|
من اهم اسباب تسميتنا بدول العالم الثالث
أحد الأعضاء الكرام قال هذا الكلام الذي يُشكر عليه حبيت آخد رأيكم به
بأن من اهم اسباب تسميتنا بدول العالم الثالث :- 1- عدم تقبلنا للنقد 2- عدم احترامنا اراء الاخرين 3-فقداننا لآداب الحوار 4- للأسف عصبيتنا يلي في غير محلها 5-تفكيرنا المحدود ياجماعة هاد الشي بينطبق علينا كلنا كعرب على فكرة السبب الخامس من عندي و أرجوكم شو رأيكم بهاد الكلام يلي بالفعل هوة واقع العرب اليوم مع تحياتي للجميع و لكاتب هالكلام ((بسام الأدعشري)) :D |
يا سيدي كلام موزون وما عليه غبار
|
شكرا كثيييييييير لأنك اهتميت بكلامي :D
وشكرا اكثر لانك فتحت المجال لحتى اناقشوا :deal: شكرا:D شكرا:D شكرا:D |
اقتباس:
|
اقتباس:
وانا معروف عني ما فوت بكتب غير بالمواضيع الملفتة والمهمة وموضوعك في مشاركة فعالة وشدة انتباه للاعضاء الغير وكلامهم تسلم انت والامورة بسام الادعشري |
اقتباس:
|
اقتباس:
|
اقتباس:
|
اقتباس:
|
يسلمو
بس اسباب تسميتنا بالعالم التالث اكتر واهم من اللي ذكرتهم او اللي ذكرتهم قبلك الاخت الادعشري يعني قبل حوارنا مع بعضنا والنقاش فيه والحكم من خلال هالنقاش اذا كان فيه ادب اولا او اذا كان في حسن استماع للآخر واحترام لرأيه، أو اذا هالحوار تم باحترام متبادل لوجهة نظر المتحاورين ام لا.. في شي اهم من كل هذا وهو ربط كل كبيرة وصغيرة في حياتنا بالدين، والاعتماد على الالهة في تخليص أعمالنا وحل مشاكلنا، مما يجعلنا اتكاليين كسالى متخلفين ولانتمتع بروح المبادرة ولا نعطي اي قيمة للوقت. هذا سبب واحد من اسباب يمكن لاتحصى.. ولكن برأيي هو احد أهم اسباب تخلفنا شكرا:D |
اقتباس:
|
اقتباس:
يعني صحيح احنا لازم نعمل ونسعى بس نحنا ما بنقدر انحقق شي ولا بنقدر نساوي شي الا اذا رب العالمين سبحانه وتعالى اذن بذلك مشان هيك احنا لازم نعمل مع الاتكال على الله جل جلاله يعني يلي بدي قولو مو نقعد ونحط ايدنا على خدنا ونقول ربنا يفرجها بس لازم نتوكل على الله سبحانه وتعالى في كل اعمالنا كان بدي اتوسع اكثر بهالنقطة بس هيك رح ادخل في تفاصيل الدين وانا مني عالمة بأمور الدين بالدرجة يلي بتسمحلي اني احكي باسمو في نفس الوقت توسعي ممكن يؤدي الى التفريق بين الديانات وبهيك بنفوت بشاكل ثانية شكرا كثير على ردك وياريت تشاركنا بأسباب ثانية ورى هالتسمية :D |
اقتباس:
samsoum تحياتي حبيب بسام الأدعشري شكرا إلك :D يلي بعذب بدي عضو ها :o هي مشاركة و نقاش الحلوين :lol: |
اقتباس:
|
اقتباس:
اتفضل أخي الحبيب عطينا رأيك |
اقتباس:
بس انا ماذكرت هون الدين كسبب، من قبيل انو الدين غلط..لا ابدا..انا احترم كل الاديان..وكل واحد حر بدينه.. انا اصلا لأني ضد ادخال الدين بكل كبيرة وصغيرة ذكرت هالشي، وهذا واضح تماما بردي السابق بتمنى ترجعله. وانا مابيهمني اذا كان الدين الاسلامي او المسيحي يحث على العمل اولأ.. وحضرتك هون وقعت بنفس المطب اللي انا ذكرته سابقا.. بمعنى.. انو العمل شيء بديهي انا بحاجته ولازم اعملو لحتى اكل وعيش ..وما في داعي اني انتظر تعليمات دينية اوغير دينية لحتى تحثني عالعمل.. و شوف مثلا دول اروبية كتيرة مثل ألمانيا وفرنسا وسويسرا والدنمارك والسويد وغيرها التي تعتبر من الدول العلمانية لوين وصلت، مع انو شعوب هالدول بمعظمها غير متدينة، وشوف شعوبنا اللي بكل شيء بيحشرو الدين بالعمل وبالنوم والاكل وحتى بسرير الزوجية.شوف لوين وصلنا.. بدليل انو هالموضوع هذا تحديدا هو عنهم وعن تخلفهم..او عنا وعن تخلفنا.. متل مابدك بتمنى تكون فهمت قصدي. وتحياتي الك:D |
اقتباس:
متل ماحكيت قبل هيك للأخ ابو عقييد.. انو ربنا خلقنا مو لحتى ناكل وننام وبالاخر شي يروح عالنار وشي عالجنة.. ربنا خلقنا لحتى نشتغل ونكون فاعلين بمجتمعاتنا ، كل واحد باختصاصه مهما كان بسيط او سخيف بالنسبة للآخرين، وانو العمل شي بديهي ... بس اللي صاير هو بالفعل متل ماحكيتي.. بنقعد وبنقول الله ماراد نلاقي شغل.. او ما أذن بهالوظيفة... بس ليش بنقول هيك.. لحتى مانعترف بإنو نحنا مو مؤهلين لهيك عمل او هيك وظيفة بسبب تقصيرنا واهمالنا وعدم التحضير اللازم..فبنقوم بنرمي كل شي على انو الله ماراد لك اذا ام قاعدة بسيران (يعني نزهة:lol:) ووقع احد ابناءها بالنهر او ضربتو سيارة بيقولو انو الله هيك كاتبلو.. مابيقولو انو اهمال امه وعدم مراقبتها الو ،هو اللي تسبب بهالشي..واذا احترق بيت بسبب الاب اللي عم يدخن عالسرير.. بيقولو الله كاتب هيك مابيقولو انو غباء هالاب واستهتاره هو السبب.. الله قال اعقل وتوكل.. اظن هي الكل بيعرفها بس ماحدا بيطبقها .. الكل بس بيتوكل طبعا في اسباب في غاية الاهمية (لتخلفنا) انشالله لاحقا بنذكرها شكرا وتحياتي الك :D |
اقتباس:
|
اقتباس:
بس انا ومن وجهة نظري انو تخلفنا مو لأننا عم نستعين بالدين بكل صغيرة وكبيرة بس لأننا ما عم نستعين بيه بالطريقة الصحيحة واسفة لأني عم قول هالكلمة(ديني) بحثني انو استعين بيه في كل شي هي الإستعانة ما بضرنا بالعكس بتنفعنا وبتساعد في وحدتنا انا اسفة لأني مني مؤهلة من الناحية العلمية بالدين لحتى اشرح الطريقة الصحيحة بس يلي بدي قولو انو في طريقة غير يلي عم نستعملها هلق هي افضل وبدي قول كمان انو هالدول العلمانية يلي قلت عنها منها كاملة او منها سعيدة لدرجة انو ما عندها اي مشاكل بل بالعكس هي عندها مشاكل ما بيقدر يحلها الا الدين (لما بينفهم صح) والرجوع الى الله سبحانه وتعالى وبكرر اسفي واعتذاري مع شكري:D |
كلام صحيح:shock:
|
اقتباس:
السؤال هوة انو في ناس بتخبها سيارة بتموت و في ناس بتخبطها سيارة مابتموت ليش في ناس تسلت من تالت طابق مابتموت و في ناس بتسلت من طابق اول بتموت طيب أنت بتشوف على التلفزيو على قناة أكشن برنامج أسمو حوادث أي الله وكيلك بتلاقي في منهن بيصير معهن حوادث بتقول مستحيل لازم يكون مات بهالحادث بس مابيموت مشان هيك بيقولو هاد اللي الله كاتبو بس مو قصدهن على هالشي أنو الولد وقع بالمي لأ لما يوقع الولد بالمي هاد استهتار صح بس أنو مات بسبب أنو وقع بالمي هاد تقدير رب العالمين لأنو في ولاد بتوقع نفس الوقعة و مابتموت و شكرا :D |
اقتباس:
|
ياجماعة انا ماعم قول انو تركو الدين وصيرو كفار او ملحدين او لادينيين لحتى تنجحو بحياتكم .. اطلاقا.. انا بعرف الدين الاسلامي كتير منيح..وبزمناتي خاتم القرآن وكنت حافظ 11 جزء منه عن غيب، ويمكن بعرف بالمسيحية واليهودية شوي.. وبعرف انو هالاديان بتحث عالعمل الصالح وكل الاشياء الجيدة.. وبصدق هالشي.. لأنو هالاديان الثلاثة لرب واحد.. وبالتالي التعاليم الدينية لازم تكون واحدة .. حتى لو اختلفت العبارات اللي بتحكي عنها
انا عم قول انو نحنا عم نستخدم الدين كمظلة لحتى نبرر لأنفسنا انو نحنا ماعم نرتكب اخطاء.. وحتى لما بنرتكب اخطاء بنقول انوالله كاتبلنا نرتكب هالاخطاء.. هالكلام مابيفوت بعقلي أبدا.. لكان ليش نحنا الله وهبنا العقل؟؟ مو لحتى نميز الصح وما نوقع بالخطأ؟؟ وبعدين للأخت (بسام) الدول اللي انا حكيت عنها صحيح عندها مشاكل كثيرة جدا، بس مافينا ننكر انها دول استطاعت انو تخرج من حرب مدمرة بفترة قياسية، ومن ولا شي، شو فو شو صارت.. ورح امشي معك (اذا ماعندك مانع:lol:) بانو اذا التزمو دينيا رح يتخلصو من الكثير من مشاكلهم.. طيب.. اما نحنا فالمصيبة عنا مضاعفة.. يعني عنا مشاكل هائلة.. واعتقد اكثر بكثير من مشاكل الغرب.بس معظمها مخفي ويتم التستر عليه.. وبنفس الوقت ماقدرنا نتطور.. مع انو عنا كل مقومات التطور بالله برأيك هالشي مو لغز او حزورة؟؟ وبعدين مافي داعي للاعتذار بسبب اختلاف الآراء.. لأنو هالشي مو ذنب ولا بشوف فيه اهانة. سلامات:D |
اقتباس:
شكرا لكلامك الرائع و بدي قول بيت شعر و يلي هو "" نعيب الزمان و العيب فينا و مالي الزمان عيب سوانا"" كلامك مظبوط يامعلم و نحنا لازم نرجع نوعا على حالنا و نمسك أديانا منيح و عقائدنا منيح و نعمل و نطور أنفسنا لحتى انصير بشر واعيين و أحسن من الغرب و شكرا إلك :D:D:D:D:D:D:D:D:D |
اقتباس:
الغرب عندهم تفسير علمي لهيك حوادث وبيعرفو ليش هاد مات وليش وهداك مامات .. بكل بساطة.. ونحنا كمان بنعرف.. بس مابنعترف.. بنقول الله كاتبلو هيك يعني الفرق كتير بسيط.. وهالشي كنت بدي اكتبه ضمن احد اسباب تخلفنا... وهي .. بالرغم من انو متل ماتفضلت برد سابق انو الكثير من الاطباء والعلماء القدامى كانو من العرب و المسلمين.. مايدعونا لتحليل اي حادثة تحليل علمي ومنطقي.. عم نلجأ للدين ونقول انو الله هيك كاتب.. بينما الدول المتطورة واللي نحنا بنقول عنهم انهم كانو ينامو عالاشجار لما كنا في اوج ازدهارنا.. صارت تبحث عن الحلول وتسن القوانين لتفادي الحوادث بأنواعها.. بالاعتماد على العلم.. والعلم فقط تذكرت هون شي ضحكني:lol:.. مرة كنت باحدى الدول العربية، وقريت على لافتة مرورية موضوعة على عمود على مفترق طرق..قف بإذن الله...تمنيت لو كان معي كاميرا لصورها.. بتشوفو هالحكي معقول؟؟؟ |
اقتباس:
|
اقتباس:
أنت لو كنت عم تشتغل عند شخص و عم يجيك من عندو مردود مادي كبير مابتحلم فيه بتاني شركة و قلك صاحب الشركة ماعد بدي شغلك عندي هيك بدون سبب أو لأنك مقصر بالعمل ما بتطلب منو أنو يخليك بالشغل و بتقلو عطيني فرصة حسن حالي أو يمكن يكون هو مو حابك أصلا و أنت بتعرف أنو مارح تحلم بغير فرصة متل هي برا بتطلب منو انو يخليك بشغلك أكيد فشو بالك أنو تطلب من الله أنو يحميك و ما يصير معك حادث بسبب عطل ميكانيكي و ليس عطل بإرادة الله حبيت ناقشك أخي الحبيب بالطريقة يلي ناقشتنا فيها أسأل الله الهداية مع سعينا وراء الهداية لأن بدون السعي لا نحصل عليها و شكرا إلك ياعزيزي:D |
يا أخي العمل و التطور و النجاح كلو مطلوب منا نحنا بس الله هو الموفق شوف المخلوقات كيف عايشة كلشي رب العالمين وضع له أسباب و مسببات رح أضعها بين قوسين ((أسباب و مسبات )) يعني متل قصة الطفل و النهر السبب أهمال الأم و الموت السبب منه هو الإختناق بعد أن عرض على الأطباء المسبب بهاد الحادث هو أهمال الأم أما من وضع الأسباب و المسببات لهذا الشيئ هو الله عز وجل ..... النمل يعيش و يرزق مع أنه ضعيف الله يقدر رزقه الطير يأكل الزبابة تأكل أصغر شيئ يخطر ببالك يأكل من يرزقه الرازق هو الله كيف يرزق من الأسباب التي وضعها الله له يعني الله بيرزق الطير كيف يا اخي خلق الدود مشان ياكل منو الطير و أنبت الحبوب مشان ياكل منها الطير و هلم جر فالطير سعى للشي يلي رب العالمين سخرلو ياه هي الفكرة أتمنى يا أخي اتكون وصلت و عموما صدقني أنا حبيت النقاش معاك و ياريت اتسامحني إذا بدر مني شي و على راسي حارتك
على فكرة انا من ساروجة يعني من جوات سور دمشق يعني شامي أصلي:lol: و بحب الزكرتاوية يلي متلك مشان هيك الله محييك :D |
للأسف انا عم حاول اشرحلك وجهة نظري من منطلق منطقي(مشان ما نقول علمي او غيره)وانت عم تتعامل مع الموضوع وكأنك عم تحاول تقنع واحد غير مسلم بالاسلام.. بتمنى انو ما نتعامل مع كل واحد بينتقد العادات والتصرفات السيئة، والقناعات المغلوطة ،بسبب التفسير الخاطيء لتعاليم الدين(أي دين) يعني ما نتعامل مع هالشخص بإنو ضد الله وضد الديانات. ونصير ندعيله بانه الله يهديه ويرجعلو عقله ويمشيه على الصراط المستقيم، ويوصل النقاش لدرجة انو نبرر وجود امور تافهة، متل الشاخصة اللي حكيت عنها سابقا، بهالطريقة..لمجرد انو مذكور فيها اسم الله..وكأنو اذا انا ماكنت مشيك على سيارتي.. وبمجرد اني قريت هالشاخصة فمارح يصرلي شي، يعني حتى لو فتت بستين حيط.. بصراحة..بدي قلك يعني تخنت..وهيك عم نبتعد عن التفكير والنقاش المنطقي.. ومن خلال كلامك عم تأكد تماما السبب الاول لتسميتنا دول العالم الثالث... مع العلم بإني في ردي الاول ماذكرت دين معين وانما قلت الدين، يعني أي دين، فليش ربطت هالقصة فورا بالاسلام؟؟
بالمناسبة.. بزمناتي كنت حافظ 13 جزء من القرآن غيباً على راسي انت وكل اهل ساروجة، وكل الناس خير وبركة:D تحياتي |
اقتباس:
تاني شي لو مرقت معك آية عندما كنت عم تقرأ القرآن في آية بتقول ((و إذا سألك عبادي عني فإني قريب أجيب دعوة الداعي إذا دعان فاليستجيبو لي و ليؤمنو )) يعني بالنسبة لأنك أنت أخ مسلم فبتعرف أنو الدعاء واجب إلى الله في كل شيء و أنا لأني مسلم أتكلم عن الإسلام أما باقي الديانات ما ذكرتها لأني أحترمها و أخاف أني أذكر شيئ عنها لعدم خبرتي فيها و لكن أخواننا المسيحيين لديهم ضوابط دينية يمشون عليها تدل على الخلق الحسن و كل الأديان خير و بركة وبعتذر لأني مافهمت عليك كما زكرت أنا الصراحة اكتشفت فيك يا حبيبي أنو معدنك طيب و بتمنالك كل خير و بتمنالك جياة سعيدة مارح قلك الله يوفقك و يسرلك أمورك لأنو أنت بتعرف اتيسر أمورك من غير تدخل الرب (طبعا حسب اقتناعك بالموضوع ) و شكرا إلك و أعتذر لو أزعجتك بأي كلمة بالآخر أنت حبيب القلب و أخ بأخوية و بغيرها :D |
اخي samsoum انا اسفة لأني ما فهمتك مزبوط من الأول
بصراحة انا معك من ناحية انو ما منعمل كل عملة اكبر من الثانية ونقول هيك الله راد يعني ممكن انا لا سمح الله اكفر هلق وقول الله هيك كتبلي هو صحيح الله هيك كتب بس مو معناها انو سبحانه غيرلي فكري وخلاني اكفر ..لا ومعنى كلمة الله هيك كتب :(الله بيعرف انو هيك بدو يصير ) عندو القدرة انو ما يخليه يصير بس اذا ما خلاني اكفر وما خلاني اغلط ما بيعود في قيمة للحساب يوم الحساب لأنو الأنسان مخير وغير مسير من هي الناحية,( بس مو من كل النواحي ) ومع هيك انا ضد ضد ضد العلمانية :x وبكرر اسفي لسوء فهمي الك ولوجهة نظرك:D انا بحيي اخي ابو عقييد على شعورو بالمسؤولية تجاه دينو وكمان على دمو الحامي:gem: والله نحنا محتاجين هيك دم لحتى اندافع على ديننا يلي عم ينهان:cry: |
والله هاد العضو معو حق .. بس لسى في شي 100 سبب ما حطون
بعدين لازم دول العالم السابع مو التالت :ss: |
الموضوع كآآآآآآآآآآآآآآآآآآآآآآآآ آن عن سبب تسمية {دول العالم الثالث}
+ + + ثم انزلقتم إلى الحديث عن الأديان ..... وكل منكم عقد حاجبه وإيده على سلاحه .... كأنه في مواجهة مصيرية ... أكون أو لا أكون ... يا أعضاء .... استهدوا بالله وخلو نقاشكم حبي وطبيعي ... ولا تأخذكم العزة والتعصب ... فهي من الجاهلية ودمتم ،،،،،،، |
باعتقادي ان ما مرت به منطقتنا من أزمات وما تمر به حاليا هو العامل الأساس في ما وصلنا اليه
|
اقتباس:
أنظر رد الحبيب (الآلهة) أنظر رد الحبيب (samsoum) أنظر رد Madmax أنظر رد الحمد لله كل الردود كانت محترمة و مافيها خناق ولا معاركة ولا شي أولا و آخرا الشباب هون محترمين آراء غيرهن حتى لو مو مقتنعين فيها و انا أولهم محترم كل رد بهي المشاركة و بحطها على راسي حتى لو ما اقتنعت فيها. بس أنت كنت معصب يمكن تحياتي لك :D |
وليد عم بيحكى صح اللى بيحصل معكو هو نفس اللى بيحصل فى الوطن العارابى كما يقول ابو الزبائد
|
هـاد أجمل و أرقى حوار بحضرو و بقرأو .. و حلو كتير اختلاف وجهات النظر , لانو اذا كلنا متفقين على رأي واحد ما رح يكون في حوار .. و أكيد مـا حدا رح ينسى إنو اختلاف وجهات النظر لا يفسد للود قضية .. بالنسبة للموضوع المطروح ,, أسباب تسميتنا بدول العالم التالت كل الأسباب اللي سبق و ذكرتوها صح , و مافيني غير أخود دور المؤيدة .. بحب بس لخص و اختصر اللي سبق و تفضلتوا فيه لأنو الموضوع تشعب و تفرع .. سبب تأخرنـا (( عربياً )) طغيان الـ ( أنا ) على ( نحن ) , فكل واحد راكد ورا مصلحتو و جيبتو حتى لو كان السبيل هو التخلي عن الكرامة و سحق المبادئ و الأخلاق .... إلخ , و هالشي سببو الاقتناع بعبارة جداً خاطئة و هي ( الغاية تبرر الوسيلة ) أما سبب تأخرنـا (( كـ مسلمين )) فـهاد أشد وطأة ,, إسلامنا هويتنا , و تخلينا عنها أو استخدامها كـغطاء و عذر لكثير من الأخطاء اللي منرتكبها بيعني إنو نحنا رمينا أنفسنـا بـ مزبلة التاريخ .. بالنهـاية ,, صار العالم العربي مجرد مستهلك لإنتاج الدول المتقدمة . الموضوع كتير رائع و بيستحق إكمال النقاش و التعمق فيه أكتر .. مع الأمل بالتوصل لـشبه حل <=- مبدئياً .. و لا تقولوا : بضعة أشخاص لحالون شو رح يقدروا يعملوا .. ؟ لأني رح قول : اذا كل بضعة أشخاص فكروا هيك , بعمرنـا ما رح نلاقي حل .. ليكنا عرفنـا الأسباب , و اذا عرف السبب بطل العجب .. و ما عاد حدا إلو حجة عدم الدراية .. الأساس بالمبادرة , و اذا ما قدرت تحقق هدفك , فـ بيكفينا شرف المحاولة .. و لـي عودة أكيــد ,, :D |
اقتباس:
|
موضوع حلو للنقاش
أنا برأيي أنو كل الأسباب اللي ذكرها كل من شارك صحيحة مية بالمية وبضيف أنو نحنا شعب شاطر بالتنظير والحكي المنمق وبنفس الوقت جبان بيتخبى ورا اصبعو(عذرا على الحدية ورجاء لا تاخدو الكلام على محمل شخصي)وحتى لو حدا حاول يغير بينصاب بالإحباط سريعا وبالنسبة لفكرة تخلفنا بسبب تدخيل الدين بكل صغيرة وكبيرةيمكن صحيحة بنظر البعض بس أنا بشوف أنو المشكلة مو بالدين إنما بالأشخاص اللي عم يستخدمو-درجة وعيون ومحاكمتن العقلية هل هي منطقية أم تبعية عمياء- يعني باختصار كل واحد لازم يواجه حالو أولا ويصلحا ويساعد المقربين منو اللي بالتالي بيساعو غيرن كل بحسب معرفتو وهيك بتتسع الدائرة ويمكن نتجاوز عقدنا جيل بعد جيل للأفضل..بس نستخدم عقولنا منيح وناخد من الدين التسامح والأمان الروحي والسكينة ودمتم بود:D:D |
اقتباس:
|
| الساعة بإيدك هلق يا سيدي 20:13 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون