جهة الحج رضوان يمكن ما تعرفوا عنو كتير أو ما كنتوا على الأقل بس والله ما ببالغ اذا قلت أعظم رجل في القرن الماضي, والله قلبي بكي عليه, رحمه الله واسكنه فسيح جناته. من جهة تانية بدي ابكي موت الحكومة عالاخر بس هي الجهة النار طفت حرقة الدموع وحسيت قلبي من جوة عم يغلي شو بدي سب وشو بدي إلعن, كل يوم عن يوم عم نكتشف شي جديد مابدي تقل العيار لقنو بعرف العالم اللي بتسمع وبتحس رح تعرف شو كنت بدي اكتب بس هدول اللي جناب متل طناب حرام فيهون ضياعة الوقت والكتابة. بحب قلك للي بتستبعد انو يكون للشؤسمو ضلع هدول 25 مليون دولار يعني والله بيبيعونا كلنا مشان 100 دولار فشو بتتصور؟ بعدين هيك هيك ما رح يكون شي رسمي واضح يعني خلف الكواليس ومن قدام معليش منندد ومنزعل شوي ومنتحمل ينقال انو فشلنا بس جل من لا يخطئ............. انا ما رح اقدر كمل لأنو تعبان. رحمه الله رحمه الله رحمه الله |
he was definitely NOT under the protection of the Syrian intelligence.. he is much more important than that..
he probably had his own very close ring.. and very very limited contacts with top Syrian officials.. nothing more than that... :sad: this really sucks |
اقتباس:
خيو شو 25 مليون دولار؟؟ يعني فراطة!! بيبيعك عنصر بيبيعك ضابط صغير مشانهون بس هدول الصغار ما بيعرفو خفايا الأمور و ما بيعرفو مين هاد اللي عم يراقبوه و يحموه.... المستوى اللي يكون فيه الناس تعرف مين هاد هو مستوى ناس الـ25 مليون دولار فراطة عندهون... يعني ياخدو مناقصة اربع مشاريع من الدولة بيطالعوهون... أو تهريب أو هيك شي... هدول ما راح يخاطرو برزقتهون كرمال 25 مليون دولار سلامات |
اقتباس:
|
الله يرحموا ياجماعة برايي لا تستعجلوا بالاحكام اذا كان حكومتنا ما استعجلت باعلان الخبر واسمعناه من الجزيرة والعربية ولسى ولكالاتنا ما زاعت الخبر علماانه صار بسوريا :!:
ومع انه الاميركا وعظمتها اخترقت وبشكل فاضح امنيا بس كمان عيب والله علينا الفاتحه على روحه |
اقتباس:
يعني هو لازم تتضح الأمور... بس لو الفقيد قتل بتفجير سيارتو هاي شغلة معيبة... يعني تقلي صاروخ تقلي قناص بفهمها.... يعني أول تدابير الأمر انو سيارتو توقف بكراج مو بنص الشارع, و ناس بهالأهمية معقول ما تتأمن سيارتو من قبل عناصرو قبل ما يطلع؟؟ يعني في وسائل تقنية بتجيبلك المادة المتفجرة و مو معقول صافيلو سيارتو بالشارع و مجبور يمشي لحتى يركبها... هاي ثغرة خطيرة و مو ضروري الواحد يكون ضابط أمن... انو بديهية على ما اعتقد و حتى لو خيانة من أحد المقربين الو.... شغلة كبيرة و الله و اختراق رهيب ما بعتقد حزب الله يوقع فيه على كل لازم تظهر المعطيات (عند اللي لازم تظهر عندهون... عالعامة ما راح يظهر شي عالغالب) و حديثنا هون مجرد تكهنات و آراء تحية |
والله يمكن معك حق بس شي ماممكن يفوت بالعقل والله مخي ما عاد جممع.......
لأ وبيجي بيرجع شخص بيقلك بلكي العملية كتير كبيرة وضخمة لحتى ما انكشفت حاج بقى والله ملينا ما عاد ينكذب علينا أكتر . بليز بليز بليز يغيروا طريقة كذبهون ويطوروها شوي. شاطرين بس بعد حرب تموز يبينوا سنانهم قدام الكاميرات والميكروفونات, واللي قاد كل العمليات وخطط وتعب ما فتح تمه ولا سمح لكامير تشوفه ولا يمكن بتعرفوا اسمه من أول. والله لو علمت لفديته بروحي. رحمه الله |
اقتباس:
شكراً كلك زوق . :deal: |
اقتباس:
على كل استنى لنشوف مستقبلا اذا كان النظام رح يقبض تمن ما مثلا كسر العزلة المفروضة علي و انهاء موضوع محكمة الحريري وبالنهاية اللي قلتو عن تقصير النظام شي مخجل فعلا يعني من فضيحة لفضيحة فضيحة الغارات الاسرائيلية المتكررة والرد بالمكان والزمان المناسبين وفضيحة اهمال البلد لتصبح مرتع للجواسيس والعملاء |
بتعرفوا شغلة شباب ..
تخيلوا يكون الشخص اللي نفذ العملية عميل مزدوج و عأساس مبارح نفذ العملية ! يعني تفجرت سيارة المرحوم و تم إعلان الخبر و الجثة محترقة و بكرة الجنازة وكلشي ماشي حسب الأصول .. شو بيمنع يكون في اتفاق على هالشي مشان توقف اسرائيل و أميريكا ملاحقة الرجل .. بينما هوي بيصير يتحرك برياحة و بهوية وجواز سفر و لوك جديد ؟ يعني هاي مجرد فكرة .. وبدها أجهزة مخابرات على مستوى عالي جداً جداً بعدين التوقيت ... مو غريب يصير ليلة الذكرى التالتة لمقتل الحريري !!! يعني بكرة بلبنان في جنازتين .. وحدة لكل طرف وتنيناتن من العيار الثقيل!!! ما بعرف مجرد فكرة خطرت ببالي وما حدا يواخزنا عليها . |
اقتباس:
اللي اغتالو قبض الـ25 مليون و هلأ يكون بطريقو على هاواي باجازة مطوّلة... هاد رأيي |
اقتباس:
|
بصراحة .....
أنا كتبت هالرد و كنت متردد حطو مشان ما صير مسخرة القسم .... بس بعد ما قريت رد فادي تشجعت يعني .... مو كتير فايتة بمخّي شغلة اغتيال عماد مغنية ...لكذا سبب أول شي التوقيت .... أنو الاغتيال يوم الثلاثاء بيوصل على بيروت الأربعاء و بيتشيع بحشد جماهيري كبير ..بيتزامن مع الحشد يللي عم يشتغلوا عليه جماعة 14 آذار و يللي صار مكلفهون عشرات الملايين من الدولارات و لا سيما المال يللي دفعوه مبارح بطرابلس كمان مغنية ....متعود يشتغل بالظل و قلال كتير يللي كانو بيعرفوه أو سمعانين باسمو ..... يعني مو كتير الشغلة رح تفرق مغنية سبق الو و عمل عمليتين لتغيير ملامح وجهو الاخيرة كانت عام 1997 ليسهل تخفيه و هو كمان مطلوب من جهات دولية عديدة ....و مطلوب كمان من الانتربول |
كل شي مدبرتمام ويلي بيأكد هالشي مكان وتوقيت العمليه كلها محاولات لضرب سوريا و علاقاتها بلبنان وتأجيج نار الفتنه اكتر واكتر..
|
انشالله
والله يا أخي بنفس الموضوع كنت عم اتناقش انا وعمي بس الموضوع أكبر من هيك بكتير.
أولاً حبيب قلبي الحج رضوان بيقدر من دون هيك تمثيلية بايخة وتافهة يتخفى وما حدا يقدر يكشفو وبحب قلك إنو هو الرجل الخفي الزيبق بكل بلد قلو اسم وباس بورت ولدرجة الذكاء الفظيعة فينك تتصور انو بكل شبكات الاستخبارات العالمية ما قلو صور غير صورتين وقدمى كتير كتير وفينك تشوفهون بموقع المطلوبين على قائمة الارهاب وانا متأكد والله مليون بالمية اذا معك صورتوه اللي عند الاستخبارات وشفتو مستحيل تعرفو. تانياً يمكن بتعرف انو كل وكالات المخابرات داخت وهي بدا ياه طوال 25 سنة وما طالت غبرة صباطو (عفواً) وابن لادن مش هيك الوضع وليكون بيعلمك أخي الحرب النفسية بتقول انو يضلوا عايشين بيضلوا أعدائهم عايشين برعب بس وقت يموتو وو كذب نحن الل منخسر لأنو قويت شوكتهون وصار عندن عزيمة أكبر وشعبيتن كبرت وانت أكيد بتعرف تماما هاد الحكي, بس بدو شوية مراجعة. |
انا استغربت كيف تمت عملية الاغتيال بنص العاصمة بوجود كل تلك الاجهزة الامنية بسوريا ... المخابرات وأمن الدولة والامن السياسي والامن الجنائي وفرع المخابرات الجوية وفرع 999 الخ ..
الاجهزة الأمنية بسوريا اثبتت فشلها |
اقتباس:
... انو اي دوله مخترقه ... وين ما كان مخترق .. وخصوصي نحنا كعرب مستباحين حتى باراضينا ... يعني بيغتالو عالم وبيطلع وبيجي الطيران الاسرائيلي وكلو عادي ,,, استباحه عينك كنت عينك... بس المهم هوي توقيت العمليه ... انا ما بستبعدها عن اسرائيل مشان تقلتق الوضع الامني بسوريا .. ويصيرو جماعة حزب الله مستفزين وهدوك تاعون الحريري مستفزين اصلا وتعلق بيناتهن اليوم ... |
اقتباس:
|
والله ياريمي متل ماقال ياس ,, عندنا شي 16 جهاز امني بسوريا كل جهاز الو تخصص معين ,, وبالاخر بتتم عملية اغتيال شخصية مهمة متل عماد مغنية !!!
معناها فشل ذريع |
ملعوب جديد
وهلق صار دور نصر الله المبجل لنشوف شو بدو يعمل من جديد |
الاجهزة الامنية يلي موجودة بسوريا مهمتهااا بس كيف بدها تخنق هالشعب وتزلو وتحكمو اطول فترة حتى لو كان الثمن السلام مع اسرائيل
|
رحمك الله يا ليث الميادين,
كل ثانية من حياتك كانت هزيمة لهم والحمد لله حتى استشهادك كان بداية, نعم بداية, بداية سقوط كيانهم الغاصب. من بين الحروف تخرج الكلمات ومن هذه الكلمات ستخرج الأفعال وأعلم تماماً بل على يقين كامل, بداية نهايتهم قد بدأت, نعم والله قد بدأت وليشهد العالم بأسره. أسأل الله سبحانه وتعالى أن ينصر من نصر دينه ، وخصوصاً هذه الثلة المؤمنة الموجودة بجنوب لبنان وهم حزب الله ، اللهم انصرهم بنصرك وأعزهم بعزك ، اللهم إنك تعلم بأنهم يقاتلون عدوك وعدوهم ، اللهم فانصرهم على أعدائهم بحق محمد وآل محمد, وصلى الله على محمد وعلى آله الطيبين الطاهرين . |
| الساعة بإيدك هلق يا سيدي 12:26 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون