|
رأيكون بعقوبات السير الجديدة
أكيد الكل سمعوا بقانون العقوبات المرورية الجديد يللي بيتمثل بنظام النقاط يللي بتتناقص مع كل مخالفة مرورية ... انتهاءاً بسحب شهادة القيادة بالاضافة للغرامات المالية الكبيرة ..... يللي بتوصل لل 100 الف ليرة هلأ الكل يمكن متفقين أنو عنا فوضى مرورية كبيرة و لا سيما بالمدن الكبيرة ...بس يا ترى .. عنا البنية التحتية ( من مواقف و طرق واسعة ... ) لنطبّق هيك قوانين أو كادر مناسب من شرطة المرور ليتطبق هالقانون عالكل .. المهم هلأ برأيكون ..هل هالقانون ... قانون عصري و فعال لضبط الفوضى المرورية بالبلد أو هو حافز جديد .. لرفع تسعيرة شرطي المرور . فيكون تشوفوا القانون من هون - ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - |
قانون عصري ومنيح..وهو اول شي بدايق لانكو مانكو متعودين عليه..وخاصة انو ازا كتروا النقاط السلبية بتنسحب الرخصة والمبالغ الضخمة اللي بتندفع..لانو الشعب ما بييجي الا بـ هالطريقة..بس آخرتكن بتتعودوا وبتصيروا تحبوه كمان :lol:
انا شخصيا بحبو..طالما مش عم إدفع شي من جيبتي :p *يعني هالقانون سن بـ سوريا مؤخرا جديد؟؟. غريب انا فكرت كل الدول عندهن نظام العقوبات متل عنا :? |
طيب أول شي بفلترو الشرطة من جماعة الخمسينات للتكاسي والميات للخصوصي وبعدين ينزلو القانون الجديد
وهلق منقرالك الموضوع لعينيك وبشوف إذا فيو أي ثغرة قانونية ولازم يكون القانون يحمل شهيق قوانين الأذعان تحياتي يا ماد ماكس |
نوعا ما مع الشعب العربي القوانين ما عم تقدم ولا تاخر .. كل واحد قانونو مخو بس
من فتره عملو حمله كتير قويه مشان ما حدا يحكي بالموبايل وهوو عم يسوق وفيها تغريم وسجن ..ووو ... هلا هون الرجال يا عمي ما بيقدرو ما يحكو .. صار كل واحد يحكي بالسياره عن طريق السبيكر بالموبايل .. وما استفدنا شي ما زالت الحوادث اكتر شي بسببها الموبايل .. ;) |
اقتباس:
|
انا مع... وبشدة :pos:
|
انا مع كمان ..الجماعه عم يحاولو يحسنو ... شو بيعملو يعني بيوقفو شرطي فوق راس كل مواطن ...خيو هالقانون منيح وكتير كمان ... بركي هالعالم ترتدع شوي :x
|
يا جماعة المشكلة مو بالقانون
لكن على من يطبق القانون وكيف يطبق القانون يعني متل المطاطة بصير القوانين كلها على راسي بس النقطة هي هلق إذا شرطي غلط بمواطن أو تعدى عليه مثلا كيف بدنا نثبت غلط الشرطي هون مكمن القصيد لأنه بصراحة في نقص ثقة بين الطرفين والله أعلم تقبلو تحياتي |
حافز جديد لرفع تسعيرة رشوة شرطي المرور
|
لا رح يقدم ولا رح ياخر
اي مو ليكون في شي اسمو نظام مرور بسوريا اول شي لحتى يصرلو قانون متل الخلق يا رجل السير عنى متل الرالي مالو قانون ، القانون الاوحد يلي بيشوفر اكتر و بيجحش اكتر و ما بيخاف على سيارتو اكتر هوه الفائز دائما ... |
هلأ فكرة القانون حلوة..وانو عم يفكرو يحسنو نظام السير كتير شغلة حلوة...
بس انا بلاقي انو لا حيقدم ولا ياخر..لأنه عنا هون مطبق من شي 5 سنين وسلامتكن...ما حدا برد والعالم كلها بتخالف..ليكنا انطرقنا مخالفة و5 نقط قبل اسبوعين :lol: ومع كل القوانين والانظمة الي مطبقة هون بتضل سواقة سوريا كتير مقبولة اكتر من عنا..يعني سوريا ما بدها كل هالنظام وكل هالنقط...لو يتطبق نظام مخالفات عادي وطبيعي..يعني النظام الي كان موجود لو يتطبق مزبوط بكفي وزيادة..خيو اهل سويا كلن ناس زوووء..من يوم يومنا زوق بس بدنا شوية رص :p |
هههههههههااي صرت ائطع الشارع بدون ما امسكـ ايد ماما وبابا دخيلكـ يا الله |
طيب شو رأيك ماوجيك القوانين الجديدة اللي مطالعينا بقطر ..
شي رح يخف عقلك منو شي مخالفات ماطبيعي .. يعني في مخالفات بتوصل لل50 الف ريال واكتير شوي .. وطبعا للسجن .. وللتسفير كمان .. يعني كل الناس ماعبتتتحمل هالقوانين النازلة .. حتى القطريين زاتن عقلن ماعبصدقوا هالقوانين وطبعا هون بقطر القانون قانون .. مافي مجال للغلط وللمسامحة |
اقتباس:
و هلأ اجتهون رزقة جديدة ...... بكونو معيدين الله وكيلك :sick: |
هالقوانين كلها عالفاضي
طالما اللي عم ينفذ القانون بدو يرتشي دايماً :jakoush: |
اقتباس:
و هون بيت القصيد عنا ما في شي اسمو تطبيق للقانون ..... كل ما هنالك أنو لكل مخالفة ... بيطلع جائزة ترضية للشرطي ....... ف الله يستر من تسعيرة هالغرامات الجديدة |
انا بشكل عام مع فرض عقوبات كبيرة لتطبيق قوانين السير.
بس مو هون المشكلة. المشكلة انو ما رح ياكلها غير المواطن اللي ما الو حدا. يعني المسؤولين وولادون وقرايبينون وهالحكي كلو. مين بيسترجي يخالفون؟؟ هاد عدا عن انو الشرطي لساتو راتبو يا دوب يطعميه رغيم خبز. يعني بدال ال 25 ليرة. رح ياخد 50. يعني اللي بدي قولو. القانون منيح. بس ما رح يقدم ولا رح يأخر. في شغلات كتير لازم يعملوها قبل هاي. |
انو مبدئيا الفكرة حلوة عشان بالحساب نمشي على النظام
بس ازا في اشارة مرور واللي عم يخالف فيها هنن الشرطة ما بيعذبو حالهن ويكلفو خاطرهن ويطلعو عليها بيمشو السير على كيفن وخاصة بأوقات الزحمة (الرش اور) بيتجاهلو كل اشارة المرور كانها مو موجودة.... اذا ليش اخترعو اشارة المرور؟؟؟ او شغلة احلى بكتير الا وهيي العدادات تبع الاشارة انو عد تنازلي اوكي حلوة الفكرة بس الاحلى انو بشارع بغداد الاشارة تبع التقاطع مع شارع الثورة كزا مرة شفتها بيكون الاشارة خضرا والعداد لسا 35 يعني في 35 ثواني والسيارات ماشية فجأة العداد غير رايو وصارة الاشارة حمرا هيك بقدرة قادر!!!!!!!! طيب ازا اصلا ما في نظاام على شو المخالفااااات؟؟؟؟؟ |
انا برأيي ... في تقدم ,..,. وفي أمل ... وفي مستقبل .. :larg:
|
انا برأيي انها عوجه وعمرها ما رح تنعدل لأنها متل أرن الموز اذا نعدل خرب
سمعو هل القصة: كنت مرة عم استنى سيارة تطلع من الموقف ادام شركة ال MTN اول استراد المزة مشان صف سيارتي وانزل ادفع فاتورة جوالي ما لحق الأخ يطلع الا وسياره وراي بكل اضويتها وزماميرها عم تصرعني مشان ما صف سيارتي بالموقف والشرطي واقف عبعد امتار وصار الشرطي يصيح لاتصف لا تصف انا فكرت حالي دعستلي شي مواطن بس صاحبكم تنح كملت الصف ونزلت شوف شو القصة ال الأخ الي كان وراي عم يصرعني صرلو ساعه واقف وانا اجيت وطحشت عليه وحلف ميت يمين وميت عظيم اني طحشت عليه ...انا ضحكت وفكرت الكميرا الخفيه عم تصور.... بس طلع الموضوع جد ....الي من اخرها طلع مشان صف لأن المكان مكاني..... انا التلو ماني طالع...... ياحزكم شو ساوى الأخ جاب سيارتو وصف وراي تمام بالعرض وسكر علي..... الت لشرطي هيك القانون بئول بتعرفو شو رد علي والحسرة على وجه انا شرطي ما بئدر الو شي لحظرة الملازم الأول.... وبكتفي لهون |
بصراحة رغم انو القانون كتير بالحالة المثالية رح يكون مناسب لحالة الفوضى
بس بصراحة عجز و ألية تعامل سيئة جدا من الجهات المسؤولة انو تقر هيك قانون بهيك بنى تحتية وهيك بنى بشرية من رجال الشرطة بدك قلي رأيك بكل قانون وبكل مخالفة برأيي كل زودة بالمخالفة هيي عبارة عن زودة لرجال الشرطة ... يعني بيضل الشعب يعمل مخالفات نفس المخالفات ما تغيرت بس الشرطي بدل ما ياخد 100 ليرة مثلا على سواقة سيارة بدون رخصة بيصير ياخد 200 ليرة ولا نقط ولا من ينقطون ... الحالة بدها قبضة من حديد على الفاسدين داخل المؤسسة المسؤولة قبل سائقي السيارات وتحياتي الحارة ظل جيفارا |
اقتباس:
ههههههههههههه لك دخيلك انت على هالتعليق الحلو والطفولي متلك اي انا مع هالقوانين لانو صار فوضى كتيير والكل بدو يسابق لا يطلع قدام التاني يعني انو عقلا ذهنا بدل ماياكل الطريق معك 10 ددقايق خليه 15 دقيقة او 20 بس يالله شوي شوي بتصير القوانين وبنتدرس منيح بس هلاء هدول منيحين يعني الرمد احسن من العمى :p يسلمووو مادو |
هلأ انا برأيي انو القانون حلو و مفيد و بكون رادع للشعب للخوف من المخالفات
بس يا ريت يكون في رقابة و قانون لشرطة السير و يكون في رقابة ع الرقابة تبعون و رقابة ع الرقابة ع الرقابة تبعون لحتى نخلص من الرشوة ع الهامش كيفك ماد و الله اشتئتلك :D |
| الساعة بإيدك هلق يا سيدي 13:01 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون