|
الرب يسوع المسيح يريد أن يشفيك فهل أنت مستعد ...
الرب يسوع المسيح يريد أن يشفيك فهل أنت مستعد ...
الأمراض تتكاثر بسرعة كبيرة هذه الأيام و عيادات الأطباء مزدحمة و الكل يتذمر من أن كثيراً من الاطباء لا يقدر حتى على تشخيص المرض او معرفته رغم التقدم العلمي و رغم التحاليل و الصور على أنواعها ، المرض قد يكون بسبب الخطايا أو بسبب الابتعاد عن الله ربنا قال لمشلول بركة حسدا : " إذهب و لا تخطئ لئلا يكون لك أشر " و هو القائل : " صلوا و لا تملوا كي لا تدخلوا في تجربة " ، ليس علينا أن ننتظر وقت المحنة او العاصفة حتى نطلب مساعدة الله ، الله حاضر ليشفينا و الرب مكتوب أنه عندما صلب لم يأخذ آثامنا و حسب بل أيضاً أوجاعنا .. أشعياء 53-4 لكن احزاننا حملها واوجاعنا تحملها ونحن حسبناه مصابا مضروبا من الله ومذلولا كل من آمن بالمسيح أحس أن أطناناً من الاوجاع و الهموم قد زالت عن كاهله ، و هو وحده ملأ الفراغ الروحي في قلبه .. كلنا يعرف أن الرب يسوع المسيح هو الشافي الأعظم في تاريخ البشرية و ما من أحد قدم إليه بالإيمان حتى و لو كان أممياً و ملحداً طالباً الشفاء إلا و حصل عليه ، و كلمة الله تقول أن المسيح هو هو أمس و اليوم و إلى الأبد يروي الكتاب المقدس قصة قائد في الجيش الروماني يسمى قائد المئة أي 100 جندي .. مرض خادم له و كان يحبه فتوجه لعند الرب يسوع و قال له غلامي مطروح و هو مفلوج يتعذب فقال الرب : أنا آتي و أشفيه .. (( ما أعظمك يا رب )) و لكن قائد المئة الوثني قال يا سيد لست مستحقا ان تدخل تحت سقفي.لكن قل كلمة فقط فيبرأ غلامي تصور مدى إيمانه فأجابه الرب و قال أمام الجموع : 10 فلما سمع يسوع تعجب وقال للذين يتبعون.الحق اقول لكم لم اجد ولا في اسرائيل ايمانا بمقدار هذا. 11 واقول لكم ان كثيرين سيأتون من المشارق والمغارب ويتكئون مع ابراهيم واسحق ويعقوب في ملكوت السموات. 12 واما بنو الملكوت فيطرحون الى الظلمة الخارجية.هناك يكون البكاء وصرير الاسنان. 13 ثم قال يسوع لقائد المئة اذهب وكما آمنت ليكن لك.فبرأ غلامه في تلك الساعة الرب لم يجد من بني اسرائيل الذين اتى لبشراهم إيماناً مثل هذا القائد الاممي الذي آمن بل و كانت ثقته بالرب كبيرة و أظهر تواضعاً إذا قال له : لست مستحقاً أن تدخل تحت سقفي !!! لكن قل كلمة فيبرأ غلامي ...و كان له ما أراد .. إن كانت لك الثقة بالرب و تواضعت و طلبت منه فتأكد و ثق أنه سيشفيك .. كن مؤمناً ، اهم علامة هي الإيمان ، دائماً كان ربنا يقول : إيمانك شفاك إيمانك خلصك ، تأكد أن ما من مرض ( لا جسدي و لا روحي ) يصمد أمام دم المسيح و حضوره ، صلي هذه الصلاة ثم اشكر الرب ..الرب يريدنا شاكرين له - تذكر ذلك شاكرين في كل شيء .. أيها الرب يسوع المسيح آتي إليك فاشف نفسي و روحي من كل أمراضها و املأني بروحك ، غسلني بدمك الطاهر ، ضع يدك على رأسي و أمر بشفائي يا رب في الحال ..و لك كل الشكر إلى الأبد آمين ... (( مهما كنت تأكد أن الرب يسوع يريد شفائك - صلي و ابدأ بالشكر على شفائك من دون أن تتوقف لحظة واحدة , اشكره أيضاً على ثباتك بالشفاء )) و سريعاً ستشعر بتحسن كبير ، سر مع الرب و الله يباركك . آمي |
شكرا على الموضوع
على العموم كل الردود هي خارج الموضوع الاساسي و الرب يشفي بكل الطرق لانه هو الشافي الوحيد |
تم حذف كل المشاركات الخارجة عن الموضوع ...
وياريت ما ننسى انو هون اللاهوت المسيحي مو حوار الأديان .. |
الظاهر ما انتبهت للملاحظة من قبل المشرف تم حذف كل المشاركات الخارجة عن الموضوع ... وياريت ما ننسى انو هون اللاهوت المسيحي مو حوار الأديان |
ما فهمت وا مين مع مين
طي انتو كاتبين انو بدو يشفينا طيب من شوووووووو ؟؟؟؟؟؟؟؟؟ اسرد الامراض يا للي يتم الشفاء منها |
اقتباس:
2 = من كلشي 3 = إقرأ الموضوع أولاً >>>> ;-) |
اقتباس:
كرمال هيك يا عمي طلبنا منك تفهمنا وين نحجز وئت بالعياده بعدين منك حاطط متى موعد الغدى بالعياده بتاعك لورد تحياتي |
اقتباس:
|
لو فعلا اللى بيؤمن بيسوع مفيش اى حاجه بتاثر فيه حتى لو شرب سم فياريت تشرب سم وتجرب تخليه يشفيك
وبعدين لما واحده راحت له وقالت له يشفى ابنها قالها لم ابعث الا لخراف بيت اسرائيل الضاله فلو انت اسرائيلى ممكن |
يخزي العين عليك با ميلكو ... هلاء انت هيك فهمت الموضوع:?
مابينحكى معك شي لآنو واضح هالنظرة الراقية لدين من اديان الله وادمكم الله :D |
اقتباس:
يعني الله يديم التخلف... ستين الف مرة قلنا خلو هالناس بقصص الروح يعني شو دخل الايمان بالامراض الجسدية يعني بالفعل شعبنا شعب مفلس شي بيومن بالتداوي بالايات وشي بيومن بالصلاة للشفاء ... اليوم كان عنا فحص عن الحركية العضوية وتاثيرها عالجسم البشري يعني شي بالفعل معقد وراقي بنفس الوقت الناس عم يفكروا ,ينتجوا ويعالج بنفس الوقت ومابيحملوا القوي الغيبية الي مابطعمي خبز اوجاعهن فيقوااااا |
مدري ليش منئرا هيك موضوع ومنطلع أذا كان مو عاجبنا أو مو من ضمن معتقدنا . لأنو معتقد ناس تانيين مقتنعين فيه ولأنو ماعم يهاجم معتقدنا .
فوينون يلي بيهاجموا كلمة مسلم بموضوع متل موضوع (فضيحة بل كارثة أدخل وشوف). ليش لما بيفوتوا على هيك مواضيع مابيئولوا هاد كلام أو موضوع طائفي :o |
القسم كلو طائفي وعلى اساس تمت ازالتو..
وانا بتمنى ازالتو من كل قلبي كمان.. بغض النظر عن الموضوع الي فيو استخفاف للعقل متل كتير مواضيع دينية. انا بتمنى ازالة هالقسم كاملاً. |
اقتباس:
تانيا ليش لينزال شي ماعم يهاجم معتقدك أو يلغيه :? |
اقتباس:
ثانياً : الغاء القسم لأنو بيعطي منحى طائفي أو ديني لمنتدى أخوية الي بيسير نحو العلمانية المعتدلة والي بيتبنى هالنهج. وهيك قسم بتحسو طائفي و وجودو غير مبرر. ووجودو يقود للتسائل ليش ما في قسم اسمو العقيدة الاسلامية مثلاً. ورح يتحول المنتدى لحرب وغزوات. لذلك الحل متل ما قلت بتحييد الدين جانباً. والغاء هالقسم الطائفي. |
اقتباس:
|
أخي باشق مجروح بدك اتطول بالك شوي أنت والأخ المحارب العتيق
لأن المطالبي بإلغاء هالقسم فيها شوية إحراج للأسباب التاليةك 1- لما تأسس هالمنتدى تأسس على أساس مسيحي مشان هيك الشعار تبع المنتدى مايزال مسيحي واللي هوي : أنتم ملح الأرض ولكن إذا فسد الملح فبأي شئ يملح 2- أسمو مسيحي "أخوية" لان كل المجموعات بالكنايس بتجتمع تحت اسم أخويات 3- أنا اتسجلت بهالمنتدى على هالأساس وإذا بتشوف إيمت اتسجلت بتعرف إنو من هداك الوقت كان هيك المنتدى . "صح أنا ما بشارك كتير بس أنا على أطلاع على طول على المواضيع" 4- متل ما إنو أصابع إيديك ما بشبهو بعضهم مشان هيك ما راح تشوف كل المواضيع بتشبه بعضها ...يعني ممكن يكون في بهالقسم مواضيع مهمي وممكن يكون في مواضيع بايخة. ومتل ما جاوب توت توت توت إنو هون قسم اللاهوت المسيحي مو قسم الحوار ... مشان هيك ما حدي مجبور يفوت لهون إذا ما بهمو الموضوع. وفكرة انو هالقسم طائفي هاي شوي صعبي لان ساعتها راح يكون كل المنتدى طائفي لان هالقسم متل ما قلت سابقا انو من اساسيات المنتدى لان هالشي قاله مؤسسي المنتدى لما التقيت بهم في حمص. وبما انو المنتدى فاتح المجال أمام الجميع إنو يعبّرو عن آرائهم معناتها المنتدى مو طائفي وبالتالي أقسامه مو طائفية فمع كل محبتي وأحترامي بقول إنو هالقسم أساسي، بس ما نحكم عليه بالإعدام إذا شي شخص كتب فيه موضوع بايخ. والله يبارك الجميع |
اقتباس:
حتى العلمانية تعتبر ( دين ) لدى البعض فبهذا الأقصاء يكون العدل ناقص يمكن الأتفاق على عدم مهاجمت الأديان أما أعتبار أن العلمانية يجب أن تتبع و إلغاء كل شيئ يمت بصلة الى الدين أذا نحن في عصر الألحاد يجب عينا أن نتقبل بعضنا البعض و الحضارة تتكون من أديان و معتقدات مختلفة و هنا الأمتحان في التعايش بين مختلف الناس على مختلف عقائدها و مشاربها الفكرية في التعايش السلمي هذا ما أعتقد أخوية نموزج عن الحياة السورية و من ناحيتي لا أستصيع أن أرى سوريا بدون جامع أو كنيسة تقبلو حبي و تحياتي أخوكم حلبي :D |
اقتباس:
بتحس ببعض الأزدواجية بكلامو أحيانا ؟ :D |
المقصود أنو كلام أخي حلبي منطقي جدا
عل أن يقرأه الكل ويفهموه ليعملوا به :D |
الي انا بستغربو ان ليش بينحرف الحوار هالقد لما بدنا انعالج موضوع ديني ؟؟
يعني القصة بكل بساطة ان واحد جايب موضوع بالقرن الواحد عشرين عن ان شي غيبي راح يشفيه من امراض وان كل هالعالم الي عم تشتغل منشان تنتج هالادوية وتعالج هالمرضي مالهم معني اذا ما اتمسكنا بهالغيبيات!! الرد خليه بعيد عن دين كل واحد منا وخليه يكون بحدود المنطق تحياتي اممي:D |
اقتباس:
التعاليم الدينية أثبتت فوائدها لمن يطبقها في مكانها الصحيح و العكس لمن لم يفهمها ولذا نحتاج للعلم و التحاور و النقد البناء تحياتي و حبي للجميع حلبي :D |
وانا كمان من رايك اخى حلبى واؤيدك اياه |
عيسى عليه السلام معجزتو كانت اشفاء المرضى
بعصرو و زمانو كانو مشهورين بالطب وقتا مشان هيك الله عطالو هالمميزات اللي عجزت غيرو... و فعلا |
هلق الموضوغ بديرة والردود عليه بديرة تانية بعيدة كل البعد عنه مشان هيك بدي احكي على كل شي برد منفصل :
الموضوع : مما لا يخفى على قارئ الانجيل الامعجزات اللي قام فيها المسيح والتي منها : اقامة الموتى ..... شفاء المخلعين...... فتح اعين العميان ........ تكسير الخبز والسمك ......... المشي على المياه ......... تهدئة العاصفة ........ طرد الشياطين .......... وبالنهاية القيامة من بين الاموات واللي تعتبر اساس الديانة المسيحية . هاد الحكي بدنا ما ننسى انه موثق من عالم عاشوا مع المسيح " يوحنا ومتى " ومن عالم كانوا من رسل المسيح " موقس " او من عالم كانوا على اتصال مع المسحيين الأوائل " لوقا " مع الملاحظة ان لوقا كان طبيب مثقف وكان بمعلوماته اللي جمعها بيرجع لأكتر من مرجع حتى انه كان باتصال مباشر مع مريم العذراء مما اعطى لانجيل اللي كاتبه طابع التحري للحقائق . الفكرة والعقل : كانسان عائش في القرن ال 21 يعتبر هاد الحكي شي خيالي وشي مانه صحيح الحكي هاد يمكن يكون عبارة عن خدع قام بها المسيح يمكن كان عبارةو عن مشعوذ او ايا كان . لكن بتفكير انسان القرن ال 21 في شغلات لازم ما ننساها : اولا فكرة وجود الله او عدم وجوده طرحت على الطاولة بنقد موضوعي تام اللي . العلم عبيتطور وعبيوجد تفسيرات لكل شي لكن برجع بقول لكن في كتير شغلات لا يمكن الاجابة عليها " حاليا " يمكن يكون في الها تفسيرات منطقية جدا نسمعها مع الايام لكن بحسب التفسيرات هي يوجد شيء لا يمكن تفسيره احداث موثقة تنص على بعض العالم اصيبوا بتشوهات وتم شفائهم بشكل كامل وقطعي ونحن بالحارة في انسانة صار معها معجزة وانا ضخيا لو ما كنت بعرفها بشكل شخصي ما كنت صدقت ابدا الشي اللي انحكى او اللي صار مشهدها وهي عبتروي قصتها والدموع عبتنزل من عيونها بعتقد كانت كافية لمنحها المصداقية خصوصا اني بعرف وضعها الماضي وبعرف قدراتها العقلية . اكيد اكيد اكيد في جزء لا يمكن تفسيره بالعلم دائما ابدا ومع كل التطورات يوجد شيء مجهول شيء لا يمكن تفسيره . خلينا نرجع للموضوع : ايمانك شفاك قم احمل سريرك وامش . ايمانك شفاك قال المسيح : لو كان لكم ايمان بحجم حبة الخردل لقلتم لهذا الجبل تحرك . جملة اقتبستها من الانجيل فقط لفكرة هل للمسيح قدرة شفاء الروح . مع كل هاي الاشارات المتعارضة في جزء لا يمكن غض النظر عنه الجزء اللي العلم والعقل لا يستطيع ايجاد تفسير له من ظهورات للمسيح ومن عجائب تقوم باسم المسيح . انا كانسان عايش بالقرن ال21 اكيد عقلي بقول لي هاي خرافات وشعوذات لكن ما ننسى في اشارات واضحة ما بقدر كانسان عقلاني ارفضها واحاول اتجاهلها . عقلي اللي بقول لي هي خرافات بيعجز امامها وما بيقدر غير يقول فعلا في الله . |
الردود :
اكيد بدها تكون تهكمية ومصخر لعدة اسباب : بداية يجب يجب يجب يجب على المسلم تكذيب هذه المعجزات والتشكيك بصحتها ليس بهدف التشكيك بل لهدف ابطالها السبب بمجرد تيقن المسلم او النظر إليها على انها صحيحة حيكون بطريقة او باخرى عبيوقع بحرف نفسية كاملة " هل المسيح هو الله " ما بيخفى ان الله قادر على كل شيء وهاد شي متعارف عليه لكن هنا المسيح يعمل كل شيء بيرجع بحط استفهامات واشارات تعجب ، عملية التشكيك برجع بقول لهدف وحيد ابطال فكرتها وليس للتحقق من مصداقيتها وطبعا هاد ما بيندرج طبعا تحت باب " الشك المنطقي " هل هو تصرف آني ام سابق : للاسف الشي هاد مانه جديد واكيييييييييد سيتم التشكيك برواية شخص او برواية شاهد او اخ او قريب حتى وان كان شاهد عيان . منرجع لفكرة او اطار اكبر من هيك بكتير شي بعيد شوي لكنه مرتبط ارتباط وثيق بالفكرة هي : ما في مسلم على سطح الكرة الأرضية إلى يردد جملة " الانجيل محرف " بس ما حدا بيسال حاله ليش !؟! الفكرة تبع السؤال بتشوفها هون : لمجرد ايمان المسلم ان الانجيل " غير " محرف فهو بشكل او بآخر عبآمن بالحكي اللي كتب فيه مع العلم ان المعجزات اللي قامت على يد المسيح لا يمكن اعتبارها من مصدر بشري ولا يمكن النظر إلى القائم بها على انه انسان عادي مما يدعم فكرة " المسيح الاقنوم " . طب حتى هون فين المشكلة اذا نظر للمسيح انه اقنوم ؟!!؟ يا سيدي هون بتنبع المشكلة : اذا نظرت للمسيح على انه جزء من الله العقل البشري بطيبعته بميل إلى فعل المقارنات . وا أسفاه شو بدها تكون نتيجة المقارنة " بلا تعليق " بين التعاليم . بمعنى آخر الردود كتييييييييييير منطقية لا بل تكون عكس هيك اكيد بدها تصير " غير منطقية " المسيحي يشكك من باب البحث عن حقيقتها " الشك المنهجي " المسلم يشكك من باب تحض حقيقتها ليس إلا " الشك الغير عقلاني " |
جابي كلامك صحيح.
للمسيح القدرة على الشفاء . وانا ما بختلف معك. بس نحنا كان تعليقنا ع القسم ككل. وعلى الاستخفاف بشكل خاص وغير هيك شبهتو بالمواضيع الدينية الاسلامية بشكل خاص يعني متل لما تفوت على موضوع اسلامي وتشوف هيك شغلات. الشفاء بالقرآن وغيرها انت كمان رح يكون الك ع الموضوع تعليق. انا ككل بشوف انو اخوية غير محتاجة لهالقسم وهي وجهة نظري الخاصة. انا بشوف مع ايماني بوجود قدرات الشفاء والكرامات لكن هناك عامل نفسي ومنرجع للـ placebo عند اختبار اي دواء جديد. يعني العامل النفسي الو تأثيرو ومن اهم هالشغلات الارتباط العقائدي بالخالق والرب. |
اقتباس:
بس بنصحك ما تتعمق كتير لأنه اذا بجك تدخل هل يوجد معجزات ام لا بدك توصل هل يوجد خالق ام لا اذا تعاملت مع الفكرة بنفس الطريقة المنهجية العقلية البحتة بده يزيد عدد الملحدين واحد على ما اعتقد لأن فكرة الله تعارض العقل بكل بساطة لكن الايمان بالله فكرة متفق عليها مع تعارضها مع العقل على نفس المقايس تفضل نجرب فكرة المعجزات يرفضها العقل لكن وجودها هي حقيقة مجبر العقل على الوقوف امامها والنتيجة " قوة خارجية غير معروفة " او " لا يوجد تعليل " |
اقتباس:
بس بنصحك ما تتعمق كتير لأنه اذا بجك تدخل هل يوجد معجزات ام لا بدك توصل هل يوجد خالق ام لا اذا تعاملت مع الفكرة بنفس الطريقة المنهجية العقلية البحتة بده يزيد عدد الملحدين واحد على ما اعتقد لأن فكرة الله تعارض العقل بكل بساطة لكن الايمان بالله فكرة متفق عليها مع تعارضها مع العقل على نفس المقايس تفضل نجرب فكرة المعجزات يرفضها العقل لكن وجودها هي حقيقة مجبر العقل على الوقوف امامها والنتيجة " قوة خارجية غير معروفة " او " لا يوجد تعليل " |
اقتباس:
بس بدي اقول لك كام شغلة : انا متل ما قلت لك مريت بفترة إلحادية طويلة لكن ما قلت لك انا بصنف حالي كنت " ملحد مسيحي " بدك تقول لي كيف ملحد ومسيحي بنفس الوقت الفكرة هون هية الأخوية متل ما الكل بيعرف عن طريق التعريف عن نفسها على النت ببقية المواقع او حتى باسمها وبشعاراتاه في جانب مسيحي باتعبار انه بالاصل كان موقع تابع للكنسية كون الكنيسة تخلت عنه والشباب استلموه وطوره بس حافظوا على طابعه المسيحي الكنسي . انفتح باب التسجيل للكل وصار في اخوة وانا فعلا بقول اخوة من كل الاديان حتى اذا بتنتبه الملحدين اكتر من المسيحيين بالأخوية مشان هيك تم وضع قسم حوار الاديان اللي اثبت فشله وتم اغلاقه وهلق عبنته له تم حذفه حتى الشي اللي بقي من آثار الاخوية القديمة هوي هاد القسم " اللاهوت المسيحي المعاصر " وجوده لا يعني انه طبّع الموقع بالطابع المسيحي لكن بنظري طبعا بشوف غيابه بده يفقد الموقع من طابعه الاصلي ومن شكله اللي تعودنا عليه على انه " ملتقى للشباب المسيحي وبقية الاديان " انا عبحكي وجهة نظري وما بمثل حدا بالأخوية لا من مشرفين ولا من اعضاء عبحكي وجهة نظر شخصية . للاسف الانترنت مليء بشكل كبير بالمواقع اللي بتحمل الطابع الاسلامي لا بل بعضها بيحمل الشكل التهجمي حتى اني شفت باحدى المواقع قسم خاص بفضائح المسيحيين . كون الأخوية علمانية لا يعني انها صارت الحادية قلت من قبل زوال كلمة " الله " من الأخوية شي حلو وبعتقد منكون صرنا هداك الوقت اخوة بكل معنى الكلمة ما بيفصل الدين بيناتنا لكنه شيء صعب انا ممكن اتقبل او اشوف موضوع مبني على فكرة مسيحية او عقيدة مسيحية كون الأخوية كان بيحمل هاد الطابع ومانه غريب عنه . بالأخير مانها فكرة تطبيع الفكرة هية الحفاظ على الطابع . شو ما قال العالم عن الأخوية وكيف ما قيموها بتبقى الأخوية هيي الاخوية نفسها اللي انتسبت الها من سنتين وبعتقد فكرة تغير طابعها او اختلافه ما بقدر اتقبله لأني هيك تعودت على الأخوية وهيك حبيتها وهيك انتسبت الها وهيك تعودت عليها . موقع يحمل كافة الجنسيات والأعراق والأديان وبنفس الوقت يمتلك طابع مسيحي معتدل . بنظري هاد الشي اللي بميز اخويتنا عن بقية المواقع :D |
صراحة باشق انا كنت عبحكيك من قبل بالجامعة بعد ما كتبت الرد وانا نازل على البيت عبتمشى خطر ببالي شي 1000 فكرة عنجد صار راسي يوجعني وتمنيت اكون قريب من شي محل انترنت حتى فوت واكتب الشي اللي عبيخطر لي بلحظتها بس الشي الي كان عبدور براسي هوي :
هل العلمانية او اعتبار العقل مصدر كل شي ممكن تطبع بالدين ؟ شوف شو طلع معي . العلمانية هي وجهة نظر العقل بالأمور ومن اهم اعتباراتها ومنطلقاتها واللي هي اساسها " اساس ومنطلق وهدف بنفس الوقت " انها لا تؤمن بالخرافات وكل شي يعبر عنه على ارض الواقع فهو متداول مشان هيك منشوفها بتحط فكرة الله " الخرافية او الخيالية " على جنب وبتناقش الأمور على الطاولة . طيب خلينا نشوف البلاد اللي فيها العلمانية هي الشي المقدس البلاد الأوروبية . بعض البلاد الأوروبية رافعة شعار العلمانية وبنفس الوقت مثلا بتشوف انه علم الدولة او شعارها داخل فيه الصليب بشكل او بآخر فكيف علمانية وصليب بنفس الوقت . هاد هوي الشي اللي كنت عبحاول اعبر عنه بالمشاركة اللي قبلها عن العلمانية. العلمانية ممكن تكون نتيجة ثقافة معينة نتيجة تطور دين معين . طيب الدول هي اذا بدها تصير علمانية هل من المطلوب حتى تصير علمانية انها تهدم كافة الكنائس والمنظمات الدينية اللي فيها . اكيد لا بيكفي انها رفعت طابع الدين عنها وتحررت من قيوده حتى تحولت للعلمانية بس هاد ما بيعني انها نفت الدين بشكل كامل او تخلصت منه بيبقى في شي الها اصول دينية وانا متاكد من الحكي اللي بدي اقوله واللي هوي انه لولا انتمائها الديني هاد بالأصل ما كانت فكرت تصير علمانية . على مستوى النت اذا حصلت النقلة بتحويل الأخوية من الموقع الديني المسيحي الى العلمانية " وهاد اللي صاير هلق " لازم لازم يبقى في شي ديني بيربط المحل هاد فيه . حتى اذا ما كان في شي بعتقد الأخوية هوي الموقع العربي الأول واذا ما كنت غلطان الوحيد اللي بيتخلى عن الصفة الدينية للتحول للعلمنة وهي لحالها انجاز للمشرفين على الأخوية . بتقدر تسحب القصص هي على بعضها لأنها بالاخي كلها مربتطة باعتبار الأخوية مسيحية وانا عند كلمتي فقط لأنها مسيحية قدرت تعمل النقلة هي التحول من الدين غلى العولمة النقلة اللي بعتبرها شكل من اشكال الحرية اللي بتمنحه الديانة المسيحية لروادها . بالأخير بتمنى اكون وصلت لك فكرتي بشكل افضل من قبل :D |
فكرتك وصلتني . صحيح الصياغة التانية أوضح بس وصلت.
ازا بدك تاخود الامور كمجتمعات دينية متدينة انا بعترفلك انو المجتمع المتدين المسيحي قادر اكتر بكتير على التحرر والتطور وعدم الخوف من الانتقالات والتحولات. انا قصدت انو العلمانية الي مندعو الها نحنا هي مو سحق الدين .. لأ بالعكس العلمانية نظام لحفظ الدين. عندما يأتي النظام العلماني مساوياً الناس بالحقوق والمواطنة هوي بالتالي عم يمنح المواطنين حقهون بالتعبد والاعتقاد بعيداً عن ضغوط او قيود ممكن تمارس بظل غير انظمة. أما الاحتفاظ بالرموز الدينية كما قلت انت كالصليب على علم الدولة او ما شابه فأنا بشوفو ارتباط بالتراث اكتر ولا مانع منه شرط ان لا يعطي الدولة اي طابع ديني. لو كان القسم هادا بأخوية مجرد رمز وارتباط بالتراث تماماً كالرمز على علم الدولة لما طالبت بالغاؤه وكان بالنسبة الي متل الشعار الموضوع تحت اسم اخوية وشعارها ((انتم ملح الارض)).. أما وانو اخوية تحت طابع علماني وفيها قسم نشيط من هالنوع فأنا طالبت بالغاؤه... حفظاً للمعتقد وللدين اخترنا العلمانية نظاماً وحولنا العلاقات مع الناس من دينية الى انسانية. فكرة اخرى: بالنسبة للعقل وتعارضه مع الدين ... انا بشوف انو العلم كفيل بتفسير ظواهر الحياة . لكن الجانب الروحاني من حياة الانسان وهو العلاقة مع الخالق بحس انها ليست بحاجة كثيراً لدخول العلم في تفسيرها... ظواهر تحس بالمشاعر بالمناجاة ... هذه الظواهر الخفية التي تعطي الراحة لا تحتاج لتفسيرات كثيرة لكني بالنهاية ارفض ان تكون منطلق ومحور نقاشنا وحياتنا فهي علاقة خاصة يعيشها الافراد لا يجب ان تعمم ولا يجب ان تدرس. يعني لحاول وصل بطريقة افضل: كل انسان بيقدر بطريقتو الخاصة يتواصل مع خالقو . بشوف انو في ناس بتصلي او بتروح كنايس وبتمارس الطقوس بطريقة روتينية وما بتحصل على راحة نفسية . بالمقابل في ناس بتحس اكتر وبتندمج اكتر .. بس ما بدي ندرس الناس طريقة التواصل يعني ما منقول للتاني لازم تتواصل صح وهيك بيصير وهيك ما بيصير . من هالكلام بستفيد لقول خلي نقاشاتنا مع بعض علمانية بحتة .. متل ما حكيتلك بتفسير ظاهرة شفاء احد معارفك على قاعدة الـ placebo .. لأنوالروحانيات يجب ان تكون ضمن علاقة خاصة ومحدودة بين الشخص وما يؤمن به وليس ظاهرة منتشرة بين الناس.... بتمنى توصلك فكرتي.. طولت كتير سوري ...:D |
اقتباس:
وكيف طلع معك هالاستنتاج !!!!! :lol: |
اقتباس:
أحلى شي أنو دائما بيرسم بسمة على وجوه الكل :lol: |
LI RAJ3A MAWDO3 MOUCHAWEK
|
| الساعة بإيدك هلق يا سيدي 21:58 (بحسب عمك غرينتش الكبير +3) |
Powered by vBulletin® Copyright ©2000 - 2025, Jelsoft Enterprises Ltd.
ما بخفيك.. في قسم لا بأس به من الحقوق محفوظة، بس كمان من شان الحق والباطل في جزء مالنا علاقة فيه ولا محفوظ ولا من يحزنون