|
هل أنت متفائل أم متشائم من الحياة ؟
أوكيه رح أكتب هذا الموضوع لشوف عدد المتشائمين والمتفائلين بالحياة وهل عندهم رغبة بإكمالها أو أن تنتهي حياتهم بأقرب وقت ممكن .. يومياً بصادف الكثير من الناس يللي بتقول أنو متفائلة ومبسوطة بعيشتها وأنو مافي أية مشكلة بحياتهم وهني بحبو الحياة .. بينما بنلاقي ناس عم تلعن الساعة يللي إنخلقت فيها ويللي عاشت فيها هيك عيشة .. وهذا الحكي ما بينطبق بس عالفقراء وكمان عالأغنياء ويللي معهم مصاري كتير بس بتلاقيها بالرغم من ذلك متضايقة من عيشتها لأحد الأسباب .. أنا بالنسبة ألي ما بعرف شوبدي قول .. بس بالرغم من أنو حالتي المادية ماشي حالها وأنو أنجزت شغلات كتير بحياتي من إخراج صحفي عالكمبيوتر واحتراف التصميم عالفوتوشوب وبرامج التصميم الكورل والإليستريتر والبيج ماكير وكذلك إتمامي للغة الإنكليزية تماماً وحصولي بنهاية الصيف هذا على شهادة الآيلتس وكذلك اللغة الإيطالية بشكل نصفي .. ولكن مع ذلك حاسس أنو حياتي مالها هدف .. حاسس أنو الله عم يعذبني وليش ما بعرف .. في كتير أشياء بتخليني متشائم من الحياة ولهالسبب العالم بالخارج بتشوفني متشائم ومكتئب دائماً .. يمكن الأسباب بتعود لأني عشت بعيلة إسلامية منغلقة على حالها وأنا فكري متحرر وعلماني ولحد الآن عايش بينهم بس ما بقول هالحكي إلهم مشان ما يتركوني .. يمكن لأني عشت حياة طفولية سيئة كتير تعرضت فيها لكل أنواع الممارسات السيئة من ضرب دائم ولظلم وحرمان وفقر وحبس في المنزل وخصوصاً إني كنت عايش بالسعودية وأنتو بتعرفو كيف الإسلام هنيك يللي للأسف سمم أهلي بأفكار سلفية وهابية كالعادة .. يمكن بسبب مرض الأسبيكوشلاتر يللي عم ياكل ركبتي اليمين وعم يدمرلي حياتي لأنو وجع ركبتي عم يضايقتي .. وهذا الوجع يللي صرلو سبع سنين ولحد الآن ما لقيت علاج عند أكتر من دكتور .. كل ما أتوجع من رجلي باخد حبة مخدر مشان تنيمني طول اليوم وتنسيني الوجع يللي جواتي ويللي بركبتي .. يمكن لأني ما بخالط الناس والسبب هو قلة المعرفة بأهل الشام .. ولأنو ما عندي رفقات وبخجل بقول هالشي إدام حدا .. وكمان خجلي الزائد يللي كان الحبس المنزلي أكبر سبب بنشوء خجلي الغريب .. والعزلة يللي عم عيشها مع نفسي وإبتعادي عن العالم يللي صاروا ياخدوني مسخرة لإلهم عالطالعة والنازلة .. يمكن بسبب أني فاشل بالدراسة وصرلي أربع مرات عم قدم بكالوريا وعم إرسب وبعرف شو سبب رسوبي وهو أنو راسي عم ينفجر من التفكير بالعالم التانية وبحياتي قبل الدراسة .. حاولت ابتعد عن كل شي رفاهيات عني ولكن للأسف ماعم إحسن إضبط تفكيري حتى لو كنت بغرفة أربع حيطان بطاولة دراسة بس .. يا عالم بدي فوت عالجامعة وماعم إقدر لأني فاشل بالدراسة .. والله شيء بيضايق كتير .. يمكن لأني حبيت مرة وحدة عن جد وحدة مسيحية متحررة بس للأسف ماعادت تهتم فيني مع أنو بالماضي كانت مستعدة تضل معي حتى لو كلفها الأمر تروح وين ماروح أنا .. ولكن يبدوا انها تراجعت مو بس عن الحب .. حتى صداقتي معها على الحفة وأنا صابر عليها .. ما بلومها لأنو خجلي وإكتئابي بحد ذاتهم مرض معدي للغير ... وخايف يجي هداك اليوم يللي شوفها عم تقلي أنو في واحد تاني بحياتها وأنو أنا خلص صرت متل إلتك! أرجوكم أعذروني عن الفضفضة الزايدة .. ولكن حبي هالمنتدى يللي كنت دائماً متابع له وهو المنتدى الوحيد يللي فيه ناس عاقلة وبتحكي بالعقل والمنطق قبل الدين والعادات .. هذا المنتدى الوحيد يللي جعلني أحكي يلي براسي .. فآسف عالإزعاج إذا كنت ضايقت حدا.. تحية! |
صديقي ..
فضفض ... وما تحط بقلبك ... هاي أحسن شي ممكن نستفيدو من فكرة المنتدى .. انو بنتشارك الهم .. فضفض .. و بدي اتمنالك الشفا .. والنجاح ... !! انا يمكن يكون متشائل ... لأنو بعتبر انو التشاؤم مو هوي اليأس ... والتفاؤل ما بيكفي لحتى نوصل !! كل شي بيرجع لإرادة الانسان .. |
شكراً على الرد المشجع سيد قهوة دايمي .. بصراحة أنا حالياً عم فكرة بهالأسبوعين قبل كل شيء إستشير طبيب نفسي .. قبل ما تزيد الأمور للأسوأ .. بالرغم من الضغط المالي يللي أنا فيه ولكني مستعد قدم هذا الشيء مقابل عدم خسارة مستقبلي ولأسباب نفسية كالعادة ..
تحية لك! |
و الله أنا متشاءم
و لو لم تكن الحياة صعبة لما ولادنا و نحن نبكي |
اييييييييييييييييييييييه....
يا ريت ما يصير معنا اللي صار معك ..... انا متفائل مع كل الشؤم في الحياة والظروف السياسية السيئة ..... والظروف الاجتماعية الاسوأ .... لكنما يابى الرجاء يموت ....... |
اول شي بكون متشائمة و بعدين اتفاءل احسن ما اتفائل و تصيبني خيبة امل مريرة مشن هيك بس متشائمة عالاغلب و الا ما نلاقي امل بين هالتشاائم ...
|
بصراحة رغم كل المصايب يلي عم تنزل على راسي وحدة ورا وحدة ... بس سبق وجربت مصيبة كانت كتير كبيرة عليي ... من وقتها صرت لاقي كلشي غيرها سهل ... وصرت متفائل بكلشي
|
والله يا شباب انا هي عادة (التفاؤل والتشاؤم ) بطلتا من زمان
لانو بتكون الشغلة ماشية تمام 100% وما بتظبط وشغلة دعست عليها ومشيت بتلاقيها نطت بوشك ظابطة وما احلاها اي عيفونا يا لسا تفاؤل وتشاؤم وضراب السخن :zen::zen::zen: |
ال متفائل ال
والله لو شو ما صار ما بتفائل حتى لو صا كل شي حولي حلو غير ضل متشائم لاني بكون عم بحلم ثاااانك يووووووووووو سو متششششششششش |
سيدي أول شي مش غلط تروح تراجع طبيب نفسي ((يعني علشان تفضفض قد ما بدك)) تاني شي انت هلأ بالشام يعني طلعت من السعوديه يعني فيك تغير كتير شغلات من حياتك تالت شي التربية الاسلاميه مش المفروض تعمل فيك هيك المفروض تعلمك الثقه بالنفس أكتر إلا إذا أهلك ((الله يسامحهم)) كانوا عم يعلموك اياها غلط!!! يعني لما تكون متضايق كتير جرب صلي ركعتين لرب العالمين و أقرأ سورة من القرآن و اتـكد أنك رح تتحسن حتى بالنسبه لمرض جربت شي مره تدعي رب العالمين من قلبك انه يخفف عليك و يشفيك؟؟!! أهم شي لما تصلي و تدعي لربنا كون واثق انه ربنا رح ينفذ إللي بدك اياه لو مش عاجلاً بس المشكله انه نحنا ما بنصبر يعني بنطلب من ربنا و بنكون بدنا الاجابه مباشره!!! و اعتبر كلي إللي عم يصيرلك امتحان من رب العالمين أهم شي ادعي ربنا بقلب صادق و ابكي لربنا و اتذلل و ان شاء الله حتتحسن كل حياتك ((شغله كتييييييييييييييييييييير مهمه)) وانت عم تدعي كون متأكد بداخلك انه ربنا رح يستجيب و الله مريت بكتييير شغلات و لجأت لرب العالمين و الحمدلله تحقق إللي بدي اياه بعد فتره الله يخفف عنك و يوفقك بحياتك |
ما في متشائم أو متفائل على طول كل لحظة تحمل في طياتها انقلابات مزاجية
على العموم لا يمكن المضي في الحياة من تفائل فهو مثل الألوان في لوحة |
كنت حطلب تحط خيار متشائل !
لأنو انا هيك متشائلة في كتير مصايب بتصيب الواحد بحياتو خيو مصايب يمكن اكبر كتير من المصايب اللي عندك اياها ! صعب تعيش حياة مرتاحة وما فيها تعب عشان هيك لازم تعود تحلّي حتى الموت عشان ما تنفجرش وتموت بدري كتير منيح بيكون لو استشرت دكتور نفسي مش عيب نهائي ولا غلط بالعكس اشي كتيييير منيح وبيدل ع انك فهمان وبدك جد تطلع من الوضع اللي انت فيه موفق وقلبي معك |
كتير حلو هالسؤال
أنا متفائل لأنو في خير وبتشائم من اللي ما بيقول في خير ولولا مافي خير ما كنا منشوف خيار :o |
صديقي
اول شي الفشل اول خطوة لطريق النجاح بشرط انه ما يخالطه اليأس خلي ثقتك بحالك اكبر من هيك ال شي يلي حققته مو قليل والبكالوريا والجامعة مو كل شي توكل عالله واطلب منه المساعدة وحاول تفهم دينك صح قطرة الماء تحفر في الحجر بالتكرار لا بالعنف ركز اهدافك وصفي ذهنك و قول يا رب ورح تلاقي نتيجة و بس خليك صبور بتمنالك التوفيق من قلبي |
شكراً إلكم عالردود المشجعة يللي خلتني إنبسط بأنو في عالم لاحظت الوجع يللي جواتي .. اقتباس:
عموماً شكراً مرة تانية على مداخلتك اللطيفة .. وآسف من كلامك إذا ضايقك اقتباس:
شاكر إلك كلماتك الحلوة مرة تانية .. وبشكرك عالمجاملة اللطيفة منك .. اقتباس:
للأسف يا عزيزي أنا حطيت أمل الدراسة براسي مشان إترك هموم الدنية وإلتجئ لدراستي مشان عوض بالمقابل عن حياة العزلة تبعي .. حاولت إني أتفوق عالعالم يللي بشوفها عم تتسلى وأنا قاعد ببيتي وماعم إعمل شي .. حاولت إني إدرس مشان فرجيهم .. لكن للأسف طلعت بالآخير أسوء منهم وبرجع وبقول ما بلوم حالي .. حاولت صفي ذهني ولكن عبس .. تفكيري عم ياخدني ويجيبني وماعم يخليني ركز على شي .. تحياتي إلك وشكراً على الكلمات الحلوة منك |
انت متشائم لانك تحس بالفراغ ما تسميه انت بالتحرر قبلت ان تتخلى عن دينك من اجل هدف وهمي انت بنفسك لا تعرفه اخي ان كنت تؤمن بالله فسترى الخير في كل ما يحصل معك انت ترى الجانب المظلم من الحياة لانك تعيش في الفراغ الذي اوهموك بانه تحرر اياك ان تستسلم وجد هدفا تحيا لاجله وليكن هدفا يستحق ان تعمل لتحقيقه ولا تفكر كثيرا في الماضي .ان وضعت كاس ماء امامك فحاول ان ترى انه نصف مملوء وليس نصف فارغ.
|
متفائل و نص و خمسة .....:gem: |
بيقولو تفائولو بالخير تجدوه .....مافيه شي يجي بالسهل
يعني الحياه فيها مصاعب ومشاكل انو مافي حدا ماعندو مشاكل بس أكيد بأرادتنا بنعديها بخير ونكمل الطريق شو بنعمل ..هذا قدرنا :oops: |
اقتباس:
يعني أنا حاولت وصلك هالشي بس شكلي ما عرفت عبر بس Ichigo عبر عني بكلمات رائعة جداً يسلموا Ichigo على ردك الرائع جداً و ان شاء الله ربنا بيهدي romanista و بخفف عنه همومه |
اقتباس:
هي انا مو متدين ومتفائل لاني حاسس بفراغ ولا ما يحزنون ... وين المشكلة؟؟؟ غريب رايك .... |
اقتباس:
الله لا يجيبلك تشاؤم و ان شاء الله تبقى دايما متفائل و ان شاء الله تصير متدين عيني انت من البدايه هيك حياتك يعني ما تنقلت من كذا بلد على تربيه مفروضه عليك بطريقة غلط على ما بعرف شو........ و هو يا حرام من ورا هالتربيه صار يحس انه الدين هو العائق بحياته طبعا ما حتئله اترك الدين و صير ملحد!!!!!! ولا بدك تاخد ذنبه كمان فوء ذنوبك!!!!!!!!!!!!!!! بدك تخفف عنه و تبينله الدين الصح عئبال ما يتبينلك انت كمان الطريق الصح الله يهديك و تصير تصلي!!!!!!!!!!!!!!! |
مابدها سؤال..
أنا أكيد متشائمة و متشائمة كتير كمان لأنه.......:cry: |
مرحبا اخونا ما بعرف انا جديدي هون وهاي اول مرة بشارك
حلو انو انت بتقدر تفضفض ومن ناحية التشاؤم انا كمان كتير متشائمي بس انا وصلت لدرجي صرت عرف فيا انو التشاؤم عم يخليني اتراجع لورا ..... نصيحة من اخت جديدي وحابي تكون بهل المنتدى حياتنا عبارة عن حلم منعيشو والحلم رغبات مكبتوتي فينا نحنا منحور رغباتنا ونعيش الحلم مظبوط احسن ما نعيشو كابوس ..... |
اقتباس:
بس شو انا ما بصير مليح الا اذا صرت اصلي يعني ..؟؟ انا ما قلتله اترك دينك ...قلتله انه ما اله دخل لا بفرحة ولا بحزن هي شغلة روحية ما الها دخل لا بحياة ولا ببطيخ ... يعني شو ذنبه هو اذا عاش بالسعودية ؟؟( ابعدنا القدر عنها ) المهم انا مو حاسس انه الدين اله دخل .... على كل رح ضل متفائل طول عمري .... شكرا .. :D |
طولو بالكن يا شباب شو القصة :shock: :shock: :shock:
انا بشوف الحياة ع علاتا ومشاكلا وتعبا بتستاهل من الواحد ضحكة من قلبو انا كنت متفائل رغم كل شي بحياتي على الرغم ... بس يلي بيقرأ هالكم من الشباب المتشششائم .. :cry: :cry: بيبكي |
التفاؤل بالحياة شي مهم
و التشاؤم سيزيد الأمر سوءا بتمنى انك تلاقي السلام بداخلك لتقدر تلاقي الأشيا المنيحة من أي شي سئ ممكن يحصل معك يعني حاول دائما النظر الى النصف المليان من الكأس أكيد رح تحاول ترتاح وكمان انتا قلت كتير أشيا إيجابية قدرت تحققها و لهالسبب لازم يكون عندك ثقة بنفسك لتحقق أي شي بتصمم عليه بتمنالك التوفيق من كل قلبي:D |
اقتباس:
يسلم راسك:D بس انت اكيد بتعرف أنه اهم شي غذاء الروح يعني كتييييييييييييييير سمعنا عن مشاهير و مليونيريه حياتهن فيها من التحرر و المتع ما يتمناه كل فرد لكنهم بيشعروا بفراغ لأنه ما في يشبع روحهم لأنه كل هالمتع عم تروح متعتها بمجرد ما انتهت و صار الواحد لحاله و فيهم كتييييير انتحروا بسبب هدا الفراغ أو على قول حدا فيهم - مش متذكره اسمه- ((لم يبقى في هذا العالم ما أفعله أو أسعى لفعله لقد حققت و فعلت كل ما يتمناه الأنسان لذلك قررت أن أنهي حياتي و أجرب الحياة الأخرى)) يا حرام فكره رح يروح يستثمر و يستمتع بعد ما يموت!!!!!! بس شو انا ما بصير مليح الا اذا صرت اصلي يعني ..؟؟ بتصير كتييييييييييييييييييييييي ير احسن لما تصير تصلي و الله يا أخي انك رح تصير تشعر براحه غريبه عمرك ما حسيتها لا تفكر أني عم اتفلسف عليك يعني أنا صارلي تقريباً سنتين بس ملتزمه بالصلاه و عن جد كتييير شغلات بحياتي تغيرت و نظرتي لكتييير شغلات صارت أحلى و هدا الشي ما خلاني امتنع عن عمل كتييير اشيا بحبها يعني بطلع و بروح و بسهر في كتييير محلات و بسافر و بلعب:clap: و برقص بس بطريقه مختلفه و بضحك:yahoo: و بنكت :pمع زميلاتي و زملائي في الشغل و ولاد عمامي و خوالي و أهل زوجي و الله العظيم أنه عم حس نظرة الناس إللي صارت كتييييير أحلى و الأحترام زاد كتيييييييييييييير |
شو دخل الموضوع بالدين
التشاؤم والتفاؤل هوي شي بيتعلق بشخصية الانسان وبنظرتو للحياة يعني الله خلق الكون وحط فيه كل شي وعطانا العقل لحتى نحكم فيه على كل شي وموضوع التشاؤم والتفاؤل موضوع داخلي لكل فرد وما ممكن نحنا ندخلو بالجانب الديني من الانسان لأنو بهالحالة منكون رجعنا لمئات السنين لورا يعني لعند الفيلسوف الفرنسي فولتير المعروف جدا اللي كان ببداية حياتو من اتباع التفاؤلية الدينية اللي كان رائد هالفكرة الفيلسوف الالماني التفاؤلي ليبنتز ومن بعدا اكتشف فولتير انو التفاؤل بكل ما يحصل هو امر في غاية التفاهة لانو وعلى سبيل المثال من خلال قصةكانديد الشهيرة جدا بيوضح انو التفاؤل هو الوصول للسعادة الكبرى واللي مانا شرط انك تعيش بهنا وتسلية ورفاه وجسد الصراع بين التفاؤل بشخصية بانجلوس والفيلسوف المعلم لكانديد بطل الرواية اللي جعلو متفائل وبيقول على طول الرواية ان كل ما يجري على سطح الارض يجري على احسن ما يرام بينما الوقائع على الارض كانت عكس هيك هلق وتعليقي الاخير انو التشاؤم والتفاؤل مرتبطان بالحالة النفسية لاي انسان والحالة القريبة وليست البعيدة اي الحالة اليومية المعايشة بكل تناقضاتها وجزئياتها لها التأثير على الانسان بالحكم على التفاؤل بالمستقبل او التشاؤم منه
|
بعتقد انو التفاؤل بيجي من القناعة والايمان بالمقدر والمكتوب;-)
عن نفسي كلمة التشاؤم مانا موجودة بقاموس حياتي... لاني ببساطة مؤمنة بنفسي وبربي |
انو هيك الواحد احيانا.. بتفائل:shock:
بيقوم بيجي يوم نكدي هيك برجع بيتئشائم :? عاتتي.. بس عن حالي متفائلة :gem: |
بشكركم على الكلام المشجع منكم يا أعضاء المنتدى .. Miss Karmoosheh .. بعترف أنو كلامك فيه منطقية وما بنكر أنو في عالم تاركة دينها وعم تعاني من ملل من هالحياة .. ولكن أنا بعرف ناس كتير بتصلي ومتدينة ولكنها دائماً متشائمة ومتضايقة من حياتها وعم تدعي على حالها بالموت .. بعترف أني تهجمت كتير عالإسلام ويمكن أهلي والعيلة بشكل عام كانو أكبر سبب بهالشيء .. لأنو علموني أن الإسلام دين الإنغلاق والحبس والعدوانية وأنو الله خلقنا بس لنعبد وأنو مافي تسلاية بالحياة .. ناهيكم عن المشاكل العائلية الكبيرة يلي بتصير بهالعيلة المنغلقة .. كرهوني حياتي بسببهم وكرهوني الإسلام .. بعرف شب .. عم يتسلى بحياتو وبيطلع وبيسهر وبيسافر وبيرقص وعايش حياة تسلاية كلها ومبسوط كتير بعيشتو وهو قال هالشي إلي .. هادا الشب بالرغم من كل يللي عم يعملوا إلا أن بيغار على دينو وبيصلي وما بيخجل من نفسوا كونوا مسلم .. يمكن دور تربية الأهل بتلعب دور هون .. لأنو قاللي أنو عيلتي معروفة بإنغلاقها الديني وهذا يللي يخليني إكره الدين بسببهم .. وقاللي أنو لو عايش حياة إنفتاح متلوا لما كنت عم اتهجم عالدين .. تحياتي مرة تانية! |
انا والحمد لله صحي معتر وعايف حالي وكرهان الارض البمشي عليها والتياب الي لابسا ويا دوبني عم لاقي مصروفي المعاشي والرفاهي ( لا تسدقو انو عندي مصروف رفاهي هاا الله وكيلكون عايش عالضروريات فقط:cry: ) وصحي لا عندي سيارة ولا بيت ولا رصيد بالبنك ولا مصلحة ولا شغله ولا عملة ولا شهادة ولا رفيقة ولا غيرل فريند ولا حبيبة ولا حدا ولا شي:cry: ,,,, وصحي انا صوتت باني متشائم وباصرار وبقوة وبجد:oops: ... بس والحمدلله الحمدلله الحمدلله بقولا الف مرة ومرة .. كل ما بكون مزعوج ودايق خلاقي ومزنوق و متورط ورح اتشرشح واتبهدل وينخرب بيتي وبكامل تعاستي وقواي العقلية ,,,الخ ... الله سبحانه وتعالى من عندو من فوق بيبعتلي واحد او وحده او سبب او حجة او شو ما كان يفكلي زنقتي والي انا فيه وبتنحل اموري والحمدلله مع اني لاني ملتزم ولا متعصب ولا شي بس بعرف انو رب العالمين يلي خلقنا ما بينسانا :larg:ومتل ما عم ينكد علينا عيشتنا عم يفرجلنا ياها كمان .. وبالنهاية ان كنا متفائلين او متشائمين نهايتنا عالمتر ونص بمتر وما حدا اخد معو شي غير عملو الصالح لهيك انا بشتغل يلي بقدر عليه لهداك اليوم .... وانشالله بتفرج عالجميع ,,, :hart:
عيني الله هيدي اول مشاركة الي .. تقبلو فائق احترامي وتشكري على استضافتكون الي مع اني معتر وشكرا :ss:  [/b][/b][/b][/b] |
انا متشفائلة:clap:
|
اقتباس:
مليح هيك ... انا متاكد انه الله ما بهمو هالخراريف هي ... :pos: |
اقتباس:
يا الله شيطانك شو مسيطر عليك و لا تقلي لأ بس للأسف شيطانك امشيك متل ما بده :devil::devil::devil: |
اقتباس:
قطلعتي قلبي :?:?:? |
انتي شو بتسوي هون :p
|
طول ما احنا شباب لازم نتفائل امال حنتفائل امتى ؟؟؟؟ |
اقتباس:
لا انا عايز اعرف ايه هو ال....... اللي انتي متشائمة منه |
اقتباس:
:clap::clap::clap: برافو يا ريت كل الناس زيك فعلا فيلسوفة و اسم على مسمى |
| الساعة بإيدك هلق يا سيدي 02:18 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون