|
مرحبا بكم في دير بعلبة
مرحبا بكم في دير بعلبة هي منطقة من مناطق مدينة حمص العتيدة أساسها الحضارة قوامها النظافة ومن أكبر ميزات أبنائها احترام المرأة أينما وجدت و كيفما ذهبت ومهما تصرفت هلأ يلي بيعرف مدينة حمص منيح رح يقول شو عم تحكي هالمجنونة لأنو هالحكي كلو موجود بس بالقلب (بالمقلوب يعني) ف اتصوروا يا جماعة أنو أنا مضطرة روح لهونيك كل يوم رح أبدا بالمغامرة منذ الصباح الباكر وبكل التفاصيل المثيرة أولا بطلع من بيتي الساعة 7 لأنو لازم كون هنيك الساعة 8 يعني لازم فيق الساعة 6 وربع مشان لحق ألبس وجهز حالي وتوابعو المهم بطلع بسرفيس الكورنيش الشرقي (هاد كل أهالي حمص بيعرفوه منيح) يعني فيكن تقولو أشهر من النار عالعلم (وأنا بسميه سرفيس الأكابر مقارنة مع سرافيس دير بعلبة) المهم هادا السرفبس بيلففني كل حمص لحتى وصل عالمحل يلي بيوقفو فيه سرافيس دير بعلبة يعني تقريبا بياخد مني شي 20 دقيقة مع أنو لو بدو يروح قص كنت وصلت ب 3 دقايق بسسسس لأ والأنكى من هيك أني بدوخ الصبح برجع يقول المهم بوصل ع سرافيس دير بعلبة و بتمنى يا ريتني ما وصلت لك الله لا يورجيكن هالبهادل رح أحكيلكن السرافيس مهترأة جدا وغير قابلة للاستعمال البشري يعني بالكتير ممكن ينقلو فيا خواريف قولو ما علينا بس كل العالم بوطننا العربي العظيم لك وحتى ببلدان الأجنبية بحطو فيروز الصبح لأنو صوتا الملائكي بيروقك إلا بدير بعلبة من صبح الله عأغاني الحجيات ( وع المشفى يابو صلاح و دقوالطبلة ) متلا الحجية المخضرمة سارية السواس يعني هاي فيكن تقولو عندن متل إليسا عنا وأسى في من هالأشكال كتير عكلن الموضوع ما خلص أسى ألو تتمة بالحلقات الجاية مشان حطكن بالوضع يلي أنا عايشي فيه بالمناسبة أنتو أكيد عم تتساءلو أنا شو جابرني روح لهونيك نسيت قلكون أنوالإدارة الحكيمة لمدينة حمص شافت أنو أحسن محل تنحط فيه الجامعة هوي دير بعلبة لأنو أنا بدرس هندسة بيتروكيميائية .
2b continued :D:D:D |
الله يرحم طرابك يا حوومص الابية
لك اد ما الواحد حكا علية بتضل حمص حمص .. يعني تخيلي انتي حمص بلا دير بعلبة او باب سباع او الخالدية او او او .. او مثلا المخيمات اذا رايحة عليون شي مرة .. يعني خنيك الحضارة تكمن بحد زاتة .. اصلا من هنيك انطلقت الحضارة على العالم من اوروبا لامريكا لليابان .. كلون هدول اصلون من عنا .. بس هني اخدو من عنا وكفو .. ونحنا ضلينا عحالنا :p روحي اختي الله يوفقك ويقويكي وبركي معك معك بتتعودي على ناقلة المواشي .. قصدي السرافيس .. وبتتعودي عالشعب الراقي الي عايش بدير بعلبة .. ارقة علبة موجودة بحمص .. ناطر بترقب مغامراتك بحمص وبالسرافيس ومع النور .. بركي بتزكر شوي ايام زمان |
اقتباس:
هون ..حتى بياعين الغاز و المازوت ... مجبورين ( بقرار من المحافظ ) يحطوا فيروز .... الصبح ..و بعد الضهر كمان  |
معناها و انتو بلسرفيس عم تمسكو دبكة :o نيالكون عم تعملو دورة لرئص الدبكات ببلاش شو بدك احسن من هيك:clap:
|
اقتباس:
ع فكرة أنا مابحب كتيرحط فيروز الصبح بس على القليلة شي هادي مو ادبح وعالمشفى وما بعرف شو :D |
اقتباس:
;-);-) |
اقتباس:
بس بكرا لأنو عم أدرس :sick:عندي مادة بكرا ادعولي:sick::sick: |
اقتباس:
وموووووووووفئة بكرىىىىىى ادها و ادود:D |
اقتباس:
وناطرين الكمالة .. بس بعد اذنك :oops: عدلت الخط .. لأنو كتير كان صغير :mimo: |
اقتباس:
لأنو أنا حاولت كبرو بس ما عرفت شلون:D |
مغامراتي بدير بعلبة
يلا منرجع منكمل حكي
وهلأ رح أحكيلكن عن الشعب _السكان_ الأهالي المقيمين بهالمنطقة يعني تقول بحياتن ما شايفين بنات يعني بيطلعو عالوحدة كأنها جاية من المريخ وبيجأرو و بيتمعنوا وبيركزوا منيح فيك (لدرجة بحب أوقات روح أضرب الشب وقلو استحي ع حالك بأى):jakoush::jakoush: لك أوقات بكون قاعدة أنا ورفيقتي بيطلعو شباب بيقومو بيقعدوا بالقلب (بالمقلوب يعني) مع أنو كل المحلات بتكون فاضية مشان يجأرو منيح وبيبلش الصفن (تقول عم يطلعو ع شي تلفزيون) :melody::melody: مع العلم أنو لبسي عادي (محتشم) يعني مو مانطو للأرض (بنطلون جينز وتيشيرت طبعا نص كم ) مع احترامي لكل الأديان بس ديني و قناعاتي ما بتفرض عليي ألبس حجاب و مانطو وبنفس الوقت ما عندي أي مشاعر احتقار أو كره للي بيحطوه أما النساوين بهالمنطقة فبتلاقي عندن حقد دفين للسافرات يعني بحبو يوصلولك فكرة أنو أنتي فلتانة وأنا الطاهرة :x:x يعني لوضحلكن متلا بتطلع وحدة محجبة وجنبي محل فاضي وما بترضى تقعد جنبي لا بل بتقعد جنبي شب وبتقعد لحالا بمقعد مشان ما تقرب مني (بركي انعدت فلتنة) ما علينا بس أحلى شي مرة نسيت حط موبايلي silent والله غضب عليي ورن موبايلي وبلشلك ملحم زين يغني :yahoo: بس شو كل السرفيس صار عندي أنو عم يطلعو أنو هاي ليش جايبي معا مسجلة؟؟ وليش شغلتا بالسرفيس؟؟ :shock::shock: يمكن فكروني رح فوم أرقص الله وكيلكن ما بعرف شو بيفكرو:frown: بس المهم علامات الإستفهام عبت السرفيس بس وقتا عرفت معنى المتل (انشالله تنشق الأرض وتبلعني):sick::sick: عكلن للموضوع تتمة باي :D |
اي انتي التانية كنتي حطي بدل ملحم غنية وطنية:clap:
كانو رح يزفئولك:ss: يسلموووووووووو على الكمالة حلووووووووة |
طب انتي الله يصلحك . شو خطر عبالك واخدتي الستيريو تبعك مع بالميكرو .. يعني كنتي بقي بالبيت ..
ومشان اختنا المحجبي .. يعني متخيلي اخت طاهرة ولابسة حجاب ... تقعد جنب بنت ( استغفر الله ) مانا متحجبة ... معقول يعني .. شو بدا تنزل من مستواها هي لهالدرجة ... او تخيلي مثلا انو الله شافة بالصدفة شي مرة جنبك ... يعني بيصير يقول عنا انو هادا مستواها وعما تمشي مع عالم غير محتشمين ..يعني طولي بالك شوي عالمخلوقة حرام يعني وطلب صغير اخت ماوش .. مشان العالم يضلو متابعين معك مغامراتك الشيقة بدير بعلبة .. بطلب منك بكل بساطة انو تحاولي تحطي المغامرات الجديد برد عالموضوع القديم بدال ما تكون كل وحدي موضوع لحالو ...وميرسي واساتني متابع .. وبتشوق |
اقتباس:
بس اسمي ميوش |
هلا ميوش .. كمان كتير مهضومة ومتابعين ...
بس دمجت الموضوعين سوا :fglasses: |
اقتباس:
ههه حلوة : )) اهل الزهراء شو رأيك فيهم؟ :) كمان شوي مو دغري صح : ))) |
:sad:
اقتباس:
سوري لاني رح اطلع شوي عن الموضوع:oops: !!! بس انو تاريخ عيد ميلادك صح شي:?؟؟؟؟:?:shock: مدري ليش لانو بيزكرني بتاريخ مهم بحياتي:birthday:.. بس نسيان شو هوي هلق:shock: :hashish: |
:lol::lol: ايـــــــــه رزق الله هديك الايام :cry:
انو و انا كمان كان الي محطة يومية بدير بعلبة... بس مرقة طريق عالقليلة مو قعدة. هلأ السؤال الاهم.. يا معترة انتي شو اخدك على هديك الديرة؟:cry: قلبي عم يتقطع عليكي |
ياسيتي هالوضع مو بس بحمص بتلاقي وين مارحت عندنا بالبلد بعني كوني مع 4 شباب ومدرعتين وناطحة سحاب ومحجبة عند الجراج تبع البرامكة فدك تتلطشي يعني بتلطشي
المشكلة ان نحنا شعب القديم والاخلاق والتاريخ العريق ونحن بكل خطابنا الاجتماعي بنعلم كل العالم الاخلاق والي بيدبح اكتر ان هالمضاهر تتمركز اكتر بالمناطق الي فيها الناس كتير محافظين يعني لاتواخذيني روحي عيلدا او سبينة وماشابة فما بعتقد انك راح توصلي سليمة عالبيت المشكلة ان مافي شرطة بتعاقب علة التحرش الجنسي عنا بالبلد وهاد مع الكبت الي عم يعيشو الشباب عم يوصلنا لحالة القرف الي عم توصلو رفيقاتنا بالمجتمع بكل الاحوال انا متابع |
اقتباس:
|
اقتباس:
وبيتمتعو بنفس الحب لأغاني العرب يلي موجود عند أهالي دير بعلبة:clap::clap: بالإضافة لشوية تعجيأ بالألوان;-) (أحمر مع أخضر مع فوسفوري إلخ إلخ);-);-) |
اقتباس:
أي وحياتك تاريخ ميلادي صح إذا بدك بورجيك هويتي:D |
اقتباس:
سبق وقلت أنا بدرس هندسة بتروكيميائية:yahoo::yahoo: |
اقتباس:
بس مين البنت يلي بدا تروح عقسم الشرطة تسجل ضبط بواحد تحرش فيا لأنو طبعا هاي الشغلة رح أضل نقطة سودي بتارخ البنت مع أنو هيي ما ذنبا شي :cry: بالعكس هي الضحية (هيك المفروض):shock: يا أخي مجتمعنا معقد أكتر ما بتتصور:x ومشان الكبت أكيد معك حق عكلن كمل الموضوع أنا رح أحكي عن هالشغلة:D |
اقتباس:
بتزكر انو الماما راحت عالمستشفى .. وهداك اليوم مستحيل انسا ... لك الله وكيلك ما ساويتلو شي للدكتور .. وهيك تبلي شال وخبطني على مؤخرتي ... لعمى شو انو قليل زوق اي المهم هلق انو انتي بتعرفي شي واحد اسمو غيث بالصدفة شي؟ |
اقتباس:
|
اقتباس:
شايف عهالصدفة وأنا صار معي متلك بس بعد سنة وما بتعرف بجوز يكون نفس الدكتور (قليل الذوق);-);-) أي بعرف بس غيث شو؟؟ |
اقتباس:
يا ربيييي.. والله انا كان قصدي ميوش :oops: بس انو ما بعرف .. بجوز انتي مخربطة .. يعني بجوز اسمك منوش .. بس اهلك مسمينك بالغلط ميوش.. كلشي ممكن:? غيث خزام .. كمان عما يدرس بيترو كيميا .. او هندسة كيميا . يعني شي الو علاقة بهادا الدير الي بالعلبة :p |
دير بعلبة ؟ :humm::humm::humm::humm::humm::humm::humm:
وين سمعان بهالاسم انا وين سمعان في يا ربي دخلك الطريق اللي قدام الكلية ردمو او اسعتهن حافرينو ؟ :? ومن وقت ما سجلتي بالكلية كم مرة صارو حافرين هالطريق ورادمينو ؟ :shock: اي وصحي بدي وصيكي وصية شي نهار المسا هيك والدنيا برود طلعي على شباك الكلية وسلميلي على سرافيس المشرفة اللي بتمرق من هنيك :cry: |
اقتباس:
|
[quote=handsome;636215]يا ربيييي..
والله انا كان قصدي ميوش :oops: بس انو ما بعرف .. بجوز انتي مخربطة .. يعني بجوز اسمك منوش .. بس اهلك مسمينك بالغلط ميوش.. كلشي ممكن:? هلأ مبين أنت مانك عنيد بنوب:pos: مشان هيك معك حق بجوز اسمي منوش وأنا مخربطة :shock: يعني ممكن:p |
اقتباس:
هديك المرة كنت عم فكر أنو ليش أسى عم يحفرو لك بهالسنة حفروا للكهربا والتلفون والمي والمجارير وزفتوا الطريق ومشي حالو وإذ بتفاجأ مبارح أنن رجعو حفروه بدمن هالقصة |
اقتباس:
|
اقتباس:
اي المهم انو خلص انا بصير عيطلك باسميك الحقيقي منوش .. وانتي دبري حالك بالنفوس كيف رح تغيري الاسم .. وبالله هلق وقت الواحد بدو يروح عالمرور محل ما بيطلع الواحد شهادة السواقة ... ما بيمر كمان ادام كليتكون .. لك صحيييي ما كمان في عندكون بالكلية ندوة .. في مرة ابن خالتة للماما اخدة فترة .. بس ما بعرف اذا اساتو اخدا ولا لاء .. بس بتزكر انو كنت مرة هنيك من شي اربع سنين تقريبا ... وكانت وقتا حلوي الكلية من جوا ... يعني مقارنة مع الجو الخارجي بتطلع متل الجنة ... |
اقتباس:
ومشان المرور لأ بعتقد المرور ع طريق حماه مو عطريقي أي صح كليتنا كتير حلوة من جوا مقارنة بالجو الخارجي و حتى مقارنة ببقية الجامعات خلص أنت معزوم أيمت ما بدك تعى وبقعدك بالندوة كمان:gem::gem: |
اقتباس:
دقيقة شوي !!!! انا شامم ريحة عزيمة بالموضوع :melody: .. غمضي عين فتحي عين بتلاقيني صرت عندك .. اول كورنيش شرقي باخدو من تحت البيت .. واذا مانو فاضي .. بقلع شي واحد وبطلع محلو .. |
شوفيرية دير بعلبة
يلا هلأ تعو لأحكيلكن عن الشوفيرية بدير بعلبة
رح أحكي عن أشهر تلات نوعيات الأول ..هوي شوماخر:yahoo: هيدا الله يكرمو بعوزو كتير وقت الفحوصات وقت بكون متأخرة كتير لأنو الطريق بياكل مع غيرو تقريبا 20 دقيقة بس هوي بيوصلك ب 3 دقايق (والله ما عم أمزح) شلون ما تسألوني يعني مستعد يفعس كل يلي قدامو مشان يوصل أول واحد عالكلية:x مو مشان شي مشان يحافظ عاللقب(شوماخر) و من أقوالو (والله يا معلم مسكتلك الطريق من أولتو للآخرتو و مانزلت عن 140 مع أنو أجى قدامي ولد صغير راكض ورا الطابة بس محسوبك ضربلك نقفة دين فرين أي والله الركاب بوسو القزاز القداماني):pos: يعني صدقوني وقت بركب معو بحس حالي بالhappy land :yahoo: أصلا كل الركاب يلي عندن أمراض قلبية مستعدين يضل كل النهار ناطرين السرفيس ولا يركبو معو بس أنا بركب:gem::gem: بس للأمانة شوماخر كتير قلبو طيب(حبوب يعني) مرة طلعت معو أنا ورفيقتي وكان عم ياكل سندويش وحلف بالطلاق ألا بدنا نشاركو الأكل قال مل بيطيق ياكل لحالو (بس طبعا ما أكلنا):sick::sick: النوع التاني هوي عمو البصباص:x هيدا شوفير عمرو شي مية سنة بس الحمدالله روح الشباب موجودة ونفسو خضرة عالأخير يعني تصورو شوفير عم بسوق وعيونو لورا وليكون بعلمكن هوي ما بيطلع بالمرايا(مشان ما يشلأنا ) لأ بيندار كلو لورا مشان تكون الرؤية واضحة مية بالمية;-) ومن أهم ميزات هالأخ أنو حبيب مطبات :o المعنى أنو كل العالم عالمطب بتنزل السرعة إالا هاد يعني بس يشوف المطب بيركب عالرابع و بيركض لعند المطب ركض وبتلاقي هالركاب عم يطلعو وينزلو بهالسرفيس مع شوية كفريات من بعض الأخوة المعصبين أنا هاد ركبت معو شي 3 مرات و بعدين حرمت :sick: |
هلق أنا ما حشارك بالموضوع مو لأني من دير بعلبة لا أنا مو من هناك يمكن مر بالشهر مرة من هنيك
بس ما حشارك لأنو يعني بكره حالي بس اسمع اسم دير بعلبة لك يا ناس والله اسمها غلط ومو حلو يعني انا لو محلك بنقل فورا على جامعة الشويفات الخاصة او عالقليلة القلمون مو |
اقتباس:
لانو على حد علمي انو هاي جامعة الشويفات الخاصة .. بس للدراسات العليا تبعيت الطلاب الذين لا تتراوح اعمارهم عن ال 18 سنة .. بعدين بيقلعون .. يعني هيك جامعات بالعادة يطلق عليون بالغة العربية السورية الحمصية الفصحة .. مدرسة .. بس ما بعرف بجوز ترقت لجامعة عهالايام .. |
اقتباس:
|
| الساعة بإيدك هلق يا سيدي 14:02 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون