|
البحث عن الهوية
مرحبا
في سؤال شغلي بالي كتير الفترة الماضية ناقشت فيه اعضاء كتير بس ما اقتنعت هو نحنا شو سوريين ولا عرب كتار اللي قالولي انو مش عرب بس ما اقتعنت كل اللي درسناه بيقول انو نحنا عرب انو اللغة والتاريخ والعادات وحدة بيننا بس قالوا كتير وكمان مش مقتنع نحنا شو وهويتنا شو سوريين ولا عرب ؟ |
طبعاً سوريين ولسنا عرب ..
وبترك المعلومات الأصح والاوفر عن هلموضوع لغيري :D |
شكرا رامي بس كنت حابب تعطيني رايك
|
بغض النظر عن الراي لانو رح يكون فيه عواطف
وهون انت عم تبحث عن هوية ..... عن حقيقة ..... كنت متوقع الموضوع اكبر من هيك ...... بس مو مشكلة فيك تتابع فيه هلأ من ناحية سوريين او عرب هون القصة شايكة شوي وفايتة ببعضها ولازمها سرد تاريخي لما منقول سوريا هون انت بدي توضح شو بتقصد فيها يعني سوريا كدولة او كشعب موجود بسوريا الطبيعية ويللي هي فلسطين ولبنان والاردن وسوريا؟؟؟ يعني وضحلي شوي اكتر يللي بتقصدوا ؟؟ |
بالتاكيد سوريا الطبيعية لانو المنطقة كانت منطقة واحدة جغرافيا وتاريخيا
وكمان برجع بقول اي عم دور على حقيقة المضوع رح يكبر شوي شوي |
كوستا ما خلصت التفقد ؟
رح نام انا |
اقتباس:
وهلأ يا معلم سوريا الطبيعية منذ فجر التاريخ كانت مهد لحضارات كتيرة قامت عليها ..... وهي الحضارات تركت اثار كتيرة بتدل عليها .....وهي الحضارات صنعها بشر ومن عدة اعراق هلأ مر على سوريا الطبيعية هالشعوب هي وهنن سومريين وكلدانيين وبابليين واشوريين واراميين وكريتيين واغريق وفلسطينيين ( ومنهم اجت تسمية فلسطين ) وكنعانيين وفراعنة ورومان وبيزنطيين وعرب واكراد ومغول وسلاجقة وصليبيين ومماليك وعثمانيين .... وكتير متلون ..... هلأ هدول ناس حكموا وشعوب عاشت منهم ..... بس لا ننسى كمان انو في شعوب تانية اجت وما انذكرت بالتاريخ الا بالقليل ومنهم الجنود المرتزقة يللي عاش منهم كتير وكمل حياتو فيها ... وتجار وعبيد من شتى بقاع العالم القديم ..... وهدول امتزجوا مع بعض وكل فترة زمنية كان يتكون عرق ما او يذوب عرق على حساب الاخر ..... بس بما انو الحرب العالمية الاولى غيرت تاريخ المنطقة وغيرت بجغرافيتها هون صار في شي اسمو بلاد عربية وكل بلد كان الو اسم حسب منطقتوا متل الاردن اخذ اسموا من نهر الاردن وتاسس على شكل امارة في شرق نهر الاردن ولبنان على اسم جبل لبنان وفلسطين على اسم شعب هاجر من جيرة ببحر ايجة اسمها بالاستيا وسوريا على اسمها سيريان وبدي اذكر شغلة هون عن اسم سوريا ونشاتو اسم سوريا بالاصل اتى من اسيريا ( اشور ) واسم سيريان من اسيرين ( اشوريين ) وهاد الاسم اطلقو عليها اليونان القدماء بس السكان الاصليين كانو يعرفو عن حالهون باسم اراميين هلأ هون بدها شرح شوي الاشوريين هنن شعب مستقل تماما عن الاراميين بس بهداك الوقت ماكان في حدود مرسومة ومشان هيك اليونانيين ما فرقوا بين الاشوريين والاراميين لانو كان تعاملهون معون تجاري فقط |
انا براي لاتدور وتعب قلبك ع هويتك انت شو بتشوف حالك مو بني ادم هي الهوية تبعك من اي مصدر كانت المهم تكون انسانيتك هويتك
هدا كلام فلسفي مو بعرف بس هي اول مشاركة قلت بفوت بقوة ههههههههه لا بجد سوري عربي انساني هيك لازم تكون |
طيب
بكتب التاريخ درسنا انو كل الحضارات هي كانت بجزيرة العرب ووقت الجفاف هاجرت للعراق والشام ومصر بعدين ما عطيتني جواب واضح |
بعدين اللي بيهمني انو اللي سكنوا سوريا بالاساس من وين اجوا ؟
|
اقتباس:
انو متلا انا فلسطينية واول من سكن بلادي وعاش فيها هني العرب الكنعانيين هل اعتبر نفسي كنعانية؟ او اعتبر نفسي فلسطينية هاجرت من اليونان وجيت واحتليت عهالبلاد؟ طيب بلكي طلعت انا من بني اسرائيل؟ انو كيف بدي اعتمد على اي تاريخ تحديدا!! منطقتنا مرت بكتير مراحل وبعدها بتمر! وصعب تعرف انتي من وين بالاساس وشو اصلك وفصلك (الا ما يسر الله)..لكن بشكل عام حسب رايي الانسان بحدد هويته (بغض النظر عن وين هو خلقان) يعني قد اكون انا فلسطينية من عرب ال 48 لكن قد تكون ميولي وافكاري فرعونية ..حدا الو عندي شي؟؟ بس ممكن اتفق معك على انو الحاضر بأثر على نسج هويتنا ..يعني عاداتنا تقاليدنا مجتمعنا لغتنا اكيد بتأثر على تعريفنا لنفسنا..وبالتالي بشكل او بآخر اي نعم انا عربية :) والاهم اني انسانة! تحياتي موضوعك حلو :D |
اقتباس:
اما الفلسطينيين فا هني اجوا من اليونان وتحديدا من جزيرة كريت وقت لما كان في مجاعة هناك..اجوا عا وقت مملكة اسرائيل ..ولاجل الحق فا هني احتلوا البلاد من العبرانيين..ويقال انو تسمييتهم فلسطينين يعود الى الكلمة العبرية פולש (polesh) واللي معناها يغزو.. نظرا لانهم كانوا غزاة اشداء جدا.. |
شوفلي هذا الموضوع عن القومية العربية
- ابو شريك هاي الروابط الي بيحطوها الأعضاء ما بتظهر ترى غير للأعضاء، فيعني اذا ما كنت مسجل و كان بدك اتشوف الرابط (مصرّ ) ففيك اتسجل بإنك تتكى على كلمة سوريا - و ضمن الموضوع بأحد الردود حطيت بزماناتي رابط لموضوع ثاني مشابه. كمان بدعوك تشوفه سلامات |
شكرا ياس اطلعت عليه
|
نحنى ســــورين و لسنى عرب
معلش اخي لنرجع شوي بالتاريخ اذا بدهم يحكو عن التاريخ سوريا هيه ساميه ، أراميه ، سريانيه ، فينيقيه و و و و و و بس مو عرب ... و بالعصر الحاظر سوريا الوحيده يلي حامله القضيه العربيه و نحنى الوحيدين يلي بنكتب جنسيتنا عربي سوري ، وليش ماحدا بالوطن العربي حاسس فينا لا و يلي بيزيد الطين بله ، انو كتير بيكرهونا ليش بس هيك لانا سورين طبعا المحبين اكتر من يلي بيكرهو بس عم احكي بشكل عام ... انا بالنسبه الي و بالرجوع للجزور انا سوري ، وانا بحكي للكل انا سوري وبس ، هي كلمة الوطن العربي و هل قصص كلها كلها مصطلحات خترعوها مشان يحملونا هم فوق همنا ، انا متنازل عنها .... لهيك يا كنان برأي نحنى بس سورين و نحنى سوريا الكبرى ، ولح نظل هيك ، اصلن يا صاحبي من قدم التاريخ معروف سوريا ، فلسطين ، بلاد الرافدين ، و بلاد النيل ... فوين العربيه بالموضوع !!! |
يا اش قلنا بلا عواطف ونحكي بالعقل نحنا شو
سوريين او عرب |
نحنا مُحتلين من قبل العرب .. اللي أصلون شبه الجزيرة العربية .. نحنا سوريين ... و اللي بيقلك غير هيك حط أصبعتك بعينو .
|
نحنا سوريين ...... عم نحكي عربي حالياً
يمكن بكرا نحكي شي تاني  و الشي الحلو هالايام .... أنو بلّشنا ( كدولة ) نطلع من الاطار العربي يللي حطينا حالنا فيه من أكتر من 40سنة ( يمكن مجبورين هلأ بس المهم ....بلّشنا ) |
اقتباس:
جذورنا معروف من وين و اصولنا معروفه شو ، معناها بكل المعاني مو عربيه |
محتّلين من قبل العرب :shock:
اي امشوا نعمل حرب عالعرب :yahoo::adal: :?؟؟ |
اقتباس:
وضحلي لشوف كيف يعني محتلين ومين كان هون قبل الاحتلال ؟وشو اصلون اللي كانوا هون اقتباس:
اقتباس:
|
اقتباس:
بطّلنا قاتلين حالنا لرفع لواء العروبة مثلاً ..... المؤتمر الأخير يللي عم تدعي عليه أمريكا ..... رفضنا نروح عليه .... اذا ما اندرجت قضية الجولان على جدول الاعمال .....بينما قبل ..... كان يكفي وجود اي قضية عربية لنشارك و عندك كمان تحسين علاقتنا مع دول المنطقة الغير عربية كبديل عن علاقاتنا ( السيئة ) مع الدول العربية ( مع أنو يمكن مجبورين هلأ بس المهم انها تحسنت ) و في أمثلة كتيرة كمان أنو اتجاه البلد عم يتغير |
اي بس انا هلا ما عم بحكي عن سوريا كموقف عم بحكي سوريا شو؟
سوريا السورية ام العربية ؟ |
هلا اقتنعت انو في حضارات كبيرة سكنت هون متل ما قللي كوستا من كنعانيين واشوريين وفينيقيين
وقريت قبل شوي بكتاب اكتر عن الموضوع بس هدول الحضارات من وين اجوا ؟ مش من جزيرة العرب بعدين صح انحمت سوريا من السلوقيين والرومان لحتى اجى الفتح الاسلامي بس بهي الفترة من كان ساكنها وعم بحكي قوميات مو اديان بعدين اتفقنا انو صار في تمازج بين الناس بس اليوم معقول نعمل لل20 مليون سوري شجرة عيلة لنفرزون بلاك سامر وكوستا وبارليب ناطر ردكون |
اقتباس:
بس بسبب الفكر القومي العربي يللي حكم سوريا من فترة طويلة ...... أخدونا بالاتجاه العربي حتى انو كان اعتزازك بوطنك سوريا ...... يعتبر نوع من التعصب .... و ببعض الأماكن كان ممكن تتحاسب على هيك شعور بس هلأ القومية العربية بلّشت تنحسر بسوريا .... و عم يتجلى هالشي على أرض لواقع |
اي هي بوافقك فيها عمي لانو بلحظات انو كل العالم بيحتفي ببلده بتعصب حاد
|
اقتباس:
وهي اكتر منطقة بالعالم صارت فيها تمازج حضاري وثقافي وعرقي .... هلأ متل ما متفيق علماء التاريخ انو التاريخ يبدأ من سومر واكاد .... وطبعا لما ببلش التاريخ بكون بلش يتسطر .. يعني اختراع الكتابة .... بس هون في نقطة مهمة انو هودل الناس قبل ما يخترعوا الكتابة شو كان ؟؟؟ وهون الرد على سؤالك .... قريت مرة انو قبل السومريين كان في ناس هاجروا من القوقاز ونزلو سكنوا المنطقة الممتدة بين دجلة ولواء اسكندرون ...... هي المنطقة يللي بسموها سوريا الداخلية ..... وكمان في ناس اجوا من شمال الهند .... تقريبا منطقة افغانستان وباكستان وهديك المنطقة .... وفي ناس اجوا كمان من منطقة شمال اليونان وهي ماسادونيا وكلون هدول تركو اثارون وطبعا كانت عبارة عن وسائل زراعية بدائية وكمان من فترة قريبة كتير قريت انو اكتشفوا جمجمة انسان تعود الى خمسمية الف سنة ..... يعني الانسان موجود بالمنطقة هي من زمان ....... |
اقتباس:
أنا مو كتير بحس أنو التاريخ هو الفاصل بهالشي ... يعني الولايات المتحدة .... يمكن بتضم آلاف الأصول ...... بس قدروا يعملوا قومية خاصة فيهون يعني برأيي يللي بيصنع القومية السورية هو الانسان السوري قبل كل شي يعني اذا شايف أنو الشعب السوري بيتميز ( سلباً أو ايجاباً ) عن باقي الشعوب العربية ... معناها ...هو غير باقي الشعوب العربية عالهامش .... معقول تحس حالك من نفس القومية انت و الاريتيري .....؟؟ حتى انو البعض ما بيعرف انها عربية |
اقتباس:
بهالحالة ما بقى فينا نقول انو محصورين بحضارة وحدة وصار في تمازج بين اكتر من شعب عالهامش صرنا امم متحدة يبقى كل هالشعوب وقت اجت لعنا وقعدت بسوريا كونت شي اسمه الهوية السورية طيب هلا رح انتقل لفترة تانية لاحقة واللي هي فترة العصر الاسلامي هون طغا الطابع العربي اكتر وصار في تمازج جديد اضافة للفتوحات الاسلامية فنقدر نقول انو من هون صار عنا الهوية العربية؟ |
اقتباس:
انا اول من زكرة بالموضوع عن وجود الحضارة هي بعدين وين اسمي تحت بالاخير :frown: مالح جاوبك خلص يوسليس كيس :frown: |
الي عودة من جديد للموضوع بس منيح قربت اقتنع
|
اي واخيرا اقتنعت نص الموضوع بس السؤال هلا وقت الفتح الاسلامي وما بعده شو اللي صار
وشو الهوية هلا ؟ وعلى اي اساس ناطر جوابكون |
اقتباس:
الاسلام اجا كدين مو غير الجزور يعني ما غير الدم يلي فينا ، يعني نحنى كفينقيني او كنعانين او سومرين او العرق السامي و يلي كلها كانت متواجده بسوريا وغيرها ، ما تأثر بهل شي الفتح جاء و غير عقيده بس ما غير ناس ، اكيد في اختلاط صار بين عرب و بينا ، بس مع هيك مو بكل الأماكن ، هلا لنشوف اخي في قبائل اصلهم قبائل سوريه من الاساس بس بتلاقي في الهم افاخذ او فروع بالخليج ، بس كلهم بيحكولك اصلنا من سوريا ، هاد بياكد معناها انو سوريا كمنطقه جغرافيه موجود عندها التنظيم القبلي قبل الفتح الاسلامي |
هو سؤال واحد طالما سورية مانا عربية لكان كيف بتحكوا عربي ..:?
|
اللغة مو رابط
هلا بالبرازيل بيحكوا برتغالي يعني هني برتغاليين ؟ |
اقتباس:
و جارتنا بتحكي لبناني .......... مع أنو بحياتا ما زارت لبنان  |
انت من الصبح محشش ؟
لا بس فعليا اللغة ما بتضل ثابتة وكل اللغات ببتغير وتجيها مصطلحات جديدة هلا باللغة العربية او خليني كون ادق باللهجة السورية في كتير كلمات اصلا ارامي وسرياني وحتى يوناني وحتى اسماء المناطق تلت رباعا اصلا قديم وبمناطق تانية بسوريا الناس بتحكي بكلمات اقرب للتركي او للهجة العراقية او الفلسطينية |
يعني بصراحة بعرفش شو الحكمة من وراء هالجدال ...
كل إنسان بينولد بأشياء لا إرادية متل اللغة والقومية والوطن والدين ... انتوا انولدتوا بتحكوا عربي ... وانولدتوا عايشين بسوريا البلد العربــي ... معناتو ليش بتقولوا عن حالكم سوريين مش عرب ؟ يعني بعرفش ... شو العيب فيها كلمة عرب ... يعني كانكم بتطحنوا بميه ... وبتحموا بشي مفروغ منه .. وحكيكم صار يجيب وجع الراس قال انا سوري ولا عربي ... ؟؟؟ هاد سؤال بينسأل ؟ |
اقتباس:
وهاد اسوا شي انك تورثي الشي وراثة وانتي مو عارفة ليش طب بلكي انا بدي اعرف ليش انو اوكي ولدت وانا سوري عربي طيب ليش عربي وليش سوري ؟ لانو خلقت هون؟ بس ؟ كلمة عرب ما فيها عيب بنوب بس بعض ناس خلوها ببعض محلات عيب |
اقتباس:
اه ومش كان من الافضل بدل ما نتخلى عن العروبة هو انو نتبناها اكتر ونغير النظرة السائدة الها؟ |
| الساعة بإيدك هلق يا سيدي 12:50 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون